Umoya UJehova Awubusisayo

“INKOSI mayibe-nomoya wakho. Umusa mawubenani.” Ngalamazwi, uPawulu waphetha incwadi yakhe yesibili eyayiya kuThimothewu. (2 Thimothewu 4:22) Yeka injabulo lamazwi okutuswa okumelwe ukuba ayinikeza uThimothewu nalabo ababenaye—ukwazi ukuthi babebonisa umoya uJehova awubusisayo!

Kodwa uyini ngempela umoya uJehova awubusisayo? Babonakala kanjani ngempela labo abanalomoya? Futhi thina singawubonisa kanjani lomoya futhi sithole isibusiso sikaJehova?

Ukuze sisize ekuphenduleni lemibuzo, ake sibuyele emuva esikhathini sikaMose. AmaIsrayeli asehlane. UJehova usanda kuphetha isivumelwano soMthetho nawo, futhi manje uwayala ngendlela okumelwe amkhulekele ngayo. Lokhu kuhlanganisa ukwakha itende lokuhlangana eliphathekayo elizodinga igolide eliningi, izinto eziyigugu, nabantu abanekhono ukuze lakhiwe. Ithuba lokunikela ngezipho ngokuzithandela ukuze kulungiselelwe izinto ezidingekayo nezisebenzi lilethwa esizweni ngalamazwi: “Bonke abanenhliziyo ethandayo mabawulethe, ube-ngumnikelo kaJehova: igolide, nesiliva, nethusi, nokuluhlaza nokububende . . . Bonke abahlakaniphile ngenhliziyo mabeze, bakwenze konke uJehova akuyalileyo: itabernakele, netende lalo, nesifulelo salo.”—Eksodusi 35:5-19.

Isizwe sasabela kanjani kulelithuba? Ingxenye esele yesahluko 35 isitshela ukuthi labo ‘abavuswa umoya wabo’ ‘nabaqhutshwa yinhliziyo yabo’ banikela futhi bazimisela ukusebenza ngenkuthalo eyayibonisa ukuthi babelazisa lelithuba elalibekwe phambi kwabo. (Amavesi 21, 22, 26) Ukusabela kwabo kwakukukhulu kangangokuthi isahluko 36, ivesi 6, lisitshela ukuthi “uMose wayeseyala, kwamenyezelwa ekamu, kwathiwa: Makungabe kusasetshenzwa ngowesilisa nangowesifazane omunye umsebenzi womnikelo wendlu engcwele. Base bevinjelwa abantu ukuletha.” Yebo, kwadingeka ukuba bavinjelwe! UJehova wayengazange asebenzise amacebo okucindezela lapho eyala ukuba kwenziwe isimemezelo: “Bonke abanenhliziyo ethandayo . . . ” Umphumela waba ukuthi isizwe sabonisa umoya wokuzithandela, futhi lokhu kwaletha izibusiso ngohlobo lwenjabulo enkulu, kanye nesivikelo nesiqondiso sIkaJehova kukho konke abakwenza.

Eminyakeni eminingi kamuva, kwaphinde kwaboniswa umoya ofanayo. Lokhu kwenzeka lapho iNkosi uHezekiya isebenza ukuze ibuyisele ukukhulekela okuhlanzekile kwaIsrayeli. Ukulandisa kusitshela ukuthi, lapho linikezwa ithuba, “ibandla laletha imihlatshelo neminikelo yokubonga, nabo bonke abaqhutshwa yinhliziyo evumayo baletha iminikelo yokushiswa.” Waba yini umphumela? “UHezekiya wathokoza kanye nabantu bonke ngenxa yalokho uNkulunkulu ayebalungisele khona abantu, ngokuba leyonto yavela ingalindelwanga.”—2 IziKronike 29:31-36.

AmaKristu Abonisa Umoya Ofanele

Ingabe siyawubona umoya ofanayo wokuzidela ngokuzithandela ezikhathini zobuKristu? Phawula lokho uPawulu akuloba ngamaKristu aseFilipi kwabaseFilipi 1:3-5: “Ngiyambonga uNkulunkulu wami ekunikhumbuleni kwami konke ngezikhathi zonke ekunxuseni kwami konke ngani nonke, nginxusa ngokuthokoza, ngenxa yokuhlanganyela kwenu evangelini, kusukela osukwini lokuqala kuze kubemanje.” Kungaziphi izindlela amaKristu aseFilipi ayevelele ‘ekuhlanganyeleni kwawo evangelini?’ Amavesi alandelayo akwenza kube sobala ukuthi akukhona nje kuphela ukuthi ayevumelanisa ngokuzithandela indlela yawo yokuphila nezimiso zeBhayibheli ukuze aqhube izindaba ezinhle kodwa futhi ayeshiseka ekushumayeleni kwawo nasekufundiseni izindaba ezinhle kwabanye.

