Ukusekela Kwembulunga Yonke Impikiswano YoMbuso
“Wandisa isizwe, Jehova, wandisa isizwe, wadunyiswa, wanula yonke imikhawulo yezwe.”—ISAYA 26:15.
1. (a) “Isizwe” sanamuhla simgcwalise kanjani uIsaya 26:2? (b) Lesi“sizwe” sihluke kanjani ezizweni zezwe?
ISIPHI isizwe uJehova asibusisa kanjalo ngokwanda? “Isizwe esilungileyo esigcina iqiniso.” (Isaya 26:2) Isizwe esingokomoya samaKristu eqiniso leso umfazi kaJehova wasezulwini, “iJerusalema eliphezulu,” amzala “kanyekanye,” onyakeni wanamuhla ka-1919. Ngokuphambene nezizwe zomhlaba nabefundisi bazo, abaye balwa eMpini Yezwe I ngenxa yokubuswa komhlaba, “isizwe” sikaJehova sinikeza ukusekela okuqinile eMbusweni wakhe wobuMesiya, omiswe emazulwini ngo-1914. (Galathiya 4:26; Isaya 66:8; IsAmbulo 11:15-18) UJehova uye waletha le“sizwe esilungileyo” epharadesi elingokomoya lomsebenzi woMbuso futhi wasibeka emsebenzini wokunikeza ubufakazi bokugcina ezizweni nakubantu bomhlaba.—Mathewu 24:14; 25:31-33.
2. Ziyini izizathu zokuba lesi“sizwe” sijabule?
2 Ekugcwalisekeni kwengoma eyisiprofetho kaIsaya 26:1-6, amalungu esizwe esizelwe ngokusha aye angena emasangweni avulwe agengeleza ekusondeleni kwawo “entabeni yaseSiyoni nasemzini kaNkulunkulu ophilayo, iJerusalema lasezulwini.” (Heberu 12:22) Lezi zindlalifa zoMbuso ngokujabula ziqaphela amazwi engoma: “Thembani kuJehova kuze kube-phakade, ngokuba uJehova, yebo, uJehova uyidwala elingunaphakade.” UJehova uye “wandisa isizwe,” saze saba namalungu aphelele, futhi lezizakhamuzi zesizwe esingcwele zidumisa uJehova njenge“dwala” lazo ne“Nkosi,” ziqiniseka ukuthi usezogcwalisa zonke izinjongo zakhe ezinhle.—Isaya 26:15; 25:8.
3. Kungayiphi indlela eyengeziwe uJehova aye wadunyiswa ngayo?
3 Eminyakeni yamuva uJehova uye ‘welula imikhawulo’ yendawo yakhe engokwasezulwini ngokwengeziwe. Lokhu uye wakwenzela ukuba kube nendawo yo“kunxanelekayo” okuvela kuzo zonke izizwe zomhlaba—“isixuku esikhulu” esiba yingxenye yabantu bakhe abazinikezele. ‘Sigcwalisa indlu yakhe ngenkazimulo’ njengoba naso sifakaza ngegama lakhe noMbuso.—Hagayi 2:7; IsAmbulo 7:9, 10.
UJehova Uyanezela Kulesizwe Phakathi No-1982
4. (a) UHezekeli 9:1-11 usibeka kanjani isibonelo esihle ngalabo abahileleke emsebenzini ‘wokuphawula’ namuhla? (b) Ngenxa yokubika ngokwethembeka inkonzo yethu, kuyini ukwaneliseka esingaba nakho?
4 Njengoba besekela ngenhliziyo yonke impikiswano yoMbuso, oFakazi BakaJehova babhala imibiko yenkonzo inyanga ngenyanga. Ngalokhu, banjengendoda enophondo lukayinki lukanobhala, echazwe kuHezekeli 9:1-11, ethunywe ukuphawulela abantu ukusinda futhi ngokwethembeka ebika kuJehova, ngokuthi, “ngenzile njengokungiyala kwakho.” Yeka ukuthi bekunganelisa kanjani eMhlanganweni Wenkonzo ukuzwa imininingwane ngengqikithi yombiko omuhle webandla nokwazi ukuthi umbiko wakho, ngisho nakuba ungase ube ‘imadlana yomfelokazi,’ unezelile kulowomphumela! Futhi, njengoba unyaka ngamunye sihlola ingqikithi yonke yomsebenzi embikweni wonyaka wezwe lonke woFakazi BakaJehova, kungaba okuvusa amadlingozi ukucabanga ngeqiniso lokuthi imibiko yethu siqu, nakuba imincane, kodwa iyingxenye yombhalo omangalisayo wembulunga yonke!—Marku 12:42, Authorized Version.
