Izinsuku Ezinjengezinsuku ZikaNowa
“Umhlaba wagcwala ubudlwangudlwangu (“ubudlova,” NW) . . . wonakele, ngokuba inyama yonke yayonakalisile indlela yayo emhlabeni.”—GENESISE 6:11, 12.
1, 2. (a) OFakazi BakaJehova kudingeka babhekane naziphi izinhlobo zobudlova namuhla? (b) Kukuziphi izimo lapho abantu bakaNkulunkulu beye baduduzwa ithemba lovuko?
UBUDLOVA! Njengasosukwini lukaNowa, ngokufanayo namuhla, ubudlova buye baba yinto esematheni. Ngisho nalabo abahamba noNkulunkulu weqiniso, njengoba kwenza uNowa, abagonyiwe neze ebudloveni. Lokhu kwalethwa ngokunamandla ekuqapheleni komhlaba lapho, ngoJuly 21 wonyaka odlule, iHholo LoMbuso loFakazi BakaJehova eSydney eAustralia, libhujiswa ngebhomu phakathi nenkulumo yeBhayibheli yeningi eyayikhuluma ngokwethembeka kuNkulunkulu nasemkhayeni. Kwafa uFakazi oyedwa. Abangaphezu kwama-40 balaliswa esibhedlela. Bonke laba sebeye balulama, nakuba abanye benezibazi ezinkulu ezabangelwa yilolunya lobugebengu. Umseshi wamaphoyisa wathi: “Kwakunabantu abayi-110 ngaphakathi futhi kumane nje kuyisimangaliso ukuthi abafanga bonke abayi-110.”
2 Kwezinye izingxenye zomhlaba—njengaseNyakatho Ireland, eLebanon naseEl Salvador—oFakazi BakaJehova bamemezela “izindaba ezinhle” ebudloveni obuqhubekayo obubazungezile. Abambalwa baye bafa, abanye babulawa lapho besenkonzweni. Emazweni amaningi “isenzakalo esingalindelekile,” njengezingozi nokuzamazama komhlaba, siye sabulala ukuphila okuyigugu, ezenzakalweni ezinjalo abantu bakaJehova baye baduduzwa ithemba lovuko.—UmShumayeli 9:11, NW; 1 Thesalonika 4:13, 14.
3. (a) Yini engenzeka kwabanye abantu bakaJehova, njengoba kuboniswe izenzakalo zamuva noLuka 21:16? (b) Isiphi isiqinisekiso esinaso ngesivikelo sikaNkulunkulu phakathi ‘nosizi olukhulu’?
3 Muva nje eMexico, sebebonke oFakazi abangama-23 nabahlanganyela nabo babephakathi kwabangaphezu kwezi-5 000 ababulawa inhlekelele yokuzamazama komhlaba. EPuerto Rico, abanye abayisikhombisa babephakathi kwabangama-300 abalahlekelwa ukuphila kwabo ezikhukhuleni nasekudilikeni kwamadwala. Ingabe lokhu kusho ukuthi uJehova wehluleka ukunikeza isivikelo kwezinye zezinceku zakhe? Lutho neze. Asigonyiwe ezingozini nasezinhlekeleleni. Futhi ngokuqondene nokushushiswa, uJesu waxwayisa abafundi bakhe, ethi: “Abanye benu bayakubulawa yibo.” Amakhulu abafowethu afa ekuphathweni ngobudlova uHitler wobuNazi. UJehova uyobakhumbula bonke labo ovukweni. Nokho, lapho “usizi olukhulu” olwabikezelwa lukhukhula umhlaba, uJehova uyobonisa ukuthi uyakwazi ukusindisa labo ababiza egameni lakhe, njengoba nje enza ezinsukwini zikaNowa.—Luka 21:16-19; Mathewu 24:14, 21, 22, 37-39; Isaya 26:20, 21; Joweli 2:32; Roma 10:13.
