UJakobe Ukhuthaza Ukukhonza Okumsulwa Nokunemisebenzi
USIBHEKA kanjani iseluleko sendoda endala? Kuthiwani uma sinengqondo ngokomoya futhi siqonde ngqó? Ingabe uyosilandela?
Incwadi kaJakobe, eyabhalwa ngaphambi kuka-62 C.E., iqukethe iseluleko esinjalo esiqondile. Umbhali wayo kwakuyindoda endala—eyase inokuhlangenwe nakho kweminyaka engama-30 ekusingatheni izinkinga zeyayikholwa nabo. Yebo, uJakobe umdala ongumKristu, umfowabo kaJesu Kristu ngamzali munye, ngempela wayengabhala esusela kokuhlangenwe nakho kwakhe siqu. (Marku 6:3) Okwaqinisa indlela yakhe yokubeka amazwi ngokunamandla kwakuyimifanekiso yakhe eqondile nemibuzo ephenyisisayo eyenza kucace ukuthi inkolo engahlanzekile nengenamisebenzi ayimthokozisi uJehova.
Njengoba ayeqondiswa uNkulunkulu, uJakobe wanikeza iseluleko esiqinile esiwusizo namuhla njengasekhulwini lokuqala. Ngokuzindla ngeseluleko sakhe esiphefumlelwe phezulu, singathola izimpendulo emibuzweni ethile ebalulekile. Futhi amazwi akhe kumelwe asishukumisele ukuba siqhubekele phambili ekukhonzeni okuhlanzekile nokunemisebenzi.
Kumelwe Sizibheke Kanjani Izilingo?
UJakobe wabhalela “izizwe eziyishumi nambili” zikaIsrayeli ongokomoya ezazihlakazeke kulo lonke izwe elalaziwa ngalesosikhathi. Kodwa iseluleko sakhe siyasebenza futhi ‘esixukwini esikhulu.’ (IsAmbulo 7:4-9; Galathiya 6:16) Wakhuthaza ayekholwa nabo ukuba babheke izilingo ngokujabula ngenxa yenjabulo yaphakade eyoba umphumela uma bezibekezelela ngokholo. Kumelwe ngokuqiniseka sicele kuNkulunkulu ukuhlakanipha kokuphila ngendlela emthokozisayo, ikakhulukazi uma sibhekene nezilingo. Abalandeli bakaJesu abagcotshiwe ababekezelela ukulingwa ngokwethembeka bayokwamukela “umqhele wokuphila,” ukungafi ezulwini. Ukubekezela ngokwethembeka kwe“sixuku esikhulu” kuyophumela ekuphileni okuphakade ePharadesi emhlabeni.—Jakobe 1:1-12; Luka 23:43.
Uma sihlangabezana nokulingwa, akumelwe siphethe ngokuthi uNkulunkulu uzama ukusiyengela ukuba sone, ngoba akakwenzi lokho. Kunalokho, isifiso esibi esikithi sisiyengela esonweni. UJehova akawona umthombo wobubi kodwa ungowakho konke okuhle, kuhlanganisa nesipho esihle sokuzalwa ngokomoya.—Jakobe 1:13-18; Efesu 1:13, 14.
Iyini Inkolo Yeqiniso?
Uma singabenkolo yeqiniso, kumelwe sisabele ngokushesha eZwini likaNkulunkulu ngokulalela. Kumelwe futhi siphuze ukuthukuthela futhi sisuse konke uNkulunkulu akubheka njengokungcolile. Ukususa ububi enhliziyweni nasengqondweni kuvumela izwi leqiniso ukuba lichume lapho, futhi akumelwe ukuba sibe abalizwayo nje izwi kodwa kumelwe sibe abalenzayo, empeleni senze imiBhalo ibe isiqondiso sethu. Cabangela lokhu: Ngemva kokubheka ubuso bakhe esibukweni, umuntu uyahamba futhi akhohlwe ukuthi ungumuntu onjani. Nokho, uma sikhonza uJehova ngokwamukelekayo, asinakuba izilaleli ezikhohlwayo. Kunalokho, kumelwe sibheke “emthethweni opheleleyo,” samukele yonke into efunekayo kumaKristu, futhi simelwe senze ngokuvumelana nakho.—Jakobe 1:19-25.
Ukuze uNkulunkulu asibheke njengezikhonzi zeqiniso, kumelwe futhi sibambe ulimi, siluvimbele ekuhlebeni, ekunyundeleni nokunye. Futhi, ngokukaJehova, ukukhonza “okumhlophe” (okungcwele, okumsulwa) noku“ngenabala” (okungachaphazelwe ububi) kuhlanganisa ukukhathalela okunemisebenzi ngabasweleyo. Okufunekayo futhi ‘ukuzigcina singenabala lokwezwe’ labantu abangamkhonzi uNkulunkulu. Asinakumthokozisa uJehova uma sisenza izinto ezingalungile izwe elizenzayo. Yebo, uJakobe akazange azibhale zonke izimfuneko zokukhonza kweqiniso. Kodwa wabonisa ukuthi inkonzo eqotho kuJehova imsulwa futhi inemisebenzi.—Jakobe 1:26, 27.
