Indlela Yokuba Yizikhonzi Eziphumelelayo
“Ngalokho-ke ngithumele kini uThimothewu . . . , oyakunikhumbuza ngokuhamba kwami okukuKristu, njengokuba ngifundisa ezindaweni zonke emabandleni onke.”—1 KORINTE 4:17.
1, 2. Ukuze umuntu adonselwe eqinisweni, isiphi isici esibalulekile? (IzEnzo 8:12)
NGOKUTHULULWA komoya engcwele ngePentekoste, ngo-33 C.E., ibandla lobuKristu lakhula futhi landa ngokushesha. (IzEnzo 2:40-42; 4:4; 6:7; 11:19-21) Yini eyaholela ekuphumeleleni kwalo? Kungani amaJuda amaningi kangaka futhi kamuva amaSamariya nabeZizwe bamukela uKristu nesigijimi soMbuso kaNkulunkulu?—IzEnzo 8:4-8; 10:44-48.
2 Ngomuntu ukuze amukele izindaba ezinhle zobuKristu, kumelwe afinyelele izici ezithile. Okokuqala, umuntu kumelwe aqaphele umusa kaNkulunkulu ongafanele esintwini ngokuthatha isinyathelo kuqala ngokuthumela iNdodana yakhe emhlabeni njengomhlatshelo wesihlengo. Njengoba umbhali weBhayibheli uJohane akubonisa: “Uthando lukaNkulunkulu lwabonakaliswa kithi ngalokho ukuthi uNkulunkulu wathumela ezweni iNdodana yakhe ezelwe yodwa ukuba siphile ngayo. Uthando lukulokhu, kungesikho ukuthi thina samthanda uNkulunkulu, kepha ukuthi yena wasithanda thina, wathuma iNdodana yakhe ibe-yinhlawulo ngezono zethu.”—1 Johane 4:9, 10.
3. Kungani kubalulekile ukuphaphamela isidingo esingokomoya?
3 Esinye isici esibalulekile siwumbono womuntu ngamunye ezintweni ezibalulekile ezingokomoya. UJesu wathi: “Babusisiwe abampofu emoyeni, ngokuba umbuso wezulu ungowabo. Babusisiwe abalambele, bomele ukulunga, ngokuba bayakusuthiswa.” (Mathewu 5:3, 6) Umuntu ozethembayo, ozenzisayo ngokuvamile akasiqapheli isidingo esingokomoya futhi akalamukeli iqiniso. Uma enikezwa isigijimi soMbuso oFakazi BakaJehova, umuntu onjalo ngokuvamile uyophendula ngokuthi, ‘Anginasithakazelo. Nginenkolo yami siqu.’ Ngokufanayo, umuntu ogxile kakhulu eminakweni yezinto ezibonakalayo akanakuba nesikhathi sezinto ezingokomoya.—Mathewu 6:33, 34; 7:7, 8; Luka 12:16-21.
4. Imiphi imibuzo manje ezocatshangelwa?
4 Kodwa kuthiwani ngalabo “abampofu emoyeni” futhi abalungele ukufuna uNkulunkulu noMbuso wakhe? Bangatholakala futhi babonakale kanjani? Ingabe kukhona esingakwenza njengezikhonzi zeZwi likaNkulunkulu ukuze senze isigijimi sethu siqondakale kangcono? Singaba kanjani izikhonzi eziphumelela ngokwengeziwe?
Izindlela Zikabani Okumelwe Sizisebenzise?
5. NgokukaPawulu, yini uThimothewu ayeyoyifundisa abaseKorinte?
5 Lapho umphostoli uPawulu ebhala incwadi yakhe yokuqala kumaKristu aseKorinte, wawatshela ukuthi wayewathumelela uThimothewu ‘owayezowakhumbuza ukuhamba kwakhe [uPawulu] mayelana noKristu Jesu.’ Esikhundleni sokuthi “ngokuhamba,” ezinye izinguqulo zithi “izindlela zokuphila,” “indlela engiphila ngayo.” Nokho, iGreek-English Lexicon of the New Testament kaProfesa Thayer ilihumusha kanje lelivesi: “Izindlela mina njengesikhonzi sikaKristu nomphostoli engizilandelayo ngokwesikhundla sami.” Njengoba uPawulu ephetha lomusho ngokuthi, “njengokuba ngifundisa ezindaweni zonke emabandleni onke,” kunengqondo ukuphetha ngokuthi amazwi akhe ahlanganisa inkonzo yakhe yenkuthalo hhayi nje ukuziphatha kwakhe siqu kobuKristu.—1 Korinte 4:17.