Ukuthi wonke amaKristu kumelwe ahlanganyele ngokuzithandela emsebenzini wokushumayela ngalezindlela kugcizelelwa kumaHeberu 13:15: “Masinikele njalonjalo kuNkulunkulu ngaye umhlatshelo wokubonga, okungukuthi isithelo sezindebe ezivuma igama lakhe.” Ngakho ukushumayela izindaba ezinhle komKristu ngamunye kuyindlela eyisihluthulelo esingabonisa ngayo umoya wokuzithandela ophawula abakhulekeli beqiniso bakaJehova namuhla. Ngaphezu kwalokho, amaKristu akhunjuzwa ukuba angalokothi ‘akhohlwe ukwenza okuhle nokuphana, ngokuba iminikelo enjalo uNkulunkulu uthokoziswa yiyo.’—Heberu 13:16.

Abazalwane baseFilipi babonisa lomoya wokuzithandela nange nye indlela. Esahlukweni 4 uPawulu ubala izimo eziningana abamsiza kuzo ngendlela engokwezimali, ngaleyondlela ukushumayela izindaba ezinhle kwaqhutshwa. (Filipi 4:14-17) Ngalokho balingisa isibonelo esihle salabo bakhulekeli bokuqala bakaJehova. Ngokusobala badumisa “uJehova ngempahla [yabo].” (IzAga 3:9) Ingabe sibonisa umoya ofanayo lapho amathuba afanayo ebekwa phambi kwethu?

Umoya Omuhle Usobala Namuhla

IHubo 110 libonisa ukuthi kwakuzoba nabaningi ababonisa lomoya omuhle ofanayo wokuzidela ngokuzithandela ezinsukwini zokugcina zalesimiso samanje lapho iningi labantu linesithakazelo kuphela “kimina.” Evesini 3 sitshelwa ukuthi, ngemva kokuba uMesiya ethathe ukubusa eMbusweni ngo-1914, abantu bakaNkulunkulu ‘babeyozinikela ngenjabulo’ nokuthi labo abenza kanjalo babeyoba baningi “njengamazolo.” Ingabe lokhu kuye kwaba njalo?

NgoApril 1 881 iThe Watchtower yanyathelisa isicelo sokuba abashumayeli abayi-1 000 bangenele umsebenzi wokushumayela wesikhathi esigcwele. Umagazini kaMay 1881 wagcizelela ukuthi labo abahlanganyela kulomsebenzi kumelwe kube yilabo abayobe “besebenzela umvuzo wasezulwini.” Phakathi neminyaka emine, abangaphezu kwama-300 base besabele—okuyisibalo esivelele ngokucabangela isibalo esincane samaKristu azinikezela ayezihlanganise neWatch Tower Society ngalesosikhathi.

Lomoya ofanayo uyaqhubeka uba sobala namuhla. Ngokwesibonelo, ngo-1986 kwakunamaphayona (izikhonzi zesikhathi esigcwele) ayizi-391 294 ayebika, ngokwesilinganiso, inyanga ngayinye. Lokho kwakuwukwanda ngamaphesenti angama-21,2 noma abayizi-68 473 ngaphezu kwabangonyaka owandulelayo! Nokho, lomoya wokuzithandela awulinganiselwe kulabo abakwazi ukusebenzisa sonke isikhathi sabo emsebenzini wokushumayela.a

Abaningi abaneminye imithwalo yemfanelo engokomBhalo—njengokunakekela umkhaya, abazali abakhubazekile noma abagugile—nalabo abanempilo engabavumeli ukuba bahlanganyele enkonzweni yobuKristu yesikhathi esigcwele nabo babonisa lomoya ofanayo wokuzidela ngokuzithandela othokozisa kakhulu kuJehova. Lokhu kuba sobala lapho umuntu eqaphela ukuthi umsebenzi omkhulu woku shumayela ngoMbuso emazweni amaningi eqinisweni wenziwa yizikhonzi okudingeka ukuba zisebenzise ingxenye enkulu yesikhathi sazo zisebenza emsebenzini wokuziphilisa noma zinakekela izibopho zomkhaya noma eminye imithwalo yemfanelo engokomBhalo. Ngempela ukubonakaliswa okutusekayo komoya uJehova awubusisayo.

Ukubonakalisa Umoya Omuhle Kwezinye Izici Zokuphila

Njengasosukwini lukaMose nolukaHezekiya, amathuba okubonisa umoya wokuzithandela ayaziveza namuhla lapho amabandla akha iHholo LoMbuso noma ezinye izakhiwo ezifanayo. Ingabe umoya ofanayo usobala ezimweni ezinjalo? Yebo, ngempela kunjalo!

