Siyini Isimo Sethu Kubaphikisi Beqiniso?
“Naphakathi kwenu kuzakuvuka amadoda akhuluma okudukisayo, ahunge abafundi ukubalandela.”—IZENZO 20:30.
1, 2. (a) Zinayiphi inzuzo namuhla izenzakalo ezidlule ezisemlandweni weBhayibheli? (b) Iziphi izenzakalo ezikhethekile emlandweni wakwaIsrayeli nasebandleni lobuKristu lokuqala ezisithintayo manje, futhi ngani?
NGENKATHI umphostoli uPawulu ebhalela ibandla laseKorinte watshela ayekholwa nabo ukuthi izinto ezazibhalwe ngezikhathi ezidlule kwakumelwe zibe njengesibonelo esixwayisayo kubo. Lesisimiso sinemiphumela ebanzi, ngisho nanamuhla. Izenzakalo eziningi zakudala emlandweni weBhayibheli zingaba nazo futhi zinazo ezifana nazo osukwini lwanamuhla okuwusizo kithina futhi okusinikeza isiqondiso esifanelekile ekuphileni kwethu.—1 Korinte 10:11; Roma 15:4.
2 Khona-ke, kuyosizuzisa ukucabangela ezinye zalezizenzakalo ezidlule emlandweni wakwaIsrayeli nezebandla lokuqala lobuKristu. Sizikhathalele kakhulu izehlakalo noma izenzakalo eziphathelene nalabo abaphikisa umsebenzi kaNkulunkulu nendlela izinto ezinjalo ezathinta ngayo izinceku zikaJehova emuva lapho. Lezizenzakalo zisisiza ukuba njengabantu bakaJehova, siqaphele, izenzakalo ezifanayo ezikhathini zanamuhla nokuthi uyini umthwalo wethu wemfanelo kulesisimo.—2 Thimothewu 3:16, 17.
3. UJeremiya waxwayiswa futhi waduduzwa kanjani?
3 Eminyakeni engama-40 ngaphambi kokuwa kweJerusalema ngo-607 B.C.E., uJehova wayala inceku yakhe ethembekile uJeremiya ukuba imemezele obala ngokungalungi okwakwenziwa kwaJuda. Lokhu kungalungi ekugcineni kwakuzoholela ekulahlekelweni umusa kaJehova nabakhileyo kwaJuda bathunjelwe eBabiloni. UJehova waxwayisa uJeremiya ngokuthi abanye babeyomphikisa. Wathi: “Bayakulwa [abaphikisi] nawe, kepha abayikukwahlula, ngokuba nginawe, usho uJehova, ukuba ngikophule.” (Jeremiya 1:19) Yeka induduzo enkulu lokhu okwakuyiyo kuJeremiya, kumqinisa ukuba afeze intando kaNkulunkulu ephelele ngaye!
4. (a) Ikuphi okunye ukuphikiswa uJeremiya okwadingeka ukuba akubekezelele? (b) Umbhalo okumaHeberu 11:32-38 usitshelani ngabaphikisi bezinceku zikaNkulunkulu?
4 Omunye wabaphikisi bakaJeremiya kwakuyindoda egama layo nguPhashuri. Wayeyindodana yompristi wakwaJuda futhi ewumbonisi omkhulu endlini kaJehova. Umlando weBhayibheli kuJeremiya isahluko 20 ubonisa ukuthi uPhashuri washaya uJeremiya futhi wamfaka ejele. UJehova wamkhulula uJeremiya kulezozibopho, kodwa ukuphikiswa kwaqhubeka. UHananiya, umprofethi waseGibeyoni, wakhuluma ngokumelene noJeremiya, emmangalela ngokuthi uwumprofethi wamanga wembubhiso. Eqinisweni, uHananiya wathi ijoka laseBabiloni laliyokwephulwa, futhi uJuda wayeyobuyiselwa. (Jeremiya, isahluko 28) Ngisho nenye yamakhosi akwaJuda, uJehoyakimi, yaphikisa amazwi kaJeremiya futhi yalwa nawo, kangangokuba yaphonsa emlilweni imiqulu yesiprofetho kaJeremiya! (Jeremiya, isahluko 36) Abanye bathi uJeremiya akabulawe futhi yibona ababangela ukuba alahlelwe emgodini onodaka ukuze afe. (Jeremiya, isahluko 38) Lona umlando womunye wabaprofethi bamaHeberu abaningi abathembekile abakhuluma ngegama likaJehova futhi abanyundelwa futhi bahlaselwa ngabaphikisi bezigijimi zesahlulelo esivela kuNkulunkulu.—Bheka amaHeberu 11:32-38.