4. Zifana kanjani izimo zosuku lwanamuhla nalezo ezichazwe kuGenesise 6:11, 12?
4 Kusukela ngo-1914 ubudlova buye baba yindaba yembulunga yonke. Abantu abayizigidi eziyikhulu baye bafa ezimpini nasezinhlekeleleni zaleli khulu leminyaka. Isintu siye saba yizisulu zokuthunjwa ngezindiza nangemikhumbi, amabhomu aqhunyiswa amaphekulazikhuni, ukubulawa kwabantu abaningi, nokuzondana kwezinhlanga, futhi siye sasongelwa ukwandiswa kwezikhali zenuzi. Ngempela, lezi “izikhathi ezinzima” ‘nezizwe zixakekile, aziyazi indlela yokuphuma.’ (2 Thimothewu 3:1-5, 13; Luka 21:25) Nokho, abantu bakaJehova namuhla baphila phakathi kosizi oluletha ingozi enkulu kakhulu kunobudlova, nakuba ngokuvamile luhlobene nobudlova. Luhlehlela emuva osukwini lukaNowa eminyakeni engaphezu kweyizi-4 300. Luyini?
Ukholo LukaNowa Phakathi Kokuziphatha Okubi
5, 6. (a) USathane waqhubeka kanjani onakalisa isintu? (b) Kungaziphi izindlela uNowa nomkhaya wakhe abahluka ngazo njengabangeyona ingxenye yalelozwe?
5 Kusukela ekuhlubukeni e-Edene kuqhubeke, uSathane uDeveli uye wazimisela ‘ukudukisa izwe lonke.’ (IsAmbulo 12:9) UJehova wayeyale indoda nomfazi ukuba basebenzise amandla abo obulili ababewanikwe uNkulunkulu ngokwethembeka phakathi kwelungiselelo lomshado, ukuze ‘bagcwalise umhlaba.’ (Genesise 1:28; Heberu 13:4) Kodwa uDeveli wonakalisa isintu ngobulili obuphambene nemvelo. Kanjani? Amadodana kaNkulunkulu omoya ahlanganyela noSathane ekuhlubukeni kwakhe. Lawa aba “amademoni,” enoSathane ‘njengombusi’ wawo. (Luka 11:15) Futhi zazihlanganisani izenzo zamademoni ngaleso sikhathi? Ehlela emhlabeni, athatha imizimba yenyama, ahlala namadodakazi abantu amahle. Umphumela wawesabeka!
6 Ngaleyondlela kwavela inzalo eyingxubevange, iziqhwaga ezingokwenyama lezo ingxenye eyayiyidemoni, ingxenye ingumuntu. Laba kwakuthiwa amaNefili, “aBawisa” isintu [Fellers] ababulalayo, njengoba umlando ubonisa: “Umhlaba wawonakele ebusweni bukaJehova; umhlaba wagcwala ubudlwangudlwangu. UNkulunkulu wabona ukuthi umhlaba wonakele, ngokuba inyama yonke yayonakalisile indlela yayo emhlabeni.” Ubudlova nokuziphatha okubi kobulili kwanda kangangokuthi kwakungathiwa ngoNowa kuphela: “Wayeyindoda eqotho, engenacala esizukulwaneni sakhe; uNowa wayehamba noNkulunkulu.” Umkakhe, amadodana akhe nawomkawo—bona kuphela esintwini sisonke—babonisa ukholo nokumesaba uNkulunkulu. Ngokusobala, uhlu lomkhaya kaNowa aluzange lonakaliswe ukuziphatha okubi kobulili kosuku lwakhe.—Genesise 6:4, 9-12, Ref. Bi., umbhalo waphansi.
7. Njengoba kuboniswe osukwini lukaNowa, uJehova ubahlulela kanjani ababi nabalungile? (Qhathanisa noMathewu 25:40, 45, 46.)
7 UJehova walibhubhisa lelozwe elalinobudlova, lisanganiswe ubulili, futhi linobudemoni. Eletha uZamcolo, washabalalisa yonke into eyayiyimbi. AmaNefili ayeyingxubevange nabantu abonakele bakhukhulwa ngokuphelele, kuyilapho labo abangamademoni ababengamadodana kaNkulunkulu bebalekela emuva endaweni yomoya—beyolindela ukwahlulelwa kwabo nguNkulunkulu. Kodwa bakhona abasinda! UNowa nomkhaya wakhe basindiswa. Ngani? Ngenxa yokholo lwabo, olwalusekelwe imisebenzi yokwakha umkhumbi nokushumayela ngokulunga kulelozwe elalilahliwe.—2 Petru 2:4, 5.
Nina Eniphila Manje, Qaphelani!