6. Kungani inkonzo kaJesu yayiphumelela?
6 Inkonzo kaJesu yayingeyona eyokushampuza. Wasebenzisa futhi isu ekushumayeleni kwakhe. Ngokwesibonelo, wafundisa ngokunakekela abaphostoli bakhe, futhi kamuva abavangeli abangama-70, indlela yokushumayela ngokuphumelelayo. Ukusebenzisa kwakhe njalo imifanekiso, imibuzo nezingcaphuno zemiBhalo kwakuyisibonelo kubo. Kuseyindlela engcono kakhulu nanamuhla.—Luka 9:1-6; 10:1-11.
7. Singazidlulisela kanjani izindaba ezinhle kubo bonke abantu?
7 Njengoba inkonzo yobuKristu iyindaba yokuphila okuphakade noma ukufa, singazidlulisela kanjani izindaba ezinhle kubantu abaningi ngangokunokwenzeka? Yebo, singenza kanjani ukuba singabi “nacala egazini labo bonke”? Ngokusebenzisa zonke izindlela zenkonzo, ezihlanganisa, njengoba umphostoli uPawulu asho, inkonzo ‘yendlu ngendlu.’ Enye incwadi yesiPanishi ithi ngezEnzo 20:20: “Lapha sinendlela yokushumayela uPawulu ayisebenzisa kwabase-Efesu.”—IzEnzo 20:20-27.
Isithiyo Sokuqala
8, 9. (a) Isiphi isithiyo sokuqala esivamile enkonzweni? (b) Kungani uJesu akwazi ukukhuluma ngesibindi?
8 Ngokuvamile isithiyo sokuqala okumelwe sisinqobe enkonzweni yithi ngokwethu. Abanye bazizwa bengakhululekile, bengafaneleki futhi benemfundo encane ngokwabantu abahlangana nabo. Kodwa uJesu wazizwa kanjani? Ingabe wayeke waya ezikoleni zokufundela ubufundisi? Ingabe wayenemfundo ephakeme? Kodwa lapho eshumayela, abantu bakubo basabela kanjani? UMathewu uyasitshela: “Bamangala, bathi: Lo ukuthathaphi lokhukuhlakanipha nalawamandla na?” Kuyiqiniso, uJesu wayeyiNdodana kaNkulunkulu ephelele. Kodwa izindlela zakhe zaziwusizo ikakhulukazi kubafundi bakhe “abangafundile,” okwakumelwe bamlingise. Ikuphi ukusabela abakuvusa, ngisho naphakathi kwezitha zabo zenkolo? “Kwathi bebona isibindi sikaPetru noJohane, beqonda ukuthi bangabantu abangafundile, bayimifunda nje, bamangala; babazi ukuthi kade benoJesu.”—Mathewu 13:54; IzEnzo 4:13.
9 Kodwa, uJesu wazitholaphi zonke lezozinto ayezifundisa? Kungani ayephumelela kangaka enkonzweni yakhe? Ingabe wasebenzisa ukushiseka okweqile njengabashumayeli banamuhla abakumaTV ukuze akwazi ukuthonya izilaleli zakhe? Cha. Isisekelo sikaJesu sasiwubulula—wayekhuluma ulimi lwabantu abavamile, wayeqaphela izidingo zabo ezingokomoya, futhi okubaluleke kunakho konke, uJesu wayazi ukuthi wayesekelwa uYise. Wakucacisa lokhu lapho ememezela ngokuthunywa kwakhe kwenkonzo esinagogeni edolobheni lakubo, iNazaretha, eGalile. Wafunda emqulwini womprofethi uIsaya: “Umoya weNkosi uphezu kwami, ngokuba ingigcobile ukuba ngishumayele ivangeli kwabampofu, ingithumele ukumemezela ukukhululwa kwabathunjiweyo, nokubona kwabayizimpumputhe, nokuhlenga abacindezelweyo, nokumemezela umnyaka omuhle weNkosi. . . . Waqala ukukhuluma kubo ethi: Namhla nje ugcwalisekile lombhalo ezindlebeni zenu.”—Luka 4:16-21.
