Ukuzuza Kunembeza Wakho Owunikezwe UNkulunkulu

“Umthetho kaNkulunkulu wakhe usenhliziyweni yakhe; izinyathelo zakhe azisheleli.”—IHubo 37:31.

1, 2. Kungani kumelwe sikhathazeke ngokuqondiswa okuvela konembeza bethu? (IzAga 12:15; 14:12)

NAKUBA uNkulunkulu engawanikezanga amaKristu uhlu olude lwemithetho, uye wasinikeza imithetho ethile, noma iziyalo eziqondile, nezimiso eziningi zokuba sizisebenzise ngokuvumelana nokholo lwethu nonembeza. Kodwa kungenye into ukuba nonembeza, futhi kungenye ukuzuza ngokugcwele kuwo. Abantu abaningi banomuzwa wokuthi ‘uma okuthile kungawukhathazi unembeza wami, kulungile.’ Ingabe lokho kucabanga kuqondile?

² IBhayibheli libonisa ukuthi ngenxa yenyama yethu enesono unembeza wethu ungasidukisa; ungase ube buthakathaka, uqondiswe kabi noma ungcoliswe. Singayibona kangcono ingozi yombono wokuthi “vumela unembeza wakho ube umqondisi wakho” ngokucabangela izakhamuzi zekhulu lokuqala zaseKrethe, ‘ezaziwa njengabaqambimanga, izilwane ezimbi, neziminzi ezivilaphayo.’—Thithu 1:10-12.

3. Unembeza waba namuphi umphumela kwabaseKrethe?

³ Njengabo bonke abantu, abaseKrethe babenonembeza abazalwa nabo. Kodwa babengazuzi kubo. Lapho elobela uThithu eKrethe, umphostoli uPawulu wathi: “Kwabahlanzekileyo konke kuhlanzekile; kepha kwabangcolile nabangakholwayo akukho-lutho oluhlanzekileyo, kodwa kungcole ingqondo yabo nonembeza wabo.” (Thithu 1:15; Roma 2:14, 15) AbaseKrethe abaningi babenonembeza abashile ababengabasizi ukuba benze okuhle noma okuhlanzekile. (1 Thimothewu 4:2) ‘Kwakungekho lutho oluhlanzekileyo’ kwabaseKrethe abaningi. Kanjani? Ngonembeza abangcolile babebheka isimo ngasinye njengethuba lokwenza okubi. Kungenzeka ukuthi bathi, ‘Akuwukhathazi unembeza wami.’ Kodwa kwakumelwe kuwukhathaze! Nokho, amanye amaJuda aseKrethe namaProselithe ayeseJerusalema ngePentekoste lika-33 C.E. Ulwazi lwawo olungokomoya kwakumelwe luwasize ukuba agweme ukuba abaqambimanga, abalimazayo noma iziminzi ezivilaphayo. Futhi labo abamukela uJesu basizwa ngokuqhubekayo ngemfundiso yakhe ukuba babe nonembeza abahle nabasebenzayo.—IzEnzo 2:5, 11; Thithu 1:5; 2:2-5; 3:3-7.

4, 5. Yini esingayifunda ngonembeza endabeni kaPawulu?

⁴ Nokho, unembeza ungadukisa ngisho nomuntu ofunda iZwi likaNkulunkulu nofuna ukwenza okulungileyo. USawulu, noma uPawulu, wayeyazi imiBhalo futhi ekhulekela ngentshiseko ngokuvumelana noMthetho. Nokho wahluleka ukuhambisana nomphumela othuthukayo wentando kaNkulunkulu. Ngemva kokufika kukaMesiya, ukushumayela nokufa ngokugcwaliseka kwesiprofetho, uPawulu waqhubeka engumJuda owumFarisi. Unembeza wakhe awumvimbelanga ‘ukushushisa ibandla’ noku‘futha ngokusongela nokubulala abafundi beNkosi.’—Filipi 3:4-6; IzEnzo 9:1, 2.

⁵ Lezibonelo zibonisa ukuthi unembeza wethu ungasiqondisa kabi. Njengoba sibhekana nezinqumo eziningi ezingahlanganisiwe yimithetho eqondile yeBhayibheli, kodwa eziyizindaba zikanembeza, sidinga ukwazi indlela esingaqeqesha ngayo unembeza wethu futhi sizuze ngokugcwele kuwo. Kukhona izici ezintathu esizozicabangela manje.

