Ukuqondisisa Izindaba
ISandulela SeBhayibheli Sizocatshangelwa Futhi?
Emzamweni wokuchaza isizathu sokuba iToday’s English Version isebenzise elithi Nkosi esikhundleni segama likaNkulunkulu siqu uJehova, iSandulela saleyonguqulo sithi: “Uma kulandelwa indlela yasendulo, eyaqala ngenguqulo yokuqala yemibhalo yesiHeberu (iSeptuagint) igama elisobala lesiHeberu likaNkulunkulu (ngokuvamile elihunyushwa ngokuguqula izinhlamvu lithi Jehova noma Yahweh), kulenguqulo limelelwe i‘Nkosi.’”
Nokho, abanyathelisi balenguqulo, iAmerican Bible Society, muva nje babhekana nemiphumela yokuhlola kwezazi okubonisa ukuthi “inguqulo yokuqala yemiBhalo yesiHeberu (iSeptuagint)” yayinayo iTetragrammaton nokuthi umkhuba wokusebenzisa uKyrios (Nkosi) esikhundleni segama likaNkulunkulu siqu waqala kuphela ekuqaleni kwekhulu lesibili C.E. Encwadini yawo yokuphendula omunye woFakazi BakaJehova, uMnyango Wezokuhlola weAmerican Bible Society wavuma: “Ukutholakala kwemibhalo yamuva kuye kwabonisa ukuthi iTetragrammaton . . . yasetshenziswa kweminye imibhalo yesiGreki. . . . Ngenxa yokusikisela kwakho siyajabula ukubukeza inkulumo yethu eSandulelweni ngokuqondene nokuhunyushwa kwelithi Yahweh eTestamenteni Elidala. Inkulumo yethu manje ayisho ukuthi kuwo wonke amaphepha asendulo eSeptuagint asebenzisa elithi Kyrios. Nokho, ukuguqula kancane okuthile kungaba ngokufanelekile ngenxa yokutholakala kwemibhalo yamuva nokuhlola kwezazi.”
Abantu abalihlonipha kakhulu igama likaNkulunkulu siqu nendawo yalo efanelekile eBhayibhelini bayothakazelela ukubona lokho kuguqula okuncane uma sekuvela ohlelweni olulandelayo lweToday’s English Version.
Umbono Wabefundisi NgoJona
Incwadi kaJona “akukho sizathu sokuba ibhekwe njengendaba engokomlando,” kusho uTimo Veijola, udokotela wezenkolo waseFinland. Phakathi nengxoxo ohlelweni lwesiFinnish, uDr. Veijola wagomela ngokuthi incwadi kaJona “ingokomlando nje njenge‘Gulliver’s Travels’ noma i‘Don Quixote.’ Ngokuphathelene nendaba, ngokuqinisekile iwumbhinqo oqhamisa izici ezihlekisayo nezibanga insini ngempela.”
Imibono yalesisazi senkolo ilinganiseka kanjani naleyo kaJesu Kristu, owabona okwenzeka kuJona phakathi nokuba khona kwakhe kwangaphambi kobuntu? Ingabe wayibheka indaba kaJona njengo“mbhinqo,” njenge“banga insini impela”? Ubufakazi bokuzibonela bukaJesu bubonakala esiprofethweni sakhe: “Ngokuba njengalokho uJona wayesesiswini somkhomo izinsuku ezintathu nobusuku obuthathu, kanjalo-ke neNdodana yomuntu iyakuba-sebuthunjini bomhlaba izinsuku ezintathu nobusuku obuthathu. Amadoda aseNineve ayakusukuma ekwahlulelweni kanye nalesisizukulwane, asilahle; ngokuba aphenduka ngokushumayela kukaJona.” (Mathewu 12:40, 41) Uvuko lukaJesu Kristu lwaluzoba ngokoqobo njengokusindiswa kukaJona esiswini senhlanzi. Futhi isizukulwane esezwa ukushumayela kukaJona kumelwe kube esangempela njengaleso esezwa uJesu eshumayela.
NjengoDr. Veijola, oye wahlanganyela ekuhumusheni iBhayibheli elisha lesiFinnish, izazi eziningi zezenkolo zanamuhla nabefundisi bayabungabaza ubuqiniso bokwenzeka kuJona. Kanjalo ihlaya loqobo akuyona indaba kaJona kodwa abefundisi abahumusha futhi bafundise iBhayibheli bengalikholelwa ukuthi liyiZwi likaNkulunkulu eliphefumlelwe.
Isifundo Sokuzithoba
Ngaphambi nje kokuyeka kwakhe emsebenzini njengongqongqoshe weCity University yaseNew York, uRobert J. Kibbee osewashona weluleka ikilasi elaliphothula ekoliji laseBrooklyn ukuba lizithobe futhi libe nesihawu futhi “nithambise izahlulelo zenu ngokwezilinganiso zolwazi lwenu.” Wanezela: “Engiye ngakufunda ekuphileni ukuthi kukhona ukuzidla okukhulu, ukuba njengengane nokunganaki ezweni. Ikhubalo kulobububi obubulalayo ukuzithoba, ukwazisa okuphicayo, nesihawu.”
Iseluleko esihle, ngempela, hhayi sabafundi abaphothulayo kuphela kodwa sabantu babo bonke ubudala! Ikakhulukazi ngokombono weseluleko esiphindiwe eZwini likaNkulunkulu ngokubaluleka kokuzithoba. AmaKristu ayelulekwa futhi ukuba abe “nobubele nokuthobeka.” (1 Petru 3:8) Futhi izAga 29:23 zithi: “Ukuzidla komuntu kuyamthobisa, kepha onomoya othobekileyo uyazuza udumo.”