Kuzovulwa Isikole Esisha!

Lesihloko siqukethe amaphuzu avelele ezinkulumo zokuphetha zikamphathi-sihlalo ekuthwesweni kweziqu kwekilasi lama-82 laseGileyadi.

KUSUKELA ekuqaleni kwaso ngoFebruary 1943, iWatchtower Bible School of Gilead isiqeqeshe izikhonzi ezizinikezele ezingoFakazi BakaJehova eziyizi-6 000, iziqeqeshela umsebenzi wobuvangeli. Phakathi neminyaka engaphezu kwengama-40 lezithunywa zevangeli zithunywa, kuye kwafinyelelwa amazwe amaningi ukuze athole ubufakazi obugcwele ngokuphathelene noMbuso. Lapho bebheka emuva kulokho uJehova akufezile, ngokuqinisekile abantu bakaNkulunkulu bayajabula ukubona ukugcwaliseka kwesiprofetho esiphawulekayo.

KuIsaya isahluko 49, amavesi 9-12, umprofethi wabikezela ngokukhululwa kwabantu abathanda ukulunga ababanjwe ‘eBabiloni Elikhulu’ njengeziboshwa zenkolo. Ngesigaba sakhe senceku egcotshiwe emhlabeni, isiyalezo sikaJehova siye saphuma: “Uthi kwababoshiweyo: Phumani, nakwabasebumnyameni: Vukani. Bayakuklaba ngasendleleni . . . Abayikulamba, abayikoma, abayikushaywa isifudumezi nelanga, ngokuba yena onomusa kubo uyakubahola, abayise emithonjeni yamanzi . . . Bheka laba bayakuvela kude. ” Ingabe kube khona ukusabela? Yebo kube khona! Abantu abanhliziyo ziqotho baye beza ngamakhulu ezinkulungwane, bevela kuzo zonke izindawo, bezibonakalisa belambele iqiniso, befi-sa ukondliwa nokukhanyiselwa yiZwi likaNkulunkulu, befuna ukukhululwa ngokomoya ‘eBabiloni Elikhulu.’ (IsAmbulo 17:5) Manje basendaweni yasemhlabeni yenhlangano yakhe yoMbuso bazondla ngenala yokudla okungokomoya.

Ukwanda Okuvelele

Phakathi nawo-1940, amazwe aseLatin America nendawo yaseCaribbean ayephakathi kwamazwe okuqala azuza ngezithunywa zevangeli ezivela eGileyadi. Kwakukhona abamemezeli abambalwa kakhulu kulezindawo, okwabeka inselele yangempela ekunikezweni kobufakazi obugcwele boMbuso. Ngokwesibonelo, iPuerto Rico yayinabamemezeli abangama-25 kuphela ngo-1944. ICosta Rica yayinabayi-181. IMexico yayinabamemezeli abayizi-2 431 ngo-1944 lapho kufika abokuqala abathweswa iziqu eGileyadi. Kodwa njengoba abantu abalambele iqiniso babephuma ebumnyameni obungokwenkolo futhi bezibonakalisa bengabafuna uMbuso kaNkulunkulu, bashumayela ngentshiseko, abanye babhalisela inkonzo yobuphayona. Amadoda afinyelela umthwalo wemfanelo. Imiphumela? Namuhla, iPuerto Rico iye yabika izikhonzi ezikhuthele eziyizi-21 943, inani eliphinda kane elababekhuthele emazweni ayi-12 ayebika endaweni yaseCaribbean ngo-1947. ICosta Rica manje isinabamemezeli abangaphezu kwalabo ababekhona kulo lonke elaseMelika ePhakathi eminyakeni engama-40 edlule. NgoJanuary walowonyaka, iMexico ibike inani elisha eliphakeme labamemezeli abayizi-206 000, okucishe kulingane nabamemezeli ababeshumayela emhlabeni wonke eminyakeni engama-40 edlule.

ENingizimu-Melika kuye kwaba okufanayo. Lapho izithunywa zevangeli ziqala ukuthunyelwa eArgentina ngo-1947, kwakunabamemezeli abangama-790. Namuhla kunezikhonzi ezikhuthele eziyizi-63 613, inani eliphinda izikhathi ezingama-26 isibalo sababeshumayela emazweni ayi-12 ahlukahlukene eNingizimuMelika eminyakeni engama-40 edlule. Kuthiwani ngeBrazil? Lapho izithunywa zevangeli zokuqala zithunyelwa khona ngo-1945, babengama-394 kuphela abamemezeli ababeqhuba umsebenzi wokufakaza. Kodwa babekezela, futhi manje iBrazil isidlule inani labamemezeli eliyizi-200 000. Lokho kungaphezu kokuphinda izikhathi ezingama-80 isibalo sababekhuthele kulo lonke elaseNingizimu-Melika ngo-1947. Amanye amazwe kulelozwekazi aye abika ukwanda okuvelele.