5. (a) UJehova uye wazidumisa kanjani ngokuqondene noMbiko Wonyaka Wenkonzo Ka-1982? (b) Umsebenzi ‘wokwenza abafundi’ uye waziveza kanjani izithelo?
5 Emakhasini 21 kuya ku-23 uyothola “UMBIKO WENKONZO WONYAKA KA-1982 WOFAKAZI BAKAJEHOVA EZWENI LONKE.” Igama eliyigugu leNkosi uJehova ngempela likhazinyulisiwe ngalombiko wenkonzo omangalisayo! Uma sibheka ingqikithi ngezansi ekhasini 23, sithola ukwanda okukhuthazayo kwama-4,2% kwenani lalabo abahlanganyela inyanga ngayinye enkonzweni yoMbuso ngokulalela umyalo kaJesu: “Hambani nenze izizwe zonke abafundi.” Futhi, kunenani elisha eliphakeme elihle kakhulu loFakazi abayizi-2 477 608 abahlanganyela njalo phakathi nonyaka ekushumayeleni izindaba ezinhle “phambi kwabantu nakuzo izindlu ngezindlu.”—Mathewu 28:19; IzEnzo 20:20.
6. Ngokuqondene nokuthunywa kwabo, liyini ithemba elikhulu oFakazi BakaJehova abanalo?
6 Nokho, oFakazi BakaJehova abalindele ukuguqula izwe. Kunalokho, ukuthunywa kwabo okuvela phezulu kuwuku‘memezela umnyaka womusa kaJehova nosuku lokuphindisela lukaNkulunkulu wethu.’ Kuyithemba lethu elikhulu nomthandazo ukuba izigidi ezengeziwe nezigidigidi ezigcwele umhlaba zisabele esigijimini soMbuso ngaphambi kokuba “usizi olukhulu” lususe zonke izinto eziyingozi nezibhubhisayo. Khona-ke, “umhlaba uyakugcwala ukumazi uJehova njengamanzi asibekela ulwandle.”—Isaya 61:2; Mathewu 24:14, 21, 22; Isaya 11:9.
7. Inhlangano kaJehova iye yakulungiselela kanjani ukwanda okwengeziwe?
7 Uma sibheka kokunye ukwanda okusheshayo komsebenzi woMbuso, oFakazi BakaJehova emhlabeni kabanzi baye baba matasa phakathi neminyaka eminingana edlule ekwandiseni izakhiwo zabo zenhlangano. Indlunkulu eBrooklyn, eNew York, iye yalungisa kabusha futhi yanweba izakhiwo zamahhovisi e-25 Columbia Heights, futhi umsebenzi wasefektri kokubili eBrooklyn nasemaPulazini eWatch Tower uye washintshelwa kumacomputer futhi kwalungiselwa ukuze kunyatheliswe nge-offset. Kuwo wonke umhlaba, amagatsha angaphezu kwama-30 eNhlangano aye akha izakhiwo ezintsha, azinweba, amanye awo aboniswe ekhasini elilandelayo. Inhlangano kaJehova ibhukulele ukukhula okwengeziwe nokwanda!
8. Ngokuqondene nokwanda kwabamemezeli boMbuso, imaphi amaphuzu athakazelisayo owatholile ekuhloleni ishadi emakhasini 21-23?