Ingabe Kukhona Okubi Ngokukhethana Ngezigaba?
UJakobe wabonisa ukuthi ukukhonza okumsulwa kudinga futhi ukungakhethi ekusebenzelaneni nabacebile nabampofu. Abanye ababethi bangamaKristu babenza izinqumo ezimbi ngokubonisa ukuthanda abacebile kanjalo bekhetha izigaba. Kwangathi singeze saba necala lokukhetha okunjalo kokungamesabi uNkulunkulu!—Jakobe 2:1-4.
Ngokuqinisekile, amaKristu kumelwe avume ukuthi, njengesigaba, abacebile baye balihlambalaza igama likaKristu ngokushushisa abalandeli bakhe. Ngakho-ke, kunokona ngokukhetha abantu njengokubonisa ukukhetha abacebileyo, kumelwe silandele “umthetho wobukhosi” ngokubonisa uthando kubo bonke omakhelwane bethu. Singalindela kanjani ukujabulela umusa kaNkulunkulu uma singenawo umusa futhi singabathandi abampofu? Ngempela, ukukhetha abantu ebandleni akuvumelani nokukhonza okuhlanzekile.—Jakobe 2:5-13; Mathewu 22:39; IzEnzo 10:34, 35.
Singakubonakalisa Kanjani Ukuthi Sinokholo?
Umphostoli uPawulu wabonisa ukuthi akuve kungemisebenzi yoMthetho kaMose kodwa kungenxa yokholo lwabo kuJesu Kristu ukuthi abantu bayalungisiswa uJehova uNkulunkulu. (Roma 3:19-28) UJakobe wavumelana nalokhu, kodwa wabonisa ukuthi ukholo lwethu kumelwe lubonakaliswe luphilile ngemisebenzi yokwesaba uNkulunkulu olusishukumisela ukuba siyenze. Ukholo olungasishukumiseli ukuba senze imisebenzi emihle akulona olweqiniso futhi aluyikusenza sisinde. Ngokwesibonelo: Uma esikholwa naye ehamba-ze futhi entula ukudla, amazwi nje ewodwa awanakumsiza; kumelwe kube khona usizo olubonakalayo. Ngisho namademoni ayakholelwa ukuthi kukhona uNkulunkulu oyedwa, kodwa awayenzi imisebenzi emihle. Ngakho ukholo lomlomo olungenamisebenzi elusekelayo lupholile, alusizi ngalutho ngokuqondene nokuzuza usindiso. UAbrahama, “ubaba” wabo bonke abanokholo lweqiniso, wabonisa ukholo lwakhe ngemisebenzi lapho enikela ngoIsaka. URahabi futhi wayenokholo olunemisebenzi, ngoba ‘walungisiswa ngemisebenzi’ ngokuvikela izinhloli zamaIsrayeli. Ngakho-ke, njengalokhu ukholo olungenamisebenzi lufile njengesidumbu, ngokwenza imisebenzi yobuKristu enesisusa esifanelekile sibonisa ukuthi sinokholo lweqiniso oluphilayo.—Jakobe 2:14-26.
Kungani Siqondisa Ulimi?
Ukukhonza okumsulwa nokunemisebenzi kudinga futhi isenzo esiqondile ekuqondiseni ulimi. Ngokwesibonelo, wonke amaKristu—ikakhulukazi afundisayo ebandleni—kumelwe akugweme ukusho imibono ephambene. UJakobe wabonisa ukuthi njengoba amahhashi engaqondiswa ngamatomu, singaqondisa imizimba yethu ethambekele esonweni uma sibamba ulimi. Phela, ngisho nomkhumbi omkhulu ungaqondiswa ngephini elincane! Kodwa uma sihluleka ukubamba ulimi, lungase lubangele incithakalo enkulu njengoba kwenza umlilo obhebhethekayo. Ngokuhleba, ngokunyundela, nangokuphendukezela inkulumo nokunye, ulimi olungabanjiwe “lungcolisa” wonke umzimba, lonakalisa isikhulumi ngokwaso. Futhi, ulimi olungaqondiswa lungokhela yonke inkambo yokuphila futhi lungaba olubhubhisa njengeGehena.—Jakobe 3:1-6.
