Ingabe Unengqondo Efuna Ukwazi

ISIFISO esinamandla sokufuna ukwazi senza umuntu ukuba ashisekele ukufunda, azi okuthile ngezinto. UJehova wafaka lentshiseko kithi, ukuze kuthi cishe ngesikhathi esizalwa ngaso sishukunyiselwe ekuhloleni izwe elisizungezile. Khona kanye ukuba khona kwethu kuyinqubo yokufunda engapheli. Uma sizoba abantu abadala abavuthiwe, abajwayelana nezimo, kudingeka senelise isifiso sethu sokufuna ukwazi, isifiso sokwazi ngezinto.

Lokhu kuyiqiniso ngokukhethekile ngesici esingokomoya. Amathemba ethu okuphila okuphakade axhomeke ekufundeni kwethu ngoJehova uNkulunkulu. (Johane 17:3) IBhayibheli lisitshela ukuthi ufuna ukuba sazi ngaye, ‘simfune, simfumane.’ (IzEnzo 17:23, 24, 27) Uma sivimbela isifiso sethu sokufuna ukwazi noma sehluleka ukusivumela ukuba sikhule, intuthuko yethu iyohamba kancane kakhulu. Eqinisweni, ukuntula isithakazelo ezintweni ezingokomoya kungase kubulale.—IHubo 119:33, 34; Hoseya 4:6.

Ngokufanelekile, isidingo sokuyala nokufunda sasigcizelelwa njalo kubantu bakaJehova bezikhathi zasendulo ukuze kwaneliswe isifiso esifanelekile sokufunda. (Duteronomi 6:6, 7; 31:12; 2 IziKronike 17:9) UJesu uMesiya wayengumfundisi omkhulu owake waba semhlabeni. (Mathewu 9:35) Abafundi bakhe balandela isibonelo sakhe. Ngisho nalapho bebhekene nokuphikiswa, “abayekanga ukufundisa nokushumayela ivangeli.” (IzEnzo 5:42) Ukufundisa okunjalo kwavusa isithakazelo ezingqondweni ezazifuna ukwazi. Abaningi babefana nabaseBereya, abasabela ‘ngentshiseko enkulu yengqondo, bahlolisisa imibhalo imihla ngemihla ukuba zinjalo yini lezozinto.’—IzEnzo 17:11, qhathanisa neNW.

Ngokufanayo, eminingi yemisebenzi yebandla lobuKristu lanamuhla igxiliswe ekufundiseni. Ngakho, ibandla ligcwalisa injongo eyinhloko ngokuba khona kwalo, okungukuthi, ukuthuthukisa nokwanelisa isifi-so sokufunda ngoJehova nangezinjongo zakhe. Loluhlobo lwesifiso sokufuna ukwazi luhle futhi luyinzuzo.

Imingcele Efanelekile Ngesifiso Sokufuna Ukwazi

Nokho, ngezinye izikhathi, abantwana kumelwe bavikelwe esifisweni sabo sokufuna ukwazi. Lapho ingane ifuna ukuthinta okuthile okushisayo noma ngokufuna ukwazi ifaka okuthile okuyingilazi emlonyeni wayo ukuze izwe ukuthi kunjani, ingase ilimale. Asivimbeli ukukhula kwayo lapho siyidumaza esifisweni sayo sokufuna ukwazi ngalezozinto.

Lapho abantwana bekhula, isifiso sabo sokufuna ukwazi singase futhi sibaholele enkingeni. Kungenzeka, umfana oseve eshumini elinambili abe nesifiso esikhulu sokufuna ukwazi ukuthi kuyini okuqukethwe umagazini wobulili. Noma intombazane eve eshumini elinambili, ngenxa yesifiso sokufuna ukwazi, ingase isebenzise ugwayi noma eminye imilaliso. Iqembu lentsha lingase lihlangane ndawonye futhi liphuze ubhiya omningi—lizama ukudakwa ukuze nje libone ukuthi kunjani! Nalapha futhi, asivimbeli ukukhula okungokwemvelo nokuthuthuka kosemusha uma sivimbela loluhlobo lwesifiso sokufuna ukwazi.

Ingabe zikhona izindawo lapho isifiso sokufuna ukwazi somKristu ovuthiwe esingamfaka kuzo enkingeni? Yebo, zikhona. UPawulu waxwayisa uThimothewu ngalabo abangase bakhange isifiso sokufuna ukwazi somKristu emzamweni wokonakalisa ukholo lwakhe. “O Thimothewu,” kwasho uPawulu, “londa kahle okubekiweyo kuwe, ugweme ukukhuluma okuyize nokuphikisana kwalokho okuthiwa ukwazi kungesikho, okuthi abanye bekuvuma, baduka ekukholweni.”—1 Thimothewu 6:20, 21.

