Uyini Umgomo Wakho Ekuphileni?
USUKU ngalunye uKenichi wayenomcabango owodwa: ‘Ukuthola igolide elingase libe sendaweni ethile kulamagquma!’ Iminyaka engama-35 wafuna ngokuzimisela emagqumeni angaphandle kwedolobha lakubo eJaphane. Wayethi: “Anginaso isikhathi senkosikazi noma abangane.” Waba indoda engahlangani nabantu ethathekile ngokufuna igolide elinqabile.
Eseneminyaka engama-65 uKenichi wakuthola ayekufuna. Ekugcineni igolide eliyigugu lalingelakhe! Wasabela kanjani ngemva kokuthola umgomo wakho konke ukuphila kwakhe? Wazindla: “Ekuqaleni ngangifuna nje ukuceba. Kodwa manje igolide alisasho lutho ngempela kangako.”
Mhlawumbe uyoqonda ukuthi kungani uKenichi azizwa ngalendlela. Ngempela wayecebile. Kodwa ekufuneni kwakhe wayechithe engama-35 yeminyaka yakhe engcono kakhulu—iminyaka ayengenakuphinde ayibone futhi. Lendoda eyayingenamngane yathola ukuthi ukufezeka komgomo wayo akusizanga ngalutho. Ingabe ikhona imigomo ekuphileni kwakho owakusebenzela kanzima ukuyifinyelela, kodwa wayithola ingakwenelisi? Ngemva kokuhlolisisa ukuphila kwabathile “eziye zafezeka izifiso zabo,” isazi sokusebenza kwengqondo uDaniel Levinson sabika ukuthi ngokuvamile laba “baqala ukubuza, ‘Ingabe yilokhu kuphela? Ingabe kwakuwufanele umzamo nokulahlekelwa ngenxa yakho?’”
Ngakolunye uhlangothi, kungenzeka uphakathi kwalabo abaye babona ubuze bokufuna imigomo yezinto ezibonakalayo futhi ngenxa yalokho, umanqikanqika ngemigomo yakho. Ukuntuleka komgomo oqondile ekuphileni kungaba okulimaza njengokufuna umgomo oyize. Udokotela wezifo zengqondo zabantwana uBennett Leventhal, ukholelwa ukuthi izinkinga zokuziphatha kwabaningi abasha zibangelwa ukuthi abazali babo abakwazi ukubanika noma yimiphi imigomo ngaphandle kokuphumelela ezintweni ezibonakalayo.” Amaphethelo edolobha laseChicago, lapho uDr. Leventhal esebenzela khona, anezinga eliphakeme kakhulu lokuzibulala eUnited States—ikakhulu phakathi kwabasha. Ngokomhleli wephephandaba elihloniphekile laseJalimane iFrankfurter Allgemeine (September 12, 1981), imbangela eyisisekelo yokuhlasimulisayo ukwanda kokusetshenziswa kabi kwemilaliso, ukungalaleli, ukukhungatheka nokugcweleza okungenangqondo phakathi kwabasha iwu“kwanda komuzwa wokungabi nanjongo.”
Uyini Umgomo Ofanelekile?
Ukuthola nje isinkwa sabo sansuku zonke kungumgomo wabaningi. Kokwamuva ukuhlola phakathi kwabasha abayi-1 000 kuzo zonke izinhlanga nezizinda zezomnotho eMelika kwatholakala ukuthi “ukuthola umsebenzi ongijabulisayo” kwakubekwe njengomgomo wabo ophambili. Kodwa nokho, njengoba ungabona, ngokuvamile onjalo umgomo ungakhungathekisa futhi ungenelisi. Kanti isifiso sokuthola ukudla, okokugqoka nendawo yokulala siwukuphela komgomo abaningi abanawo.
UMfundisi omkhulu kunabo bonke owake wahamba kulomhlaba wakhomba emgomeni ohlukile. Wathi: “Ningasebenzeli ukudla okuphelayo kepha ukudla okuhlala kuze kube-ngukuphila okuphakade.” Wakhuthaza ukuba abantu baphakamise amehlo abo ukuze bathole amalungiselelo angabanikeza ukuphila okuphakade. Luhlobo luni lwabantu ababeyonikwa umvuzo onjalo? NgokukaJesu, kwakuyilabo uNkulunkulu “abeke uphawu kubo.” (Johane 6:27) Ngakho ukusebenzela uphawu lokuvunyelwa uNkulunkulu ukuze uthole ukuphila okuphakade ngenjabulo kwakungumgomo owabekwa uJesu kubafundi bakhe.—2 Petru 3:13.