Yebo, ukuqondisa ulimi kufuna umzamo omkhulu. Nakuba umuntu onesono eye waqeqesha zonke izinhlobo zezilwane, akakakwazi ukufinyelela ukuqondisa ngokuphelele ulimi. Kodwa kumelwe sisebenzele ekubambeni ulimi. Ngoba ulimi olungaqondiswa lungathuka, luhlebe, lungadukiswa ngemfundiso engamanga, njalonjalo, luyinto elimazayo egcwele isihlungu esibulalayo. Futhi ungake ucabange nje ukuthi bekuyoba okungafanelekile kangakanani ukusebenzisa kabi ulimi—oludalelwe ngokuyinhloko ukudumisa uNkulunkulu—ukuqalekisa abantu abadalile! Lokho bekuyoba okuphambene njengokuthola kokubili amanzi amnandi nababayo emthonjeni ofanayo noma izithelo zomnqumo emkhiwaneni.—Jakobe 3:7-12.
Ubani Ngempela Ohlakaniphile?
Ukuhlakanipha kweqiniso kudingwa yiwo wonke amaKristu futhi ikakhulukazi abafundisa abanye ekukhonzeni okumsulwa. Umuntu ohlakaniphe ngempela ubonisa ukwesaba uNkulunkulu okufanele futhi uthobekile. Eqinisweni, ukuze akhonze ngokwamukelekayo njengofundisayo umuntu kumelwe athobeke, angabi nokhahlo, angakhukhumali futhi angabi ongafuni ukuboniswa. Futhi, umhawu nombango ngokuqinisekile akumfanele umKristu oyalayo nanoma imuphi omunye umlandeli kaKristu. Kunalokho, ukuhlakanipha kwalabo abanezimfanelo zokungamesabi uNkulunkulu kungokobulwane, kungokwamademoni.—Jakobe 3:13-16.
Ukuhlakanipha kwasezulwini kumsulwa, kunokuthula, kunengqondo futhi ‘kulungele ukulalela.’ Ngokwesibonelo, umfundisi onengqondo ongumKristu akabi elokhu egomela ngezintwana. Futhi okunye, ukuhlakanipha kwasezulwini kugcwele ‘izithelo zokulunga,’ ezihlanganisa zonke izenzo ezivumelana nobuhle, nokulunga neqiniso. Ngokuvamile, ukuze ukulunga kuchume, kumelwe kube khona ukuthula. Abafundisi nabanye ebandleni abathuthukisa ukuthula babonisa ukuthi ngempela bahlakaniphile.—Jakobe 3:17, 18.
Singakuvimbela Kanjani Ukuxabana?
Ukuthula kwezikhonzi ezikanye noJakobe kwaphazanyiswa ngenxa yokuthi abanye phakathi kwabo babenecala lezinto ezinjengokubonisa ukukhetha, ukwahlulela abanye ngokungafanele nokuvumela umhawu. Lokhu kwaphumela ekuxabaneni kwebandla. Futhi wawuyini umthombo walokhukulwa? Phela, inkanuko enganelisiwe yokuzijabulisa ngokobulili! Izifiso ezimbi kanjalo zaholela ekuhaheni nasemoyeni wenzondo nowokubulala.—Jakobe 4:1-3.
Ukuze sivimbele ukuxabana ebandleni kumelwe sixwaye ubungane nezwe, okuwukuphinga okungokomoya. Lokhu kudinga ukugwema umbono, imigomo, izindlela nezenzo zezwe labantu abahlukene noNkulunkulu. Nakuba isejwayezi somona sithuthukisa umbango futhi sicindezela kakhulu abantu abanesono, kungalwiswana naso ngomoya kaNkulunkulu, eqinisweni ngokubonakaliswa komusa wakhe ongasifanele. Lolusizo zingaluthola izinceku zikaNkulunkulu ezithobekile eziqhubeka zithandazela usizo lwakhe futhi zimlalela. Zingamelana ngokuphumelelayo noDeveli. Yebo, noma yibaphi abathi bangamaKristu abaye babonisa isimo esingalungile kumelwe basondele kuNkulunkulu ngomthandazo, bazithobe phambi kwakhe futhi bapheze ukukhuluma kabi ngabazalwane babo noma ukubahlulela ngokungalungile. Yeka ukuthi akufaneleki kanjani ngabantu abonayo ukwahlulela omakhelwane babo lapho kunguJehova uMniki-mthetho Omkhulu nomaHluleli!—Jakobe 4:4-12.
Ukugwema ukuzethemba ngokuqhosha kuyonezela futhi ekuthuleni kwebandla. Njengoba ukuphila kulesimiso kunjengenkungu enyamalalayo, siyobe siyiziwula uma sibambelela kukho futhi sizigabisa ngalokho esiceba ukukwenza. Kunalokho, okungenani ngezinhliziyo zethu kumelwe sithi, “Uma iNkosi ithanda.” Nokho, asinakufeza lutho oluhlala njalo ngaphandle komusa wakhe nosizo, futhi uyakufuna ukuthotshelwa nokudunyiswa njengomthombo wokuphila nazo zonke izinto ezinhle. Kumelwe senze ngokuvumelana nalolulwazi, ngoba ukwenza okunye kuyisono.—Jakobe 4:13-17.