IZwi LikaNkulunkulu Libonisani?

6, 7. Iyiphi enye indlela iZwi likaNkulunkulu elingasisiza ngayo ezindabeni zikanembeza?

⁶ IZwi likaNkulunkulu eliphelele liqukethe okuningi okungasikhanyisela maqondana nombono kaNkulunkulu, noma izimiso, futhi liqeqeshe unembeza wethu. Njengoba sekuphawuliwe kakade, uJosefa wayengenawo umthetho olotshiwe kaNkulunkulu oxwayisa ngokuphinga. Kodwa unembeza kaJosefa wawuqeqeshwe kahle. Ngokungangabazeki wayecabangile ngeqiniso lokuthi uNkulunkulu wayejonge ukuba indoda nomfazi (“ababili”) babe nyamanye, bangabi nomxhantela wanoma imuphi umuntu wesithathu oyisiphingi. Futhi uJosefa ngokuqinisekile wayekwazi okuhlangenwe nakho okwakuhilela umngane kaNkulunkulu, uAbrahama, okwabonisa isimo sikaNkulunkulu ngokuphinga.—Mathewu 19:5; Genesise 2:24; 20:1-18.

⁷ Singazuza ngokufanayo. Ngokwesibonelo, singase sibhekane nesinqumo maqondana nokwamukela isimemo sokudla noma sokuqhuba ibhizinisi nothile wesinye isizwe, uhlanga noma isizinda. Lokho kudinga isinqumo somuntu siqu. Uma, nokho, siye sabona eBhayibhelini isimo sikaNkulunkulu ngokungakhethi nokuba ngoqondile, unembeza wethu oqeqeshiwe uyomelana nanoma yikuphi ukubandlulula esikhuliswe ngakho. Siyokwenza ngokuvumelana nawo. (IzEnzo 10:34, 35; Jakobe 2:1-4) Ngakho-ke izimiso zeBhayibheli zingasisiza futhi.

8. Lapho sibhekene nesinqumo sikanembeza, yini okumelwe siyenze?

⁸ Lapho kudingeka sinqume indaba ethile ukuze ‘sibe nonembeza omuhle,’ kumelwe sifune lokho uJehova akushoyo ngokuqondene nendaba, ngoba lokho kungase kuthinte unembeza wethu nesinqumo sethu futhi kumelwe. (1 Petru 3:16) Ngaphandle kokufuna imithetho eqondile, kumelwe sibe nesithakazelo ekutheni zikhona yini izimiso ezingokweBhayibheli ezihlobene nayo. Ingabe uJesu washo noma wenza noma yini ebonisa ukucabanga kwakhe esinqumweni esinjalo? Singase sicwaninge izincwadi zokufunda iBhayibheli ezixoxa ngaleyondaba. Futhi singase siye kumaKristu esikanye nawo angase asisize ukuze sithole izimiso eziqondene nalokho eBhayibhelini. Yebo, lesinyathelo akumelwe sithathwe ngombono wokubathwalisa umthwalo wethu wemfanelo, akumelwe futhi sibuze sithi, ‘Uma bekunguwe, yini obungayenza?’—Galathiya 6:5.

9. Uyini umgomo wethu ekunqumeni izindaba zikanembeza?

⁹ Ezimweni lapho kumelwe kwenziwe isinqumo somuntu siqu, amaKristu aqotho kumelwe alandele inkambo eyowashiya enonembeza ohlanzekile nongaphazanyisiwe phambi kukaNkulunkulu. Kumelwe akwazi ukuthi: “Okungubufakazi bukanembeza wethu, ukuthi sahamba ezweni kakhulu maqondana nani ngobungcwele nangobuqotho bukaNkulunkulu.” (2 Korinte 1:12) Ukuthi umKristu umthanda kangakanani uJehova nezimiso zakhe kungase kuboniswe kulokho akunqumayo ezindabeni zikanembeza.

Abanye Bayothinteka Kanjani?

10, 11. Impikiswano ngokudla eKorinte lasendulo ifanekisa siphi isici sesibili maqondana nemibuzo ehilela unembeza?

¹⁰ Njengoba amaKristu efuna ukuba onembeza bawo bawashukumisele ekulingiseni uNkulunkulu, ukukhathalela kothando ngabanye kumelwe kube yithonya elinamandla ezinqumweni ezihilela unembeza. Lesisici savela lapho uPawulu eloba ngezindaba ezihlukahlukene eziqondene nokudla.

