Zigcine ‘Ungenacala Lokwezwe’
“Ukukhonza okumhlophe okungenabala phambi kukaNkulunkulu uBaba yilokhu ukuhambela izintandane nabafelokazi osizini lwabo nokuzigcina kungabi-yicala lokwezwe.”—JAKOBE 1:27.
1, 2. Iziphi ezinye zezimfuneko zokukhulekela okuhlanzekile?
UJEHOVA ufuna ukukhulekela okuhlanzekile. (Johane 4:23, 24) Phakathi kwezinye izinto, inkolo engenabala ikhuthaza ukukhathalela kwenkuthalo nokunothando ngabaswele. (Galathiya 2:10) Idinga ukuba nathi sizigcine singenacala lokwezwe, okungukuthi, umphakathi wesintu ongalungile ohlukanisiwe noNkulunkulu futhi ‘osemandleni omubi,’ uSathane uDeveli.—1 Johane 5:19.
2 “Ukukhonza okumhlophe okungenabala phambi kukaNkulunkulu uBaba yilokhu,” kubhala umfundi uJakobe, “ukuhambela izintandane nabafelokazi osizini lwabo nokuzigcina kungabi-yicala lokwezwe.” Enye inguqulo ithi: “Inkolo ehlanzekile, engangcolisiwe, emehlweni kaNkulunkulu uBaba wethu yilena: ukusiza izintandane kanye nabafelokazi uma beswele, nokuzigcina ungangcolisiwe yizwe.”—Jakobe 1:27, The Jerusalem Bible.
3. Imiphi imibuzo esizoyicabangela manje?
3 Kodwa thina njengezinceku zikaJehova, singazigcina kanjani ‘singangcolisiwe yizwe’? Uyini umbono ongokomBhalo ezintweni ezinjengezindaba zezwe zezenhlalo, amalungiselelo emfundo, izindaba zamabhizinisi nezokuzijabulisa?
‘Ukuzigcina Singangcolisiwe Yizwe’
4. UJohane 17:14 noIsaya 2:2-4 ubonisani ngokuqondene nobuhlobo bethu nalelizwe?
4 Njengoba thina njengofakazi bakaJehova ‘asisibo abezwe,’ kumelwe sehluke emphakathini wesintu ongalungile. (Johane 17:14) Ngokwezinga elithile, lokhu kudinga ukuba singathathi-hlangothi maqondana nezindaba zezwe zezombangazwe. Kumelwe futhi sigweme ukuhileleka ebudloveni balo futhi silandele ukuthula njengalabo abaye ‘bakhanda izinkemba zabo zaba ngamakhuba.’—Isaya 2:2-4.
5. Ukuze sihlale singonakalisiwe yilelizwe, yisiphi isinyathelo okumelwe sisithathe njengoba kuboniswe (a) aboku-1 Korinte 6:9-11? (b) Efesu 5:3-5?
5 Njengabantu abafisa ukuhlala bengonakalisiwe yilelizwe, kumelwe sigweme inkulumo, ukuziphatha nemibono evamile kubantu bezwe, kodwa engavumelani neZwi likaNkulunkulu. Ngokwesibonelo, inzondo, ukuhaha, ukuziphatha okuhlazisayo nokutekula ngokuthuka, akunandawo ekuphileni kwethu. (1 Korinte 6:9-11; Efesu 5:3-5) Akumangalisi ukuthi izenzo zethu nemibono kuyahluka kokwabantu bezwe, ngoba abanalo ithemba lethu lobuKristu.
Isikhathi Saloluhlelo Lwezwe Sifushane
6. Ngokucabangela eyo-1 Korinte 7:29-31, oFakazi BakaJehova kumelwe bawubheke kanjani umshado, izimpahla noma ezinye izinto zomhlaba?