Umehluko Owenziwa Umgomo
Abalandeli bakaJesu benza ushintsho olukhulu endleleni yabo yokuphila ngoba izinhliziyo zabo zagxila kulomgomo obalulekile. Omunye wabo, umphostoli uPawulu, ngokusobala wayezalwa abazali abanothile edolobheni elihloniphekile eliseMpumalanga ePhakathi. Wayethole imfundo ephakeme kumJuda owayenguthisha nomahluleli ohloniphekile futhi wayethuthuka kakhulu ngomsebenzi okhethekile kunabaningi ontanga yakhe. Kodwa ngenxa yokuthi “wayejonge emgomeni, emklomelweni wokubizwa okukhulu kwaphezulu nguNkulunkulu,” wabheka lezozinto njengezingelutho wanikela ukuphila kwakhe ekwenzeni izinto ezivunyelwa uNkulunkulu. Njengoba kwakunjalo nangamanye amaKristu, ukukhuthazela kukaPawulu nenjongo eqotho kwakusobala ezibukelini.—IzEnzo 22:1-3; Galathiya 1:14; Filipi 3:5-8, 14.
Intshiseko efanayo nenjongo eqotho iyaphawuleka kumaKristu eqiniso namuhla. Ngemva kokubona umhlangano woFakazi BakaJehova, umlobi wephephandaba laseCanada wabika ukuthi isizathu esiyinhloko sokwanda kwabo “singongakholeki umuzwa wokuhileleka nokuzinikezela okuboniswa oFakazi.” Abaningi balaba baye bathola injabulo yeqiniso ngokufuna umgomo wokuphila kunezinye izinto.
Ngokwesibonelo, uMark oneminyaka eyi-19 wayefinyelele emgomeni wakhe wokuba omunye wabavelele abancintisani bemijaho yezithuthuthu eCalifornia (U.S.A.) “Ngangifinyelele eqophelweni lapho nganginqoba emijahweni eminingi. Nganginedumela nginayo yonke imali engangiyifuna ngithandwa yinoma iyiphi intombazane edolobheni,” kwasho uMark. “Kodwa ngemva kokunqoba emjahweni omkhulu, ngazibuza, ‘Ingabe yilokhu kuphela? Manje sengiseqophelweni eliphakeme lokuphila kwami kodwa uphi lowomuzwa wokwaneliseka?’” Abanye babeqaphelisisa ukuphumelela kwakhe okuvelele kwezemijaho futhi benza indlela yakhe yokuphila ibe umgomo wabo. “Babezama ukuthola enganginakho, kodwa konke kwakuyinhlekisa. Ngangingenalutho kodwa babekufuna.” Ngemva kwesikhathi uMark wafunda iBhayibheli ngokungathi-sína noFakazi BakaJehova, wabona ukubaluleka kokufuna umgomo ofanelekile. Ngemva kokuba esengomunye woFakazi, wanikezela ukuphila kwakhe ekufuneni ukuvunyelwa uNkulunkulu nokusiza abanye ngokomoya. Ecabanga ngokuphila kwakhe kusukela lapho, uMark manje oneminyaka engama-27, wathi: “Manje ngathola abangane boqobo nenjabulo yokusiza abanye ngokomoya. Ekugcineni ngaba nomuzwa wokuthi ukuphila kwami kwakufeza okuthile okuwusizo kubantu.”
Kodwa ukufuna umgomo kukuthinta ngezinga elingakanani ukuphila komKristu? Umzamo ongakanani odingwa umKristu ukuze azuze umgomo onjalo? Futhi kungaziphi izindlela ukufuna umgomo okuyiwona okuletha ngazo ukwaneliseka? Yimiphi imigomo yokuqala ngamunye okumelwe ayisebenzele ngenkathi elwela umgomo wokugcina wokuphila okuphakade? Imibuzo enjalo izocatshangelwa esihlokweni esilandelayo.
[Amazwi acashunwe esihlokweni ekhasini 4]
“Manje ngathola abangane boqobo nenjabulo yokubasiza ngempela abanye ngokomoya. Ekugcineni ngaba nomuzwa wokuthi ukuphila kwami kwakufeza okuthile okuwusizo kubantu.”—Owayengushampeni wesithuthuthu oneminyaka engama-27