Ukuphila Nenkonzo KaJesu
Ukufundisa Owesifazane OngumSamariya
LAPHO besuka eJudiya beya eGalile, uJesu nabafundi bakhe badabula esigodini saseSamariya. Bekhathazwe yindlela, sekuntambama baphumula ngasemthonjeni oseduze nomuzi waseSikari. Lomthombo wambiwa nguJakobe emakhulwini eminyaka ngaphambili, futhi usekhona ngisho nanamuhla, eduze nedolobha lanamuhla laseNablus.
Njengoba uJesu esaphumule lapha, abafundi bakhe baya emzini ukuyothenga ukudla. Lapho owesifazane ongumSamariya ezokukha amanzi, uJesu uyacela: “Ngiphuzise.”
AmaJuda namaSamariya njengokujwayelekile awadlelani ngenxa yobandlululo olujulile. Ngakho, emangele, owesifazane uyabuza: “Yini ukuba wena ongumJuda ucele ukuphuziswa yimi engingowesifazane waseSamariya na?”
UJesu uphendula ngokuthi ukuba ubazi ukuthi ungubani, ubezomcela “amanzi aphilayo.” Uthi, lamanzi azoba “ngumthombo wamanzi aphuphumayo, kube-ngukuphila okuphakade.”
“Nkosi, ngiphe lawomanzi,” kuphendula owesifazane.
UJesu manje uthi: “Hamba ubize indoda yakho.”
“Anginandoda,” kuphendula owesifazane.
UJesu uyamfakazela. “Usho kahle ukuthi: Anginandoda; ngokuba usuké waba-namadoda ayisihlanu; le onayo kalokhu akusiyo indoda yakho.”
“Nkosi, ngiyabona ukuthi ungumprofethi wena,” kusho owesifazane emangele. Embula izithakazelo zakhe ezingokomoya, uyaphawula ukuthi amaSamariya ayekhulekela eNtabeni iGerizimu, kodwa amaJuda eJerusalema.
Nokho uJesu uyaphawula ukuthi indawo yokukhulekela ayisiyo into ebalulekile. “UNkulunkulu unguMoya,” uyachaza, “abakhuleka kuye bafanele ukukhuleka ngomoya nangeqiniso.”
Owesifazane uhlabeke umxhwele ngokujulile. Uthi, “ngiyazi ukuthi uMesiya uyeza, othiwa uKristu; nxa esefikile yena, uyakusitshela konke.”
“Nginguye mina engikhuluma nawe,” kusho uJesu. Cabanga ngakho! Lona wesifazane oza emini ukuzokukha amanzi, mhlawumbe ukuze agweme ukuhlangana nabantu bendawo abamedelelayo ngenxa yendlela yakhe yokuphila, uJesu umphatha ngendlela emangalisayo. UJesu umtshela ngokungagungciyo lokho angakaze akutshele muntu obala. Kwaba namiphi imiphumela? Indaba ekumagazini wethu olandelayo izochaza.—Johane 4:3-26.
◆ Kungani owesifazane ongumSamariya amangaliswa ukuthi uJesu wayekhuluma naye?
◆ Yini uJesu amfundisa yona ngamanzi aphilayo nangendawo yokukhulekela?
◆ UJesu umembulela kanjani ukuthi ungubani, futhi kungani lokhu kumangalisa?
[Isithombe esigcwele ikhasi ekhasini 9]