6 Umphostoli uPawulu wabhala: “Isikhathi siyancipha. Kusukela manje labo abanabafazi mabaziphathe njengabangenabo, nabalilayo njengokungathi abalili, nabajabulayo njengokungathi abazange bajabule; abathengayo njengokungathi abanalutho, nalabo abasebenzisa lelizwe njengokungathi abazange balisebenzise, ngoba uhlelo lwezwe lwamanje luyadlula.” (1 Korinte 7:29-31, Modern Language Bible) Lokhu kubonisa ukuthi nakuba amadoda angamaKristu kumelwe athwale izibopho zomshado, akumelwe enze umshado ube ukuphila kwawo konke. Lapho efa, amaKristu azelwe ngomoya ayobushiya phakade bonke ubuhlobo bawo basemhlabeni, izinjabulo, ukudabuka nezimpahla. Ingani, ngisho namanje, kungakhathaliseki noma anethemba lasezulwini noma lasemhlabeni, amaKristu angase alahlekelwe omkawo noma izinto ezibonakalayo! Ngokungaphezulu, ‘ngosizi olukhulu’ kuyolondolozwa ukuphila hhayi izimpahla. (Mathewu 24:21; UmShumayeli 9:11) Ngakho akekho koFakazi BakaJehova namuhla okumelwe abeke umshado, izinto ezibonakalayo noma yini enye yasemhlabeni ibe ngeyokuqala ekuphileni. Esikhundleni salokho, wonke amaKristu kumelwe enze ubuhlobo obuhle noJehova uNkulunkulu bube yinto esemqoka kakhulu. Futhi lokhu kungokubaluleke kakhulu njengoba siphila “ezinsukwini zokugcina” futhi ‘uhlelo lwezwe lwamanje ludlula.’—2 Thimothewu 3:1.
7. Ngokwesinye isazi sezomnotho, yini eye yanda kanye nemfundo, iholo, nokunye?
7 Abantu abaningi bakhathazekile ngekusasa “lohlelo lwezwe lwamanje.” Ngokwesibonelo, umbhali wephephandaba uNancy Brown wacaphuna amazwi esazi sezokongiwa komnotho uEzra Misham njengothi maqondana nokukhula kwemfundo neholo: “Akuzange kulethe bungcono emphakathini. Kanye nokukhula kwezesayensi, ezemfundo nasezintweni ezibonakalayo, umphakathi uye waba nokwanda kobudlova, ukungalaleli, ubugebengu obuncane, ukucekela phansi, ukubulawa kwabantu nokuzibulala, inhlamba.” Okwaphawuleka kakhulu kwakuyilamazwi okuqala esihloko saleliphephandaba: “Kuphela ukungenela kukaNkulunkulu okungasindisa izwe ekuzibhubhiseni.”—Times-Colonist, yaseVictoria, eBritish Columbia, kaMarch 25, 1982.
8. Kungani singamelwe sithole konke esingakuthola kulelizwe?
8 Yebo, uJehova akadalanga umhlaba ukuba uhlalwe umphakathi wesintu ongalungile, kodwa abantu abalungile nabaphelele. (Isaya 45:18; IHubo 37:29, 38) Ngakho-ke uNkulunkulu ngeke asivumele isintu sizibhubhise. Kodwa akungabazeki ukuthi loluhlelo lwezwe elidala ngokushesha luzodlula ngokuphelele. Ngakho-ke, izinceku ezizinikezele zikaJehova akumelwe zisebenzise lelizwe “ngokugcwele.” Noma, njengoba enye inguqulo ikubeka: “Lapho nisasebenzisa izwe, ningazami ukuthola kulo konke eningakuthola, njengoba lelizwe esimweni salo samanje liyadlula.”—1 Korinte 7:31, The New Testament in the Language of Today, kaWilliam F. Beck.
Singalisebenzisa Lelizwe Na?
9. (a) Abantu bakaJehova bangalisebenzisa ngezinga elingakanani ngokufanele lelizwe? (b) Ngokucabangela uMathewu 6:31-33 no-1 Thimothewu 6:7, 8, imuphi umbono okumelwe sibe nawo ngasezintweni ezibonakalayo?
9 Njengofakazi bakaJehova abazinikezele, ingabe kulungile ngathi ukuzuza okuthile kulelizwe? Yebo, uPawulu wabonisa ukuthi singalisebenzisa izwe, kodwa hhayi ngokugcwele. Ngakho-ke, singawasebenzisa amalungiselelo ezwe angokomthetho ekufezeni izibopho zethu ezingokomBhalo nasekushumayeleni isigijimi soMbuso. (1 Thimothewu 5:8; 6:17-19) Nokho, njengoba sifuna ukuhlala ‘singenacala lokwezwe,’ akunakufaneleka ukuhileleka ezingxabanweni zalo, ekubhikisheni, nasekuchukuluzaneni kwezizwe ngamazwi nasekulweni ngokoqobo noma ezindabeni ezifanayo. Akumelwe sisekele olunye uhlangothi kunolunye ngisho nangasese. Futhi akumelwe sikhathazeke ngokungafanele ngemisebenzi yethu yokuziphilisa noma ukuchuma ngokwezinto ezibonakalayo, ngoba uJesu wathi: “Ngakho-ke ningakhathazeki nithi: Siyakudlani? noma: Siyakuphuzani? noma: Siyakwembathani na? Ngokuba konke lokhu abezizwe bayakufunisisa; ingani uYihlo wasezulwini uyazi ukuthi niyakudinga konke lokhu. Kodwa funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina.” Futhi uJesu wakwenza lokho ayekushumayela, ngoba nakuba izimpungushe zazinemigodi nezinyoni zinezidleke, wayengenandawo yokuqamelisa ikhanda lakhe. Ngakho-ke, masaneliswe ukudla nokokwembatha lapho “sifuna kuqala umbuso.”—Mathewu 6:31-33; Luka 9:58; 1 Thimothewu 6:7, 8.