8 Esewonke, amazwe angama-95 phakathi kwalawo abhalwe eMbikweni Wonyaka Wenkonzo afinyelela inani eliphakeme elingakaze lifinyelelwe labamemezeli boMbuso phakathi no-1982, futhi amanye alawa afinyelele imincele yoqobo. Ngokwesibonelo, idolobha elikhulu eligcwele abantu laseHong Kong kwakungokokuqala ukuba likhonzwe izikhonzi zoMbuso ezingaphezu kwe-1 000. (Isaya 60:22) IBrazil yaqhubekela phambili, nabayizi-133 377 ensimini njengenani elisha eliphakeme, lokhu kwaba “umhlambi” omkhulu kunayo yonke woFakazi ngaphandle kwaseUnited States. (Mika 2:12) Njengeqembu lenkolo elingelesibili ngobukhulu eItaly yamaKatolika, oFakazi BakaJehova bajabulela ukwanda ngamaphesenti ayi-8 ngenani eliphakeme labamemezeli boMbuso abayizi-98 172. (Marku 4:8, 20) Iziqhingi zolwandle, ezinkulu nezincane, kusukela eAustralia kuya eCaribbean, zibike amanani amasha aphakeme abamemezeli. (Isaya 42:10) Kuyajabulisa ukuphawula intuthuko enhle emazweni anezinkinga ezingavamile, njengeArgentina, iEl Salvador, iPakistan neUganda. (IHubo 91:9, 10) Amazwe lapho inhlangano kaJehova inesikhathi eside yamiswa, nawo ahlanganyela kulokhu kwanda—iBrithani, iCanada, iFederal Republic of Germany—kanye neU.S.A., okwathi ngoAugust yafinyelela inani eliphakeme labamemezeli boMbuso abayizi-613 007 ensimini, ukwanda kwamaphesenti ayi-8,8.—IzEnzo 16:5.
“Ukuphayona” Izindaba Ezinhle
9. (a) Uyini umbiko ngokwanda kwamaphayona? (b) Kungani lelilungelo linconywa kubo bonke abangase bakwazi ukwenza ithuba lalo?
9 Kulabamemezeli boMbuso bezwe lonke, isilinganiso sabayizi-172 859 babika inyanga ngayinye njengezikhonzi ezinga“maphayona,” zichitha isikhathi esikhulu usuku ngalunye zitshela abanye izindaba ezinhle. Uma kuqhathaniswa nonyaka ongaphambili, izigaba zalezisebenzi zesikhathi esigcwele zande ngamaphesenti ayi-14! Abaningi abanye futhi, bahlela ukungenela lenkonzo ejabulisayo. Ingabe ungomunye wabo? Ngokuqinisekile iyokwenza ukwazi ‘ukufakaza ngamazwi amaningi,’ ngokulingisa isibonelo sabaphostoli, ngokuqondene nezibusiso ezikhazimulayo eziseduze ngabo bonke abeza kuJehova, beba “nokukholwa iNkosi yethu uJesu.”—IzEnzo 2:40; 8:25; 10:42; 20:21, 24; 23:11; 28:23.
10. (a) Kungayiphi indlela ubuphayona banamuhla bungaqhathaniswa nenkonzo yamaNaziri kwaIsrayeli? (b) OFakazi BakaJehova baye bazikhandla kanjani emazweni ahlukahlukene?
10 Nakuba engenzi izifungo zokuba abamemezeli besikhathi esigcwele, lamaphayona athembekile, kuhlanganise namaningi “amaphayona asizayo” (angase akhonze inyanga nje noma ezimbili), anjengamaNaziri akwaIsrayeli wasendulo, ngokuthi ngokuvamile akhonza uNkulunkulu ngokuzinikela okukhulu. Kwamanye amazwe izinceku zikaJehova ziye zazinikela ngempela ‘ngokunikela njalonjalo kuNkulunkulu ngaye umhlatshelo wokubonga.’ Ngokwesibonelo, ngoApril, iVenezuela yabika amaphayona asizayo ayizi-2 464—amaphesenti ayi-136 ngaphezu kwenani eliphakeme elidlule. Futhi iTrinidad yaba namaphesenti angama-51 engqikithini yenani labamemezeli abasebenza njengamaphayona. NgoJune, phakathi nenkathi enemvula eJaphane, abayizi-25 140 babehlanganyela enkonzweni yobuphayona—abangamaphesenti angama-36 kubo bonke abamemezeli boMbuso kulelozwe. Yeka injabulo nokwaneliseka okutholakala ekuzideleni komuntu ukuze kudunyiswe uJehova ngokwengeziwe!—Heberu 13:15; Numeri 6:8; Luka 9:23-25.
11. (a) Kungani kumelwe bangadunyazwa labo abangakwazi ukuphayona? (b) Imuphi umbiko omuhle wenkonzo nenani lababakhona elibonisa ukuthi oFakazi BakaJehova yonke indawo baye bakhuthala kakhulu?
