Manje Yisikhathi Sokushumayela IZwi
“Abayekanga ukufundisa nokushumayela ivangeli ngoJesu Kristu imihla yonke ethempelini nasemakhaya.”—IzEnzo 5:42.
1, 2. (a) Imiphi imiphumela yekhulu lokuqala yokushumayela ngoMbuso esinombiko wayo eBhayibhelini? (b) UJesu wabonisa kanjani kuMathewu 28:19, 20 nakuzEnzo 1:8 ukuthi ukushumayela kwakuyoba umsebenzi wabalandeli bakhe?
NGEMVA kokuthululwa komoya ongcwele ngePentekoste, abalandeli bakaJesu Kristu bagcwala amandla nesibindi sokuqhubeka ngaphandle kokuyeka ekufundiseni nasekumemezeleni izindaba ezinhle ngoKristu, Jesu. Yaba yini imiphumela ekhulwini lokuqala? Sitshelwa ukuthi abaningi abalalela enkulumweni yabalandeli bakaJesu baba amakholwa. Eqinisweni, inani lamadoda akholwa lalinganiselwa ezi-5 000. (IzEnzo 4:4) Kwesinye isehlakalo umbiko weBhayibheli uthi abakholwa eNkosini baqhubeka benezelwa, abesilisa nabasefazane abaningi.—IzEnzo 5:14.
2 Ngesikhashana nje ngemva kwePentekoste kwase kunezinkulungwane ezaba amakholwa ngenxa yokuqhubeka kwabafundi bakaJesu bengayeki ekufundiseni kwabo izindaba ezinhle ngoKristu. Kuvusa amadlingozi ukufunda okwafezwa abahlanganyela ekumemezeleni “izindaba ezinhle” ekhulwini lokuqala leSikhathi sethu eSivamile ngokushesha nje ngemva kokufa nokuvuka kukaJesu, nangokuthululwa komoya ongcwele ukuze bafeze umsebenzi obaluleke kanjalo. Abazalwane bethu nodade abathembekile bekhulu lokuqala babeyizisebenzi ngempela, izisebenzi ezikhuthele, benza ababekwabelwe iNkosi uJesu Kristu.—Mathewu 28:19, 20; IzEnzo 1:8.
3, 4. (a) Ezikhathini zanamuhla, kwaqala nini ukuvuselela umsebenzi wokushumayela? (b) Naphezu kokuvimba kweLobukholwa umsebenzi wokushumayela ngoMbuso, uJehova waqhubeka kanjani elungiselela ukufezwa komsebenzi wakhe, kwaba namiphi imiphumela phakathi nesikhathi esinzima kakhulu emlandweni womuntu?
3 Ingabe kuncane okwenziwa ekhulwini lama-20? Ake sihlole amaqiniso. Khumbulani lokhu ngokuphathelene nekhulu lokuqala nokuqala kobuKristu: Kwaqala ngomuntu oyedwa, iNkosi uJesu Kristu. Kwakhula kangangokuba esikhathini esincane seminyaka emithathu nesigamu abaphikisi bakhe benkolo bathi: “Bheka, izwe lonke liyamlandela.” (Johane 12:19) Osukwini lwethu, kusukela ikakhulukazi ekupheleni kwekhulu le-19, isikhathi sasisondela sokuba umsebenzi omkhulu wokuvuna kukaJehova uNkulunkulu ngoKristu Jesu kuqale. (Mathewu 13:24-30, 36-43) ELobukholwa beliqhubeka kuwo wonke amakhulu eminyaka, kodwa kunokuba liqhubekise ukukhanya kweqiniso ngokuqondene nezindaba ezinhle ngoKristu Jesu nangombuso amaKristu ayezobe ewukhulekela futhi ewubhekile, belifihla ukukhanya ngezimfundiso zalo eziningi ezingamanga. Nokho, uJehova wayengenakuvinjwa njengoba isikhathi sasisondela sokuba iNdodana yakhe ithathe amandla oMbuso. Ngeqembu labafundi beBhayibheli abaqotho umoya oyingcwele kaJehova waqala ukunikeza ukuqondisisa kulabo abathanda ukulu nga futhi abafuna ngobuqotho ukwenza intando nomsebenzi wakhe. Imiphumela iye yaba evusa amadlingozi kusukela kulezozinsuku zakuqala, njengoba yayinjalo ekhulwini lokuqala. Kuye kwalinganiswa ukuthi eminyakeni engaphambi nje kwekhulu lama-20 kwakunabayizi-4 000 ababehlanganyela ekumemezeleni obala ithemba labo.