8. Usuku lukaNowa lwalufanekisela ngaziphi izici usuku lwethu?
8 Usuku lukaNowa lwalufanekisela usuku lwethu. Sikwazi kanjani lokhu? Nokho, uJesu wabikezela ngesikhathi esifanayo sobudlova, ukungabi namthetho, nokungabi naluthando njengengxenye ‘yesibonakaliso’ sokuthi simi onqenqemeni ‘losizi olukhulu olungakaze lube khona selokhu kwasekelwa umhlaba kuze kube manje, nolungasayikuba khona.’ Wathi futhi: “Lolosuku nalelohora akakho owazi lutho ngalo . . . nguBaba kuphela.” Khona-ke wanezela: “Njengasemihleni kaNowa, kuyakuba njalo ukufika kweNdodana yomuntu. Ngokuba njengasezinsukwini lezo ezandulela uzamcolo babedla, bephuza, beganwa, bendiswa, kwaze kwafika usuku uNowa angena ngalo emkhunjini, abazanga kwaze kwafika uzamcolo wabakhukhula bonke, kuyakuba njalo ukufika kweNdodana yomuntu.”—Mathewu 24:3-21, 36-39.
9. Sikugwema kanjani lokho okumiselwe labo abanganaki?
9 Yebo, “abazanga.” Kodwa wena akumelwe ube njengabo. Ungasinda lapho iNkosi uJesu ibonakala ezulwini, ikhipha ulaka lukaNkulunkulu ngokubhubhisa phakade ‘labo abangamazi uNkulunkulu nabangazilaleli izindaba ezinhle ngeNkosi yethu uJesu.’ (2 Thesalonika 1:7, 8) Akumelwe ube njengabantu bezwe abakukhathalela kwabo okuyinhloko ekuphileni kuwukuzijabulisa, ukuphishekela umsebenzi ophambili noma umcebo obonakalayo, bengacabangi neze ngoNkulunkulu. Ngempela, ‘unkulunkulu wabo isisu sabo.’—Filipi 3:19.
“Zondani Okubi”
10, 11. (a) Ukuze sizuze ukuvunyelwa uNkulunkulu, imiphi imikhuba emibi okumelwe igwenywe? (b) Iziphi izikhali okumelwe sihlome ngazo, futhi ngani?
10 Kulezinsuku zokugcina, ukuphila kwabantu abaningi kakhulu kugxiliswe ebulilini, ngenzuzo noma ngokungenanzuzo yomshado. Futhi ngabaningi abashadile, ukudivosa noma ukuchithwa komshado kuye kwaba yisenzo abasikhethayo. Bengazinaki izixwayiso eziqondile zabafundi bakaJesu, abaningi kweLobukholwa bazitika ngobungqingili. Kakade, abanye babo ‘sebezitholela umvuzo’ ngohlobo lweAIDS nezinye izifo ezithathelwana ngobulili. Nokho, lingaba khona ithemba lensindiso ngisho nangabantu abanjalo. Khumbula, uJesu wakhuluma kahle ngezifebe ezazihlanza ukuphila kwazo futhi zikholwe, ngokungafani nabaholi benkolo abaqhoshayo, nabangaphenduki bosuku lwakhe.—Roma 1:26, 27; 2 Petru 2:9, 10; Juda 6, 7; Mathewu 21:31, 32.
11 Noma ibaphi abantu bakaJehova okungenzeka baye bangcoliswa, noma abalingelwa ukuba bazitike emikhubeni yokuziphatha okubi kumelwe baphaphame bahlome zonke izikhali uNkulunkulu azinikezayo! (Efesu 6:11-18) Lezi nsuku ‘zifana nsé nezinsuku zikaNowa.’ ‘Lelobhubesi elibhodlayo,’ uDeveli, namademoni akhe onakele basebenza ubusuku nemini ukuba bahlukanise futhi babambe izinceku zikaNkulunkulu. Kumelwe simelane nalezo zitha, siqinile okholweni.—1 Petru 5:8, 9.
12. Kungani kubalulekile ukulandela iseluleko samaHubo 97:10?
12 Kuyashaqisa ukuthi, ngisho nabanye ababevelele enhlanganweni kaJehova baye banqotshwa imikhuba yokuziphatha okubi, kuhlanganise ubungqingili, ukushintshisana ngabafazi, nokoniwa kwezingane ngokobulili. Kumelwe kuphawulwe, futhi, ukuthi ngonyaka odlule, abantu abayizi-36 638 kuye kwadingeka ukuba bakhishwe ekuhlanganyeleni nebandla lobuKristu, abaningi babo ngenxa yokuziphatha okubi. Inhlangano kaJehova kumelwe igcinwe icocekile! (1 Korinte 5:9-13) Lesi isikhathi ngabadala bebandla, izinceku ezikhonzayo, futhi yebo bonke abafowethu nodade sokuba bagweme noma iziphi izimo ezingabaholela ekuziphatheni okubi. Ukwethembeka ezindinganisweni zikaJehova kuyovuzwa, njengoba iHubo 97:10 lisho: “Nina enithanda uJehova zondani okubi; uyagcina imiphefumulo yabamkhonzayo; uyabasindisa ezandleni zababi.”
