Inhlangano KaJehova Iqhubekela Phambili—Ingabe Uqhubeka Nayo?

AWUKWAZI ukufunda imiBhalo yamaKristu yesiGreki ngaphandle kokuhlatshwa umxhwele yiqiniso lokuthi amaKristu ayehlelekele ukukhulekela. Ikakhulukazi, ayehlelekele ukushumayela, ukusakaza izindaba ezinhle zombuso kaNkulunkulu.

Umlobi-mlando wanamuhla uH. G. Wells waphawula maqondana namaKristu akuqala: “Ukuphela kwenhlangano yabo kwakuyinhlangano yabashumayeli, futhi umsebenzi wayo oyinhloko wawuyintshumayelo.” Yebo, njengoba umphostoli uPetru asho: “UJesu Kristu wasiyala ukuba sishumayele kubantu, futhi sinikeze ubufakazi obanele.”—IzEnzo 10:42, NW; Mathewu 28:18, 19.

Kodwa kuthiwani ngokushumayela osukwini lwethu—kulezi‘zinsuku zokugcina’ zalesimiso sezinto? (2 Thimothewu 3:1-5) UJesu Kristu wabikezela: “Lezi zindaba ezinhle zombuso ziyoshunyayelwa kuwo wonke umhlaba owakhiwe ngenjongo yobufakazi kuzo zonke izizwe; khona-ke ukuphela kuzofika.” (Mathewu 24:14, NW) Ngakho-ke, ngaphambi kokuba isiphelo salesisimiso sezinto sifike, umsebenzi wokushumayela omkhulu kakhulu wezwe lonke kumelwe wenziwe. Iyiphi inhlangano ewenzayo?

Eqinisweni, kukhona iqembu elilodwa kuphela ezweni lonke elihleleke ngenxa yenjongo yalokhu kushumayela ngombuso. LingoFakazi BakaJehova. Umsebenzi wabo wokushumayela uyanda kuwo wonke umhlaba emazweni angama-206. Ngo-1981 kwakukhona oFakazi abayizi-2 361 896 abahlanganyela kulomsebenzi. Lokho kungabamemezeli bombuso abangaphezu kwezi-750 000 kunababekhona eminyakeni eyishumi edlule!

Ukuze bahambisane nomsebenzi owandayo wokushumayela, oFakazi BakaJehova, eminyakeni nje emibili edlule, baye baqeda noma baqalisa ukwakha amafektri amasha angamashumi amabili okunyathelisa izincwadi zeBhayibheli. Futhi, ukukhula okusheshayo kuyenzeka endlunkulu yezwe lonke yoFakazi BakaJehova. Ekhulwini lokuqala, iJerusalema laliyindawo okwakuvela kuyo ukuqondisa okwakunikezwa inhlangano yobuKristu. (IzEnzo 15:1, 2) Kodwa namuhla ukuqondisa okunjalo kukhishwa eBrooklyn, eNew York.

Ngokuhlwa kukaMarch 15 nonyaka isenezelo samuva nje esakhiweni esikhulu sezakhiwo zendlunkulu eBrooklyn sanikezelwa. Lesi iSakhiwo samaHhovisi ase-25 Columbia Heights, esibonakala ekhasini elilandelayo. Sinesakhiwo esilungiswe kabusha esisanda kwakhiwa ezihlangene ukuze zenze isakhiwo esisodwa.

Amalungu angaphezu kwezinkulungwane ezimbili omkhaya wendlunkulu yaseBrooklyn ayekhona esimisweni sokunikezelwa, esasiqhutshelwa ehholo lomhlangano lekhaya ngo-6:45 p.m. Kodwa isimiso sadluliselwa ngethelevishini esebenzisa izintambo eHholo LoMbuso nasezindlini zokudlela ezihlukahlukene ukuze kuzuze amalungu omkhaya ayebuthene lapho. Futhi, amalungu angaphezu kwamakhulu ayi-6 ePulazini leWatchtower, ahlala endaweni eqhele ngamakhilomitha ayi-145 enyakatho New York, akwazi ukulalela ngokuxhunyaniswa ngomsakazo.