4 Esikhathini esingangeminyaka engama-80 kusukela ekuqaleni konyaka ka-1900 sithola ukuthi phakathi nesikhathi esinzima kakhulu ekuphileni komuntu uJehova uye waqhubeka enezela esigabeni salezikhonzi ezimemezela izindaba ezinhle ngoKristu noMbuso wakhe. (Qhathanisa nezEnzo 16:5.) Futhi unyaka wenkonzo ka-1981 womsebenzi woFakazi BakaJehova uye waveza izibusiso eziningi kubamemezeli boMbuso emhlabeni wonke.
Lokho Obekwenzeka
5. (a) Isiphi isithakazelo phakathi no-1981 esaboniswa ekugujweni kweSidlo SeNkosi Sakusihlwa ngoFakazi BakaJehova nabathakazelayo? (b) Kulabo ababakhona, bangaki abahlanganyela ekwenzeni isimemezelo sasobala ngoMbuso phakathi nonyaka?
5 Sibuyisela ukunakekela kwethu okokuqala osukwini olubaluleke kakhulu ngokwekhalenda yamaKristu, ukugujwa kweSidlo SeNkosi Sakusihlwa sokukhumbula ukufa kukaKristu, emabandleni ayizi-43 870 emhlabeni wonke phakathi no-1981 kwakunabayizi-5 987 893 ababehlangene ndawonye ngeSonto, ngoApril 19, (ngoNisani 14 ngokwekhalenda yamaJuda), ngalomkhosi. Lezizigidi zezwa futhi zaxoxa ngencazelo yeqiniso neqondile yokufa kweNkosi njengoba ifundiswa eBhayibhelini. Kulelonani emhlabeni wonke onyakeni wenkonzo ka-1981, bekunabayizi-2 247 486 abahlanganyela njalo ekushumayeleni nasekufundiseni izindaba ezinhle zoMbuso emazweni angama-206 neziqhingi. Futhi bekunenani eliphakeme loFakazi abayizi-2 361 896 ngezinye izikhathi phakathi nonyaka abaye bahlanganyela kulenkonzo eyabiwe uNkulunkulu. Bafezani? Sisebenza kanjani isigijimi sabo ekusizeni abantu? Ake sibone.
Ukusakaza IZwi
6. (a) Ezikabani izimfundiso ezingokwenkolo eziye zabusa emakhulwini eminyaka eMelika ePhakathi naseNingizimu, kwaphumela kusiphi isimo? (b) Nokho, iluphi ushintsho obelwenzeka kulamazwe?
6 Inkolo yamaRoma Katolika iye yabusa ukucabanga kwabaseMelika ePhakathi naseNingizimu emakhulwini eminyaka, kwabangela ukuba iningi labantu babe nokwazisa okuncane kakhulu ngezimfundiso eziyiqiniso zeBhayibheli. (2 Korinte 4:4) Ngenxa yalokho, ngaphandle kokwazi uJesu Kristu nezindaba ezinhle zoMbuso, abantu baye bahlakazeka futhi bakhathazeka, ngokufanayo nesimo uJesu asibona phakathi kwamaJuda osuku lwakhe ayengaphansi kokuphathwa konya kwababhali nabaFarisi. (Mathewu 9:36) Nokho, ngenxa yesibusiso sikaNkulunkulu emsebenzi wokushumayela woFakazi BakaJehova kule likhulu lama-20 kulamazwe esiLatini, ushintsho olumangalisayo luyenzeka. Njengoba ukukhanya kuye kwakhanya phakathi kobumnyama obungokomoya obumboze umhlaba, izinkulungwane zabantu abanhliziyo ziqotho ziye zaqoqelwa enhlanganweni kaJehova.—Isaya 60:1, 2, 8.