10. Ngokuqondene nemfundo, imiphi imibuzo okufanele icatshangelwe ngokomthandazo, futhi ungayiphendula kanjani?
10 Khona-ke, kuthiwani ngomsebenzi wezwe wokuziphilisa? Nokho, njengoba lelizwe liyodlula osukwini lwethu, ingabe kungaba okunengqondo ukuhlela ukuphila okunikezelwe ekuzithuthukiseni kulelizwe? (Mathewu 24:34) Lutho neze! Futhi ngokuqinisekile lombono uyothinta umbono wethu ngasemfundweni yezwe, akunjalo? Nakuba imfundo eyisisekelo idingeka, ezikoleni zemfundo ephakeme cishe akunakwenzeka ukubalekela ukushanelwa igagasi elandile lokucabanga kwezwe. Yebo, kumelwe kwenziwe isinqumo somuntu siqu maqondana nemfundo. (Galathiya 6:5) Kodwa imibuzo enjengalena elandelayo idinga ukucatshangelwa ngokomthandazo: Phakathi neminyaka echithelwa eyunivesithi, ingabe abafundi baye bakwazi futhi ‘ukuqhubeka befuna kuqala uMbuso nokulunga kukaJehova’? Ingabe abathintwa ngokuphelele imicabango elulaza ukholo lweqiniso? (Kolose 2:8) Ingabe abangane bezwe baye baba yithonya elihle kubo, noma baye baba elilimazayo ngokomoya? (1 Korinte 15:33) Futhi ingabe abantu abaningi abanemfundo ephakeme baye bakulondoloza ukuzithoba?—Filipi 2:2, 3.
11. Naphezu kwesimo semfundo yomuntu, iluphi usizo olunikezwe lapha lokuhlola izisusa?
11 Ngisho nabanye abaya ezikoleni zokufundela imisebenzi bangase bagxile kakhulu emsebenzini abawufundelayo kangangokuba bangabi naso isikhathi sokusisebenzisela ukukhulekela uJehova. Ngakho-ke, kungakhathaliseki ukuthi siyini isimo semfundo, okuningi kuxhomeke ezisuseni zomuntu. Ingabe isifiso sokuzibusa nokuceba siyisici esiyinhloko? Ingabe imfundo iyophumela ekuncipheni okukhulu kwenkonzo kuJehova noma ingabe iyosiza ekukusekeleni enkonzweni engcwele? Nakuba ungumKristu okumelwe azigcine engenacala lokwezwe, ingabe kunalokho uzama ukuzifunela isikhundla kulesisimiso sezinto noma ingabe eqinisweni ubeka izithakazelo zoMbuso kuqala ekuphileni?
12. Yini eye yashukumisa abanye abantu abanemfundo ephakeme ukuba bamukele iqiniso loMbuso?
12 Siyajabula ngokuthi abanye abantu abafunde kakhulu baye balamukela iqiniso loMbuso. Kodwa abakwenzanga lokhu ngenxa yemfundo yabo ephakeme. Kunalokho, baqaphela ukuthi, naphezu kwemfundo ephakeme, ukuphila kwakungenanjongo ngoba babengenaNkulunkulu futhi bengenalo ithemba eliqinisekile. Manje bayazi ukuthi ‘kababaningi abahlakaniphileyo, abanamandla nabayizikhulu’ abanokuvunyelwa kwaphezulu. (1 Korinte 1:26-31) Kodwa, nabo ngokwabo bajatshuliswa ukuthi, ekugcineni, baye bathola injongo yoqobo ekuphileni njengofakazi bakaJehova.
“Ezentengiselwano Zokuphila”
13. U-2 Thimothewu 2:3, 4 usikiselani ngokuqondene neminako yezamabhizinisi nomKristu ozinikezele?
13 Njengoba sifuna ukuzigcina singonakalisiwe yilelizwe, imuphi umbono okumelwe sibe nawo ngaseminakweni yalo yezamabhizinisi? Nokho, umphostoli uPawulu watshela uThimothewu: “Hlanganyela nami ukuhlupheka njengebutho elihle likaKristu. Akakho osempini olibala imidingo yalokhukuphila, aze akholeke kulowo abuthwé nguye.” (2 Thimothewu 2:3, 4) AmaKristu kumelwe asebenze futhi azondle ngobuqotho kanye nemikhaya yawo. Kodwa bekungeke yini kumangalise uma umKristu ozinikezele kukhulunywa ngaye ngokuyinhloko njengommeleli webhizinisi elithile esikhundleni sokuba yisikhonzi? Ingabe akumelwe, ngokuyinhloko, aziwe njengommemezeli woMbuso futhi “njengebutho elihle likaKristu”?
