IPanama Iyajabula Ngomsebenzi Wayo Wokwakha
IMISEBENZI yokwakha ayimisha ePanama. Ekuqaleni kwalelikhulu leminyaka, kwaqalwa umsebenzi emseleni omkhulu onqamula phakathi nalelizwe elihlanganisa ezinye izingxenye elingumngcingo, elihlanganisa ulwandlekazi iAtlantic nePacific. Lesisakhiwo esikhulu sanikeza iPanama encane igama elithi “umahlukana-ndlela womhlaba.”
NgoJanuary 18, 1986, umsebenzi wokwakha wolunye uhlobo wafinyelela umvuthwandaba wawo. Ngalolosuku oFakazi BakaJehova baba nesimiso sokunikezelwa kwezakhiwo zehhovisi legatsha ezisanda kwakhiwa. Nakuba kungabangama-211 kuphela ababa khona mathupha esimisweni sokunikezelwa, izinkulungwane ezengeziwe zalalela ngezingcingo ezixhunyiwe. Isakhiwo esisha sinendawo yokuhlala amalungu egatsha, izithunywa zevangeli, nendawo yokunyathelisa.
Nokho, ukwakhiwa kwalezizakhiwo kuyingxenye yesimiso sokwakha esingokomoya ebesiqhubeka ePanama kusukela ekupheleni kwekhulu le-19leminyaka. Izimbewu zeqiniso loMbuso zahlwanyelwa lapho ngalesosikhathi. Ngonyaka ka-1957, kwakunabamemezeli abayinkulungwane noma ngaphezulu ‘bezindaba ezinhle’ ePanama. (Mathewu 24:14) Ihhovisi legatsha elincane nekhaya lezithunywa zevangeli elakhiwa ngalowonyaka lalanele. Kodwa eminyakeni engama-20 inani loFakazi lase liphindwe kathathu! Ngakho-ke ngoSeptember 1982 iNdikimba Ebusayo yoFakazi BakaJehova yavumela ukwakhiwa kwehhovisi legatsha elisha.
Kuphi? Endaweni enhle ebheke ichibikazi engaphandle kweDolobha lasePanama cishe ngamakhilomitha angama-20.
Inselele Yokwakha
Kodwa ubani owayeyoklama isakhiwo? Sasiyokwakhiwa kanjani futhi ubani? Bekhumbula amazwi eHubo 127:1, abazalwane baqhubekela phambili, bazi ukuthi uJehova wayeyobasiza ukuba banqobe lezinkinga ezazibonakala zingenakunqobeka.
Kwenziwa umdwebo wamapulani angaqinisekisiwe, obonisa ubukhulu bendawo edingekayo yehhovisi, umtapo wezincwadi, indawo yokugcina izincwadi, indawo encane yokunyathelisa, nendawo yokuhlala amalungu omkhaya. Kwahlanganiswa neHholo LoMbuso elikhulu. Abadwebi bamapulani basendlunkulu yeWatch Tower Society eBrookIyn, eNew York, babe sebeklama isakhiwo esiyohlangabezana nalezidingo.
Ngokulandelayo kwaphakama inselele yokwakha. Amakhulu oFakazi bendawo azinikela ngokuzithandela. Abazalwane eUnited States nabo banikela ngamakhono nangezinkonzo zabo. Phakathi nesikhathi samasonto ayisithupha, kwase kufike ingqikithi yabasizi abangama-230, kuhlanganise nabanye abavela emazweni ase Melika ePhakathi.
Abazalwane bendawo bakujabulela ukuvula amakhaya. Omunye umkhaya waze wathuthela etendeni okwesikhashana ukuze uhIalise izisebenzi zokuzithandela eziyi-11. Abanye ababenamabhasi amancane okuthutha abantwana besikole basiza ekuthutheni lezisebenzi. Nokho abanye bahlanganyela ekupheni abayizi-30 000 ukudla kwamahhala okwakunikezwa khona, kanye esakhiweni. Iziphuzo eziqabulayo ezenziwe ngopayinapu, amawolintshi, upapaya, nangomango, nobisi lukakhukhunathi, zazinikezwa njalo ukuze ziqede ukoma kwalabo ababesebenza kanzima ngaphansi kwelanga lezwe elishisa kakhulu.
Akuwona UMbhoshongo WaseBabele
Umsebenzi waqhubeka ngokushesha. Phakathi namasonto amabili zonke izindonga zase ziphakanyiswe zaze zafinyelela esitezi sesibili, eminye imishayo yensimbi yayisisendaweni yayo, futhi indawo yeHholo LoMbuso esesitezi sesibili yathelwa ukhonkolo. Umsebenzi wamapayipi nokagesi waqhubeka kanye kanye nowokubeka isitini, ukupulasitela, nokufakwa kwamafasitela neminyango. Esikhathini esi ngaphansi kwenyanga kwafakwa uphahla, futhi lwaqedwa ngesikhathi esifanele ukuze lunikeze isivikelo ezimvuleni ezinkulu—ezazingajwayelekile ngalesikhathi sonyaka.
Kwakunezinkinga ezithile. Ngezinye izikhathi, kwakuba nezisebenzi zokuzithandela ezifinyeiela ama-800, futhi ikhono elikhulu lokuhlela lalidingekile ukuze Iibagcine bematasa. Ngokungaphezulu, abazalwane abaningi ababevakashile babengasazi iSipanishi. Kunokuba lokhu kubangele umsebenzi wesakhiwo ukuba ume, njengaseMbhoshongweni waseBabele owaziwayo, abazalwane babonakalisa izithelo zomoya—futhi basizwa ngabahumushi abathile.—Galathiya 5:22, 23.
Phakathi nomsebenzi wokwakha, kwakugcizelelwa izindaba ezingokomoya. Imihlangano yebandla evamile yayiqhutshwelwa esakhiweni, futhi kwakubekelwa eceleni isikhathi sokuhlanganyela enkonzweni yasensimini. Kwakunezikhathi futhi zokuzilibazisa, ukubuka izindawo, nemibuthano yokuzijabulisa. Kodwa ngokuyinhloko abazalwane babezele ukuzosebenza, futhi izakhiwo zasheshe zaqedwa!
Enkulumweni yakhe yokunikezela, uJohn Booth weNdikimba Ebusayo waphetha kahle inkulumo, ethi: “Yini ezovela kuso sonke lesisakhiwoebesisakha? Phela, sakhela ikusasa eliphakade. Akukhona ukuthi isakhiwo siyohlala phakade, kodwa umphumela walesakhiwo nomsebenzi wabazalwane kulo lonke izwe nakuwo wonke umhlaba kuyoba ngabantu abayophila phakade.” Akumangalisi ukuthi oFakazi ePanama bayawujabulela umsebenzi wokwakha owanda njalo!
[Ibalazwe ekhasini 22]
(Ukuze ubone ukuthi indaba ihlelwe kanjani, bheka encwadini)
Panama
Panama City