7. Landisa ngokuhlangenwe nakho okuhle kwentombazane yaseArgentina eneminyaka eyi-12 ubudala.
7 Iqiniso leBhayibheli linamandla kubantu babo bonke ubudala, libasize ukuba bamelele umbuso kaJehova. (IHubo 119:129, 130) Ummemezeli oneminyaka eyi-12 ubudala eArgentina, ongakabhapathizwa nokho, walandisa ngenjabulo yakhe enkulu ekuqhubeni izifundo zeBhayibheli zasekhaya eziyisishiyagalombili. Wabhala lokhu: “Ikakhulukazi phakathi nesikhathi samaholide ngisebenzisa isikhathi esiningi ngangokunokwenzeka emsebenzini wendlu ngendlu, ezimpindelweni nasemsebenzini wezifundo zeBhayibheli. Wonke lomsebenzi ungenza ngijabule futhi nginelungelo elikhulu lokuba ngisetshenziswe uJehova njengethuluzi ezandleni zakhe lokusiza abantu abaningi ukuba bamazi njengoNkulunkulu weqiniso. Ngikhulekela ukuthi sengathi ngingaba nalelithuba njalo.” Ulungiselela ukuba abhapathizwe ngokushesha futhi aqhubeke nomgomo wakhe njengephayona. Lokhu kuvela entombazaneni eneminyaka eyi-12 ubudala! Yeka amandla okucabanga okuhle esinawo eZwini likaNkulunkulu!
8. Ikuphi ukwanda okumangalisayo kwabamemezeli boMbuso okuye kwenzeka eMelika ePhakathi naseNingizimu kusukela ngo-1945?
8 Ngo-1945, ngasekupheleni kwempi yezwe yesibili, eyonakalisa umhlaba, kuyo yonke indawo eMelika ePhakathi naseNingizimu, kuhlanganise neMexico, kwakunabantu abayizi-4 720 ababehlanganyela ekushumayeleni izindaba ezinhle zoMbuso. Phakathi nonyaka wenkonzo ka-1981 kulawomazwe afanayo “ivangeli” liye lashunyayelwa inani eliphakeme labamemezeli abayizi-373 919. Ngokuqinisekile amanzi eqiniso aye enziwa ukuba atholakale kulawomazwe ahangukile futhi abomileyo baye basabela ngendlela emangalisyo.—Qhathanisa noJohane 7:37, 38.
9. Besiyini isimo sabamemezeli boMbuso eYurophu kusukela ekuqaleni kwekhulu lama-20?
9 Izindaba ezinhle zoMbuso zinezimpande ezijulile emazweni amaningi aseYurophu. Kusukela ezinsukwini ezingasekuqaleni kwekhulu lama-20, futhi ngisho nangaphambili kwamanye amazwe, ofakazi bakaJehova, besaziwa ngokuthi abaFundi beBhayibheli Bezwe Lonke, babesakaza izindaba ezinhle zoMbuso phakathi kwabantu. Ngokwesibonelo, umbiko wokuqala wokufakaza owenziwa eJalimane ubheka emuva ngasekuqaleni kwekhulu. Umongameli wokuqala weNhlangano, uCharles T. Russell wavakashela eJalimane ngo-1891, futhi kamuva kwenziwa amalungiselelo okuba kunyatheliswe ezinye izincwadi namapheshana ngolimi lwesiJalimane. Amabandla aseJalimane amiswa okokuqala ngokushesha nje ngemva kuka-1901 eJalimane.
10. Ikuphi okuhlangenwe nakho okuvela eJalimane okubonisa ukuphumelela okuqhubekayo kwenkonzo yendlu ngendlu?
10 Kuze kube namuhla abantu bakaJehova eJalimane basathola ukuthi umsebenzi wendlu ngendlu uyindlela ephumelela kakhulu yokusakaza izindaba ezinhle zoMbuso kaJehova kubantu. (Luka 9:1-6) Ngenxa yokufakaza komunye umbhangqwana abahlangana nawo emsebenzini wendlu ngendlu, abantu abayi-12 kuya kwabayi-14 bahlangana ndawonye kamuva ngesifundo seBhayibheli sasekhaya esaqaliswa. Lomkhaya kamuva wathuthela eAustralia lapho wonke umkhaya, ngaphandle kwendodakazi eyodwa eyayisishadile, waqhubeka ufunda noFakazi BakaJehova. Umama noBaba kusukela lapho babhapathizwa.
