Ukunakekela “Izimvu” Ezihlakazekile ECaprivi
IMOTO emthubi iLand-Rover yayithwele izimpahla, amaspares, nezincwadi zeBhayibheli. Yayiya enyakatho isuka eWindhoek, inhlokodolobha yeNingizimu Ntshonalanga Afrika (iNamibia). Kwakunini? KwakungoMay ka-1981. Njengoba babedabula indawo yasemaphandleni eyithafa, eyomile, abagibeli abane babenesikhathi sokuzindla ngohambo olujabulisayo olwalungaphambili.
Umshayeli, uChris du Plessis, nomngane wakhe babengoFakazi BakaJehova futhi bengamaphayona avamile, okungukuthi, abashumayeli besikhathi esigcwele besigijimi soMbuso. Babesanda kusebenzisa nje amasonto ambalwa ajabulisayo eKatatura, ilokishi elikhulu labamnyama elingaseWindhoek. Bobabili bakuthola kuqabula ukushumayela izindaba ezinhle zoMbuso kaNkulunkulu endlini ngendlu kubantu abamnyama ababenesimo sobungane futhi besabela kahle esigijimini.
Lezinsizwa ezimbili zazicelwe ukuba ziyise umbonisi wesifunda uSchalk Coetzee nomkakhe eqenjini elingalodwa loFakazi elalisenyakatho, lapho kuneminye imigwaqo engenakuhanjwa ngezimoto ezivamile. Babengakanisa noma kuphi ngeLand-Rover—abakwaCoetzee balale “esitezi esiphansi” emotweni futhi izinsizwa zimbili zilale “esitezi esiphezulu” etendeni elisophahleni lwemoto!
Ngemva kokuhamba cishe amakhilomitha angama-370 iqembu lafika “kunxantathu obulalayo”—owawubizwa kanjalo ngoba abantu abaningi bafela khona ngenxa yezimpi ezihlasimulisayo ezazilwiwa abahlaseli ababevela eAngola. Lapho liqhubekela enyakatho labona izimoto eziningana ezilimele kodwa alizange libe nankinga.
Okokuqala bavakashela eOndangwa, eyikamu lamasosha elingekude naseAngola. Lapho amaphayona akhethekile ayenakekela ibandla elincane. UChristo Els nomkakhe uElizabeth babeye bafunda ulimi lwakuleyondawo, isiNdonga—okwakuyinselele yangempela. Kodwa abantu balalela kahle futhi babenenhlonipho ejulile ngeBhayibheli. Ngezinye izikhathi kwakudingeka ukuba uChristo alime ngezimbongolo noma umkakhe kwakudingeka ukuba ahlakule insimu ukuze abaninikhaya bakhululeke ukulalela isigijimi soMbuso!
Njengoba kuleyondawo kwakulwiwa impi, labo ababehamba emigwaqweni yebhuqu babesengozini yokunyathela amabhomu agqitshiwe. Ngakho-ke uChristo noElizabeth babevame ukuhamba emigwaqweni yesihlabathi eyenile, futhi abantu ababehlangana nabo babemangala kakhulu ngokuthi babengaziphethe izikhali.
Kwakuyinjabulo yangempela ngabo ukuhambela abantu baseOvahimba ababehlala endaweni ekude bephila isidala. Labantu bambethe izikhumba, begcobe ibomvu emzimbeni. Amaphayona asebenzisa incwadi ayesize ekuyihumusheni. Yeka injabulo okwaba yiyo ukubona labantu bebonisa ukwazisa ngesigijimi soMbuso!
Kwenziwa umhlangano wosuku olulodwa phakathi nesonto lokuhambela kukaMzalwane uCoetzee neqembu lakhe. Njengoba indawo yayinabantu abambalwa, inani lababekhona lalilincane. Kodwa bonke babejatshuliswe isimiso nokuhlangana okuhle kulendawo ekude engaphansi kokuvikelwa amasosha.
