Itshe Elisha Eliwuphawu OlungokwaseZulwini EKorea

NGOKUHAMBISANA nalo lonke izwe, umsebenzi wokushumayela ngoMbuso eKorea uqhubekela phambili ngezinga elikhulu. Eminyakeni nje emithathu, cishe ngosuku olufanayo, okwavulwa ngalo isakhiwo segatsha eKongdo, eKorea, isakhiwo esisha sanikezelwa ngoMay 11, 1985.a Kwakungelinye itshe eliwuphawu emlandweni ongokwaseZulwini woFakazi BakaJehova eKorea.

Njengoba sibonakala esithombeni, isakhiwo esisha siyisitezi sesithathu esiphezu kwehhovisi (ingxenye engakwesokudla esithombeni), izitezi ezimbili ezingaphezu kwefektri (ingxenye ephakathi), nesakhiwo esixhumene naso esiyikhaya laseBethel (yonke ingxenye engakwesobunxele). Izakhiwo ezingasemuva ziyikhaya laseBethel elithakazelisayo.

Kodwa kungani kunesakhiwo esengeziwe ngokushesha? Ngo-1982, lapho ifektri entsha iqala ukusebenza, yayikhiqiza omagazini INqabayokulinda nePhaphama! abayizi-380 000 inyanga ngayinye. Lokhu sekuye kwaphindeka kabili kwaba yizi-760 000 inyanga ngayinye. Ngokusobala, indawo eyenezelwe yefektri iyosetshenziswa ngokugcwele. Ukuze kunakekelwe umkhiqizo owandile, manje kunamalungu angama-86 akhonza endlunkulu. Ikhaya elisha lingakwazi ukubhekana nokwanda; kunendawo eyanele yamalungu ayi-120.

UA. D. Schroeder, ilungu leNdikimba Ebusayo loFakazi BakaJehova eBrooklyn, eNew York, wayekhona esimisweni sokunikezela. Amalungu eKomiti yeGatsha laseKorea anikeza umbiko ngomsebenzi wasensimini nangemniningwane yesakhiwo. Bonke ababeyizi-2 199 ababekhona babegcwele ukubonga okuvela enhliziyweni kuJehova ngesibusiso sakhe esicebile.

[Umbhalo waphansi]