11. Omunye ufakazi kaJehova osekhulile, eWest Berlin, waba nomuzwa onjani ngenkonzo yakhe?
11 Ukukhulumela okuvela kudade oneminyaka engama-84 ubudala, eWest Berlín, nakuba ekhubazeke kabuhlungu, kodwa okwaziyo ukuhlanganyela emsebenzini wamaphayona asizayo kuzonikeza umbono othile ngokwazisa kwakhe iqiniso nesidingo sokushumayela iZwi likaNkulunkulu manje. Wathi: “UJehova ngimthanda kangangokuba kulula ukuba ngihlanganyele enkonzweni ngibe khona emihlanganweni ukuze ngikubonakalise lokhu kuye.”—Qhathanisa neHubo 122:1.
12. (a) IItaly iye yamukela izindaba ezinhle zoMbuso ngezinga elingakanani ikakhulukazi kusukela ngo-1945? (b) Imuphi umbiko okhuthazayo esinawo ngomsebenzi woMbuso emazweni aseItaly, ePortugal naseSpain?
12 EItaly, lapho iSonto lamaRoma Katolika beliphethe ukuphila kwabantu benkolo emakhulwini eminyaka, izehlakalo eminyakeni yamuva nje ziye zaveza umsebenzi woFakazi BakaJehova ngezinga elingakaze libe khona. Kusukela eqenjini elincane elilinganiselwa kwabangama-90 ngo-1945, oFakazi BakaJehova baye banda baba inhlangano engokwenkolo engeyesibili ngobukhulu eItaly. (Isaya 60:22) Ngonyaka wenkonzo ka-1981 igatsha libike inani eliphakeme labamemezeli boMbuso abayizi-90 553. Manje ngaphezu kwanoma inini ngaphambili sekuyisikhathi sokushumayela izindaba ezinhle zoMbuso eItaly nakwamanye amazwe esiLatini aseYurophu. EItaly, ngo-1945, njengoba sekushiwo, kwakunabamemezeli abacishe babe ama-90, kodwa eSpain nasePortugal ngalowonyaka akukho mbiko wanoma ibaphi ofakazi bakaJehova abashumayela izindaba ezinhle zombuso. Nokho, ngo-1981 inani selilonke kulamazwe omathathu liye laba abamemezeli abayizi-159 972. Njengoba uJesu asho: “Ukuvuna kukhulu, kodwa izisebenzi ziyingcosana.”—Mathewu 9:37.
Ukuvuna Kwezinye Izindawo
13. (a) Imiblko ibonisani ngokuqondene nokusakazwa kwe“vangeli” emazweni aseAfrika? (b) Ikuphi okuhlangenwe nakho okubonisa ukuthi ngempela sekuyisikhathi sokuvuna abantu abathanda ukulunga abengeziwe?
13 Ezindaweni eziningi eAfrika, izinkulungwane phezu kwezinkulungwane ziye zasabela esigijimini seqiniso nje ngoba simenyezelwa lapho ngofakazi abathembekile bakaJehova phakathi nekhulu lama-20. Kwezinye izindawo, njengaseNigeria, eNingizimu Afrika, eZambia, eZimbabwe naseMalawi, izimbewu zeqiniso zahlwanyelwa emuva lé ngawo-1923 kuya ku-1927, kanti kwamanye amazwe, njengeMali, iMauritania, iUpper Volta neRwanda, isigijimi asizange siveze abamemezeli boMbuso kwaze kwaba isikhathi esiphakathi kuka-1962 no-1970. Ngokuqinisekile isikhathi siyavumelana nokwenza noma yini enokwenzeka yokusiza abomileyo ukuba beze emanzini eqiniso ngaphambi kokuba uJehova athi umsebenzi usufeziwe. EZambia iphayona elikhethekile lavakashela umuzi wenduna eyabonisa isithakazelo esikhulu esigijimini soMbuso. Induna yamema abanye ukuba bazolalela, sebebonke babeyi-18 ababelalele isigijimi sephayona elikhethekile, kwaphumela ekuqalisweni kwezifundo zeBhayibheli zasekhaya eziningana. Esikhathini esifushane ibandla lendawo lakhula ngezigaba zabamemezeli besuka ema-65 beya ku-86. Namuhla kunezindawo ezimbalwa kakhulu emazweni abaNsundu lapho bengekho khona ofakazi bakaJehova abashumayela “ivangeli.”
