Ukuphila Epharadesi—Ingabe Kuyobangela Isithukuthezi?
“IZITHA ezimbili zenjabulo yomuntu ziwubuhlungu nesithukuthezi.” Ingabe uyavumelana nalombono wesihlakaniphi sekhulu le-19? Abantu abaningi baye baba nesithukuthezi ngezinye izikhathi, kodwa kungani?
Isithukuthezi sihlobene “nesicefe, insakavukela, noma isidina,” “umuzwa wokukhathala nokungeneliseki.” Ngokuvamile siwumphumela womsebenzi ongashukumisi noma ongenelisi. Kodwa kuyiqiniso futhi ukuthi isithukuthezi siyisimo esingokomzwelo. Lokho okuyisithukuthezi komunye umuntu kungaba okujabulisayo komunye.
Ingabe Ukuphila Okuphakade Kuyobangela Isithukuthezi?
Ngokuphambene nesimo somuntu sanamuhla, bonke abazuza ukuphila ePharadesi elithenjisiwe bayovumelana nesimiso sabo noMenzi waso. Ngani? Ngoba bayothola imfundo eyanele yokubalungiselela ukuphila okujabulisayo nokuvuzayo endaweni eyiPharadesi. Sikwazi kanjani lokho? Ngoba umprofethi uIsaya waphefumlelwa ukuba abhale: “Ngokuba umhlaba uyakugcwala ukumazi uJehova njengamanzi asibekela ulwandle.” Yebo, ukumazi uJehova, uMsizi wesintu ophakeme, kuyoba isihluthulelo senjabulo yoqobo yokuphila okuphakade ePharadesi emhlabeni.—Isaya 11:9.
Wonke umhlaba ophelele uyobonisa izimfanelo ezimangalisayo zoMdali oMkhulu. Isintu esilalelayo siyoba nothando olujulile ngoNkulunkulu nesifiso sokwazi nokuqonda izindlela zakhe nokuhlakanipha njengoba kufanekiswa emhlabeni. Ngisho nanamuhla, abantu abangaphelele bayamangala uma befunda izimangaliso nendalo eyinkimbinkimbi. Nokho ngisho nengcweti enkulu kunoma iyiphi indawo ayaneliswa—njalo ifuna ukwazi okwengeziwe. Futhi ngaso sonke isikhathi kunokuningi kokukwazi! Ukuhlakanipha komuntu nesifiso esingeneliseki kubonisa ukuthi ukuphila okuphakade kuyoba okuthakazelisa njalo!—1 Johane 4:7, 8.
Isibonelo salokhu, ngisho naphansi kwezimo zanamuhla ezingaphelele, siyisimo sika-Andrés Segovia oneminyaka engama-90 ubudala, umshayi wesiginci seklasiki odume izwe lonke. Ingabe uthola ukuphila kubangela isithukuthezi? Usalokhu ehamba umhlaba wonke ecula. Nakuba aye wabona ukukhathazwa yizwe kwabanye, “unomdlandla kakhulu, umatasa kakhulu ngomsebenzi wakhe ukuba angakhathala.” Yena ngokwakhe wathi: “Ngifunda futhi ngitadishe ezomlando, ubuhlakani obujulile, ubuciko bazo zonke izinto nomculo.” Yebo, kusenokuningi kokufundwa. Kodwa cabanga nje ukuthi kuyoba kuningi kangakanani okokufundwa ePharadesi lasemhlabeni eliphelele! Futhi njengoba sinamathemba ajabulisayo okuphila phakade esiwagcinelwe, isintu siyoba nesikhathi sokukwenza.
Indaba ka-Andrés Segovia ibonisa elinye iphuzu futhi—amandla omuntu okungenisa ulwazi. Njengoba isazi sokusebenza kwengqondo nokucabanga uPeter Russell abhala kuThe Brain Book: “Emakhanda ethu kunesinye sezimiso eziyinkimbinkimbi kakhulu kulomhlaba esiwaziyo. . . . Akekho umuntu oye waba seduze nokusebenzisa amandla aso aphelele.” Esikhathini sokuphila esilinganiselwe mhlawumbe seminyaka engama-70 noma engama-80, amandla engqondo ahlala cishe engathintiwe. Njengoba uRussell esho: “Njalo kuphawulwa ukuthi sisebenzisa amaphesenti ayi-10 kuphela amandla aphelele engqondo yethu. Lokhu, nakho kubonakala kuwukweqisa. Cishe asisebenzisi ngisho nephesenti elilodwa—kungenzeka iphesenti elingu-0,1 noma ngaphansi.” Ake ucabange ukuthi ingqondo yomuntu iyoba namandla angakanani ePharadesi ngaphandle kokucindezela kokugula nokuguga!