13. Isiphi iseluleko esinengqondo esinikezwa umphostoli uPawulu noPetru?
13 Ekugcineni, “usizi olukhulu” luyosusa bonke labo “abanengekayo.” Yeka ukuthi kumelwe sikukhathalele kanjani ukuzonda, yebo, ukwenyanya, nokugwema ukuziphatha okubi kwezwe! Kumelwe ‘sibubalekele ubufebe’! (IsAmbulo 21:8; 1 Korinte 6:9, 10, 18) Umphostoli uPetru, ngemva kokuxwayisa ngezihlubuki ezihlwanyela ukungabaza nangokuba ngokoqobo ‘kosuku lukaJehova,’ usikhuthazela “ekuhambeni okungcwele nasekumesabeni uNkulunkulu.” Uyanezela: “Kepha siyalindela ngesithembiso sakhe amazulu amasha nomhlaba omusha okukho-na kuwo ukulunga. Ngakho, bathandekayo, lokhu nibheka lezo zinto, khuthalelani ukuba nifunyanwe ninokuthula, ningenabala, ningenacala kuye.” Khona-ke yeka injabulo okuyiyo ukufinyelela ‘emhlabeni omusha,’ lapho uNkulunkulu ‘eyokwenza khona konke kube kusha’ futhi kuhlanzeke!—2 Petru 3:3-7, 10-14; IsAmbulo 21:1, 4, 5.
Khumbula Ezinye ‘Izibonelo Eziyizixwayiso’
14. Kungani ukuhlanza kukaZamcolo kwakungokwesikhashana nje?
14 Ngemva kokuba uZamcolo uhlanze konke ukonakala kwamademoni nokwabantu emhlabeni, uJehova waphinda umyalo ayewunikeze uAdamu ekuqaleni, ngokutshela uNowa namadodana akhe ukuthi: “Zalani nande, nigcwalise umhlaba.” (Genesise 9:1) Lokhu bakwenza ngendlela engokomfanekiso, njengoba “imindeni” engama-70—isibalo esifanekisela ukuphelela—ibhalwe kuGenesise isahluko 10. Kodwa isintu sasisahlushwa imiphumela yesono esazuzwa ngefa kuAdamu. Futhi ngokusobala ithonya lobudemoni laphinda laholela abantu ekucwileni ekuziphatheni okubi kobulili.
15. Yini esiyifundayo ekwahluleleni kukaNkulunkulu iSodoma?
15 Ngokuhamba kwesikhathi, “umngane” kaJehova, uAbrahama, nomshana ka-Abrahama uLoti bathuthela endaweni yaseKhanani. ULoti wakhetha ukudlulela ethafeni laseJordani, ‘elalinjengensimu kaJehova.’ Kodwa ingabe lalinjalo ngokuziphatha? Lutho neze! Umuzi waseSodoma, lapho uLoti ayehlala khona, neGomora elalingumakhelwane kwakucwile ebungqingilini. Kwakungenakutholakala ngisho namadoda ayishumi alungileyo. Ngenxa yalesizathu, uJehova wehlisela kuleyo mizi “isijeziso somlilo omiyo njalo.” Leyo mizi eyonakele ayisoze yabuyiselwa! UJesu wakhuluma ngokwahlulela kukaNkulunkulu iSodoma, kanye nalokho okwenzeka “emihleni kaNowa” ekugcizeleleni isidingo ngathi sokuba siqaphe!—Genesise 13:10; 18:32; Juda 7; Luka 17:26-30.