11 Nokho, akuwona wodwa amaphayona azinikele kodwa impela sonke “isizwe” sikaIsrayeli ongokomoya, kanye nezigidi zabangane baso abayi“sixuku esikhulu” baye benza umzamo oncomeka kakhulu ekushunyayelweni koMbuso phakathi no-1982. Bonke baye benza ingxenye yabo ekwengezeleni enanini eliphakeme elisha elingakaze lifinyelelwe lamahora ayizi-384 856 662 achithwa enkonzweni yasensimini phakathi nonyaka, futhi abaningi baye bahlanganyela ekuqhubeni izifundo zeBhayibheli eziyi-1 586 293 eziqhutshwa masonto onke emakhaya abantu abathakazelayo. ESikhumbuzweni sokufa kukaJesu, esagujwa ngoApril 8, 1982, inani lababekhona emhlabeni wonke, emabandleni ayizi-44 953, kwakungabantu abayizi-6 252 787—isixuku ngempela! Futhi kwangathi singakhuthala ekuqhubekeni nokunakekela ukondliwa okungokomoya kwawo wonke “lamawundlu”!—Johane 21:15-17.
12. Isiphi isibusiso esishiwo kuNumeri 6:24-26, futhi singasetshenziswa kobani manje?
12 Ngokushesha ngemva kokusho umthetho ngokuqondene namaNaziri, uJehova wenza ukuba uMose akhiphe isibusiso esizweni sonke, ngokuthi: “UJehova makakubusise, akulondoloze; uJehova makakhanyise ubuso bakhe phezu kwakho, abe-nomusa kuwe; uJehova makaphakamise ubuso bakhe phezu kwakho, akuphe ukuthula.” Yeka ukuthi lamazwi asebenza kahle kanjani namuhla esizweni sikaJehova esingcwele sikaIsrayeli ongokomoya—nakuyo “ingxubevange” evela kuzo zonke izizwe eye yeza ukuba ihlanganyele naso enkonzweni eya kuJehova! Ngempela kuvusa amadlingozi ukwazi ukuthi ofakazi bakaJehova abasha abayizi-138 540 babhapathizwa kuwo wonke umhlaba phakathi nonyaka, ukwanda kwamaphesenti ayi-15,6 ngaphezu kwenani elabhapathizwa ngonyaka ongaphambili. Igama likaJehova liye labekwa kubo bonke laba, nakubo bonke abanye ebandleni, ukuze uJehova ngokwakhe ‘ababusise.’—Numeri 6:24-27; Eksodusi 12:38.
‘Ukunqoba’
13, 14. (a) Siyini isimo sabazalwane bethu ababalwa ngaphansi kwa“Manye Amazwe Angama-28”? (b) Isiphi isikhuthazo esingasithola esibonelweni sabo?
13 Emazweni amaningana oFakazi BakaJehova baye balwela ukholo kanzima ngaphansi kwezimo ezilukhuni kakhulu. Ngenxa yolaka lwesitha, futhi ukuze kuvikelwe abazalwane bethu, ezinye zalezindawo azibhaliwe ngayinye embikweni olotshwe ngezinhla, kodwa ingqikithi yenkonzo yabo isemugqeni ongenhla kwengqikithi isiyonke, onesihloko esithi: “Amanye Amazwe Angama-28.”
14 OFakazi abamelelwe yilemibiko ngempela ba“yanqoba nokunqoba ngowasithandayo.” (Roma 8:37-39) Njengoba sicabanga ngenkonzo yabo yokwethembeka, kwangathi singazimisela, nathi, ukuba sinqobe zonke izithiyo ukuze siqhubeke sikhonza uJehova ‘ngayo yonke inhliziyo yethu, umphefumulo, ingqondo namandla,’ njengoba sisiza ngothando umakhelwane wethu ukuba enze ngokufanayo. Ngalendlela singabonisa ukuthi ‘asikude nombuso kaNkulunkulu.’—Marku 12:29-31, 34.
15-17. (a) Imiphi imibiko ekhuthazayo esinayo ezingxenyeni zomhlaba ezinezimpi? (b) Imiphi eminye imibiko efanayo oye wayifunda phakathi nonyaka odlule? (c) Uyini umthandazo woFakazi BakaJehova ngokuqondene nababusi?