Kungani Kumelwe Sibekezele?
Phakathi kwezinye izinto, uJakobe wabuye wagcizelela isidingo sokubekezela. Cishe, phakathi kwebandla kwakunabantu abambalwa abacebile abaqaphela, njengaye, ukuthi ukunotha ngezinto ezibonakalayo kuyize uma kuqhathaniswa nemicebo engokomoya yamaKristu. Nokho, njengesigaba, abacebile bacindezela abampofu futhi bamelana nabalungile. UJakobe wabonisa ukuthi kumelwe sikubekezelele lokhu nobunye ubunzima ngokubekezela kuze kufike isahlulelo phezu kwabacindezeli phakathi ‘nokuba-khona kweNkosi’ uJesu Kristu. Sidinga ukuba njengomlimi olindela isivuno ngokubekezela. Uma singaba abangabekezeli futhi sihluleke ukubekezela ngokwethembeka, siyolahlekelwa yinkululeko nezibusiso ezifika phakathi nokuba khona kweNkosi.—Jakobe 5:1-8.
Njengezikhonzi zeqiniso, kumelwe futhi sibekezelele esikholwa nabo, singabakhathazi, sikhononda ngokungafanele noma sibavungamela ngomoya wokunganeliseki okukhulu. UJakobe wabuye wabonisa ukuthi abaprofethi bakaJehova babeka isibonelo ngokuzwa ubuhlungu nangokubekezela. NjengoJobe wasendulo, singaduduzeka ngeqiniso lokuthi siyothola isihawu esikhulu sikaJehova nomusa uma sibekezela ngezinhliziyo ezimsulwa ezigxile ngokuqinile kuNkulunkulu.—Jakobe 5:9-11.
Unamandla Kangakanani Umthandazo?
Ngemva kokuyala amanye amaKristu ngokufunga kokungakhethi nokokuthanda intokozo, uJakobe wawanxusa ukuba athandaze. Ikakhulukazi umthandazo ubalulekile uma othile ephethwe ubuthakathaka obungokomoya noma ukugula. Khona-ke kuyoba okufanelekile ukubiza amadoda amadala ebandla, angakhuluma izikhumbuzo eziduduzayo ezingokomBhalo ezinjengamafutha okugcoba. Lababadala bayomthandazela lowo odinga usizo, futhi onjalo “umkhuleko wokholo” uyoba namandla. UJehova uyozithethelela izono umuntu othobekile nophendukile okungenzeka uye wazenza futhi uyombuyisela empilweni engokomoya. Ukuthi “umkhuleko oqinileyo wolungileyo unamandla kakhulu” kubonakaliswa iqiniso lokuthi uJehova wayiphendula imithandazo kaEliya.—Jakobe 5:12-18.
Kuthiwani uma umKristu eduka endleleni yeqiniso? Abantu abanezimfanelo ezingokomoya kumelwe bazame ukumsiza ngomthandazo oqotho nangokusebenzisa ngenkuthalo iZwi likaNkulunkulu. Uma odukileyo ‘ebuyisa endleleni yakhe yokuduka,’ umphefumulo wakhe—isoni ngokwaso—uyosindiswa ekulahlweni nasekufeni kwaphakade. Umuntu omsolayo uye wasebenzela ukusitshekelwa, noma ukuthethelelwa kwezono zesoni.—Jakobe 5:19, 20.
Qhubekani Ekukhonzeni Okumsulwa
Incwadi kaJakobe iphendula ngokuqondile imibuzo eminingi ebalulekile, njengoba sesiye sabona. Kodwa siyosibheka kanjani lesiseluleko esiphefumlelwe phezulu salendoda endala enokuhlangenwe nakho? Sizwakala siqondile futhi singokomoya. Ngakho ingabe siyosilandela?
Uma sisisebenzisa ngobuqotho iseluleko sikaJakobe, siyosisiza ukuba sibekezelele izilingo, siqhube inkolo yeqiniso, sigweme ukukhetha futhi sibonakalise ngemisebenzi emihle ukuthi sinokholo lweqiniso noluphilayo. Futhi, siyosisiza ukuba siqondise ulimi, senze ngokuhlakanipha kwasezulwini, sivimbele ukuxabana ebandleni futhi sibekezele njengofakazi bakaJehova abathobekile nabathandazayo. Ngempela, ngenxa yokulandela iseluleko sikaJakobe, siyokwazi ukumdumisa kangcono uBaba wethu wasezulwini onothando ngokuqhubeka ekumkhonzeni okumsulwa nokunemisebenzi.