14. AmaHeberu 13:18 angasetshenziswa kanjani ekusebenzelaneni kwethu kwezebhizinisi?
14 Khona-ke, ezimweni zamabhizinisi, ukuzihlola kudingeka ngezindlela ezihlukahlukene. Ngokwesibonelo, iqiniso lokuthi singase sisebenzelane nabantu bezwe abanobugovu akuzona izaba zokusebenzisa imikhuba yabo yokukhohlisa nokungathembeki kanye nolimi lwabo olubi. Kunalokho, kumelwe ‘siziphathe ngokwethembeka kuzo zonke izinto.’ (Heberu 13:18) Kuyiqiniso, singase singakutholi ukuphathwa okufanayo ngabantu abalukhuni bamabhizinisi balelizwe. Kodwa singaqiniseka ukuthi uJehova uyosibusisa ngenkambo yethu yokwethembeka, futhi lena ngenye indlela ‘esingahlobisa ngayo isifundiso sikaNkulunkulu uMsindisi wethu.’—Thithu 2:9, 10.
15. Isiphi iseluleko esingokomBhalo esinikezwa ngokuqondene nokuhileleka komuntu kwezamabhizinisi?
15 Njengalabo abafisa ukuhlala bengonakalisiwe yilelizwe, kumelwe “senze okuhle kubo bonke, kepha ikakhulu kwabendlu yokukholwa.” (Galathiya 6:10) Kodwa siyobe singenzi lokhu uma sithuthukisa ngobugovu imisebenzi yethu yezamabhizinisi ngokusebenzisa ukujwayelana kwethu nabantu bakaNkulunkulu ukuze senze inzuzo ngabo. Yebo, amaKristu kumelwe ‘ahambe njengabahlakaniphileyo.’ (Efesu 5:15) Iqiniso lokuthi othile othiwa umzalwane uza kithi necebo lokuceba ngokushesha kumelwe lingabi yisizathu sokuba sinxenxwe kalula ukuba sihlukane nemali yethu. Ngesizathu esihle inhlangano kaNkulunkulu iye yasixwayisa ngezikhathi ezithile ngalabo abathi bangabafowethu abangokomoya, kodwa abafuna ukuzitholela izinzuzo ezingafanele ‘ngezimvu’ zikaJehova.
Ukungabi Ngowezwe Ngazo Zonke Izindlela
16. Iziphi ezinye izindlela zokubonisa ukuthi sizigcina ‘singenacala lokwezwe’?
16 Ngokusobala, asinakuzisho zonke izindlela oFakazi BakaJehova ababonisa ngazo ukuthi bazigcina ‘bengenacala lokwezwe.’ Nokho, ngokuqinisekile, ukuzitika ophuzweni oludakayo, ukuthanda kakhulu imidlalo yokuncintisana okukhulu noma enobudlova, ukuchitha amahora ubukela amabhayisikobho noma izinhlelo zethelevishini ezibonisa ngezigebengu, ababulali, nabanye abadlali abaziphethe kabi, ukufunda izincwadi ezigxile ebulilini nokudlala imidlalo enobudlova yamavideo akuzona izindlela zokuzigcina singangcolisiwe yilelizwe. (1 Korinte 6:9, 10; 15:33; Galathiya 5:19-26; 1 Petru 4:3) UJehova ulindele ukuba ofakazi bakhe bagweme ukweqisa, ukuziphatha okubi nobudlova balelizwe. Ngakho akumelwe sifune ulwazi noma okuhlangenwe nakho ebubini bezwe, kodwa kumelwe sibe ‘abantwana abangazi lutho ebubini.’—1 Korinte 14:20; qhathanisa no-1 Johane 3:2, 3.
