Kwenzekani Ekuphileni Komkhaya?

“NGICELA ningisize. Umyeni wami ungiphatha kabi futhi angisakwazi ukukubekezelela. Akekho engingaphendukela kuye. Ngingedwa ngaphandle kwendodana yami enonyaka owodwa. Umyeni wami uyisidlwangudlwangu futhi izingalo zami ngezinye izikhathi ziba mnyama ngenxa yezibhakela zakhe. Wangingqimuza ekhaleni emasontweni amabili adlule futhi ngopha kakhulu ekhaleni. Khona-ke lapho silele ngobunye ubusuku waqala ukungiklinya futhi kwaze kwaba yilapho ngiquleka lapho aqaphela khona ayekwenzile. Kwaphela izinsuku kunzima ngami ukugwinya. . . .

“Umyeni wami uyathetha futhi aphule izinto endlini futhi ethuse umntwana. Ngemva kokuba umyeni wami engilahle phansi ngobunye ubusuku, umntwana wadazuluka wamemeza ngokwethuka futhi ngangilimele, ngethuke kakhulu ukuba ngingenza noma yini. . . . Ngiye ngamtshela ukuthi ngifuna idivosi. Manje angilokothi ngithi ngifuna ukuhamba funa aqale futhi ngesaba ukuthi ukuphila kwami noma kwendodana yami kusengozini.”—Kucashunwe encwadini Scream Quietly or the Neighbours Will Hear, nguErin Prizzey.

Ingabe yisehlakalo esisodwa? Phinde! EUnited States iyodwa kulinganiselwa ukuthi unyaka ngamunye abafazi abayisigidi nezi-800 000 bashaywa abayeni babo, okungukuthi, bayakhahlelwa, bashaywe ngesibhakela nangokuthile, basongelwe noma bahlaselwe ngommese noma isibhamu. Hlanganisa kulokhu izimo zokoniwa ngokobulili nokunganakwa kwabantwana ngokomzwelo, ukuphathwa kabi kwabazali nomkhulu, futhi isimo siba ngisho esidabukisa kakhulu. Kungakho kunalombuzo: Kwenzekani ekuphileni komkhaya?

Unesizathu sokuthinteka. Ungase ubuze, ‘Kungani mina? Ngingakuqinisekisa ukuthi lezozinto azenzeki emkhayeni wami!’ Noma kunjalo, izinkinga ezinjalo zemikhaya kumelwe zikuthakazelise. Ngani? Ngenxa yokuthi iBhayibheli laprotetha kudala ukuthi ukuvama kweziphazamiso ezinjalo zemikhaya kwakuyoba ingxenye yobufakazi obukhanyayo bokuthi siphila “ezinsukwini zokugcina” zalesisimiso sezinto somhlaba wonke.a Phawula lokho umphostoli uPawulu akubikezela: “Yazi lokhu ukuthi ezinsukwini zokugcina kuzakuvela izikhathi ezinzima; ngokuba abantu bazakuba-ngabazithandayo, . . . nabangalaleli abazali, nabangabongiyo, nabahlazisayo, nabangenalutando.”—2 Thimothewu 3:1-3.

Ingabe amazwi kaPawulu ngempela ayagcwaliseka namuhla? Zisezingeni elingakanani nje izingxabano ezinjalo zemikhaya? Ingabe zisekela ukugcwaliseka kwesiprofetho sikaPawulu esibonisa ukuthi ngempela siphila “ezinsukwini zokugcina”?

[Umbhalo waphansi]