Ukunikezela Kuqokomisa Ukwanda

Ngemva kokuba uCarey W. Barber esethandazile, isimiso sokunikezela saqala ngokubukeza kukaJohn E. Barr isifundo seNqabayokulinda salelosonto, esasinesihloko esifanelekile sokunikezela. UMilton G. Henschel, usihlalo walokho kuhlwa, wabe esemema uGrant Suiter ukuba abukeze “intuthuko engokomlando” yenhlangano kaNkulunkulu kusukela ngo-1919 kuya ku-1935.

“Asizicabangeli lezizinto ngokuqhosha, ngaphandle kokucabangela uJehova,” kuqalisa umzalwane uSuiter, “kodwa, ngokuphambene, siyamcabangela futhi siyakuqaphela lokho aye wajabulela ukukusebenzisa kulamashumi eminyaka, okungukuthi, lomkhaya.” Lapho oFakazi BakaJehova okokuqala bethuthela eBrooklyn emuva ngo-1909, umkhaya wendlunkulu wawunamalungu acishe abe amashumi amathathu kuphela.

USuiter wachaza ukuthi ngo-October 1919 inhlangano yaqala ukukhipha umagazini omusha iThe Golden Age, manje obizwa ngokuthi iPhaphama! Futhi ngonyaka olandelayo, endaweni encane eMyrtle Avenue, umkhaya wendlunkulu waqala ukunyathelisa izincwadi zeBhayibheli emishinini yawo yokunyathelisa. Ngakho-ke, uSuiter waphawula, ngonyaka ka-1921 umkhaya wase wande wafinyelela emalungwini ayi-107. Ngo-1923, wathi, izincwadi eziyizinkulungwane ezinhlanu ngosuku zazikhishwa yiwo.

Ukuqhubekela phambili kwenhlangano kaNkulunkulu kwadinga izakhiwo ezinkulu. Ngakho-ke, njengoba uSuiter achaza, ngo-1927 ikhaya elisha elandisiwe lakhelwa umkhaya wendlunkulu eColumbia Heights, futhi ifektri enezitezi eziyisishiyagalombili yakhiwa kujana e-117 Adams Street.

Eqhuba umlando “wentuthuko engokomlando,” uLyman A. Swingle ngokulandelayo walandisa ngokuqhubekela phambili kwenhlangano kaJehova kusukela ngo-1936 kuya ku-1950. Waphawula: “Ngo-1936 ukushushiswa kwakukhula kulo lonke izwe.” “Amakamu okuhlupha kaHitler ayesakhiwe.” Khona-ke, ephendulela ikhanda lapho kwakuhleli khona umbhangqwana osukhulile, wathi: “Umzalwane uPoetzinger nomkakhe baboshwa ngalowonyaka, bafakwa kulawomakamu, futhi abaphumanga kwaze kwaphela iminyaka eyisishiyagalolunye.” Naphezu kokushushiswa okunjalo, bona nezinye izinkulungwane baye baqhubekela phambili nenhlangano kaNkulunkulu.

“Lena kwakuyiminyaka ebucayi,” kuqhubeka uSwingle. “NgoSeptember 1, 1939, uHitler wathutha amabutho akhe wawayisa ePoland, futhi iMpi Yezwe II yaqala.” Izinkathazo futhi zanda eUnited States. “Izenzo zezichwensi zaqhubekela kulo lonke izwe,” elandisa. “AmaHholo ethu oMbuso ambalwa ashiswa ngokuphelele. Izimoto zethu eziningi zabhujiswa. . . . Nokho, naphezu kwazo zonke lezinkinga, ngo-1940 saba nokwanda kwabamemezeli ngamaphesenti angama-40!” Phakathi nempi ngokwayo, echaza, inhlangano yaphindwa kabili ngobukhulu—kusukela kubamemezeli bombuso abayizi-71 500 kuya kwabangaphezu kwezi-141 000.

“Ngo-1946,” kuqhuba uSwingle, “umhlangano wokuqala ngemva kwempi waqhutshwa eCleveland, Ohio—kwakukhona abayizinkulungwane ezingamashumi ayisishiyagalombili.” Lapho kwamenyezelwa ukuthi ukwakha okuqhubekayo kwakuzokwenziwa eColumbia Heights nokuthi abazalwane babengasekela isimiso sokwakha ngeminikelo yabo. “Khona-ke sakha isakhiwo esinezitezi eziyishumi [isenezelo ekhayeni elalikhona], futhi sasisikhulu kakhulu,” kusho uSwingle “kangangokuba sasicabanga ukuthi sasingenakuphinde sakhe futhi eBrooklyn. Ngesikhathi esifanayo sakha isakhiwo esinezitezi eziyisishiyagalolunye ukwenezela kwesise-117 Adams Street. Lezizakhiwo zanikezelwa ekuqaleni kuka-1950.”