Izwe LaseCaprivi
Ngemva kokuma isikhashana eRundu ukuze lithole izimvume, iqembu langena ezweni laseCaprivi. Njengoba ibalazwe libonisa, leli yizwe eliwumhubhe omncane elisuka enyakatho-mpumalanga Namibia liye phakathi enhliziyweni yeningizimu Afrika. Lingamakhilomitha angama-480 ubude futhi ububanzi balo obukhulu bungamakhilomitha angama-80 futhi lihlanganyela imingcele neAngola, iZambia, neBotswana. Nakuba nalo liyindawo elawulwa yizimpi, linokuthula kunezwe elingasentshonalanga.
Cishe inani labantu baseCaprivi liyizi-40 000 lenziwa ikakhulukazi ngabantu abamnyama, nakuba abaThwa bevame ukuhamba engxenyeni engasentshonalanga. Izakhamuzi eziningi zikhuluma isiNgisi futhi ziyakwazi ukufunda nokubhala. Njengoba iqembu laliya empumalanga, lalivame ukuma futhi likhulume nabantu, futhi lalijabulela ukubuka indawo—imithi nezilwane zasendle, kuhlanganise nezindlovu nezinyamazane. Lapho lisondela eKatima Mulilo, okuwukuphela ‘kwedolobha,’ amaqoqo amaqhugwane afulelwe kahle aqala ukwanda. Amaphayona ayethatheke kakhulu ngalendawo kangangokuba lapho uSchalk Coetzee ewabuza ukuthi ayengathanda yini ukukhonza kulendawo ekude alamukela ngenjabulo lelilungelo.
Ngemva kokuhlala isikhashana eKatima Mulilo, leliqembu labantu abane lahamba futhi layovakashela iqembu elingalodwa eKasane enyakatho Botswana. Ladabula esiQiwini Sezinyamazane iChobe, ngezinye izikhathi lidlula eduze kwezinyathi ezinkulu nezindlovu. Lapho likanisile ebusuku, lalizwa amabhubesi ebhodla kude buduze.
EKasane, lashumayela emaqhugwaneni, ngendlela yabaNsundu, lihunyushelwa amaphayona akuleyondawo. Isingeniso side futhi sinesizotha. Isihambi sima ngaphandle kweqhungwane bese sikhuleka ukuze sidonse ukunakekela kwabangaphakathi. Othile uyasabela bese esimemela ukuba singene futhi sihlale. Ngokuvamile kubizwa umkhaya wonke ukuba uzolalela. Khona-ke kulandele ukubingelelana okude nokubuzana impilo nemvelaphi. Ngemva kwalokho-ke uFakazi usengaqala ukukhuluma ngesihloko seBhayibheli.
OFakazi bakuleyondawo bajabula futhi babonga kakhulu ngokuthi leliqembu lalisuke kude kangaka lizobavakashela. Kwadingeka ukuba imihlangano iqhutshelwe eqhugwaneni lodaka. Ngakho uSchalk Coetzee wabakhuthaza ukuba bazakhele iHholo LoMbuso labo.
Lapho zibuyela eKatima Mulilo, zonke izihambi zajabulela ukuvakasha isonto lonke noFakazi bakuleyondawo. Ebusuku bakanisa eduze koMfula iZambezi futhi bajabulela ukuthula, okwakuphazanyiswa umsindo wezigubhu ezikude kuphela—“ukushaya kwenhliziyo” kwaseAfrika. Bathola iqembu lakuleyondawo lishiseka kodwa lidinga ukuqondiswa okuningi ngokuqondene nendlela yokuqhuba imihlangano, indlela yokushumayela emaqhugwaneni, indlela efanele yokubhalisa imishado yalo ngokomthetho, nokunye.
Izihambi zawujabulela ngempela umsebenzi wokushumayela! Esinye sathi: “Lapho abantu bezwa ukuthi sasinezincwadi zeBhayibheli ngeSilozi, ulimi lwabo, batheleka kithi, bengafuni izincwadi kuphela kodwa futhi nomuntu ozobafundisa. Kwakungakholeki!”