¹¹ Ebandleni laseKorinte ukukhathalela kwaphakama maqondana nenyama eyayihlatshelwe izithombe. Kwakungaba ukukhonza izithombe ngomKristu ukudla inyama yomhlatshelo phakathi nomkhosi wezithombe. Kodwa uPawulu wachaza ukuthi kwakungesona isono ukudla inyama esele ethengiswa emabhizinisini afana namakhefi ahlobene nethempeli noma esilaheni. (1 Korinte 8:10; 10:25; IzEnzo 15:29) Nokho, amanye amaKristu ayekhulekela izithombe ngaphambili ayethinteka kakhulu (enonembeza ababuthakathaka) ngokudla inyama enjalo ngisho nalapho ithengiswa obala ingahlangene nenkolo. Nakuba engabavuni onembeza ababuthakathaka, uPawulu wakhuthaza abanye ukuba bacabangele labazalwane. Kwakungaba ukungabonisi uthando ukwenza okwakungase kwenze ukuba laba bakhubeke noma bazizwe bekhululekile ngokukanembeza ukuba bahlanganyele ekukhulekeleni izithombe futhi.

12, 13. Kungani kumelwe imibono nonembeza babanye kucatshangelwe? Yenza isibonelo.

¹² UPawulu wabonisa isimo esisidingayo sonke: “Ngalokho uma ukudla [noma yini enye] kumkhubekisa umzalwane wami, angisoze ngadla-nyama kuze kube-phakade.” Uma endabeni exhomeke kunembeza wethu, futhi ngalokho sinenkululeko yokwenza, singawunaki unembeza wabanye futhi kanjalo ‘sone abazalwane bethu abafelwa uKristu,’ singalahlekelwa ukuma kwethu okuhle noNkulunkulu. UPawulu wabuza: “Ngokuba yini ukuba inkululeko yami yahlulwe ngunembeza womunye na?” (1 Korinte 8:3, 11-13; 10:29) Ngisho nakuba umuntu enomuzwa wokuthi ‘kuyindaba kanembeza,’ uma kulimaza abanye kungaholela ekwamukeleni kwakhe isahlulelo esinzima sikaJehova. Lokhu kubonisa indlela okungakhohlisa ngayo ukucabanga ukuthi ‘uma kuxhomeke kunembeza wami, kulungile.’

¹³ Cabangela okuhlangenwe nakho kombhangqwana owawunesifundo seBhayibheli, uya emihlanganweni futhi usulungela ukubhapathizwa. Umdala ebandleni watshela indoda ngokujabulela kwakhe ibhayisikobho ethile. Indoda yaphendula, ‘Ini! Ingabe ubuka amabhayisikobho okuthiwa awabadala kuphela?’a Umdala wazama ukuthethelela izenzo zakhe, ethi amanye alamabhayisikobho (acatshangelwa njengasolekayo ngisho nayizwe) anokubaluleka okuthile uma izici ezimbi zigwenywa. Kodwa kwabonakala ukuthi lendoda yayiphazamisekile. Ngemva kwalokho yathuthuka kancane kakhulu kunomkayo. Ukuba lomdala wayezindle ngemibhalo enjengabaseKolose 3:2-8, abase-Efesu 5:3-5 noMathewu 7:12, yayiyowuthinta unembeza wakhe nokuziphatha.—1 Korinte 9:22, 25-27.

14, 15. Unembeza wendikimba yabadala ungase ube nalo kanjani ithonya ezindabeni ezithile zomuntu siqu?

¹⁴ Ukucabangela abanye futhi kuhilela ukungabaceli ukuba bavumele okuthile okumelene nonembeza babo. Ngokwesibonelo, abadala basebandleni banomthwalo wemfanelo wokuvumela imigidi yomshado emaHholo oMbuso, indlela lena eyoqhutshwa ngayo, indlela ihholo elihlotshiswa ngayo, njalo njalo.b Abadala kwelinye ibandla baloba: “Komunye umshado zonke izimpelesi zikamakoti zadabula phakathi kwezitulo ziziphephetha ngokokushaya umoya. Umshado olandelayo kwafuneka wedlule owokuqala, ngakho-ke izimpelesi zikamakoti zadabula ehholo zishwiba izambulela. Olandelayo kwakumelwe ube mkhulu kakhulu futhi ube ngcono; bafuna izimpelesi ezingamashumi amabili nabangenisa izivakashi abangamashumi amabili. Ihholo lase liqala ukusetshenziswa njengesekisi.”