Lapho eseya ngasesiphethweni, umzalwane uSwingle walandisa: “Ngo-1950—owokuqala uMhlangano waseYankee Stadium—wezinsuku eziyisishiyagalombili. Kwafika abazalwane abavela emazweni angamashumi ayisithupha nesikhombisa. Ababekhona: izi-123 707.” Ngempela kwakuyinkathi yokwanda! “Kusukela ngo-1936 kuya ku-1950 sasuka kubamemezeli abayizi-50 000 saya kwabayizi-373 430—ukwanda okuphindwe kasikhombisa nengxenye kuleyominyaka eyishumi nesihlanu!” Kodwa ubani ngokufanelekile othola udumo? Ekuphetheni uSwingle wacaphuna amazwi kaNehemiya: “Ngokuba baqonda ukuthi lowomsebenzi wawenziwa uNkulunkulu wethu.”—Nehemiya 6:15, 16.

Ngokulandelayo, umzalwane uHenschel ngokwakhe wahlanganisa “intuthuko engokomlando—kusukela ku-1951 kuya ku-1981.” Ekwethuleni amaphuzu akhe, wathi: “UJehova ubangela ukuba izinto zenzeke. UJehova ubangela ukukhula.” Futhi lapho ecaphuna amazwi omphostoli uPawulu athi, “Siyizisebenzi kanye noNkulunkulu,” wabuza: “Ingabe lowo akuwona umqondo okhuthazayo, ukuba sikwazi ukusebenza ndawonye noNkulunkulu emsebenzini wakhe nokubona imiphumela uJehova abangela ukuba yenzeke?”—1 Korinte 3:6-9.

“Ubufakazi bukhona,” kuqhubeka uHenschel, “intuthuko engokomlando ibonisa ukuthi uJehova uyawunakekela umsebenzi. . . . Kumelwe sibe nabamemezeli abazokwazisa lezindaba ezinhle kuwo wonke umhlaba. Leso isabelo sethu—‘ukushumayela izindaba ezinhle zombuso.’” Khona waphawula ukukhula okukhulu: “Abamemezeli abayizi-798 000 ngo-1958. Khona-ke ngo-1968 izisebenzi eziyi-1 221 000. Ngo-1978, 2 182 000, futhi ngo-1981, 2 361 000.”

“Ukuze umsebenzi wokushumayela wenziwe yilezisebenzi ezingaphezu kwezi-2 000 000,” kuchaza uHenschel, “kwafuneka ukuba kube khona amathuluzi.” Obani ababezowalungiselela? Amalungu omkhaya wendlunkulu! “Emuva ngo-1950,” kuphawula uHenschel, “kwakukhona amalungu omkhaya angama-355.” Kodwa, wachaza, njengoba isidingo sezincwadi zeBhayibheli sikhula kwaba njalo nangomkhaya wendlunkulu—waya ema-512 ngo-1960, waba nabangama-678 ngo-1965, abayi-1 228 ngo-1970, futhi namuhla kunabacishe babe yizi-2 600.

Ukuze kuhlaliswe zonke lezisebenzi, kwadingeka indawo yokuhlala eyengeziwe. UHenschel wachaza ukwanda: Ikhaya elisha elinezitezi eziyishumi nambili e-107 Columbia Heights lanikezelwa ngo-October 1960. Elinye ikhaya elisha lakhiwa e-119 Columbia Heights futhi lanikezelwa ngoMay 2, 1969. Khona-ke kwathengwa enkulu iTowers Hotel ngo-1975, eyalungiswa yaba yizindlu zokuhlala zamalungu acishe abe amakhulu ayisishiyagalolunye. Kanti phezulu ePulazini leWatchtower izakhiwo ezintsha zokuhlala zaqedwa ngo-1968, ngo-1971 nango-1973.