17. Ukungangcoliswa kwethu yizwe kumelwe kubuthinte kanjani ubuhlobo bethu nabanye?
17 Ukuba ngongangcolisiwe yilelizwe kufinyelela kuzo zonke izici zokuphila kwethu futhi ngokuqinisekile kuhilela ubuhlobo bethu nabanye. Nakuba izici ezinjengomhawu obabayo, ukuxabana, ukuqhosha nokuqamba amanga zivamile kulelizwe, azivumelekile phakathi kwethu, ngoba uJakobe wabhala: “Ngubani ohlakaniphileyo nowaziyo phakathi kwenu na? Makakhombise ngenkambo enhle imisebenzi yakhe ngobumnene bokuhlakanipha. Kepha uma ninomhawu obabayo nombango ezinhliziyweni zenu, ningazibongi, ningaliqambeli iqiniso. Lokhukuhlakanipha akusikho okwaphezulu kodwa kungokomhlaba, kungokwemvelo, kungokwamademoni; ngokuba lapho kukhona umhawu nombango, kukhona isiyaluyalu nezenzo zonke ezimbi.” (Jakobe 3:13-16) Yeka ukuthi kubaluleke kangakanani ukubonisa ‘ubumnene bokuhlakanipha’ ‘nokuzama ukuhlala ngokuthula nabo bonke abantu’! (Heberu 12:14) Ngokuqinisekile, njengofakazi abathembekile bakaJehova, asinakuvumela ukungezwani nje komuntu siqu konakalise ubuhlobo bethu nabafowethu nodade okholweni. Kunalokho, kumelwe ‘sibekezelelane, sithethelelane, uma umuntu enensolo komunye njengoba neNkosi yasithethelela.’ (Kolose 3:13) Leyo akuyona indlela evamile yezwe yokusebenzelana nabanye, kodwa kuyindlela yaphezulu.
18. Ukuzehlukanisa kwethu nezwe kuba sobala ikakhulukazi uma senzani?
18 Ukuzama ukuhlala ngokuthula nabantu abangaphakathi nabangaphandle kwebandla lobuKristu kuyindlela ebalulekile yokubonisa ukuthi asingcolisiwe yilelizwe. Kodwa ukwehluka kwethu kulo kusobala ikakhulukazi uma sigcina ukuma kwethu njengamasosha angamaqhawe kaJesu Kristu, sembethe ngokuphelele isivikelo somoya sikaNkulunkulu futhi ‘izinyawo zethu zigqokisiwe ukulungela ukushumayela ivangeli lokuthula.’ (Efesu 6:11-18) Kunabaningi abasalambele futhi bomele isigijimi soMbuso esinikeza ukuphila. Ngakho-ke, sengathi singasebenzisa ngokungenabugovu impahla yethu, ukuhlakanipha namandla emsebenzini omuhle wokumemezela “ivangeli” phakathi nalesisikhathi esifushane esisasele kuze kube yilapho lesisimiso siphela.—Mathewu 24:14.
19. Yini esingalindela ukuba uSathane ayenze kulezizinsuku zokugcina ezidlula ngokushesha, kodwa yini esiyophumelela ukuyenza ngosizo lwaphezulu?
19 Kulezinsuku zokugcina ezidlula ngokushesha, uSathane, unkulunkulu walelizwe, uyosihlasela ngokwengeziwe njengofakazi bakaJehova abathembekile. UDeveli uyosigabisela ngomcebo walelizwe wezinto ezibonakalayo, ukuheha kwalo okukhazimulayo, imfundo yalo ephakeme nokunye okwengeziwe njengomzamo wokugcina wokusiphambukisa enkonzweni engcwele kuNkulunkulu wethu. Kodwa ngosizo olungehluleki lwaphezulu siyophumelela ekuhlaleni ‘singenacala lokwezwe’ kube udumo kuNkulunkulu wethu ongcwele, uJehova.
Ubungaphendula kanjani?
□ NgokukaJakobe 1:27, iziphi ezinye zezimfuneko zokukhulekela kweqiniso?
□ Iziphi ezinye zezindlela zokuzigcina ungonakalisiwe yizwe?
□ Iqiniso lokuthi lelizwe liyadlula lingaba namuphi umphumela embonweni wethu ngemfundo ephakeme?
□ Mayelana nokusebenzelana kwezamabhizinisi, ukuzihlola kudingeke ngaziphi izindlela?
□ OFakazi BakaJehova bangabonisa kanjani ukuthi ‘abanacala lokwezwe’ ngokuqondene nokuziphatha kwabo kanye nobuhlobo nabanye?
[Isithombe ekhasini 15]
NjengamaKristu angathathi-hlangothi, oFakazi BakaJehova bayabuxwaya ubudlova bezwe
[Isithombe ekhasini 16]
Akuyona inqubekela phambili yasemhlabeni eletha ukuvunyelwa uJehova
[Izithombe ekhasini 18]
UJehova ulindele ofakazi bakhe ukuba bahlale bengenacala ekweqiseni kwalelizwe, ukuziphatha okubi nobudlova