Encwadini yakhe yesibili eya kuThimothewu, uPawulu wanikeza isixwayiso esengeziwe: “Abadukileyo mayelana neqiniso, bethi ukuvuka kwabafileyo sekudlulile, bechitha ukukholwa kwabanye.” (2 Thimothewu 2:18) Ungacabanga yini ngendlela inkulumo enjalo eyasivusa ngayo isifiso sokufuna ukwazi? Abantu abangaqaphile kungenzeka bacabanga: ‘Lamadoda asho ukuthini? Angasho kanjani ukuthi uvuko selwenzekile kakade?’ Bekhohlisiwe, kungenzeka balalela. Waba yini umphumela? Ukholo lwabanye loniwa. Ukulalela inkulumo enjalo ngenxa yesifiso sokufuna ukwazi kwakuyingozi ngendlela efanayo nendlela okuyingozi ngayo ukusebenzisa imilaliso noma izincwadi zobulili ngenxa yesifiso sokufuna ukwazi.

Ingabe lokhu kusho ukuthi amaKristu awanawo umqondo ovulekile, awazimisele ukulalela imibono yabanye abantu? Cha, akukhona lokho okuqondiwe. Kunalokho, ayalwa ukuba agweme ukunikela izingqondo zawo ezintweni ezingawabangela usizi kamuva. Cabanga nje indlela umlando obungaba ngohluke ngayo ukube uEva wenqaba ukwanelisa isifiso sakhe sokufuna ukwazi ngokulalela amazwi akhohlisayo kaSathane uDeveli! (Genesise 3:1-6) Umphostoli uPawulu waxwayisa abadala base-Efesu ‘ngezimpisi’ ezithi ngokubonakalisa umoya ofanayo nalowo uSathane awubonakalisa kuEva, ‘zikhulume okudukisayo, zihunge abafundi ukuba bazilandele.’ (IzEnzo 20:29, 30) Zisebenzisa “amazwi obuqili” aklanyelwe ‘ukusilimaza.’ Lamazwi aveza imibono ewushevu esimwemi esingokomoya somKristu.—2 Petru 2:3.

Uma wawazi ukuthi isiphuzo esithile sasiyingozi, ingabe wawuyosiphuza ngenxa yesifiso sokufuna ukuzwa ukuthi sinambitheka kanjani? Noma ukuze ubone ukuthi umzimba wakho unamandla ngokwanele ukuba umelane noshevu? Ngokuqinisekile akunjalo. Ngokufanayo, kuwukuhlakanipha yini ukugxilisa ingqondo yakho emazwini aklanyelwe ngabomu ukukukhohlisa nokukususa eqinisweni? Lutho neze!

Qaphela Amafilosofi Ezwe

Isifiso sokufuna ukwazi singasilimaza nathi, uma sisiholela ekubeni sihlole amafilosofi ezwe. Ifilosofi ichazwa ‘njengokuzimisela komuntu ukuqonda nokuchaza ngesizathu nokuhlolisisa lonke ulwazi lomuntu, izimbangela eziyisisekelo nezimiso zoqobo.’ Nokho, ekugcineni labo abathuthukisa amafilosofi omuntu baphenduka bafane nalabo ‘abafunda njalo, kepha bengeke bakwazi ukufika ekulazini iqiniso.’ (2 Thimothewu 3:7) Ukwehluleka kwabo kungenxa yesici esisodwa esiyisisekelo: Bathembela ekuhlakanipheni komuntu kunasekuhlakanipheni kukaNkulunkulu.

Lesisici savezwa ngokusobala umphostoli uPawulu. Wakhuluma kwabaseKorinte ‘ngokuhlakanipha kwalelizwe,’ ‘okungubuwula kuNkulunkulu.’ (1 Korinte 3:19) Futhi waxwayisa abaseRoma ngalabo ‘ababeyiziwula ekucabangeni kwabo.’ (Roma 1:21, 22, qhathanisa neNW.) UJehova ungumthombo wakho konke esinakho. Ngokufanelekile, sibheka kuye ukuba asinikeze ‘ukwazi nokuqonda konke’ nokuba asembulele “okujulileyo kukaNkulunkulu.” (Filipi 1:9; 1 Korinte 2:10) Umthombo oyinhloko wokuhlakanipha kukaNkulunkulu uyiZwi lakhe, iBhayibheli.