UHenschel walandisa ngokwakhiwa nangokuthengwa kwamafektri ukuze kuhlangatshezwane nesidingo esikhulayo sezincwadi zeBhayibheli. Ngo-1956 isakhiwo esinezitezi eziyi-13 sakhiwa e-77 Sands Street. Khona-ke ngaphesheya komgwaqo kwathengwa esinye (isakhiwo esinezitezi eziyi-10) ngo-1958. Ngo-1968 ukuxhunywa kwefektri entsha yokunyathelisa enezitezi eziyishumi nanye kwaqedwa. Kanye nefektri ese-117 Adams Street, lezi zihlanganisa imigwaqo emine enamafektri edolobha ehlanganiswe ndawonye ibhuloho elilenga phezulu. Khona-ke, ngoNovember 1969, inkimbinkimbi iSquibb, eqhele ngemigwaqo embalwa, yathengwa. Futhi, njengoba uHenschel aphawula, nalezizakhiwo zithakazelisa kakhulu phakathi nalesisimiso sokunikezelwa, ngoba iSakhiwo samaHhovisi e-25 Columbia Heights siyingxenye yalenkimbinkimbi.

Ngalesosikhathi, ukwanda kwakuqhubeka ePulazini leWatchtower, elalithengwe ngo-1963. UHenschel walandisa indlela, ngo-1973, ifektri yokuqala eyaqedwa ngayo lapho. Khona-ke ngo-1975 enye enkulu kakhulu yaqala ukwakhiwa.

Ngemva kokuxoxa ngentuthuko engokomlando yeminyaka engamashumi amathathu adlule, kuhlanganise nomhlangano ka-1958 eYankee Stadium–Polo Grounds, owawunabantu abayizi-253 922, umzalwane uHenschel wethula umzalwane uMax H. Larson nengxenye yakhe yesimiso “Izici Ezivelele Ekwakheni.” Umzalwane uLarson wabonisa amaslides angamashumi amane, abonisa ukudilizwa kwezingxenye zenkimbinkimbi yakuqala iSquibb nesakhiwo esisha samahhovisi. Ababebukele babona indlela lesisakhiwo esisha esahlanganiswa ngayo nefektri eyayikhona kakade eye yalungiswa yenziwa isakhiwo sesimanje samahhovisi.

ULarson wachaza: “Phakathi nawo-1978 umsebenzi waqalwa esakhiweni esise-25 Columbia Heights ngokusiguqula sisuka ekubeni isakhiwo sokugcina izinto sibe isakhiwo samahhovisi esimanje. Ukufeza lomsebenzi kwadinga iqembu labazalwane nodade abayi-180 kuya kwabangama-200.” Phakathi nalesosikhathi, ngoSeptember 1979 ukudiliza okuphawulwe ngenhla kwaqala, kwase kuthi ngoDecember 1979 ukwakha kwaqalwa engxenyeni entsha engasempumalanga ye-25 Columbia Heights.

UFranz Unikeza Inkulumo Yokunikezela

Ukuphetha lesimiso esivusa amadlingozi sangokuhlwa, umzalwane uHenschel wethula umongameli weWatchtower Bible and Tract Society, uFred W. Franz. UMzalwane uFranz waqala emsebenzini wokushumayela isikhathi esigcwele emuva ngo-1914, futhi uye wakhonza njengelungu lomkhaya wendlunkulu kusukela ngo-1920. Ngakho-ke wakwazi ukulandisa imininingwane eminingi ethakazelisayo ayezibonele yona maqondana nokuqhubekela phambili kwenhlangano kaJehova.

Nakuba izakhiwo ezintsha eziqediwe e-25 Columbia Heights zizinhle kakhulu, umzalwane uFranz wagcizelela ukuthi zazingakhelwanga noma iyiphi injongo yobugovu. Wadonsela ukunakekela ekulandiseni kweBhayibheli kuMarku 7:11-13, lapho ephawula insizwa eyayinempahla kodwa esikhundleni sokuyisebenzisa ekwaziseni abazali bayo, njengoba kwakumelwe yenze, yafuna ukuyisebenzisela izifiso zayo siqu zobugovu. Ngakho-ke yathi “YiKorbana, okungukuthi umnikelo [kuNkulunkulu].”

