Imibuzo Evela Kubafundi
◼ IsAmbulo 7:17 singasetshenziswa kanjani kumaKristu namuhla, ngoba sisakhala ngezinye izikhathi?
IsAmbulo 7:17 sithi nge“sixuku esikhulu” esinethemba lokuphila okuphakade emhlabeni: “Ngokuba iWundlu elingaphakathi nesihlalo sobukhosi liyakubelusa, libaholele emithonjeni yamanzi okuphila; noNkulunkulu uyakwesula izinyembezi zonke emehlweni abo.”
Umphostoli uJohane watshelwa ukuthi isixuku esikhulu sasi“phuma osizini olukhulu.” (IsAmbulo 7:9-14) Kanjalo siyaqonda ukuthi isAmbulo 7:14-17 sisebenza kubantu manje abama ngasohlangothini lukaNkulunkulu, abamukela igazi likaKristu futhi abasindayo uma lesisimiso sezinto esikhona siphela “osizini olukhulu.”
IsAmbulo sithi baye ‘bahlanza izingubo zabo egazini leWundlu, abasalambi abasomi, abasashiswa yilanga,’ “noNkulunkulu uyakwesula izinyembezi zonke emehlweni abo.” Lamazwi akumelwe athathwe njengoba enjalo, ngomqondo ongokwenyama. Kungani kungenjalo? Yebo, abahlanzanga ngokoqobo izingubo zabo egazini leWundlu. Futhi ngezinye izikhathi bayalamba ngokwenyama futhi bome, njengoba nomuntu ophelele uJesu ayenjalo. (Luka 4:2; Johane 4:7, 8; 19:28, 29) Ngakho ukusebenza okuyinhloko kwesAmbulo 7:14-17 kumelwe kube okungokomfanekiso, noma okungokomoya.
Incwadi i“Then Is Finished the Mystery of God,” amakhasi 207 no-208 iyawachaza lamavesi IsAm 7:14-17. Ibonisa ukuthi isixuku esikhulu asilambi manje noma some ngokomoya; sizondla ngeZwi likaNkulunkulu futhi sihlanganyela enkonzweni yakhe, engaba ukudla nesiphuzo kuso, njengoba kwakunjalo ngoJesu. (Johane 8:32-34) Asikuzwa ukushisa kokungavunyelwa kwaphezulu, kuyoba okufanayo nasosizini olukhulu. Futhi asisakhali (njengoba kungase kube sasinjalo ngaphambili) ngenxa yokungamazi uNkulunkulu noma ngokuba nobuhlobo obubi naye. Ngalengqondo, uNkulunkulu kakade ‘usezesulile zonke izinyembezi emehlweni aso.’
Kodwa kamuva, kusAmbulo 21:3, 4, siqinisekisa ngokuthi ngemva kosizi olukhulu nokumiswa kwesimiso esisha sokulunga abantu abathembekile bayothola izibusiso ezingokwenyama eziyohlanganisa ukuphela kosizi, ukukhala noma ubuhlungu. Khona-ke kuyoba izinyembezi zangempela zobuhlungu, ukudumazeka nosizi okungasayikuba-khona.