“Bayekeni”
5. (a) UJesu wahlangabezana nokuphikiswa ngezinga elingakanani? (b) Iziphi ezinye zezimpikiswano ezincane ezaphakanyiswa abaphikisi bakaJesu?
5 Ukuphikiswa kweqiniso kwakunzima nasekhulwini lokuqala ngenkathi iNkosi yethu uJesu Kristu isemhlabeni. Abaphikisi ababengabantu bakubo babefuna ukuvimbela izinto ezinhle ezazenziwa uJesu. Kodwa njengoba uJehova azibonakalisa enoJeremiya wazibonakalisa enoJesu futhi, emsindisa ezitheni zakhe. (Luka 4:14-30; 11:53, 54; Johane 7:1) Ababejivaza uJesu ngokuvamile babenza izimpikiswano ezinkulu ngezinto ezincane. Bamangalela uJesu njengomuntu oyisiminzi ozinikele otshwaleni nohlala nabathelisi nezoni. (Mathewu 11:19) Bathi abafundi bakhe babengabephuli besabatha ngenxa yokukha izikhwebu ukuze badle ngesabatha. (Marku 2:23-28) Bahlambalaza abafundi bakaJesu ngoba babe‘ngahlambanga izandla lapho bedla isinkwa.’—Mathewu 15:1, 2.
6. Ukuphikiswa kukaJesu kwaba nzima kangakanani?
6 Kodwa abaphikisi abanjalo basuka ezintweni ezincane baze bafinyelela nasekuphikeni amandla omoya ongcwele kaNkulunkulu abonakaliswa emisebenzini emangalisayo eyenziwa uJesu. Ngemva kokuba uJesu elaphe umuntu owayenamademoni, owayeyimpumputhe nowayeyisithulu, abaphikisi bakhe bathi: “Lo uwakhipha amademoni ngoBelzebule kuphela, umbusi wamademoni.” (Mathewu 12:22-28) Babuye bambeka icala lokuvukela uKesari. (Luka 23:1, 2) Ekugcineni, bafuna ukuba abulawe.—Luka 23:13-25.
7. UJesu wasabela kanjani kubaphikisi beqiniso?
7 UJesu wasabela kanjani kulabo ababemphikisa? Ekhuluma nabaphostoli bakhe, wathi: “Bayekeni; bangabaholi abayizimpumputhe; kepha nxa impumputhe ihola impumputhe, ziyakuyela emgodini zombili.” (Mathewu 15:14) Iseluleko sikaJesu esihlakaniphile sasithi: “Bayekeni.” Ngesikhathi esifanele kwakuzobonakala lokho abayikho.
Ukuphikisa Okuvela Ngaphakathi
8, 9. (a) Hlobo luni lokuphikiswa olufana nolwatholwa uJeremiya noJesu olwabikezelelwa ibandla lobuKristu? (b) Chaza ukuthi lokhu kwenzeka kanjani ngokuqondene nendaba yokusoka.
8 Ngemva kokufa kukaJesu, abalandeli bakhe abathembekile ngokufanayo bahlangabezana nokuphikiswa okukhulu. Kodwa sizani niphawule: Njengoba nje abaphikisi bakaJeremiya nabakaJesu babevela phakathi esizweni samaJuda, khona-ke ngokumiswa kwebandla lobuKristu kwakuyoba-khona ukuphikisa okuvela ngaphakathi. (IzEnzo 20:29, 30) Nakuba lokhu kwakubikezelwe, kwakusazokuza njengovivinyo olukhulu kulabo abahamba ngokwethembeka. Nokho, uJehova wayeyobonakala enabantu bakhe ukuba abasindise, njengoba ayenoJeremiya noJesu.—Bheka 1 Petru 5:8-11.