Nokho, umzalwane uFranz wathi: “Abafowethu nodadewethu kulamahhovisi amasha esiwanikezela kuJehova abanjalo. Kunalokho, basebenzisa lezizakhiwo ukuze banikele okuhle kakhulu kwabo kuJehova uNkulunkulu. Basebenza kanzima, hhayi ukuze bazitholele injabulo yobugovu ezintweni ngokuba sezindlini ezinhle kanjalo, kodwa ukuze benze umsebenzi owengeziwe futhi nangendlela engcono kakhulu.”

Naphezu kobuhle obukhulu, nokuqina kwalezizakhiwo ezintsha, umzalwane uFranz waphawula ukuthi sidinga isivikelo sikaJehova, njengoba nje iBhayibheli lisho kumaHubo 127:1: “Uma uJehova engayakhi indlu, basebenzela ize abayakhayo.” Futhi kunjalo-ke nangalezizakhiwo lapha, kusho uFranz, ngaphandle kokuba uJehova evikela futhi ebusisa imisebenzi yethu kuzo imizamo yethu iyobe iyize. Kodwa umlando wabantu bakaNkulunkulu kuyo yonke iminyaka, kusho yena, ubonisa ukuthi uJehova uyababusisa futhi uyabavikela abantu bakhe.

Ekuphetheni inkulumo yakhe, umzalwane uFranz wacaphuna amazwi eNkosi uDavide: “Ngokuba ngingubani mina, nabantu bami bayini ukuba sibe-namandla okunikela ngenhliziyo engaka na? Ngokuba konke kuvela kuwe, nokuvela esandleni sakho lokhu sikuniké wena.” (1 IziKronike 29:14) Ngakho-ke, njengoba uJehova enguMnikazi wazo zonke izinto futhi lezizinto sizithole kuye, uFranz wathi, ukuphela kwento esiyenzayo iwukuzibuyisela kuJehova ngokuzinikezela kuye. Ngakho-ke, ekuphetheni lolusuku nokuhlwa okuvuselelayo ngokomoya nokuhle kakhulu, wamemezela: “Ngifisela ukumemezela manje ukuthi lamahhovisi amasha ami ngokuphelele enikezelwe ngokusobala kuJehova uNkulunkulu.”

Usuku Olugcwele Lwezibusiso Ezingokomoya

Isimiso sokunikezela sasebusuku sasimane nje siyisiphetho, njengophudingi, wosuku olukhetheke kakhulu lomsebenzi. Ekuseni kwakuqalwe njengezinye izinsuku zokusebenza endlunkulu yaseBrooklyn, ingxoxo yetekisi leBhayibeli yaqaliswa ngo-7 ekuseni, yalandelwa ukudla kwasekuseni. Khona-ke ngo-8 a.m. iningi lomkhaya—labo abasebenza emkhayeni nasezindaweni ezihlukahlukene zefektri—baqalisa uhambo lokubona isakhiwo samahhovisi e-25 Columbia Heights. Nokho, labo abasebenza kulamahhovisi ayinkimbinkimbi baya ezabelweni zomsebenzi wabo ovamile. Kwakunyatheliswe umagazini onamakhasi angama-24 owawuhlele isimiso sosuku nohambo lokubona isakhiwo. Labo ababeboniswa isakhiwo babonani?

Belandela ukuqondiswa, bangena esakhiweni esikhulu esihle nesisha e-25 Columbia Heights futhi baqhubekela eMnyangweni weNkonzo kuso lesositezi sesithathu. Lapha imibiko yababonisi bezifunda abacishe babe ngama-325 iyamukelwa masonto onke ezingxenyeni eziyishumi zehhovisi lenkonzo. Esitezi sesibili, amalungu omkhaya abona uMnyango weNsimu neNgxenye yamaPhayona. Kulengxenye, ezwa ukuthi amaphayona amasha ayizi-5 578 ayemisiwe ngo-1981.

Lapho enyuka ngekheshe eya esitezi seshumi nambili, amalungu omkhaya avakashela amahhovisi alabo abasingatha izindaba zezimali zeNhlangano. Esitezi seshumi nanye abona uMnyango Obala Izindleko, lapho izindleko zezinto zeNhlangano zinakekelwa khona, njengezokukhiqizwa nokuthumela izincwadi. Esitezi seshumi avakashela amaHhovisi Abaphathi, kanye nendlu yokuhlanganela iNdikimba eBusayo. UMnyango Wokudweba wabonwa esitezi sesishiyagalolunye, kuhlanganisa nokuboniswa kwezitayela ezihlukahlukene zemidwebo esetshenziswa abadwebi abalungiselela imifanekiso yezincwadi zeNhlangano.