¹⁵ Ingabe lena kwaku‘yindaba kanembeza’ yesinqumo somuntu siqu? Cha. Ngisho uma onembeza bombhangqwana othembisene ungabavumela okuthile okuwukweqisa noma okwedlulele, unembeza obumbene wabadala awukwazi ukunganakwa. Nakuba bengafuni ukuphoqelela lokho abakuthandayo bona siqu, banesifiso sokuthula enhliziyweni, ukuvumelana nempilo engokomoya yalo lonke ibandla. Futhi kumelwe ngokuqhutshwa unembeza basize abantu ukuba ‘bayazi indlela yokuziphatha kwabo endlini kaNkulunkulu, eyinsika nesisekelo seqiniso.’—1 Thimothewu 3:15; 1 Korinte 10:31.

16. Uma kumelwe unqume indaba exhomeke kunembeza, yini okumelwe uyicabangele?

¹⁶ Ngakho-ke, lapho sibhekene nesinqumo ‘endabeni kanembeza,’ sidinga ukuzindla ngalokhu, (1) iZwi likaNkulunkulu lithini ngakho, (2) indlela isinqumo sethu esingase sibathinte ngayo abanye. Nokho kukhona esinye isici sesithathu esibalulekile.

Thina Ngokwethu Siyothinteka Kanjani?

17. Unembeza wamthonya kanjani umzalwane eNew York City?

¹⁷ Umagazini iNatural History ka-August 1981 wawuqukethe isihloko ngezithunywa ezihamba ngamabhayisikili zasemzini waseNew York ezaziyisa izincwadi namaphasela aphuthumayo emabhizinisini omuzi. Phakathi kwamadoda ayizibonelo ayengenele loluhlobo lomsebenzi, siyafunda: “UDonald, isithunywa esineminyaka engama-41, uyakwazi ukondla umkakhe nendodana yakhe eneminyaka eyi-15 ngemali ayitholayo. UDonald wayegeza amafilimu, kodwa wawuyeka umsebenzi wakhe ngoba, njengoFakazi KaJehova, wayengenakuyivuna indima ayeyifeza ekukhiqizeni imifanekiso engcolile. Njengesithunywa, akanawo nje kuphela umuzwa wokuthi unembeza wakhe uhlanzekile kodwa futhi angashayisa emsebenzini ngokuthanda kwakhe ukuze anikezele isikhathi esengeziwe ekushumayezeni abantu.”

18. (a) Lomzalwane kungase ukuba wasifinyelela kanjani isinqumo sakhe? (b) Isiphi isibonelo ongasifunda kulokhu?

¹⁸ Izici ezihlukahlukene ziyazithinta izinqumo zomsebenzi (bheka ibhokisi ekhasini 26). Ngokufanayo nasendabeni kaDonald, umKristu kungenzeka usebenza efemini egeza amafilimu—ethatha izithombe, amabhayisikobho asemakhaya, amafilimu okukhangisa ngemikhiqizo ethile, nawokubukiswa emabhayisikobho. Kancane kancane ingenise imifanekiso engcolile. Eqophelweni elithile unembeza womKristu uyoqala ukumkhathaza. Angase athole ukuthi yena ngokwakhe uphoqeleleka ukuba ahileleke emfanekisweni engcolile noma kweminye imisebenzi emelene nomthetho. Kungakhathaliseki ukuthi kungenxa yokuhlanganiswa nefemu esebenzisa imifanekiso engcolile noma ngenxa yalokho acelwa ukuba akwenze, angase athole ukuthi kumelwe ayeke ukuze ahlale ‘engongasolekiyo,’ okungaba okubaluleke ngokukhethekile kubantu abanamalungelo ebandleni noma abawafunayo. Ekufuneni omunye umsebenzi, angase ngokuqiniseka alindele isibusiso sikaJehova. (1 Thimothewu 3:2, 8-10; Roma 13:5) Ngokungangabazeki kunamaKristu amaningi aye ashiya imisebenzi enjalo kunokuvumela ukungcola kuwalulaze. (Qhathanisa noMathewu 5:28.) Ngakho-ke, lapho sibhekene nesinqumo sikanembeza, kumelwe sizibuze: ‘Uma ngenza lokhu noma ngenqaba ukukwenza, kuyongithinta kanjani mina?’ Ngokuqinisekile akumelwe singawunaki unembeza wethu siwushise futhi kanjalo senze kube lula ukwenza okubi esikhathini esizayo.—1 Thimothewu 4:2; Juda 10; Efesu 4:18, 19.