Lapho siphendukela eMpumalanga Ekude, siphinda futhi sibone ubufakazi obumangalisayo besibusiso sikaJehova njengoba isigijimi esikhulayo seqiniso loMbuso sasiza abayizinkulungwane ukuba baphume ebumnyameni. Lapho izithunywa zevangeli zokuqala zabelwa ukuya eJapane ngo-1949, kwakubika abamemezeli abayi-8 kuphela. Emazweni ayi-8 aseAsia ayebika umsebenzi eminyakeni engama-40 edlule, kwakunengqikithi yezikhonzi ezikhuthele ezingama-475. Namuhla, kukhona eziyizi-116 272 eJapane kuphela.

ENingizimu Pacific kwakunamagatsha amabili kuphela kwaze kwaba u-1959. Ngosizo lwabamemezeli baseAustralia abathutha ukuze bakhonze lapho indingeko inkulu khona, nangemizamo yabanye abamemezeli basemabandleni nezithunywa zevangeli ezimbalwa, izinkulungwane zabantu ziye zafinyelelwa ngezindaba ezinhle ezindaweni ezihlukahlukene eziseziqhingini. Manje sekunamagatsha ayisithupha engeziwe kuleyongxenye yensimu.

Umlando wokukhula kweAfrika nawo ungojabulisayo. Amazwe ayi-17 ayebika ngo-1947 ayenengqikithi yabamemezeli abayizi-24 896. Kodwa ngenxa yokusiza kwezithunywa zevangeli ukusakaza izindaba ezinhle ngokushesha, amakhulu ezinkulungwane masinyane azibonakalisa efuna uJehova nokulunga kwakhe. Namuhla, eNigeria kuphela, oFakazi abathi ababe yizi-130 000 bamemezela isigijimi soMbuso ngentshiseko.

Akukho kungabaza ngokuthi iZwi likaJehova elikhulayo leqiniso lifeza lokho athokoza ngakho. Liphumelela ngokuqinisekile kulokho alithumele kukho. (Isaya 55:10, 11) Manje njengoba kuqoqwa isivuno esikhulu kangaka, lona leliZwi liyasiqinisekisa ukuthi uJehova uzoveza abelusi abaqeqeshiwe abengeziwe. (Qhathisa noJeremiya 23:4.) INdikimba Ebusayo iyasiqaphela isidingo esikhulayo samadoda afanelekayo ukuba anakekele imithwalo yemfanelo ensimini nasemagatsheni ahlukahlukene eNhlangano. Kuye kwathathwa izinyathelo ukuba kuhlangatshezwane nalesidingo.

ISikole Sokuqeqeshelwa Inkonzo

Nina enithweswe iziqu ekilasini lama-82 laseGileyadi, nabo bonke abebekhona kulomkhosi owakhayo, nizojabula ukwazi ukuthi kuzovulwa isikole esisha ngasekupheleni kuka-1987. LeSikole Sokuqeqeshelwa Inkonzo, njengoba sizobizwa kanjalo, sizoba yingxenye yeWatchtower Bible School of Gilead, ngaleyondlela senze ukuba abazalwane bakwamanye amazwe babe khona kuso. Kulindeleke ukuba ikilasi lokuqala liqale ngo-October 1 walonyaka edolobheni lasePittsburgh, ePennsylvania, U.S.A., indawo yokuqala eyinhloko yeNhlangano ekuqaleni kwayo. Emva kokuphela kwekilasi lokuqala, amanye amakHasi ayoqhutshwa ngezikhathi ezithile ezingxenyeni ezihlukahlukene zeUnited States.

Labo abayobhaliswa kumelwe bahlangabezane nezimfuneko ezimisiwe ezingokomBhalo. Abayoqeqeshwa kuqala kuyoba abadala abangashadile nezinceku ezikhonzayo ezingashadile, eziphila kahle. Uma abanye bengamaphayona, kuyoba kuhle kakhulu. Labo abamenyelwe esikoleni kumelwe bakulungele ukukhonza noma kuphi lapho kunendingeko enkulu khona ensimini yomhlaba wonke ngemva kokuqeqeshwa kwabo. Lokhu kuyodinga umoya kaIsaya, owazinikela ngokuzithandela, ethi: “Bheka, nangu mina; ngithume mina.” (Isaya 6:8) Nina enithweswe iziqu kulelikilasi lama-82, kanye nezithunywa zevangeli kakade esezikhonza emazweni angaphezu kwekhulu, ningabheka phambili ngesikhathi esifanele ekubeni nabanye abazalwane abaqeqeshiwe abasebenza kanye nani.