10, 11. (a) Kumelwe sizizwe kanjani ngenkonzo yethu? (b) UPawulu uphendula kanjani?
10 Namuhla sinokusekelwa okufanayo enkonzweni yethu—uJehova uNkulunkulu, iNkosi ePhakeme yendawo yonke. Sishumayela isigijimi sakhe, ukuhlanipha kwakhe. Sincika eZwini lokhe futhi silisebenzisa ngokukhululeka ezingxoxweni zethu. Ngakho-ke, ingabe kumelwe sizinyeze ngokushumayela kubantu abafunde kangcono noma abacebile?
11 UPawulu uyaphendula: “Siphi isazi na? Uphi umbhali na? Uphi umphikisi walesisikhathi na? UNkulunkulu kakwenzanga kube-yize ukuhlakampha kwalelizwe na? . . . Ngokuba bhekani ukubizwa kwenu-bazalwane: kababaningi abahlakaniphileyo ngokwenyama, kababaningi abanamandla, kababaningi abayizikhulu, kodwa izinto zobuwula zezwe uNkulunkulu uzikhethile ukuba ajabhise abahlakaniphileyo; nezinto ezibuthakathaka zezwe uNkulunkulu uzikhethile ukuba ajabhise izinto ezinamandla; nezinto eziphansi zezwe nezinto ezidelelwayo uNkulunkulu wazikhetha, nezinto ezingekho, ukuba achithe ezikhona, ukuze kungabikho-nyama ezibongayo phambi kukaNkulunkulu.”—1 Korinte 1:18-29.
12. Impumelelo enkonzweni yethu ivelaphi? (Jakobe 4:8)
12 Impumelelo enkonzweni ayiveli emfundweni yethu noma ozalweni. Ivela esigijimini soMbuso ngokwaso esifinyelela inhliziyo esabelayo yomuntu okhathalela isidingo esingokomoya. Esinye isici siwumusa kaJehova kulowomuntu, ngoba njengoba uJesu asho: “Akakho ongeza kimi, uma uBaba ongithumileyo engamdonsi.”—Johane 6:44.
13. (a) UPawulu noBarnaba basabela kanjani ekuphikisweni? (b) Singaba nayo kanjani injabulo enkonzweni ngaso sonke isikhathi?
13 Ngakho-ke, ngokuthembela ekusekeleni kukaJehova, singafeza inkonzo yethu ngokholo njengoPawulu noBarnaba ekhulwini lokuqala. Lapho beshumayela eIkoniyu, inkonzo yabo yabangela ukwehlukana okukhulu kwemibono nokuphikiswa okuthile. Ingabe lokho kwabenza bayeka? Indaba kaLuka iyasitshela: “Nokho bahlala isikhathi eside, befundisa ngesibindi ngeNkosi eyafakazela izwi lomusa wayo, ibanika ukuba kwenziwe izibonakaliso nezimangaliso ngezandla zabo.” Uma nathi ngokufanayo siba nombono oqondile ngabantu abasensimini yethu, futhi sishiyele imiphumela ezandleni zikaJehova, inkonzo ngaso sonke isikhathi iyoba yinjabulo, ingabi umthwalo.—IzEnzo 14:1-3; Jakobe 1:2, 3.