19, 20. (a) Kokubili unembeza nokholo kungalinikeza kanjani ithonya enkonzweni yethu? (b) Kungakhathaliseki ukuthi sicebile noma cha, kumelwe sibe yini isifiso sethu?

¹⁹ Lapho sizindla ngesinqumo sikanembeza esenziwa uDonald, kumelwe siphawule ukuthi ukwenezela ekufuneni kwakhe ubuhlobo obamukelekayo kuJehova, wafuna ukumemezela ukholo lwakhe ngokwengeziwe. Lokhu kuvumelana nokuhlanganisa kukaPawulu unembeza nokholo: “Kepha umgomo womyalo uluthando oluvela enhliziyweni emhlophe, nakunembeza omuhle, nasekukholweni okungazenzisiyo.”—1 Thimothewu 1:5.

²⁰ Kuyancomeka uma ukholo lomuntu nesifiso sokuba nonembeza omuhle kumshukumisela ekulungiseni okuthile ukuze ‘izinyathelo zakhe zingasheleli’ futhi ukuze anikeze isikhathi esengeziwe nokunakekela ekusakazeni “sonke iseluleko sikaNkulunkulu.” (IzEnzo 20:26, 27) Nokho, kumelwe sibabheke kanjani abanye abazimo zabo zibavumela ukwenza okwengeziwe ekushumayeleni kodwa abangenzi njalo? Bangase bathole imali eningi emisebenzini yabo noma emabhizinisini futhi babonakale benemali eningi yokuphila ngokunethezeka kulesisimiso. Nokho, esikhundleni sokujabula ekwenzeni abafundi isikhathi esigcwele njengamaphayona, baqhubeka besebenza bekhulisa amabhizinisi abo, amakhaya nokunethezeka.c (Qhathanisa noMarku 10:17-22; Luka 12:16-21.) Akukhona okwethu ukwahlulela abanye ezindabeni ezinjalo, ngoba “yilowo nalowo phakathi kwethu uyakuziphendulela kuNkulunkulu.” Kunalokho, asivumele ukholo lwethu ngokungazenzisi lusishukumisele ekukhonzeni uNkulunkulu ngokugcwele ukuze sijabulele unembeza ohlanzekile.—Roma 14:1-4, 10-12.

Ukuqondiswa Unembeza Omuhle

21. Iliphi ithonya elifanelekile onembeza bethu abangaba nalo kithi?

²¹ Unembeza womKristu oqeqeshwe kahle nothintekayo uyosiqondisa ukwenza okulungileyo. Wenza kanjalo endabeni kaPawulu. Wayebathakazelela kakhulu ‘abazalwane bakhe,’ amaJuda ayephila nawo, kangangokuba waloba: “Unembeza wami ufakazelana nami eMoyeni oNgcwele ukuthi nginokudabuka okukhulu nobuhlungu obungapheliyo enhliziyweni yami.” (Roma 9:1-3) Yebo, wenza konke ayenokukwenza ukuze ahlanganyele izindaba ezinhle zobuKristu nabo.

22. Kungani unembeza ungasishukumisa ngisho nangaphezu kwalokho okungenziwa iziyalo?

²² Kumelwe kube ngokufanayo nangathi. Uma sikwazisa ukubaluleka kukanembeza wethu esiwunikezwe uNkulunkulu, asinakuthambekela ekucabangeleni iziyalo. Iziyalo zingase zibeke izimfuneko ezithile, noma imigomo. Kodwa unembeza oshukunyiswa uthando nokholo ngokunokwenzeka uyofuna ngisho okwengeziwe kithi, usishukumisele ekwenzeni ukuzidela okukhulu nokungabi nabugovu. Ngaleyondlela ngokuqinisekile siyozuza konembeza bethu. Uyosivikela ezintweni ezingase ziphumele ekubeni singavunyelwa uNkulunkulu, futhi uyosisiza ukuba senze izinto azamukelayo ngempela. Ikakhulukazi kunjalo njengoba onembeza bethu besiqondisa ekubeni nengxenye enkulu ekumemezeleni izindaba ezinhle. Inzuzo enkulu kangakanani esingaba nayo kunaleyo uPawulu ayichazela uThimothewu? Wathi: “Ziqaphele wena kanye nesifundiso, ume kulezozinto; ngokuba ngokwenza lokhu uyakuzisindisa wena nabakuzwayo.”—1 Thimothewu 4:16.