15 Umkambonisi ojikelezayo eLebanon wabhala: “Enkonzweni, noma nini lapho sizwa ukudutshulwa kwezindiza zempi, sikhosela emiphemeni yezakhiwo ukuze sivikeleke, ngoba abantu abahlanu baye babulawa izingcezu eziwayo ensimini ebesisebenza kuyo indlu ngendlu kulelosonto elifanayo. Ngokuqhubekayo imithandazo yethu kuJehova yayingeyesibusiso sakhe emhlanganweni ozayo nakubazalwane bethu abaseWest Beirut. Umhlangano wesifunda wawungoJune 13. Sajabula lapho kumenyezelwa ukuphela kwempi emsakazweni ngosuku olungaphambili, ngomhla ka-12, ngakho umhlangano waqhubeka kahle.” Futhi imibiko yamuva yabonisa ukuthi akekho koFakazi BakaJehova owalimala eWest Beirut ngalesosikhathi.
16 Ezweni laseMelika ePhakathi, lapho inkonzo yokuthula yoFakazi BakaJehova iye yaqondwa kabi kakhulu uhulumeni omusha, zonke izithunywa zevangeli zadingiswa. Omunye umbhangqwana oyizithunywa zevangeli wabanjwa futhi wafihlwa amasonto amabili, kwaze kwaba yilapho izakhamuzi ezithembekile ezingoFakazi ziwuthola futhi zembula lapho ukhona eNxuseni laseBrithani, lapho kwenziwa khona amalungiselelo okuhamba kwawo. Kwabikwa kulendawo ukuthi izikhulu zazifuna “inceku ethembekileyo neqondayo” ezazizwe ngayo ukuthi yayiwumholi womsebenzi woFakazi BakaJehova.—Mathewu 24:45-47.
17 Ezweni laseAfrika laseZimbabwe, isikhulu esiphakeme sikahulumeni satshela umhlangano wezombangazwe: “Uma nje bengoFakazi BakaJehova asinankinga. Abazona izitha zethu. Kodwa uma beyeka ukuba oFakazi BakaJehova khona-ke kuyisikhathi sokukhathazeka.” Kuwumthandazo wabantu bakaNkulunkulu beqiniso ukuthi zonke izikhulu zikahulumeni zithathe umbono okhanyiselwe kanjalo, ukuze bonke oFakazi BakaJehova ‘bahlale kahle ngokuthula, ngokumesaba uNkulunkulu nangesizotha esipheleleyo.’—1 Thimothewu 2:1, 2.
Imihlangano Yesigodi “Yeqiniso LoMbuso” Iqala Okuthile!
18. Iyiphi incwadi evelele eyakhishwa eMihlanganweni Yesigodi “Yeqiniso LoMbuso,” futhi iyini injongo yayo?
18 Phakathi nenyanga kaJune 1982, uchungechunge lweMihlangano Yesigodi “Yeqiniso LoMbuso” yoFakazi BakaJehova ezizweni zonke yaqaliswa, futhi lemihlangano isiqhutshwe kuzo zonke izingxenye zomhlaba. EU.S.A. kuphela kwakunenani eliphakeme elisha lababekhona abayi-1 108 022.a Kulemihlangano ka-1982 eU.S.A., nakwezinye izindawo eziningana, incwadi entsha yokutadisha iBhayibheli yakhishwa. Lena incwadi enemifanekiso emihle enamakhasi angama-256 enesihloko esithi Ungaphila Phakade EPharadesi Emhlabeni. Kodwa lena akuyona nje incwadi yezithombe. Futhi ayilungiselelwe ngokukhethekile abantwana bodwa. Imifanekiso yayo emihle ingeyenjongo yokufundisa abantu babo bonke ubudala, ukuze basizwe bahlakulele leyomfanelo esindisa ukuphila, UKHOLO. Kwakungenxa yoKHOLO lwabo olusekelwe ngokuqinile olwazini oluqondile lukaJehova, iZwi lakhe nezinjongo zakhe, okwenza ofakazi abathembekile bezikhathi zasendulo bakwazi ukunqoba izithiyo ezazibonakala zingenakunqobeka. KUNGOKHOLO ukuthi “isixuku esikhulu” sabantu abathambekele ekulungeni namuhla bahlangana nenselele yalezi‘nsuku zokugcina’ futhi bayothola ukusindiswa “osizini olukhulu” bangene oHlelweni Olusha lukaJehova.—IsAmbulo 7:9, 14; 2 Thimothewu 3:1; Heberu 10:38, 39; 11:32-38.