14. Ikuphi okuhlangenwe nakho okuthakazelisa kakhulu okubikwa ukuthi kwenzeka eziqhingini zaseTorres Straits?
14 Imibiko evela kwezinye izingxenye zomhlaba kulonyaka odlule iye yabonakala ingeminye yezibusiso nentuthuko. Kudanyana nesihloko esisenyakatho neAustralia kuneziqhingi zaseTorres Straits. Kuneziqhingi eziyi-100 kuleloqoqo, ezingama-20 zazo zihlala abantu. Esinye saleziqhingi, iThursday Island, sinebandla elikhulayo loFakazi BakaJehova. Umbonisi wesifunda nabazalwane ababili eThursday Island bavakashela esinye isiqhingi esibizwa ngokuthi iSue, lapho bamukelwa khona ngokufudumele. Usihlalo wesiqhingi, njengoba ebizwa kanjalo, wayememe abazalwane ukuba beze njengoba enesithakazelo eqinisweni leBhayibheli nasemsebenzini woFakazi BakaJehova, unezincwadi zoFakazi BakaJehova. Yeka ukuthi abazalwane bamangala kanjani ukuthola ukuthi losihlalo wayenemithetho eqinile ngokuqondene nokucoceka phakathi kwabantu besiqhingi kanye nangokuziphatha kwabo. Uvame ukulungiselela abantu ukuba babe nokuhlangana kohlobo oluthile okungokomoya. Phakathi nokuvakashela kwabazalwane, balalela amaculo ahlatshelelwa phakathi kwalokhu kuhlangana, amagama awo ayethathwe kwezinye izincwadi zeWatch Tower Society. Bakwazi ukunikeza inkulumo kubantu abangama-40, nokubakhuthaza ekutadisheni kwabo iBhayibheli ngokusebenzisa izincwadi zeNhlangano.
Ubufakazi Emhlabeni Wonke
15. Ngakho-ke, ikuphi okuqhubeka kuwumthwalo wemfanelo wezikhonzi zikajehova zoMbuso?
15 Yeka ukuthi amazwi kaJesu akuMathewu 24:14 siye sawacaphuna kaningi kangakanani okuthi “lelivangeli lombuso liyakushunyayelwa ezweni lonke, kubengubufakazi ezizweni zonke andukuba kufike ukuphela”! Ubufakazi boMbuso bunikezwa ngezwi nangesenzo yizinceku ezithembekile zikaJehova. Lapho ubufakazi obanele sebunikeziwe—uJehova uNkulunkulu oyonquma—khona-ke ukuphela kuyofika. Khona-ke, isabelo sethu esiqhubekayo, siwukuqhubeka nokunikeza ubufakazi ngesehlakalo esikhulukazi izwe eliyosibona, ukuza kombuso kaJehova ezandleni zeNkosi yakhe ebusayo, iNkosi yethu uJesu Kristu.
16. (a) Iziphi izibalo ezinikeziwe zokubonisa ukuthi oFakazi BakaJehova bayakuqaphela ukuthi manje yisikhathi sokushumayela iZwi? (b) Kanjalo imuphi umbuzo womuntu siqu esizibuza wona?