Indlela Abantu Abasabela Ngayo
14. Abantu basabela kanjani ekushumayeleni kukaPawulu?
14 Ekushumayeleni kwabo, uJesu noPawulu abazange bathole ukusabela okuhle ngaso sonke isikhathi. Ngokwesibonelo, basabela kanjani abantu lapho uPawulu eshumayela eAthene? Umlando uyasitshela: “Kepha abathile kuzo izazi zamaEpikhuru nezamaStoyiku baphikisana naye; abanye bathi: Leliphoshophosho lithini na? Abanye bathi: Kungathi ungomemezela onkulunkulu abangaziwayo; ngokuba wayeshumayela ivangeli ngoJesu nangokuvuka kwabafileyo. Base bemthatha, bamyisa eAreyophagu, bethi: Ungesazise ukuthi siyini lesisifundiso esisha esikhulunywa nguwe na? Ngokuba uletha ezindlebeni zethu okuthile okungaziwayo.”—IzEnzo 17:18-20.
15. Abantu basabela kanjani enkonzweni yakho? Kodwa yini okumelwe siyikhumbule?
15 Kumelwe siqaphele ukuthi isigijimi sethu nokuchazwa kwaso ngabezindaba nabaphikisi kungasenza sizwakale singajwayelekile kubantu abaningi banamuhla. Ngenxa yalokho, abantu abaningi, bebangelwa yinzwabethi, bazinquma kusengaphambili izinto futhi basenqabe ngaphandle kokusilalela. Abanye, njengabaseAthene, bamukela ukwaziswa okwengeziwe ngaphambi kokuba benze isinqumo. Yebo, uma sebelalele basenokulihleka ithemba loMbuso njengokuthile okungenakukholeka. Nokho, khumbula ukuthi benqaba uKristu nesigijimi sakhe, hhayi wena.—IzEnzo 17:32-34; Mathewu 12:30.
Ukusuka Ekubeni Izihambi Kuya Ebunganini
16. (a) Singasabela kanjani uma abantu esingabazi besivakashela ekhaya lethu? (b) Yini okumelwe ifezwe isingeniso sethu?
16 Uzizwa kanjani uma izihambi zifika ekhaya lakho? Imiphi imibuzo engase ifike ngokushesha engqondweni yakho? Mhlawumbe, Bangobani? Bafunani? Ingabe bazongikhathaza? Kumelwe sikukhumbule lokhu uma sizethula njengezikhonzi ezithile emzini womunye umuntu. Ngakho-ke isingeniso sethu kumelwe senze izingqondo zabo ziphenduleke kuleyomibuzo. Kodwa kanjani? Nokho, yini uJesu ayisikisela njengesingeniso? Wathi, “Ekungeneni kwenu endlini niyibingelele. Uma indlu ifanele, ukuthula kwenu makuze phezu kwayo; kodwa uma ingafanele, ukuthula kwenu makubuyele kini.”—Mathewu 10:12, 13.
17. Singamenza kanjani umuntu akhululeke esingenisweni sethu?
17 “Ukuthula kwenu, makuze phezu kwayo.” Kubonisani lokhu? Ukuthi enkonzweni yethu sifisa ukuba ukuthula kwethu kube kuwo wonke umuntu nasemkhayeni. Kanjalo amazwi ethu okuvula kumelwe abonise ukuthi siyizikhonzi zikaNkulunkulu ezithanda ukuthula. Ngisho nanamuhla abantu bobuJuda namaMoslemu babingelela ngokuthi, “Ukuthula makube kuwe” (noma “Ukuthula” “Shalom aleichem,” noma “Shalom” ngesiHeberu, nokuthi “Assalām ‘alaikum” noma “Salām,” ngesiArabhu). Yebo, ukubingelela kwethu kuyohluka emazweni ngamazwe ngokwenjwayelo yendawo. Kodwa inhloso iyafana—iwukwenza umuntu akhululeke ukuze alalele isigijimi soMbuso. Ngokuvamile ukusho igama lakho kuqala nokuthi uhlala kuphi, kungasiza kulokhu. Kubonisa ukuthi akukho lutho olufihlayo. Injongo yakho nokuthembeka kusobala kubo bonke ukuba bakubone. Khona-ke wenza njengoba uPawulu aluleka: “Qiniseka ukuba ukuziphatha kwakho phambi kwabantu kungabi nakugxekwa. Ngokusemandleni akho, hlala ngokuthula nabantu bonke.”—Roma 12:17, 18, Phillips.