19. Ikuphi ukukhulumela onakho ngalencwadi?
19 Enye inhloko yomkhaya, umamukeli ojabulayo walencwadi, wathi: “Ngempela kuyisipho esivela kuJehova esingakaze sibe khona eminyakeni yami engama-25 ngiseqinisweni. Indlela ebhalwe ngayo iyoheha kunoma ubani. Imifanekiso ishukumisa kangangokuba ungabona noma ikuphi ukunyakaza efuna ukukumelela. Izinjongo zoMbuso kaNkulunkulu zivezwe ngendlela eqinisekisayo.” Lencwadi engenakulinganiswa namali kakade isinyatheliswe ngezilimi ezingama-21, neziningi ezisazokuza.
20. (a) Kungani kufiseleka ukuba izigidi ezengeziwe zifunde iqiniso ngalelithuluzi? (b) Labo abalalela uIsaya 26:2, 4 bangaqhubeka ngokushesha babone kuphi ukugcwaliseka?
20 Kuthenjwa ukuthi izigidi zabantu kuwo wonke umhlaba zingase zifunde iqiniso ngalencwadi entsha, Ungaphila Phakade EPharadesi Emhlabeni, nokuthi laba bayoma beqinile ekusekeleni impikiswano yoMbuso, lapho ngokushesha, amazwi aphethayo ‘engoma’ kaIsaya isahluko 26 egcwaliseka: “Wozani, bantu bami, ningene emakamelweni enu, nizivalele iminyango, nicashe ngokuphazima kweso, kuze kudlule ulaka. Ngokuba bhekani, uJehova uyaphuma endaweni yakhe ukuba ahambele ububi babakhileyo emhlabeni.” Ngemva kokuba iNkosi uJehova isilwele kanjalo igama layo elikhulu eHarmagedoni, “isizwe esilungileyo esigcina iqiniso,” kanye ne“sixuku esikhulu,” sabakhulekeli abangabangane, bayophuma bengenamyocu, ukuba baqhubekele ekugcwalisekeni kwazo zonke lezi zithembiso ezinhle “uJehova, yebo, uJehova” azilobe ngokwethembeka eZwini lakhe.—Isaya 26:2, 4, 20, 21; IsAmbulo 7:9, 14; 16:13-16.
[Umbhalo waphansi]
a Ezweni lonke, Emihlanganweni Yesigodi “Yokwethembeka EMbusweni,” kwakunabayizi-4 147 256, noFakazi abasha abayizi-44 357 ababhapathizwa.
Ukucabangela ukugcwaliseka kwanamuhla kwe“ngoma” eyisiprofetho kaIsaya 26:
□ Isa 26 Ivesi 2: Obani abokuqala abenza ukusekela kwembulunga yonke impikiswano yoMbuso, kanjani, futhi namiphi imiphumela?
□ Isa 26 Ivesi 4: Ikuphi ukwethemba lamazwi okumelwe akufake kunoma iyiphi inceku kaJah?
□ Isa 26 Ivesi 15: Amanani aphakeme oMbiko Wonyaka Wenkonzo Ka-1982 abonisa kuphi ukugcwaliseka?
□ Isa 26 Ivesi 20: Iyiphi indawo yokuphephela uJehova ayilungiselelayo, futhi isikhathi esingakanani?
□ Isa 26 Ivesi 21: Kuyini ukugcizelela lokhu okukunikezayo njengesizathu sikaJehova sokwehlisa ukwahlulela?
[Ibhokisi/Isithombe ekhasini 27]
OFakazi BakaJehova emhlabeni kabanzi bajabula ekukhululweni kwencwadi “Ungaphila Phakade EPharadesi Emhlabeni” enamakhasi ayi-256 nezithombe phakathi neMihlangano yabo Yesigodi “YeQiniso LoMbuso.” Lencwadi, ebeka ngokusobala izimfundiso eziyisisekelo zeBhayibheli, iyakhanga kubantu, abadala nabancane ngokufanayo, abawufisela izinto ezingcono umhlaba wethu. Kulindeleke ukuba ifeze indima enkulu ekukhuliseni umsebenzi woFakazi wembulunga yonke wokukhuthaza ukufundwa kweBhayibheli emakhaya.
[Ishadi ekhasini 20-23]
UMBIKO WONYAKA WENKONZO KA-1982 WOFAKAZI BAKAJEHOVA EZWNI LONKE
(See bound volume)
[Izithombe ekhasini 19]
Ezinye zezakhiwo ezintsha zamagatsha eWatch Tower ebezakhiwa eYurophu phakathi no-1982
E-ENEBAKK, ENORWAY
EHOLBÆK, EDENMARK
EAJALVIR (MADRID), ESPAIN
ESELTERS, EJALIMANE