Ngokungabaza iqembu lashiya abangane balo abasha baseKatima Mulilo futhi laqala uhambo lokubuyela emuva. Lasebenzisa isonto linebandla laseRundu enyakatho Namibia. Abazalwane abaningi ababelapho babengababaleki ababevela eAngola ababekhuluma isiPutukezi. Enye inkinga yolimi! Ngemva kohambo cishe olungamakhilomitha ayizi-4 000, lafika eWindhoek, likhathele kodwa lijabule futhi libonga kakhulu kuJehova ngamalungelo amaningi eliye lawajabulela.
Ukubuyela Emuva EKatima Mulilo
Amaphayona amabili abuyela eKatima Mulilo, manje ukuze ayohlala khona futhi asize “izimvu” zikaJehova. Ukuze ahlale, ayedinga izindawo zokuhlala nomsebenzi wamatoho. Athola imisebenzi esanda kuqala nje ukuwufuna. Athola futhi imvume yokusebenzisa ikharavani nemoto yeWatch Tower Society. Futhi abonga uJehova ngokunakekela izidingo zawo ngaleyondlela.
Ngokushesha, amaphayona ayehileleke ekusizeni oFakazi bakuleyondawo ngezindlela eziningi. Lokhu kwahlanganisa ukwakha iHholo LoMbuso. Asika utshani obude bokufulela, abutha udaka olukhethekile olutholakala ezidulini okwakuthi lapho selomile luqine kakhulu, futhi afunda ukufulela indlu ngotshani—ngendlela yabaNsundu. Lapho izindonga sezipendwe zaba mhlophe, ihholo labukeka lilihle futhi likhanga. Njengoba babengenayo imali yokuthenga izihlalo, kwakubalwa emabhentshini noma ezingodweni. Lalingakalungi kahle, kodwa kwakuyiHholo LoMbuso labo siqu!
Kwakungakaze kube nemihlangano eqhutshwa ngokufanele. Ngakho-ke amaphayona alungiselela imihlangano eyisihlanu yamasonto onke eqhutshwa oFakazi BakaJehova emhlabeni wonke. Lokhu kwasho umsebenzi omningi, kodwa kwakungokwakhayo ngokomoya kuwo nakoFakazi bakuleyondawo. Amaphayona kwadingeka afunde iSilozi futhi, ulimi bakuleyondawo.
Ngokushesha, kwamiswa ibandla. Ngesikhathi esifanele, abazalwane abane bakuleyondawo bakwazi ukunikela izinkulumo zeningi nokusingatha yonke imihlangano, futhi omunye wamiswa njengenceku ekhonzayo. Phakathi nalesosikhathi, amaphayona ayewujabulela kakhulu umsebenzi wokushumayela emaqhugwaneni. Abantu abaningi kakhulu babefuna ukufunda iBhayibheli kangangokuba awabange esakwazi ukubafinyelela bonke. Awunakuthanda yini ukukhonza ezweni elinjengalelo? Ingabe ungakwenza?
Olunye Uhambo Lokuya EKasane
Umbonisi wesifunda wayecele amaphayona ukuba avakashele iqembu eliseKasane eBotswana ngezikhathi ezithile. Ngesinye isikhathi, angena enkingeni engathi sína. Amasosha aseBotswana awamisa eduze komngcele.
“Niyizinhloli!” kusho umholi.
“Cha, siyizikhonzi, oFakazi BakaJehova, ezifundisa abantu lweBhayibheli.”
“Angikholwa ukuthi ningamaKristu. Ningamasosha aseNingizimu Afrika.”
Kwakuyisimo esinzima. Kodwa lapho amasosha ebona izincwadi zeBhayibheli futhi engatholi zibhamu, avumela abazalwane ukuba bahambe.