Ngenxa yokuthi amafilosofi abantu awalinaki iZwi likaNkulunkulu, akumelwe siyibhekele phansi ingozi ayilethayo. Ukucabanga ngokwefilosofi kwa namuhla kuye kwayenga abefundisi abaningi beLobukholwa ukuba bemukele imfundiso yokuziphendukela kwemvelo. Baye bayeka ngisho nokukholelwa kwabo ekuphefumlelweni kweBhayibheli bavume la ukugxekwa kwalo emzamweni wokuzuza inhlonipho. Amafilosofi ezombangazwe nawe zenhlalo agcizelela inkululeko yomuntu siqu aye aholela obhememeni lokukhishwa kwezisu, ukuziphatha okubi kobulili okwandile, ukusetshenziswa kabi kwemilaliso, neminye imikhuba eyonakalisayo. Ukucabanga ngezinto ezibonakalayo kuholela abantu abaningi namuhla esilinganisweni esithile senjabulo nasempumelelweni abayithola ngezinto zabo ezibonakalayo.

Wonke lamafilosofi aletha imizamo yokuxazulula izinkinga noma ukufuna injabulo ngokucabanga komuntu futhi ngaphandle kosizo lukaNkulunkulu. Wonke awalinaki iqiniso eliyisisekelo uJeremiya aliqaphela: “Ngiyazi, Jehova, ukuthi indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” (Jeremiya 10:23) Injabulo yethu nensindiso yethu ixhomeke ekulaleleni nasekuthembeleni kuJehova. Ngakho kuyinkambo yokuhlakanipha ukumelana nesilingo sokuvumela ukubuswa isifiso sethu sokufuna ukwazi, sinikele izingqondo zethu emibonweni yabantu engonakalisa ukucabanga kwethu futhi ekugcineni isishiye silahlekile phakathi kwalabo abangena themba.

Isifiso Sokufuna Ukwazi Ngesiphelo Esisondelayo

Kusukela ekwambuleni kukaJehova e-Edene ukuthi unenjongo yokususa imiphumela emibi yokuhlubuka kukaSathane, izinceku zaKhe ezithembekile ngaso sonke isikhathi bezinesifiso esiphilayo sokufuna ukwazi ngokusebenza kwenjongo yaphezulu. Phela, ngisho nezingelosi ziye zabonisa isifiso sokufuna ukwazi ngalokhu! (1 Petru 1:12) Ngosuku lukaJesu, abaningi babenesithakazelo esikhulu sokufuna ukwazi isikhathi esiqondile sokufika koMbuso. Nokho, ngokuphindiwe uJesu wabatshela ukuthi kwakungeyona intando kaJehova ngabo ukuba basazi. (Mathewu 25:13; Marku 13:32; IzEnzo 1:6, 7) Noma imuphi umzamo wokumisa usuku oluqondile wawuyoba yize. Kunalokho, ngokuhlakanipha wabanxusa ukuba banakekele imithwalo yabo yemfanelo yobuKristu, bagcine isimo sokuphuthuma nsuku zonke.—Luka 21:34-36.

Namuhla, izenzakalo zezwe zinikeza ubufakazi obunamandla bokuthi isiphelo siseduze, futhi nesifiso sokufuna ukwazi ngosuku esizokwenzeka ngalo siyakhula. Izehlakalo ezithile kungenzeka ziye zenza abanye bakholelwa ukuthi baye baluthola usuku nehora. Badabuka kakhulu, mhlawumbe kwaze kwaba sephuzwini lokuyeka ukukhonza uNkulunkulu, lapho lokho abebekulindele kungaphumeleli. Kungcono kakhulu ukushiyela indaba ezandleni zikaJehova, ngethemba lokuthi uyoletha isiphelo ngesikhathi esifanele. Konke esikudingayo ukuze sibe ngabalindile kuye kwanikezwa.

Isidingo Sokulinganisela

Ngakho, njengezinye izinto eziningi ekuphileni, isifiso sethu sokufuna ukwazi singase sibe isibusiso noma isiqalekiso. Lapho siqondiswa ngokufanele, singathola amatshe ayigugu olwazi oluletha injabulo nokuqabuleka. Isifiso esihle sokufuna ukwazi ngoMdali wethu, intando yakhe, nangezinjongo zakhe singenelisa kakhulu futhi sibe yinzuzo. Isifiso esibi sokufuna ukwazi esingalawuleki singasiholela olwazini olucatshangelwayo oluwugibe nasezimfundisweni zabantu ezintula ukholo loqobo nokuzinikela kuNkulunkulu. Ngakho-ke, lapho isifiso sakho sokufuna ukwazi sisongela ekukuholeleni kokuthile okungabazisayo, “xwayani, ukuze ningadukiswa . . . niwe ekuqineni kwenu.”—2 Petru 3:17.