16. Isiphi isenzo samademoni esisenza sidinge ukuzimisela ukulwa kanzima ngenxa yokholo?
16 Ungalenzi iphutha! USathane namademoni akhe baseyizimbangela zobudlova! Nakuba bephonswe “emigodini yobumnyama” engokomfanekiso baphucwa nelungelo lokubuyela emizimbeni yenyama, leyo mimoya eyonakele izimisele ukonakalisa abantu, futhi ikakhulukazi izinceku zikaJehova. (2 Petru 2:4-6) Akukho kungabaza ngokuthi amademoni athonya uKhanani ukuba enze isenzo esibi kumkhulu wakhe uNowa. (Genesise 9:22-25) Ngokuqinisekile kumelwe ukuba abangela ukonakala okwaba ‘imisebenzi yezwe laseKhanani,’ okwenza ekugcineni lahlanza abantu balo. (Levitikusi 18:3-25) Ngokufanayo, amademoni akhuthaza imikhuba yobulili engeyona engokwemvelo leyo ehlupha imiphakathi eminingi kakhulu namuhla. Ekuzigcineni silwa kanzima ngenxa yokholo, kumelwe simelane nanoma ikuphi ukuhlasela kwalezo zingelosi ezinesono ezishukumisela abantu ukuba ‘benze ubufebe ngokwedlulele futhi balandele inyama ukuze bayisebenzise ngokuphambene nemvelo.’—Juda 3, 6, 7.
Yakhela Ukusindiswa
17. NjengoNowa nomkhaya wakhe, singazibonakalisa kanjani singeyona ingxenye yezwe?
17 Ngenxa yokuthi izikhathi zethu zimbi kakhulu, singayithola kanjani indlela yokukhululwa? Nokho, uNowa nomkhaya wakhe basinda kanjani? “Ngokukholwa uNowa . . . walahla izwe.” (Heberu 11:7) Ngokufanayo namuhla, oFakazi BakaJehova ‘abayona ingxenye’ yezwe elibi. Ngokungaphezulu, siye sabonakalisa ukholo lwethu ngokunikezela ukuphila kwethu kuJehova nokwamukela ubhapathizo lwamanzi ukuze sibe abafundi bakaJesu Kristu.—Johane 17:14, 16; Mathewu 28:19.
18. Yini efanekiselwa ukwakhiwa komkhumbi?
18 Futhi, sihlanganyela emsebenzini kaJehova wanamuhla, umsebenzi wokwakha ongokomoya oqondiswa uNowa Omkhulu, uJesu Kristu. Njengendawo yokulondeka nokusinda, umkhumbi umelela ipharadesi elingokomoya uJehova abelokhu elakha phakathi kwabakhulekeli bakhe kusukela ngo-1919. Uyisimo sobuhlobo obubuyiselwe nobunokuthula noNkulunkulu. Uyilungiselelo laKhe lokusindiswa komkhaya ongokomfanekiso kaNowa Omkhulu “osizini olukhulu.”—Mathewu 24:21; 1 Korinte 3:9, 11; 2 Korinte 12:3, 4; IsAmbulo 7:13, 14.
19. UNowa, amalungu omkhaya wakhe, nomsebenzi wabo, kwafanekiselani?
19 “UNowa wayetholile umusa emehlweni kaJehova.” Yeka ukuthi umfanekisela kahle kanjani uJesu Kristu, owahamba noNkulunkulu ngokuthobeka lapha emhlabeni, engenzi lutho ngokwakhe! (Genesise 6:8; Mathewu 17:1, 5; Johane 8:28) Bobabili babengabashumayeli bokulunga—isibonelo esihle kubo bonke ofakazi bakaJehova. Futhi singaqiniseka ukuthi umkaNowa, ofanekisela abagcotshiweyo abasele emhlabeni namuhla, wayeyisibonelo sokuzithoba. (2 Petru 2:5; Luka 4:14-19; Efesu 5:21-24) Uma sicabangela ukuthi wawumkhulu kangakanani umsebenzi wokwakha umkhumbi wokusinda, singabona ukuthi kumelwe ukuba kwakumjabulisa kanjani uNowa owayesegugile ukuba namadodana amathathu asenamandla nawomkawo njengabasizi bakhe! Ngokufanelekile laba bafanekisela “isixuku esikhulu” sosuku lwanamuhla esithwele umthwalo womsebenzi wokwakha ongokomoya phakathi nalesikhathi sokufika kwalokho okwakufanekiselwa uZamcolo.—IsAmbulo 7:9, 15.
20, 21. (a) Imaphi amathemba akhazimulayo alindele abakhulekeli bakaJehova emhlabeni ohlanziwe? (b) Iyiphi injabulo engajatshulelwa ngisho kwamanje?
