Ukuvuselelwa Kwenkolo Noma Isimo Esibucayi Esingokomoya?

“Ukukhuluma ngomthandazo, ukuzindla, ukukhulekela nesifundo seBhayibheli sekuye kwathatha isikhundla sezimpi zenkolo emasontweni amaningi. . . . Izazi zithi lokhu kuthambekela kubonisa ukuzimisela okusha kulabo abakholwayo ukuba ‘bafune abangcwele’ emphakathini oye wagudlukela kude nezisekelo zenkolo.”—U.S.News & World Report.

“Kulo lonke elaseMpumalanga Yurophu, kunezimpawu zokuvuseleleka kwenkolo. . . . EHungary, eCzechoslovakia, eMpumalanga-Jalimane nePoland, abefundisi nezazi bathi inani elikhulayo labantu liphendukela—noma libuyela—emasontweni. . . . Abantu abasha bayabuza, ‘Siphilelani?’”—The New York Times.

INGABE sibona ukuphaphama okungokomoya kwenzeka, uma sicabangela imibono enjengalena? Nakuba ukwanda emasontweni kusalela emuva kunokwanda kwenani labantu, kunokwanda okuncane okubonakalayo lapha nalaphaya kuleminyaka emibalwa yamuva. Ezinye izazi zamasonto zibheka lokhu njengophawu lokuthi ukwehla kwamasonto kusukela ngawo-1960 akusaqhubeki, futhi manje izinto sezingcono. Kungakhathaliseki noma kunjalo noma cha, singase sibuze: Kungani labantu bephendukela emasontweni?

Kungani ‘Kunokuvuselelwa’?

“Kukhona indlala engokoqobo kubantu, umuzwa wokuthi kukhona okuntulekayo esimweni sabo esingokomoya,” kusho umpristi webandla lababhishobhi eMelika uTilden Edwards. Ngamanye amazwi, kubonakala sengathi abantu abengeziwe baya bevuleka inkungu ngokuqondene nendlela yokuphila yezinto ezibonakalayo neyalelizwe, futhi bafuna injongo yokuphila. Abanye, ngokubanjwa ukwesaba ukubhubhisa kwenyukliye noma kobugebengu nobudlova, noma ukuthintwa nje yinhlekelele ethile yomuntu siqu, baphendukela enkolweni ukuze baduduzeke.

Umphumela obonakalayo walokhu kuthambekela uwukusungulwa nokukhula kwezinkolo zaseMpumalanga eNtshonalanga. Amathempeli, izindlu zokukhulekela osanta, amasonto amaSulumane, izindawo zokuzindla, njalonjalo, kwakhiwa kokubili emadolobheni nasezindaweni ezingaphandle emazweni aseNtshonalanga. Okubonakala kakhulu futhi, amaqembu aqhuba izinto ezinjengeYoga, ukuzindla okungaphezu kokwemvelo, ubuBudhha baseJapane okuthiwa yiZen nehlelo lobuHindu okuthiwa yiHare Krishna. Ngokombono wezinye izazi zenkolo, lezinkolo “ezingavamile” zibonakala zinalokho abantu abaningi emphakathini waseNtshonalanga abakufunayo: igunya elithile elizobatshela okumelwe bakukholelwe, okuthile kokubaqondisa ekuphileni kwabo, umuzwa wokuba ngoweqembu elithile nesimo sokuba nokuthula kwangaphakathi noma ukuziqaphela.

Ukuvuselelwa Noma Isimo Esibucayi?

Iqiniso lokuthi abantu baphendukela enkolweni ngezimpendulo uma bebhekene nezikhathi ezinzima noma eziyingozi, noma uma bekhathazwa ubuze bendlela yabo yokuphila, limane libonakalisa iqiniso eliyisisekelo elaphawulwa uJesu Kristu: “Akusinkwa sodwa umuntu ayakuphila ngaso kodwa ngamazwi onke aphuma emlonyeni kaNkulunkulu.” (Mathewu 4:4) Indlela yokuphila engeyokuthanda izinto ezibonakalayo kuphela ayiwanikezi amandla nokukhuthazela okudingekayo kokubhekana nezinkinga eziningi zanamuhla.

Eqinisweni, ezinye izazi zikholelwa ukuthi lomuzwa wobuze obungokomoya yiwona ngokwengxenye, obangela izinkathazo eziningi zomphakathi wanamuhla. “Ukwehluleka kwengqondo yomuntu, ngenxa yokuntula ngokomoya, kuye kwaba yisici esiphawulekayo kubo bonke ubugebengu obukhulu balelikhulu leminyaka,” kusho umlobi ophawulekayo waseRashiya uAlexander Solzhenitsyn.

Ngokucabangela lesisimo esibucayi ngokomoya, kumelwe sibuze: Ingabe amasonto asemzabalazweni wokwanelisa izidingo ezingokomoya zalabo abaphendukela kuwo? Labantu bangakuthola yini ukuqondiswa okungokomoya namandla abawafunayo? Ngokuqondile, inkolo ingahlangabezana yini nalesisimo esibucayi sanamuhla?