Lokhu kuye kwaba sobala ngokukhethekile endleleni yamuva yokwakhiwa kwamaHholo oMbuso ngokuvamile ebizwa ngokuthi ukwakhiwa kwamaHholo oMbuso ngokushesha. Amakhulu amaningi oFakazi ayaqoqana futhi asebenze kusukela ngoMgqibelo entathakusa kuze kube ngeSonto ebusuku—abanye basebenze ubusuku bonke—ukuze bafeze lokho amaphephandaba aye akubiza ngokuthi “isimangaliso sangempela-sonto.” Lapho kwakuwudonga lukakhonkolo kuphela olwalukhona ngoLwesihlanu, iHholo LoMbuso eliphelile lisetshenziselwa umhlangano ngeSonto ebusuku!b

Amathuba amakhulu ngisho nangokwengeziwe okubonisa umoya wokuzithandela ayavela lapho kwakhiwa izakhiwo zamagatsha emazweni ahlukahlukene. Ubungako bomsebenzi wokuzithandela ngokuphelele onikelwa emsebenzini owenziwayo kulezakhiwo ezihlukahlukene wenza umuntu acabange. Yebo, ngaphezu kokunikela ngomsebenzi kuneminikelo engokwezimali eyenza kube nokwenzeka ukuthenga izinto ezidingekile. Ngokuvamile, oFakazi banikela ngokuzithandela izinto ezidingekayo ezinciphisa kakhulu izindleko zokwakha.

Isibonelo salokhu senzeka phakathi nokwakhiwa kwegatsha elisha eSydney, eAustralia. Lapho, abazalwane abahlala enyakatho ekude yeQueensland balungiselela futhi bathumela esakhiweni amapulangwe ayegcwele amaloli amane anenani elilinganiselwa ezi-R120 000 kuya ezi-R140 000! Phakathi nesikhathi sokwakhiwa kwegatsha, oFakazi babefika ngamabhasi bevela ezindaweni ezikude njengeNtshonalanga Australia, eqhele ngamakhilomitha ayizi-4 000, ukuze bazokwenza umsebenzi wokuzithandela izimpelasonto ezine ngesikhathi ngasinye. Ochwepheshe abaningana basebenza ngokuzithandela esakhiweni izinyanga eziningi futhi abanye baze basebenza ngisho nonyaka noma ngaphezulu. Ngempela lokhu kwakuwukubonakaliswa komoya ofanayo nalowo uJehova aye wawubusisa kakhulu kangaka kuwo wonke amakhulu eminyaka adlule futhi lokho namuhla ngokuvamile kuyaphindwa kwamanye amazwe.

Amathuba engeziwe okubonisa umoya wokuzithandela ayaziveza lapho oFakazi behlangene emihlanganweni yesifunda neyesigodi. Umhlangano ngamunye onjalo udinga izisebenzi zokuzithandela eziningi, ngokuvamile kusasele izinyanga eziningi ngaphambi kwesenzakalo, ukuze kuqinisekwe ngokuthi konke kuyohamba ngokushelelayo futhi kuhleleke kahle. Futhi lapho usuqalile, ngezinye izikhathi oyedwa koFakazi abane abakhona bayosiza ngokuzithandela ekwenzeni imisebenzi eminingi edingekile eyenza kube nomhlangano ojabulisayo nophumelelayo. Umsebenzi ungase uhilele ukuphaka ukudla noma ukuhlanza. Kungase kube umsebenzi ongaqashelwa yiningi lalabo abakhona. Kodwa akwenzeki uJehova angawuqapheli! UyabaVUza labo abazinikela ngenjabulo ekwenzeni lokho okudingekayo. Ingabe uyawuvuna futhi umvuzo otholakala lapho amaKristu ‘ekhonzana ngothando’ ngokusebenza ngokuzithandela ngezikhathi zemihlangano? Ingabe niye nakucabangela ukwenza kanjalo njengomkhaya?—Galathiya 5:13.

Nakuba lezici ezikhethekile zisinikeza amathuba amahle okuzinikela ngalomoya wokuzithandela, kunamanye amathuba amaningi okubonisa umoya ofanayo usuku ngalunye nesonto ngalinye. Ngokwesibonelo, lapho iHholo LoMbuso selakhiwe, ingabe uhlanganyela ngokugcwele ekulihlanzeni nasekuligcineni libukeka? Ingabe uyakusekela ukusebenza kwalo ngokunikela ngokwezimali njengoba uJehova ekubusisa ngezinto ezibonakalayo? Ingabe uyawusekela umsebenzi wokushumayela ezweni lakini ngokunikela ehhovisi legatsha lakini? Futhi okubaluleke ngisho nangokwengeziwe, ingabe uhlanganyela njalo emsebenzini wokushumayela izindaba ezinhle nokwenza abafundi endaweni yakini? Eqinisweni akukho lutho oluyoke luthathe indawo yokuhlanganyela kwethu ngokomuntu siqu kulomsebenzi uJesu awubala njengomsebenzi obaluleke kakhulu okumelwe wenziwe esikhathini samanje, ngaphambi kokuphela kwalesimiso.—Mathewu 24:14; 28:19, 20; IzEnzo 1:8.

Bonke labo abahlakulela lomoya uJehova awubusisa ngokucebe kangaka baye bakuthola kuyiqiniso ukuthi uJehova “kasiye ongalungile ukuba akhohlwe umsebenzi wenu nothando enalubonakalisa ngakulo igama lakhe.” Nawe futhi, ngokubonakalisa lomoya wokuzidela ngokuzithandela, ungakufakazela ukuthi “isibusiso sikaJehova siyacebisa; akenezeli usizi kuso.”—Heberu 6:10; IzAga 10:22.

[Imibhalo yaphansi]