20 Lapho lomhlaba usuhlanziwe, usulungele ukwenziwa ube yipharadesi elingokoqobo, labo abafanekiselwa amadodana kaNowa nomakoti bawo okwesikhashana bangaba nazo izingane abazizalela ekulungeni. Khona-ke isimangaliso sovuko siyokuqeda ukugcwalisa umhlaba ngabantu. Bonke abemukela ilungelo lokuba “ezinye izimvu” zikaJesu bayobuyiselwa ekupheleleni, futhi lapho sebesinde ovivinyweni lokugcina ngemva kokuba uKristu abuyisele uMbuso kuYise, laba kuyobalelwa kubo ukulunga ukuze baphile phakade.—Johane 5:28, 29; 10:16; 1 Korinte 15:24-26; IHubo 37:29; IsAmbulo 20:7, 8.
21 Yeka izinjabulo ezilindele abakhulekeli bakaJehova abathembekile! Kodwa injabulo enkulu ingatholakala ngisho kwamanje ngokuhlanganyela ngenhliziyo yonke ekwakhiweni komkhumbi wokusinda wosuku lwanamuhla. Uqhubeka kanjani lowomsebenzi? Isifundo sethu esilandelayo sizonikeza impendulo.
UBUNGAPHENDULA KANJANI?
◻ Kumelwe zisixwayise kanjani izenzakalo zangaphambi kukaZamcolo?
◻ Iziphi izifundo esizithola kuMathewu 24:37-39?
◻ Kungani kubaluleke kakhulu ‘ukuzonda okubi’?
◻ Singahlanganyela kanjani ekwakheni umkhumbi ongokomfanekiso?
[Ibhokisi ekhasini 11]
NJENGASOSUKWINI LUKANOWA—
“Amaphesenti angama-40 kuphela othisha basekholiji lezenkolo . . . akholelwa ukuthi kubi ngendoda nomfazi abangashadile ukuhlanganyela ubulili.”—Saturday Oklahoman & Times, December 29, 1984
[Ibhokisi ekhasini 12]
Ingabe Izimiso ZeBhayibheli Zibalulekile?
Umpristi wase-Episcopal walalela inkonzo yomngcwabo eyayiphethwe omunye woFakazi BakaJehova. Ngemva kwalokho, zimenywe umpristi, izikhonzi ezimbili zeWatch Tower Society zaba khona engxoxweni nabefundisi abahlukahlukene eBrooklyn Heights, eDolobheni laseNew York.
Indaba yobungqingili yaphakama. OFakazi bakwenza kwacaca ukuthi iBhayibheli liyabenqabela nokuthi oFakazi bayabakhipha ekuhlanganyeleni abantu abenza noma iluphi uhlobo lokuziphatha okubi. (Roma 1:24-27; 1 Korinte 6:9, 10; Juda 7) OFakazi babuza abefundisi ngesimo sabo ngalendaba futhi bathola izimpendulo ezilandelayo:
Umfundisi weBandla: “Ngicabanga ukuthi sinawo umthetho wokuxosha ebandleni kweminye yemithetho yesonto, kodwa ngabe ngiqamba amanga, angikhumbuli ukuthi sake sawusebenzisa nini lowomthetho!”
Umpristi wase-Episcopal: “Ukuba sawusebenzisa lowomthetho, ngabe asisenabo abahlala ezifundeni zabefundisi [abasele].”
Isikhulu esingumKatolika: “Ukuba sawusebenzisa lowomthetho, ngabe asisenabo abapristi [abasele].”
Nakuba lamazwi abefundisi engase eqise, oFakazi BakaJehova bayajabula ngokuma kwabo okuqinile ekugcineni ibandla lihlanzekile. ‘Abasibo abezwe.’—Johane 15:19.
[Ibhokisi ekhasini 13]
‘NJENGASOSUKWINI LUKANOWA’—
“Isikole sikawonk’ uwonke saseDolobheni laseNew York sabafundi besikole esiphakeme abafunda ngobungqingili siye savulwa eManhattan.” Uthisha wakhona wathi: “Sifuna umphakathi lapho abantwana abangongqingili besilisa nabangongqingili besifazane bengeke babe izisulu zentsha engakavuthwa.”—The New York Times, June 6, 1985
[Ibhokisi ekhasini 14]
‘NJENGASOSUKWINI LUKANOWA’—
“Amalungu eSonto laseRiverside izolo amukele umthetho wokuvunyelwa kongqingili besilisa ovumela ubuhlobo bobungqingili njengengxenye yomqondo wokuphila komkhaya wobuKristu.”—New York Post, June 3, 1985