Ukuqondisisa Izindaba

Ubumsulwa

Njengezwi ehlane lanamuhla eliyekelelayo uDr. J. Mostyn Davis weYunivesithi yombuso yasePennsylvania ukhuluma ngobumsulwa. Lapho eloba kumagazini wamuva iMedical World News, uphawula ukuthi umsebenzi wokwelapha “uye wathula ngokumangalisayo maqondana nezingozi zenguquko engokobulili.” Abasha abafuna ukuhlala bemsulwa abanakusithola isikhuthazo sokwenza kanjalo emaphephandabeni nama-TV, lapho “ubulili bulingana nokuthengiswayo,” noma kubazali babo, abaye “balahlekelwa kakhulu ikhono lokukhuluma okuhle nokungafihli lutho” ukukhuluma, noma amanxusa alulekayo, lawo “umuntu athola kuwo ubandlululo lobuqili olusekela ubulili ngaphambi komshado.”

Ngokuphambene, uDr. Davis uveza ukuthi “ubumsulwa bunikeza uhlobo oluthile lwenkululeko engase kalula ilwisane nenkululeko ehlobene nobulili. Akudingeki ukhathazeke ngokukhulelwa okungafunwa, izifo zokubhajwa, imiphumela emibi yokusebenzisa amaphilisi, nemininingwane yokukhipha isisu,” futhi uyanezela, “buyindlela eshibhile yokuvimbela inzalo eyaziwa abantu.” Ubuye futhi abike ukuthi “akukho sifundo esibonisa ukuthi ubulili ngaphambi komshado buthuthukisa umshado noma ubulili bomshado,” futhi, ngaphezu kwakho konke, “ubumsulwa buletha ukuziqeqesha,” kusho udokotela.

IBhayibheli likhuluma ‘ngokuhlakanipha okuvela phezulu’ njengobumsulwa nokuziqeqesha, noma ukuzithiba, ‘njengesithelo somoya.’ (Jakobe 3:17; Galathiya 5:22, 23) Futhi liyala abantu abasha ukuba ‘babalekele izinkanuko zobusha, bajonge ukulunga, nokukholwa, nothando, nokuthula kanye nabakhuleka eNkosini ngenhliziyo ehlambulukileyo.’—2 Thimothewu 2:22.

Imishado Entengayo

Isibonakaliso esiqinisekile sesimo esintengayo semishado yanamuhla siwukuthandwa okukhulayo kwezivumelwano zangaphambi komshado. Ngaphambi kokuba umbhangqwana ushade, bangase baye kubameli babo ukuba benze isivumelwano bahlele imininingwane maqondana nokwehlukaniswa kwempahla, ukuvakashelwa kwabantwana, imali yesondlo, njalonjalo, uma kungase kube khona idivosi. Izivumelwano ezinjalo manje ziqhutshwa emazweni ayishumi nane eU.S., futhi kusukela ngo-1980 ziye zakhula cishe ngokuphindwe kahlanu eNew York. Abahlanganyela kuzo ngokuvamile bangabantu abake badivosa ngaphambili, abanemali, izimpahla nezinzuzo zemisebenzi abafuna ukuzivikela. “Bake balahlwa futhi manje bafuna ukuba konke kubhalwe phansi ephepheni,” kusho uLester Wallman weAmerican Academy of Matrimonial Lawyers.

Uthando nokukhathalela umngane kuyisisekelo somshado ohlala njalo. (Efesu 5:28, 33) Kodwa lapho abantu bengenela umshado benombono wokugcina nokuvikela izithakazelo zabo siqu ababi abathandi babangane babo, kodwa baba “abazithandayo, nabathandimali, . . . abangenaluthando,” njengoba iBhayibheli labikezela. (2 Thimothewu 3:2, 3) Izivumelwano zabo zangaphambi komshado zingase ziphephise imali yabo nempahla kodwa ngokuqinisekile hhayi imishado yabo.

Isayensi NoNkulunkulu

Esihlokweni esimaqondana nomsebenzi wangaphakathi wezindlu zokuthaka imithi zikaBell ezidumile, iNew York Times yanikeza ingxenye yombono wesazi se-“mathematics” esingunjiniyela kagesi, uMisha Buric, osebenza ikakhulukazi ngama-microcircuits asetshenziswa kumacomputer amuva nje.

“Ngiwahlela kanjani ama-transistors ayizi-17 000 ukuba enze umsebenzi othile owusizo?” kubuza uBuric. Angafunda yini okuthile engqondweni? “Kumangalisa ngokuphelele,” uyasho. “Umuntu uqaphela ukuba yinkimbinkimbi kwayo nokuthi ayiqondakali ngokuphelele. . . . Akumelwe sizame ukwakha ingqondo, ngoba asazi ukuthi singakwenza kanjani.” Kwakungekhona lokho kuphela. “Ngafinyelela ekutholeni okuthile abanye ososayensi abakukholelwayo kodwa abangaxoxi ngakho njalo,” kusho isihloko. Kuyini lokho? UBuric, ongeyena umuntu wenkolo, uthi: “Umuntu uqaphela ukuthi umbono wethu wokuthi singenza noma yini awuqondile. Kukhona izinto ezithile esingakwazi ukuzenza zibe zinhle njengoba imvelo noma uNkulunkulu ezenzile.” Khona-ke yini? “Ngenxa yokuqaphela ukuthi kunokuthile okunamandla ngaphezu kwethu,” uyavuma, “umane nje ngokuthula ukwamukele.”

Lapha umuntu uthola ukuphindwa okungaphelele kwalokho umhubi akuloba eminyakeni eyizinkulungwane edlule: “Ngiyakukubonga, ngokuba ngenziwa ngokwesabekayo nangokumangalisayo; imisebenzi yakho iyamangalisa; umphefumulo wami uyakwazi kahle.”—IHubo 139:14.