Isimo esinzima sempi kulendawo senza futhi ukuba kube nzima kakhulu ukuxhumana neZambia. UMfula iZambezi kuphela owahlukanisa iKatima Mulilo neZambia, lapho kunoFakazi BakaJehova abaningi futhi abanezincwadi eziningi zeSilozi. Kodwa ngenxa yamasosha ayeqaphile, abantu bakulendawo babengenakulinga bawele umfula ngamamokolo abo, noma izikebhe. Kwakuba khona ukudubula ngaphesheya komfula ngezikhathi ezithile.
Ukunakekela “Izimvu” Ezihlakazekile
Nokho, konke lokhu akuzange kuvimbele lamaphayona ekunakekeleni “izimvu” ezweni laseCaprivi, kuhlanganise nezihlakazekile. Ngokwesibonelo, ezwa ukuthi uAndrew, indoda eyayisikhulile eyayihlala edolobhaneni elingamakhilomitha angaba ngama-70 ukusuka eKatima, yayinesithakazelo esijulile eBhayibhelini. Lapho eyithola, yayifunda incwadi ethi Iqiniso eliholela ekuPhileni okuPhakade futhi ukuhambela kwawo kwayijabulisa kakhulu! Eminyakeni eminingi edlule yayizifundela yodwa, futhi usizo eyalunikezwa amaphayona lwayikhuthaza kakhulu.
UFrank Mwemba naye usendaweni ekude kakhulu. Uhlala edolobhaneni elingamakhilomitha angaba yikhulu ukusuka eKatima. Ikhaya lakhe lalingafinyelelwa ngemoto kuphela, futhi ngezikhathi ezithile kuphela zonyaka, njengoba ingxenye enkulu yaseCaprivi iwubishi futhi ngezinye izikhathi igcwala amanzi. UFrank wamukela iqiniso eZambia, wabhapathizwa khona, futhi emva kwalokho wabuyela endaweni azalelwa kuyo eCaprivi. Waqhubeka eyedwa iminyaka eminingi. Ingabe waqhubeka eshumayela kuleyondawo engayodwa? Ingabe wamelana nemikhuba yakuleyondawo yobuthakathi nesithembu? Ingabe umshado wakhe wawubhaliswe ngokomthetho? Yebo! UFrank wondla umkakhe—oyedwa kuphela—nabantwana ngokudoba nokulima, futhi asebenzisa izinsuku eziningi ehambela amadolobhana agqagqene ngemokolo yakhe noma ngezinyawo ukuze asakaze izindaba ezinhle. Utadisha njalo nomkhaya wakhe, agweme izinyanga, futhi ngenjabulo wabonisa izihambi isitifiketi sakhe somshado!
Kwesinye isenzakalo, uChris wathatha uhambo ngesikebhe esibanzi eMfuleni iZambezi eya eNantungu indawo eyithafa, enobishi. Wayezwe kuthiwa kwakunabantu abathakazelayo lapho. ‘Yini engizoyithola?’ uChris wazibuza, njengoba ayegxumela ogwini, ebelethe ujosaka. Ngokujabulisayo wathola iqembu elincane elalizama ukuphila ngokweBhayibheli njengoba laliye lafundiswa oFakazi baseZambia. Lajabula kakhulu lapho libona izincwadi zeSilozi ezazifike noChris, kuhlanganise nomagazini bamuva beNqabayokulinda. Ezinsukwini ezintathu ezalandela, uChris wayematasa nezingxoxo zeBhayibheli nokuhambela amadolobhana aseduze ukuze abonane nabantu abathakazelayo. Ngaphambi kokuba ahambe, wenza amalungiselelo okuba kube nemihlangano njalo nawokushumayela ngoMbuso.
Ukushintsha Kwababehamba Nabo
Ngenxa yezinkinga ezingokwempilo, umngane kaChris kwadingeka ashiye iCaprivi ekuqaleni kuka-1982. Kamuva, uMelt Marais wahamba noChris, umzalwane owakhonza ngentshiseko eCaprivi cishe unyaka wonke. Owesithathu ayesebenza naye eCaprivi kwakunguMagda, udade osemusha oyiphayona, ashada naye ngoMay 1983. Inkulumo yabo yomshado yanikelwa eHholo LoMbuso elincane uChris ayesize ekulakheni.