ISikole Sokuqeqeshelwa Inkonzo siye salungiselelwa uhlelo lwezifundo olusha ngokuphelele. Lesikole siye sasungulwa ngenjongo yokuqeqesha abazalwane abafanelekayo abanokuhlangenwe nakho okuthile enhlanganweni njengabadala noma izinceku ezikhonzayo ebandleni.

Isidingo Sokuthuthuka

Emva kosuku lomkhosi wePentekoste ngo-33 C.E., ibandla lobuKristu lalikhuthele kakhulu ekusakazeni izindaba ezinhle eJerusalema, kulo lonke elaseJudiya naseSamariya, futhi kamuva, ezingxenyeni ezikude zomhlaba. (IzEnzo 1:8) Cishe ngonyaka ka-60 C.E. umphostoli uPawulu, wayehola emsebenzini wobuvangeli phakathi kwabezizwe, wabhalela abaseKolose ethi: “[Ithemba] enezwa ngalo ngaphambili ngezwi leqinilevangeli elifikile kini, njengalokhu likhona ezweni lonke lithela izithelo, landa.” Wabuye wanezela ngokuthi labo abakholwayo ‘akumelwe bagudluzwe ethembeni levangeli abalizwayo, elashunyayelwa kukho konke okudaliweyo okuphansi kwezulu.’—Kolose 1:5, 6, 23.

Ngesikhathi esifushane, amaKristu akuqala ayesesakaze izindaba ezinhle kabanzi. UJehova wayenikeze ukwanda, isibalo sabafundi sanda kakhulu. Lokhu kwadinga amadoda engeziwe afanelekayo ukuba afundise ebandleni futhi eluse umhlambi. Omunye wababonisi abasebasha owayenikezwe umthwalo wemfanelo onjalo kwakunguThimothewu. Yini umphostoli uPawulu ayala ukuba uThimothewu ayenze? Kwakungafanele kube khona ukuyekelela ekuqeqesheni kwakhe: “Nxa ubeka lezozinto kubazalwane uyakuba-yisikhonzi esihle sikaKristu Jesu, wondliwa ngamazwi okukholwa nesifundiso esihle osilandelayo . . . Kepha zijwayeze ekumesabeni uNkulunkulu.” (1 Thimothewu 4:6-8) Lokhu kwakuyoba okubaluleke ngaphezu kokunaka izithakazelo zomuntu siqu, kuhlanganise ngisho nokulolonga umzimba. Ukuze afeze inkonzo yakhe ngokugcwele, uThimothewu kwakufanele azinakekele yena nesifundiso sakhe.

Nina enithweswe iziqu kulelikilasi la.seGileyadi niye namukela ukuqeqeshelwa umsebenzi wenu wezithunywa zevangeli. Izipho ezinhle ezingokomoya ziye zadluliselwa kini ababonisi abakufanelekelayo ukufundisa. Manje kukhona olunye uhlelo oluhle lokufundiswa kwamadoda afanelekayo anokuhlangenwe nakho ekunakekeleni umthwalo wemfanelo webandla. Azoqeqeshwa ngombono wokuzinikela kuNkulunkulu, okuyowasiza ukuba alondoloze umbono oqondile futhi kuwahlomisele ukubheka kulokho umphostoli uPawulu aqhubeka wakubhalela uThimothewu: “Makungabikho-muntu odelela ubusha bakho, kepha yiba yisibonelo kwabakholwayo ngezwi, nangenkambo, nangothando, nangokukholwa, nangokuhlanzeka. Nakekela ukufunda, nokuyala, nokufundisa. Nakekela lezozinto, ume kuzo, ukuze ukuqhubeka kwakho kuqhame kubo bonke.”—1 Thimothewu 4:12, 13, 15.

Njengasendabeni kaThimothewu, labobazalwane abamiselwe imithwalo yemfanelo yebandla namuhla, kuhlanganise namadoda asemasha, kufanele baqaphele ukuthi lesi yisikhathi esifanele nesiphuthumayo ngabo ukuba benze ukuqhubeka kwabo kuqhame. Ngokwenza kanjalo, bayonikeza ngobuqotho ubufakazi bokuthi baphila ngokwezindinganiso zaphezulu nobokuba nothando lweqiniso lokunakekela izithakazelo ezingokomoya, ngaleyondlela bafanelekele amalungelo enkonzo engeziwe.—Filipi 2:20, 21.

Ngokucabangela isidingo esikhona kulelizinga ekufezekeni kwenjongo yaphezulu, kuyilungelo ukusetshenziswa uJehova noma kuphi enhlanganweni yakhe. Yeka ukuthi sibonga kanjani kuye njengoMalusi wethu oMkhulu nakuMalusi Omuhle, uJesu Kristu, ngalelilungiselelo leNhlangano elisha, elifike ngesikhathi, iSikole Sokuqeqeshelwa Inkonzo!