[Imibhalo yaphansi]

Ingabe Uyakhumbula?

□ Kungani kuyingozi ukuba nomuzwa wokuthi ‘uma okuthile kungawukhathazi unembeza wami, kumelwe ukuba kulungile’?

□ Uma ubhekene nendaba okumelwe uyinqume ngokukanembeza wakho, yimaphi amaphuzu amathathu okumelwe uwacabangele ngokungathi sína?

□ Unembeza umelwe ukuthinte kanjani ukudumisa kwakho uNkulunkulu obala?

[Ibhokisi ekhasini 26]

Amaphuzu Omsebenzi Okumelwe Acatshangelwe

Lapho umKristu kumelwe enze isinqumo ngomsebenzi othile, kumelwe okokuqala acabangele lokho azokwenza. Angase acabangele lamaphuzu amabili:

Ingabe lomsebenzi uyalahlwa yiBhayibheli?

IBhayibheli liyazilahla izinto ezinjengokweba, ukukhonza izithombe nokusebenzisa kabi igazi, ngakho-ke umKristu akanakungenela umsebenzi azosekela kuwo ngokuqondile izinto ezinjalo.

Ingabe ukwenza lomsebenzi kuyohlanganisa umuntu eduze nesenzo esilahliwe kangangokuba uyoba umlekeleli ngokusobala?

Ngisho nomuntu ongumashanela noma owamukela izivakashi lapho kugcinwa khona igazi noma endaweni okwenziwa kuyona izikhali zempi uhlangene ngokuqondile nomsebenzi omelene neZwi likaNkulunkulu.—Levitikusi 17:13, 14; Isaya 2:2-4.

Ngaphandle kwalokho umuntu ayobe ekwenza ngempela, ezinye izici ezengeziwe zingasithinta sonke isimo:

Ingabe umsebenzi uwukukhonza isintu okungekhona okungalungile ngokweBhayibheli?

Umuntu ohambisa iposi wenza inkonzo yokuyisa iposi emakhaya nasemabhizinisini. Ingabe umKristu angalahlwa uma phakathi kwezindawo ayisa kuzo iposi kungamakhaya ambalwa amasela noma ifemu ethengisa izithombe zokukhulekelwa?—Mathewu 5:45.

Umuntu unegunya elingakanani ezintweni ezenziwayo?

UmKristu onesitolo akanakugcina noma athengise izithombe noma amasoseji egazi. Akekho esimweni esifana nomqashwa wasesitolo othengisa ugwayi namasoseji egazi phakathi kweziningi ezinye izinto.

Umuntu uhileleke ezingeni elingakanani?

Umqashwa osebenza ukwamukela imali futhi ephatha ugwayi izikhathi ezimbalwa kuphela angase aphethe ngokuthi isimo sakhe asifani nesomunye umqashwa obeka ngononina lezizinto emashalofini cishe usuku lonke.

Uyini umthombo wenkokhelo noma indawo lapho umsebenzi wenziwa khona?

Ezweni lapho uhulumeni enikeza isonto ukuphatha zonke izimiso zenhlalo, umuntu angase athole isheke lakhe enhlanganweni yenkolo. Kodwa eqinisweni umsebenzi wakhe owukubheka amapaki omphakathi awukho endaweni yesonto. Futhi awuwona owenkolo noma obhekwa njengothuthukisa ukukhulekela kwamanga.

Uyini umphumela wokwenza umsebenzi othile?

Ingabe ukwenza umsebenzi kungakhuba abaningi, kumenze ‘asoleke’? (1 Thimothewu 3:2, 10) Kungawuthinta kanjani unembeza wezisebenzi?

[Isithombe ekhasini 22]

UmKristu okanye naye angase akusize uthole lokho okushiwo yiZwi likaNkulunkulu endabeni kanembeza.

[Isithombe ekhasini 24]

Cabangela indlela izinqumo zakho noma izenzo ezingase zibathinte ngayo abanye