Umsebenzi Weminyaka Eyinkulungwane
Kumelwe kuvunywe ukuthi ngabaningi namuhla ukuphila kuyisidina ngenxa yokuthi babopheke esimisweni esifanayo esivumela ukwehluka okuncane noma ukushukunyiswa kwengqondo. Kodwa uma iBhayibheli likhuluma ngokuphila okuphakade ngaphansi kokubusa koMbuso kaNkulunkulu ngoKristu, libhekisela endleleni yokuphila umuntu wanamuhla angakaze ayazi. Okokuqala, lohulumeni waloMbuso, awunaso isimiso seminyaka emihlanu njengoba eminye imibuso yanamuhla inaso, kodwa ilungiselelo leminyaka eyinkulungwane, njengesiqalo! Leyonjongo igcizelelwe ezingxenyeni ezihlukene zeBhayibheli futhi inikeza ithemba elijabulisayo lemisebenzi ehlukahlukene, yonke eyoba ngeyakhayo nekhiqizayo.—IsAmbulo 20:1-7.
Kuyoba khona okuningi kokwenziwa nokuningi kokufundwa, kanye nezisusa ezinamandla zakho kokubili, leso “sithukuthezi” siyoba igama elikhohlakele. Ngokwesibonelo, uJehova uye wathembisa ukuthi ‘uyobhubhisa ababhubhisa umhlaba.’ (IsAmbulo 11:18) Lokho kusho ukuthi umhlaba owonakalisiwe uyohlanzwa. Cabanga nje ngomsebenzi omkhulu wokubuyisela umhlaba esimweni sawo sakuqala esihle nesiphelele—kususwe amafuku nezindawo eziminyene; kuhlanzwe imifula yomhlaba namanzi ekungcoleni. Uthando ngoNkulunkulu nomakhelwane luyoshukumisa abesilisa abalalelayo nabesifazane ukuba bahlanganyele ngenjabulo kulomsebenzi omkhulu.
Uhlelo Lokwakha, Lokulima Nolokufundisa
Ngokuqondakalayo isimo sePharadesi ngeke sihlanganise ukusetshenziswa kabi kwezindlu okukhona namuhla. Ubani ngempela ofuna ukuphila ezimweni eziminyene ezakhiweni eziwohlokayo, emadlangaleni noma ngisho emigwaqweni? Abaningi bayojabula ngokuba nekhaya elingelabo nendawo yokulima! Yileso isithembiso sikaNkulunkulu kulabo ababonisa ukwethembeka kuye manje. Umphumela wokugcina uyoba umhlaba oyiPharadesi elakhiwe ngabantu abajabulayo, abanelisiwe ngokuphila okunenjongo, bethola injabulo ngokukhonza abanye.—IzEnzo 20:35.
UNkulunkulu uye waqinisekisa ‘ngamazulu amasha nomhlaba omusha’ okuyosho ushintsho oluphelele lwezimo zokuphila ngezigidi zabantu. UIsaya waprofetha: “Bayakwakha izindlu, bahlale kuzo; bayakutshala izivini, badle izithelo zazo. . . . Ngokuba izinsuku zabantu bami ziyakuba-njengezinsuku zomuthi, nomsebenzi wezandla zabakhethiweyo bami uyakugugela kubo.”—Isaya 65:17-23; 2 Petru 3:13.
Lezi zithembiso zaba nokugcwaliseka okuncane ngokubuyiselwa kwamaJuda ezweni lawo ngo-537 B.C.E. Zinokugcwaliseka okukhulu ngendlela engokomoya kulelikhulu lama-20, futhi zibonakalisa ukuthi ukuphila kuyoba njani phakathi nokuBusa Kweminyaka Eyinkulungwane KoMbuso KaKristu emhlabeni. Ngakho uma sihlaziya amazwi kaIsaya ngokushesha siyabona ukuthi asho umsebenzi onenjongo, owakhayo. Loluhlelo lokwakha nokulima luyoba ngolwesikhathi eside ngoba izindlu ngeke zidingwe kuphela yilabo abayosinda iArmagedoni kodwa futhi yizigidi zezigidi zabayobuya kancane kancane phakathi novuko. Yeka amathuba angapheli ayoba khona okuqalisa ukwakha nezinhlobonhlobo zemiklamo!—IsAmbulo 16:14-16; 21:3, 4.
Cabanga lokho uvuko ngokwalo olukushoyo. Okhokho bakho bayovuswa kwabafileyo. Izizukulwane zokhokho bakho uyozibona ngokwakho! Uyokwazi ukulandelela indabuko yakho nemvelaphi yakho, hhayi emibhalweni engenalutho, kodwa ngokukhuluma nokhokho bakho abavusiwe. Ngokuqinisekile lokho ngeke kube isidina!—Johane 5:28, 29.