9 Lokhu kuphikisa kwangaphakathi ekhulwini lokuqala kwaba neziqalo zakho ezincane. Abaphikisi abathile kungenzeka babenomuzwa wokuthi babenesisusa esizwakalayo sokukuqala, kodwa isifiso sabo sokuba nezindawo eziphambili, ukuba imibono yabo ivelele, kwabaholela esimweni sokulwisana neqiniso kanye nalabo elikubo lapho imibono yabo ingemukelwa njengeqondile. (1 Thimothewu 1:19, 20) Ngokuthakazelisayo, ngenkathi udaba lokusoka luba impikiswano futhi isigungu esikhethekile sihlangana eJerusalema ukuze sixoxe ngaloludaba, elinye lamaphuzu elaphawulwa esigijimini esasiya emabandleni lalithi: “Njengalokho sizwile ukuthi abanye abavela kithi banikhathazile ngamazwi, benyakazisa imiphefumulo esingabayalelanga khona.” (IzEnzo 15:24) Abantu abanjalo phakathi ebandleni lobuKristu babebanga inkathazo, bephikisa izimfundiso zendikimba yabadala ababephathiswe umthwalo wemfanelo onzima wokusakaza kabanzi ukukhanya kweqiniso.
10. (a) Iziphi ezinye zezimfundiso ezaziphendukezelwe ezazifundiswa abaphikisi beqiniso ekhulwini lokuqala? (b) Isiphi isixwayiso uPawulu asinikeza uThimothewu ngokuqondene nabaphikisi beqiniso?
10 Ngokwesibonelo, ngokusobala abanye ebandleni babethi usuku lukaJehova lwase luqalile. (2 Thesalonika 2:1, 2) Abanye baphikisa bathi akukho ukuvuka kwabafileyo. (1 Korinte 15:12-14) Futhi kwakusekhona abanye ababethi ukuvuka kwabafileyo kwase kwenzekile. (2 Thimothewu 2:16-18) UPawulu waxwayisa uThimothewu ukuba aqaphele labo ababephakathi kwalabo ababeyobangela ukwehlukana nokuphambuka eqinisweni lobuKristu elalikhona emabandleni. Phawula amazwi omphostoli: “Uyale abathile ngokuthi bangafundisi okwahlukileyo, futhi banganaki izinganekwane nezindaba zolibo olokuzalana ezingapheliyo, ezibanga ukuphikisana kunokuba ziqhube isimiso sikaNkulunkulu esisekukholweni, ngenza njalo namanje; kepha umgomo womyalo uluthando oluvela enhliziyweni emhlophe, nakunembeza omuhle, nasekukholweni okungazenzisiyo, abathé abanye bephaphalazile kulokho, baphambukela ekukhulumeni okuyize, befuna ukuba babe-ngabafundisi bomthetho, ingani kabaqondi abakushoyo nabaqinisa ngakho begomela.”—1 Thimothewu 1:3-7.
11. Ingabe kukhona esingakufunda ngokucabanga okuphambene okwakuvelele ebandleni lekhulu lokuqala, futhi kungani lokhu kuphuthuma namuhla?
11 Konke lokhu kusitshelani? Ukuthi: kwakukhona izinkinga zokucabanga okuphambene ebandleni lobuKristu lekhulu lokuqala. Kwakukhona ukuphikisa okuvela phakathi kwalo, okuvela kulabo ababethi bayingxenye yebandla likaNkulunkulu. Futhi sasiyini isizathu? UPawulu kwabaseFilipi 1:15 wathi: “Abanye kambe bashumayela uKristu ngomhawu nangombango kepha abanye ngenhliziyo enhle.” IToday’s English Version ikhuluma ngalaba njengabanezisusa ezingafanele, “abanomhawu nochuku.” Yebo, izinto eziphawulwe esikhathini esidlule zinjengesibonelo esixwayisayo kithi, futhi kungokungaphezulu manje njengoba siphila ekupheleni impela kwalesisimiso sezinto esibi esiqondiswa uDeveli.—2 Thimothewu 3:1-7.