Kwamthatha isikhathi esijana uMagda ukuba ajwayelane nokuphila eCaprivi. Ikharavani yayithuthelwe endaweni engaphandle kwedolobha eyayingenawo ugesi noma amanzi aseduze. Ngokuvamile kuleyondawo babevame “ukuhlaselwa” yizindlovu ebusuku. Ukukhanyisa isibani efasiteleni lekharavani futhi ubone indlovu enkulu iseduze cishe ngamamitha amabili okokuqala kwakumesabisa uMagda! Kodwa ngokushesha wajwayelana nokuphila okusha futhi wakuthanda. Isibonelo sakhe salikhuthaza ibandla elincane laseKatima.
Okunye futhi okwabakhuthaza kakhulu abazalwane baseCaprivi kwakuwukuba khona emihlanganweni yesifunda eFrancistown, eBotswana (okuqhele ngamakhilomitha angama-650). Bajabulela ikakhulukazi ukuba khona emhlanganweni wesigodi owawungaseGoli (okuqhele cishe ngamakhilomitha ayi-1 400). Bamangaliswa ukubona isixuku esikhulu soFakazi nenhlangano ehleleke kangaka nokubona umusa omkhulu wabazalwane nodade abamhlophe—konke okuwubufakazi bokusebenza komoya kaJehova.
Kodwa kwakuyinkonzo yokwethembeka, yothando yamaphayona asemasha eyayakha kakhulu ‘ezimvini’ zaseCaprivi ezaziludinga ngokuphuthuma kangaka usizo. Ngakolunye uhlangothi, ukunikeza lolusizo kwaletha injabulo enkulu kulamaphayona ayezimisele ukukhonza lapho indingeko yayinkulu kakhulu khona.
Nokho, ngoSeptember 1983, uChris noMagda kwadingeka bashiye iCaprivi. Ngani? Uyachaza: “Samenyelwa ukuba siyokhonza ehhovisi legatsha leWatch Tower Society eNingizimu Afrika. Sadabuka lapho sivalelisa kubamemezeli abayi-13 baseCaprivi nakubantu abaningi abathakazelayo ebandleni elincane nasemaqenjini amathathu esawashiya. Sithandazela ukuba sengathi uJehova angaletha izisebenzi ezengeziwe zokusebenza lensimu, esilungele ukuvunwa.”—Mathewu 9:37, 38.
Ziningi ezinye izindawo ezidinga usizo. Ingabe uyakwazi futhi uzimisele ukukhonza ngalendlela, ukuzinikela ukuba unakekele izimvu zikaJehova? Uma kunjalo, kunemivuzo ecebile ekulindele. Kunjengoba uJesu asho: “Kunenjabulo enkulu ngokupha kunangokwamukela.”—IzEnzo 20:35, NW.
[Ibalazwe\Isithombe ekhasini 21]
(Ukuze ubone ukuthi indaba ihlelwe kanjani, bheka encwadini)
NAMIBIA
ANGOLA
OVAMBOLAND
Ondangwa
Rundu
Tsumeb
Otavi
Grootfontein
The “death triangle”
Windhoek
CAPRIVI STRIP
Zambezi River
Katima Mulilo
Kasane
BOTSWANA
ATLANTIC OCEAN
[Isithombe ekhasini 23]
Ukukanisa ngaseMfuleni iZambezi eKatima Mulilo. USchalk Coetzee ubhala umbiko wakhe wamasonto onke njengombonisi wesifunda. Qaphela izindawo zokuhlala “ezisesitezi esiphezulu” seLand-Rover
[Isithombe ekhasini 24]
Ukushumayela ngoMbuso eKasane, enyakatho Botswana