Ngaphezu kwalokho, phakathi neMinyaka Eyinkulungwane Yokubusa KoMbuso KaKristu kuyokwenziwa isimiso somhlaba jikelele sokufundisa ukuze abavusiwe bazi ngokugcwaliseka kwezinjongo zikaNkulunkulu emhlabeni nalokho okufanele bakwenze ukuze bazuze ukuphila okuphakade. Ngokungangabazeki uJehova uyoveza imithetho emisha eyofanelana nezimo zesintu ezishintshile. Khona-ke abantu bayokwahlulelwa ngemithetho neziyalezo ‘ezisezincwadini’ eziyovulwa phakathi nokuBusa KukaKristu Kweminyaka Eyinkulungwane.—IsAmbulo 20:12.
Ukusebenzisa Amandla Engqondo
Khona-ke, ingabe ukuphila kuyoba isidina, phakathi nokuBusa Kweminyaka Eyinkulungwane nangemva kwalokho? Khumbula amandla engqondo amangalisayo futhi uqhathanise lokho okwaziyo manje nalokho osazokwazi.
Ngokwesibonelo, zingaki izilwane, izitshalo nezinambuzane ongazibiza ngamagama noma uzichaze ngolwazi lwakho siqu? Zingamashumi amabili? Amashumi amahlanu? Ikhulu? Ngabanye abahlala emadolobheni, abangathintani nendalo, lokho kungayinselele ebadalulayo. Nokho omunye usosayensi uyabhala: “Kukhona izinhlobo ezihlukahlukene zezinto eziphila emhlabeni [okuyizidalwa eziphilayo nokuzizungezile] ezingaba izigidi ezi-5.” Zingaki zalezo zinhlobo eziyizigidi ezinhlanu eziphila emhlabeni ongazisho ngamagama? Ngokwesibonelo, zingaki izinhlobo ezehlukene zezinambuzane oye wazibona ekuphileni kwakho? Kunezinhlobo ezingaphezu kwezi-700 000! Futhi kuthiwani ngezinhlobo ezimangalisayo zezinyoni nezimpaphe zazo ezingafani, ukuklanywa nomculo? Zingaki ozaziyo? Kodwa kunezinhlobo eziyizi-8 600 zezinyoni eziphilayo. Umuntu wayeyophila kanjani ngaphandle kwezihlahla? Sithembele kuzo ngokudla, umthunzi, amapulangwe nezinkuni. Kuyokuthatha isikhathi esingakanani ukwazi zonke izinhlobonhlobo ezihlukene zezihlahla eziyizi-20 000?
Nokho lezi kumane kungezimbalwa kweziyizinkulungwane zezindaba ezijabulisa umuntu. (Qhathanisa noJobe, izahluko 38 no-39.) Izinhlobonhlobo zazo nobunzulu akulethi nkinga ngamandla engqondo yethu. Eqinisweni, sinengqondo eklanywe namandla angapheli. Ngakho-ke, isintu, esibusiswe ngengqondo ephapheme nefuna ukwazi, ngeke sibe nendawo yesithukuthezi. Nokho, lokho esikudingayo kuwukuphila okwanele okufanela amandla engqondo. Futhi lokho ngokuqondile kuyisithembiso sikaNkulunkulu ngesintu esilalelayo—ukuphila okuphakade ePharadesi emhlabeni.—Johane 17:3; IsAmbulo 22:1, 2.
Ubuphakade Abubangeli Isithukuthezi
Kodwa nokho elinye ithemba lePharadesi liyaziveza—ukwazi wonke umhlaba, kancane kancane. Ngeke kube khona imingcele yezwe, ngeke kube khona ukuvinjelwa kokuhamba. Buyobe bungasekho ubuzwe, ubuhlanga namandla ezizwe. Bonke bayoqaphela ukuthi bawumkhaya wesintu owodwa, onobunye. Yeka injabulo okuyoba yiyo ukuhamba, futhi kancane kancane ukwazi izigidi “zabafowethu” “nodadewethu” abahlala ngokuthula kuwo wonke umhlaba. Lokho kuyoba umthombo wenjabulo yaphakade—hhayi isithukuthezi!
Izithembiso zikaJehova nezinjongo ziyogcwaliseka ngokuphelele maqondana nalomhlaba: “Abamnene bayakudla, basuthe; abafuna uJehova bayakumdumisa; inhliziyo yenu mayiphile kuze kubephakade. Imikhawulo yonke yomhlaba iyakukhumbula iphendukele kuJehova, nezizukulwane zonke zezizwe ziyakukhuleka ebusweni bakho.” Uma ufisa ukuba phakathi kwabamnene abayophila phakade, zizwe ukhululekile ukuthintana noFakazi BakaJehova noma abanyathelisi balomagazini. Imibuzo yakho iyophendulwa ngaphandle kwenkokhiso futhi nawe ungaba nethemba lokuphila phakade ePharadesi emhlabeni!—IHubo 22:26, 27; Thithu 1:2.
[Isithombe ekhasini 6]
Zingaki izinhlobo zezinyoni, izilwane, izinhlanzi nezitshalo ozaziyo? EPharadesi kuyoba nesikhathi sokufunda ngazo zonke