16 Emazweni angama-206 naseziqhingini zomhlaba ngonyaka odlule kwakunamahora asetshenziswa enkonzweni ayizi-358 581 547 ngabamemezeli abayizi-2 361 896 bezindaba ezinhle zoMbuso ekusakazeni lesigijimi esijabulisayo. Baqhuba izifundo zeBhayibheli zasemakhaya eziyizi-1 475 177 futhi basakaza izincwadi nezincwajana eziyizi-31 444 062 omagazini INqabayokulinda nePhaphama! abayizi-234 163 921 emhlabeni wonke. Lokhu, ngaphezu kobufakazi obuyinqwaba obuye banikezwa eminyakeni eminingi yekhulu lama-20, kunikeza ubufakazi obuningi besifiso sabantu bakaJehova ukuba bafeze ukuthunywa kwabo ‘kokushumayela izindaba ezinhle kwabathobileyo, nokubopha abanhliziyo ezaphukileyo, nokumemezela ukukhululwa kwabathunjwa nokumemezela unyaka womusa kaJehova nosuku lokuphindisela lukaNkulunkulu wethu, nokududuza bonke abalilayo.’ (Isaya 61:1, 2) Ingabe uyahlanganyela MANJE ekushumayeleni iZwi likaNkulunkulu nombuso wakhe othenjisiwe?
17. Ibuphi ubufakazi obengeziwe besibusiso sikaJehova esizobucabangela ngokulandelayo?
17 Phakathi nonyaka wenkonzo ka-1981 abantu abayizi-119 836 bangena ezigabeni zalabo abanikela ukuphila kwabo kuJehova futhi bakubonisa lokhu ngobhapathizo lwamanzi. Sibemukela bonke laba ebuzalwaneni bobuKristu. Njengoba uhlola ishadi elihambisana nalomagazini, eliveza umsebenzi wokushumayela ngoMbuso woFakazi BakaJehova onyakeni wenkonzo ka-1981, uzobona ukuthi kusukela eMpumalanga naseNtshonalanga izinkulungwane ngezinkulungwane ziye zeza emanzini okuphila naweqiniso alungiselelwe eZwini likaNkulunkulu, futhi laba baye bahlanganyela ekumemezeleni izindaba ezinhle zoMbuso.
18. Njengoba nsuku zonke isikhathi esisele siyancipha, lokhu kusho ukuthini mayelana nokubaluleka komsebenzi wethu wokushumayela, futhi ngalokho kumelwe sibe yini isinqumo sethu?
18 Nsuku zonke, isikhathi esisele salesimiso sezinto esonakele siyaqhubeka sincipha, okusho ukuthi amathuba ethu okushumayela “ivangeli” abaluleke kakhulu ngokwengeziwe. Kwangathi usuku ngalunye lungasithola senza imizamo enamandla ekuzibonakaliseni singabalandeli bakaJesu abathembekile, sifuna ukulingisa inkambo yokuphila kwakhe njengomphakamisi wokukhulekela okungcwele. NjengoDavide othembekile, kwangathi ukushisekela indlu kaJehova, ukukhulekelwa kwakhe okumsulwa nokuhlanzekile, kungasibangela ukuba sime siqinile ebuqothweni bethu futhi siqhubeke ngenani labamemezeli boMbuso kuze kube yilapho uJehova ethi umsebenzi usuphelile.—IHubo 69:9.
[Ibhokisi/Isithombe ekhasini 24]
Ukwanda kwabashumayeli beZwi EMELIKA EPHAKATHI NASENINGIZIMU—
1945 . . . abamemezeli abayizi-4 720
1981 . . . abamemezeli abayizi-373 919
[Ibhokisi/Isithombe ekhasini 25]
Ukwanda kwabamemezeli boMbuso eSPAIN, ePORTUGAL naseITALY—
1945 . . . abamemezeli abangama-90
1981 . . . abamemezeli abayizi-159 972
[Ibhokisi/Isithombe ekhasini 30]
Ukwanda koFakazi eAFRICA—
1945 . . . abamemezeli abayizi-19 083
1981 . . . abamemezeli abayizi-300 989
[Ishadi ekhasini 26-29]
UMBIKO WONYAKA WENKONZO KA-1981 WOFAKAZI BAKAJEHOVA EZWENI LONKE
(Bheka umqulu)