18. Iyiphi indinganiso okumelwe sihlangabezane nayo ngaso sonke isikhathi enkonzweni yethu?
18 Kungakhathaliseki ukuthi sisenkonzweni yendlu ngendlu noma emgwaqweni, siphambi kwabantu bonke. Ingxoxo yethu nokuziphatha kumelwe ngaso sonke isikhathi kungabi nakusolwa futhi kube nokuthula. Nokho, nakuba intshumayelo yethu imelwe ibe ngethambile nenokuthula, akumelwe ibe ngeyokuzinyeza. Akumelwe sibe namahloni ngokuba yizikhonzi zasobala zikaNkulunkulu.—Marku 8:38.
19, 20. (a) Umuntu angayiqalisa kanjani ingxoxo nabantu abanamahloni emgwaqweni? (b) Kungani uJesu ayephumelela ekuqaliseni ingxoxo yokwethukela?
19 Kwezinye izizwe abantu banenhlonipho enkulu futhi bathanda izindlela zakudala. Abanye bayethuka uma umuntu eza kubona emgwaqweni ebabonisa umagazini. Uma kunjalo, kungani ungasebenzisi indlela yokuhlakanipha okwengeziwe yesingeniso. Umuntu angaqalisa ngokuhlakanipha ingxoxo nomuntu ongajahile futhi khona-ke akhiphe izincwadi zeBhayibheli ngendlela evamile.
20 UJesu wayelulungele ngempela uhlobo olunjalo lokushumayela. Njengoba amaSamariya nabesifazane ngokuvamile babeklolodelwa ngamaJuda, uJesu wayenokuhlakanipha esingenisweni sakhe kowesifazane owayengaziphethe kahle waseSamariya emthonjeni kaJakobe. Ingxoxo yakhe iyisibonelo sokufakaza ngokwethukela nasemgwaqweni. Iyisibonelo esihle futhi sokufundisa okunozwela nokwakhayo.—Johane 4:5-30.
21. Isiphi esinye isici esibalulekile esiboniswa enkonzweni kaPawulu?
21 Kukhona esinye isici esibalulekile okumelwe sicatshangelwe uma sethula izindaba ezinhle zoMbuso. UPawulu wayeyingcweti kuso. Ake ubone ukuthi ungasibona yini ezingenisweni zakhe ezithile ezitholakala kuzEnzo 13:16-20; 17:22 no-22:1-3. Phawula ukuthi endabeni ngayinye wayefuna lokho angavumelana ngakho nezilaleli zakhe. Wayezifanisa nazo nesizinda sazo. Umphumela uwukuthi zazilalela ngisho noma zingavumelani naye. Ngendlela efanayo isingeniso sethu singase sibe ngesifudumele, kube khona ubuhlobo phakathi kwethu nomninikhaya. Mhlawumbe uyaphawula ukuthi kunabantwana ekhaya futhi nawe ungumzali. Khona-ke ninezinto enifana ngazo, isisekelo sobungane. Ninokuthile nje eningakhuluma ngakho okungaholela esigijimini soMbuso!—Mathewu 18:1-6.
22. Imiphi imibuzo manje edinga impendulo?
22 Kodwa lokhu kusikisela kuyisiqalo nje. Iziphi izinyathelo ezengeziwe ezidingekayo ekukhiqizeni omunye umfundi ekugcineni? Yebo, yini enye edingekayo ekusizeni omunye abe nobuhlobo noNkulunkulu ngoKristu? Iziphi izimfanelo eziyokwenza inkonzo yethu iphumelele ngokwengeziwe?
Ungaphendula kanjani?
◻ Iziphi ezinye zezici ezihilelekile ekwamukeleni komuntu isigijimi soMbuso?
◻ Ukwethuka namahloni kunganqotshwa kanjani enkonzweni?
◻ Kumelwe ibe yini inhloso ezingenisweni zethu enkonzweni yasensimini?
◻ Isibonelo sikaJesu nesikaPawulu singasisiza kanjani ekungeneni kwethu abantu?
[Isithombe ekhasini 28]
UJesu wafundisa abafundi bakhe izindlela eziphumelelayo zenkonzo
[Isithombe ekhasini 30]
Imiphi imibuzo efika engqondweni uma kufika isihambi kwakho?