Indawo elandelayo ama kuyo kwakuwuMnyango Wokubhala esitezi sesishiyagalombili, lapho omagazini, izincwadi nezinye izincwadi zeNhlangano kubhalwa khona. Esikhundleni sokusebenzisa imishini yokubhala, iningi labalobi manje lifaka ukwaziswa ngokuqondile kumacomputer. Lawa axhunywe ngezintambo emshinini obhalayo, lowo othi uma uyalwa, ubhale amagama angama-700 ngomzuzu alokho okuye kwafakwa kucomputer. Ngokushesha, kuyo yonke lenkimbinkimbi kuyoba khona imishini yaloluhlobo eyi-149 ezosetshenziswa emahhovisini ahlukahlukene nemishini yokubhala engama-20.

Ngokulandelayo amalungu omkhaya aqhubekela esitezi sesikhombisa eMnyangweni othiwa iPhotocomposition. Lapha aboniswa indlela amagama avela eMnyangweni Wokubhala ahlanganiswa ngayo engxenyeni ebhala ngokugqamile abe sesimweni sekhasi elifiselekayo. Khona-ke, maduze noMnyango okuthiwa yiGraphics, abona indlela amagama alotshiwe kanye nemifanekiso, aguqulwa ngayo ngezindlela ezihlukahlukene zephotographic kwenziwe ifilimu. Ifilimu eyenziwa kanjalo iyahlanganiswa ukuze ibe ipuleti bese ithunyelwa efektri ukuze yenze amapuleti okunyathelisa ngendlela ye-offset. Kuso lesisitezi sesikhombisa umkhaya wavakashela uMnyango weSpanish noMnyango Wokuhlola Amaphutha. Khona-ke, phansi esitezi sesithupha eData Processing, abona indlela amacomputer amakhulu agcina futhi akhiphe konke ukwaziswa okungena kuwo kuvela emishinini yamacomputer kuyo yonke inkimbinkimbi yamahhovisi.

Nakuba sekubonwe okuningi kangaka, kwakusenendlela ende yokuyihamba ngaphambi kokuma ekhaya ukuze kutholwe ukudla eziphakela ngokwawo ngo-11:45. Ngakho-ke ngokulandelayo amalungu aya eMnyangweni Wokubhalelana naseMnyangweni weInvoicing/Bookkeeping esitezi sesihlanu. Khona-ke awela ibhuloho (lingabonwa emfanekisweni ekhasini 24) elihlanganisa iSakhiwo SamaHhovisi e-25 Columbia Heights nezakhiwo ezingaphesheya komgwaqo. Kulengxenye avakashela iHhovisi Lokwakha, iSikole saseGiliyadi, uMnyango Owenza Amabhokisi Ezincwadi, kanye noMnyango Wokupenda Nezikafolo, Indlu Yokokumboza Izihlalo, eyokuHlanganisa Izincwadi nokuLungiswa Kwemishini.

Abaningi bathola iNdlu Yokuthwebulela ithakazelisa kakhulu, lapho amadrama omhlangano, ukufundwa kweBhayibheli nomculo kuthwetshulwa khona. Khona-ke kwakujabulisa ukubona uMnyango Wokufaka Ukwaziswa KumaTape usebenza. Amakhasethi ayizinkulungwane eziyi-15 ayakhiqizwa usuku ngalunye—nangaphezu kwezigidi eziyi-9 kusukela umnyango wavulwa ngo-1978! Kodwa kwakusekhona indlu yamaElectronics, uMnyango weBraille, iHhovisi Lezokwakha, iHhovisi Lamapulani, iHhovisi Lomhlangano, uMnyango Wokuthatha Izithombe, iHhovisi lezisebenzi, iGaraji noMnyango Wokuthumela Izimpahla kwakumelwe kubonwe ngaphambi kokudla kwasemini.