Injongo Yabaphikisi
12, 13. (a) Ingabe namuhla siyakubona ukufana okuthile nokuphikiswa kweqiniso ekhulwini lokuqala? (b) Iyini injongo eyisisekelo yabaphikisi banamuhla?
12 Make silethe ukunakekela kwethu ezikhathini zanamuhla, ingabe siyakubona okufana nalezozenzakalo esiye saxoxa ngazo? Yebo, kuye kwaba-khona abathile phakathi kwethu abebefuna ukuchitha umsebenzi omuhle owenziwa abantu bakaJehova emhlabeni wonke. Abanye baye baba nomhawu, baba nochuku, bagcwala izifiso zobugovu, ngokuvamile befuna ukuzenzela igama. Bangase babe “abakhononayo nabasolayo, behamba ngezinkanuko zabo, . . . betusa ubuso ngenxa yenzuzo.” (Juda 16) Konke lokhu kungaholela ekungabazeni, ukuxabana nokuhlukana phakathi kwabantu bakaNkulunkulu. Ngokusola kwabo, abanjalo balahlekelwa umbono womsebenzi wamaKristu esiwunikwe uNkulunkulu nobaluleke kakhulu, okusho ukuthi, hhayi kuphela ukuba ngabalizwayo izwi, kodwa ukuba ngabalenzayo, sifeze lokho uJehova ayaleze ukuba kwenziwe abalandeli abathembekile beNdodana yakhe, uKristu Jesu.—Jakobe 1:22-25; Mathewu 28:18-20.
13 Injongo yabaphikisi abanjalo, ekuhlaseleni ibandla lobuKristu, ukululaza ukholo lwabantu bakaJehova, ukudukisa abanye babe abalandeli babo. UPawulu waxwayisa abadala base-Efesu ngalomzamo omubi lapho ethi: “Naphakathi kwenu kuzakuvuka amadoda akhuluma okudukisayo, ahunge abafundi ukubalandela.” (IzEnzo 20:30) UJuda wanikeza isixwayiso esifanayo, ngokuthi: “Ngokuba sebengenile ngokunyenya abantu abathile okwalotshwa ngabo phambili endulo ukuthi bayakwehlelwa yilokhukulahlwa, abangamesabi uNkulunkulu, bephendukezela umusa kaNkulunkulu wethu ube-ngamanyala, bephika uMbusi oyedwa neNkosi yethu uJesu Kristu.” (Juda 4) Izimo ezifanayo ziye zaphakama kulelikhulu lama-20 phakathi kwebandla labantu bakaJehova!
14, 15. (a) Iyiphi indlela yobuqili esetshenziswa abanye abaphikisi namuhla? (b) Yini abaphikisi abanjalo abangayinaki?
14 Abaphikisi abanjalo abakujabuleli ukuhlanganyela emsebenzini omkhulu wokwenza abafundi. Kunalokho, ngobuqili baya kwabanye kakade abangoFakazi, bakhulume ngendlela yokwenza buthaka isinqumo sabathembekile sokufeza ngokugcwele ukuzinikezela kwabo kuJehova nasekwenzeni intando yakhe. Badlulisela umqondo wokuthi njengoba uJehova ewuNkulunkulu onothando kangaka, ngokuqinisekile ubengenakufuna ukuba bonke labo abafuna ukumthokozisa bahileleke emsebenzini onzima kanjena njengokushumayela endlini ngendlu nokubekezelela ukushushisa kwabaphikisi beqiniso. Qha, bangase bathi, akufunayo nje uNkulunkulu kithina ukuba sibe abantu abalungile, sinakekele abanye ngendlela engokwenyama futhi sithande omakhelwane bethu.