Yeka uhambo olugcwele noluvusa amadlingozi lwamahora amathathu nengxenye! Ukuthi inhlangano kaJehova ngempela iqhubekela phambili kwezwiwa yibo bonke. Ngemva kokudla, umkhaya wakhululekela ukubukiswa inkimbinkimbi yefektri. Izisebenzi zasefektri zazisezabelweni zazo zomsebenzi ngo-12:30 p.m. ukuze zibonise abanye bomkhaya ukusetshenziswa kwemishini ehileleke ekunyatheliseni nasekuhlanganiseni izincwadi zeBhayibheli. Okwakuthakazelisa kakhulu kwakuyimishini emikhulu yokunyathelisa yeoffset—emihlanu yayo ngesikhathi sokuboniswa, neminye emithathu elethwa nonyaka. Phela umshini omkhulu, wokunyathelisa iBhayibheli, ungamamitha angama-33 ubude!

Ngemva kokuboniswa ifektri amahora amathathu, umkhaya waphindela ekhaya, ukhathele kodwa uvuswe amadlingozi isibusiso esisobala sikaJehova ekwandeni. Ngo-4 ntambama bonke bahlangana ezindaweni zabo ezifanelekile ezindlini zokudlela eziyi-6 ukuze bajabulele ukudla okukhethekile. Khona-ke, ngemva kokuphumula isikhashana, bonke bajabulela isimiso esikhuthaza kakhulu sokunikezela.

Ukusekela Inhlangano KaJehova Ethuthukayo

Kwamaningi amanye amazwe, abantu bakaJehova bathola lomoya ofanayo wenjabulo nentshiseko njengoba bebona ubufakazi besibusiso sikaJehova emizamweni yabo yokwandisa izakhiwo zokusakaza izindaba ezinhle zombuso wakhe. Emazweni amaningi izakhiwo ezintsha zamagatsha ziye zaqedwa muva nje noma zisakhiwa.

Yebo, konke lokhu kwakha nokwandisa ezweni lonke kudinga imali. Nakuba oFakazi BakaJehova bengakaze bacele iminikelo, labo abathakazelela ukuhlanganyela ngokwezimali ekwandiseni izithakazelo zombuso kaJehova bangenza kanjalo ngokuthumela iminikelo ehhovisi leWatch Tower Society ezweni lakubo. ENingizimu Afrika iminikelo enjalo ingathunyelwa eWatch Tower Society, Private Bag 2, Elandsfontein, 1406. Iminikelo enjalo yamukelwa ngokubonga okukhulu.

Abantu bakaJehova banokuthunywa okuqondile kokushumayela izindaba ezinhle zombuso kaNkulunkulu kuwo wonke umhlaba owakhiwe ngaphambi kokufika kwesiphelo. (Mathewu 24:14) Ukuthi uNkulunkulu ujonge ukuba lomsebenzi ufezwe kuze kube sezingeni elingakanani, asazi. Kodwa ungaqiniseka ngokuthi, kungakhathaliseki ukuthi isikhathi esizayo silethani, inhlangano kaJehova iyoqhubekela phambili yenza lokho Yena akuyalayo.

[Isithombe ekhasini 25]

Eyakuqala iSquibb eyinkimbinkimbi manje isingeyoFakazi BakaJehova. Isakhiwo SamaHhovisi e-25 Columbia Heights singakwesokudla

[Izithombe ekhasini 26]

Ikhaya e-124 Columbia Heights ngo-1950

Ifektri e-117 Adams Street ngo-1950

[Izithombe ekhasini 27]

107 Columbia Heights

Isakhiwo i“Towers”

119 Columbia Heights

[Izithombe ekhasini 28]

Ifektri eyinkimbinkimbi ehlanganisa imigwaqo emine yedolobha eBrooklyn

IPulazi leWatchtower namafektri okunyathelisa nezindlu zokuhlala

[Isithombe ekhasini 29

UFred Franz unikeza inkulumo yokunikezela

[Izithombe ekhasini 30]

Isakhiwo SamaHhovisi e-25 Columbia Heights, esibonisa imisebenzi ehlukahlukene

1. Lapho ungena esakhiweni e-25 Columbia Heights

2. Ukuhamba endlini yeNdikimba eBusayo

3. Ukubuka indlu yamacomputer

4. Ukuvakashela iHhovisi likaMongameli

5. Ukuhlola uMnyango wokubonisa imiDwebo

6. Ukubuka uMnyango wokuBhala ngamacomputer okukhulunyelwa kuwo