15 Lendlela yobuqili ingase ibe nzima kwabanye ukuba babhekane nayo. Kuyiqiniso ukuthi uJehova unothando nokuthi ufuna ukuba sibe abantu abalungile. Ngokuqinisekile ufuna ukuba amaKristu abonise uthando ngomakhelwane bawo ngokuphatha abanye ngendlela yomusa nangokunakekela izidingo zabo ezingokwenyama uma lokho kudingekile. (Luka 6:35, 36) Kodwa lokho akwanele! Labo abaphikisayo ngokuvamile bayakhohlwa ukuthi uBaba wethu uJehova naye wathi—ngokuyinhloko ngeNdodana yakhe, uJesu Kristu—kumelwe senze abafundi, sifundise abantu, sishumayele “izindaba ezinhle zombuso” kuwo wonke umhlaba ukuze kube ubufakazi.—Mathewu 24:14, NW; Johane 15:17-27.
16. Kungaziphi ezinye ‘izinto ezidukisayo’ abaphikisi banamuhla abazama ukudukisa ngazo abantu bakaJehova?
16 Cabangela ezinye ‘zezinto ezidukisayo’ ezisetshenziselwa ukudukisa abantu bakaNkulunkulu namuhla. Ngezinye izikhathi abaphikisi abanjalo bayobangela ukungabaza ngezimfundiso ezihlukahlukene abantu bakaJehova ababambelele kuzo ngokufanayo. Ngokuvamile lokhu kuba ukuphikisana ngamazwi, njengoba kwakunjalo ngekhulu lokuqala. (1 Thimothewu 6:3, 4) Bangase futhi bangabaze isidingo sokuba nenhlangano eqondisa izingqondo zabantu bakaNkulunkulu. Umbono wabo uwukuthi, umoya kaNkulunkulu ungaqondisa abantu ngabanye ngaphandle kwendikimba ethile ehlelekile neyiziko, yamadoda anikeza isiqondiso. Bangathi okudingekayo nje kuphela kumuntu ukuba azifundele iBhayibheli. Kodwa eLobukholwa belilokhu lifunda iBhayibheli iminyaka engamakhulu amaningi. Futhi bheka ukukhala kwecilongo okungacacile okuvela kweLobukholwa namuhla! Bheka isiyaluyalu nokungaqondisisi ngesigijimi seqiniso esiqukethwe eZwini likaNkulunkulu! Yeka ukuphambana lokhu okuyikho nokuthula okwabikezelwa nobunye phakathi kwamaKristu eqiniso angalifundi nje kuphela iBhayibheli kodwa aliphenyisisayo futhi asebenzise ngentshiseko izimfundiso zalo!—Efesu 4:3-6.
Abaphikisi Abanakuphumelela
17. Khona-ke, siyini isimo sethu kubaphikisi beqiniso?
17 Khona-ke, uyini umbono wethu kulabo abaphikisayo futhi abafuna ukuchitha ukholo esiye salwamukela ngoFakazi BakaJehova nenhlangano yobuKristu uJehova ayisebenzisayo? Iseluleko sikaJesu maqondana nabaphikisi sithi: “Bayekeni; bangabaholi abayizimpumputhe.” (Mathewu 15:14) Ukuxabana nokuphikisana nabanjalo, kuyize futhi eqinisweni akuyona inkambo yobuKristu. Akukho muntu ophoqelelwe ukuba ngomunye woFakazi BakaJehova. Kuyilungelo nomthwalo wemfanelo esiye sawuthatha ngokuzithandela kwethu siqu. (IHubo 110:3) Uma abathile bengafuni ukuba yingxenye yelungiselelo elivunyelwe uJehova, futhi lelo aye walibusisa, leso isinqumo sabo ukuba bazenzele.
18. Iseluleko sikaPawulu kwabaseRoma 16:17, 18 sisebenza kanjani kithi namuhla?
18 Inhloso yethu kumelwe ibe ukubhekana nabaphikisi beqiniso ngendlela yobuKristu. Nokho, kunezinto ezithile okumelwe sizikhumbule. UPawulu wabhalela labo bebandla laseRoma futhi wabeluleka: “Ngiyanincenga, bazalwane, ukuba niqaphele ababanga ukwahlukana nokukhubekisa, bephambene nesifundiso enafundiswa sona nina, nahlukane nabo; ngokuba abanjalo abayikhonzi iNkosi yethu uKristu, bakhonza isisu sabo; nangamazwi amahle namnandi bakhohlisa izinhliziyo zabangenacala.” (Roma 16:17, 18) Kungaba ukubonakalisa ukuntula umbono ohluzekile ukuphikisana obala nalabo ababangela ukwehlukana. Ungabavumeli labo baphikisi bakuphazamise. Ukuziphatha kwabo ngeke kuliphazamise iqiniso futhi ngeke kuvimbele uJehova ekufezeni lokho iZwi lakhe elithi uyokwenza.
19. KumaHeberu 6:4-8, iyiphi incazelo uPawulu ayinikezayo ngalabo abahlubuka eqinisweni?
19 Ngakho, yeka ukuthi aduduza kanjani amazwi omprofethi uIsaya: “Asikho isikhali esenzelwa wena esiyakuphumelela, nalo lonke ulimi olukuvukelayo luyakwahlulelwa”! (Isaya 54:17) Umphostoli uPawulu watshela uThimothewu ngoJane noJambre, abamelana noMose, futhi wathi ubuwula babo baba sobala kubo bonke abantu. (2 Thimothewu 3:8, 9) Khona-ke, labo ababangela ukwehlukana futhi abafuna ukwenza isiyaluyalu kubantu bakaNkulunkulu basesimweni esiyingozi kakhulu phambi kukaJehova. Akekho phakathi kwabo okumelwe aweye amazwi kaPawulu esixwayiso kumaHeberu 6:4-8, lapho kuboniswa khona ukuthi labo abona ngamabomu kumoya ongcwele kaNkulunkulu akunakwenzeka ukuba “babuye bavuswe, baphenduke.”
20. (a) Kungani singadingi ukwethuswa yilokho abaphikisi abangase bazame ukukwenza? (b) Ukwenzani okungasiqinisekisa ukuthi ‘asiyikuhlukaniswa nothando lukaNkulunkulu’?
20 Ngakho-ke, isimo sethu mayelana nabaphikisi, sisiphawulelwe ngokucacile nangokukhanyayo eZwini likaNkulunkulu. Ngaso sonke isikhathi masikhumbule ukuthi asisodwa; sisekelwa uJehova, uKristu Jesu nazo zonke izingelosi ezingcwele. (Mathewu 13:41, 42) Futhi sinesiqinisekiso sikaJesu sokuthi uyokuba nabalandeli bakhe “kuze kube-sekupheleni kwezwe.” (Mathewu 28:20) Ngakho-ke, asidingi ukuba sithuswe ngokungafanelekile lapho kuvela abaphikisi futhi balwisane neqiniso. Lokhu kuyingxenye yomzamo kaSathane wokuvimbela ukusakazwa kwezindaba ezinhle zoMbuso. Kodwa ngokuhlala sithembekile futhi sibeka isibonelo esihle sokwesaba uNkulunkulu ngokuziphatha kwethu nokukhuluma, nakanjani ‘siyonqoba nokunqoba ngowasithandayo.’ Sengathi singaqhubeka siqinile, si“kholwa ukuthi nakufa, nakuphila, nazingelosi, nababusi, nakho okukhona, nakho okuzayo, namandla, nakuphakama, nakujula, nanto enye edaliweyo akuyikuba-namandla okusahlukanisa nothando lukaNkulunkulu olukuKristu Jesu iNkosi yethu.”—Roma 8:37-39.
Lemibhalo elandelayo isitshelani ngabaphikisi beqiniso?
□ Mathewu 15:14; Roma 16:17, 18
[Isithombe ekhasini 22]
“Bayekeni; bangabaholi abayizimpumputhe”
[Isithombe ekhasini 24]
Ungalokothi ube buthakathaka ekuzimiseleni kwakho ukufakazela iqiniso