Ukuqondisisa Izindaba

Indelakazi Yeluleka Abagembuli

● Inkulumo ethi “Indlela Yokugembula—Uma Kufanele” Inikezwa ngezikhathi ezithile indelakazi engumKatolika emibuthanweni yokuzijabulisa endaweni yeTheku laseSan Francisco eCalifornia. Lendelakazi ineziqu zobudokotela ku“mathematics” futhi iyingcweti yokucabangela okungenzeka. Ngokwephephandaba i“The Oregonian,” inikeza iseluleko namacebo emaqenjini aceba ukuthatha uhambo lokugembula lokuya eNevada. Eqinisweni, ukusikisela kwayo kuthi: “Wazi umdlalo. Wazi nemiphumela yawo emibi.” Ibuye futhi inikeze iseluleko ngokuthi hlobo luni lwemidlalo okumelwe ibhejelwe naleyo okungamelwe ibhejelwe.

Lapho ibuzwa ukuthi kuyisono yini ukugembula, indelakazi yaphendula: “Cha, angikholwa ukuthi kunjalo.” “Ukuphila kuwukugembula,” yenezela. “Ngicabanga ukuthi ukugembula akulona uhlobo lokona.” Izinkulumo zayo zazimane nje zibonisa umbono wesonto layo. “Imfundiso yobuKatolika icabangela ukugembula njengokungenandaba kangako ngokwakho,” kwasho i“Catholic Encyclopedia for School and Home.”—Umq. 4, k. 506.

Nokho, okuhlangenwe nakho kubonisa ukuthi, lapho imali kubhejwe ngayo, ukuhaha kuba khona. Abaningi abacindezeleka ukuba abagembuli baqala ngokugembula ngemadlana encane ‘njengokuzijabulisa.’ Ngakho-ke, kunokuzama ‘ukwazi umdlalo nemiphumela emibi yawo,’ nokuhileleka ezenzweni ezaziwa njengeziveza “imisebenzi yenyama,” akuhlakaniphile yini ngomKristu ukuzihilela ezenzweni ezikhiqiza “izithelo zomoya”?—Gal. 5:19-23.

Imikhosi Yobuqaba ‘EYenziwe UbuKristu’?

● Kukhanyiswa amalangabi ngasogwini olusempumalanga yesiSpain futhi emazweni amaningi aseYurophu ubusuku obungaphambi kukaJune 24, bubizwa ngokuthi usuku “lukaJohane uMbhapathizi ongcwele” ngokwekhalenda yamaKatolika. Lamalangabi ahlobene kanjani noJohane uMbhapathizi? Iphepha lasekuseni laseBarcelona i“La Vanguardia” lavuma ukuthi wonke umkhosi eqinisweni “umelele ubuKristu empendukalanga yasehlobo.” Isehlakalo esingokwezinkanyezi lapho ilanga libonakala sengathi limile ekujikelezeni kwalo kokuya ngasenyakatho noma eningizimu, kwakubangela lemikhosi nokuzijabulisa okukhulu phakathi kwamaqaba asendulo.

Omunye umkhosi omkhulu wempendukalanga oye wenziwa ‘ubuKristu’ ngokaDecember 25. Cishe phakathi nalesosikhathi izinsuku ziqala ukuba zinde, futhi amaRoma akhulekela ilanga ayegubha umkhosi wokuzalwa kwelanga elingenakunqotshwa. Ekhulwini lesine lona washintsha waba umkhosi wokuzalwa kweNdodana kaNkulunkulu ngisho isihlahla esicishe sifane nophayini (fir) esisetshenziswa imindeni yamaqaba engamaJalimane emikhosini yawo yempendukalanga yasebusika sabuye kamuva samukelwa njengesihlahla “sikaKhisimusi”.

Esikhundleni sokwenza izehlakalo ezinjalo zobuqaba zibe ‘ezobuKristu’ umphostoli uPawulu ubekela amaKristu eqiniso inkambo efanelekile ngokubuza: “Kunabudlelwane buni ukukhanya nobumnyama na?” Khona-ke uyayala: “Phumani phakathi kwabo, nahlukane nabo, isho iNkosi; ningathinti okungcolileyo; khona ngiyakunamukela.”—2 Kor. 6:14-17.

Izinto Ezibonakalayo Ezingenelisi

● Abahamba ngezinto zokuhamba besuka emaphandleni beya emsebenzini eTokyo, eJaphani, bachitha isilinganiso sehora nengxenye beya futhi bebuya emsebenzini. Njengoba abaningi basebenza isikhathi eseqile amahora simbalwa usuku ngalunye, kungokuvamile ngabo ukuba bangabibikho emakhaya amahora ayi-13 noma ngaphezulu. Njengoba beshiya amakhaya abo ngaphambi kuka-7:00 ekuseni, kuvamile ukuba babuye ngemva kuka-8:00 ebusuku.

Iningi lalezizisebenzi lihlala ezindlini ezincane nezimpahlana ezincane njengoba indawo ayitholakali kalula. Uma kuqhathaniswa nendawo engama 15 mitha ububanzi nama 30 mitha ubude, isilinganiso sendlu yabo singaba yingxenye yalokho. ETokyo ngokwayo, kungaphansi ngisho kwalokho. Naphezu kwawo wonke lomsebenzi onzima, bambalwa kakhulu ababona noma iyiphi indlela yokuthuthukisa isimo sabo.

Nokho, oFakazi BakaJehova abangaphezu kwezi-64 000 eJaphani baqhuba izifundo zeBhayibheli nabantu emakhaya abangaphezu kwezi-90 000 bebabonisa ngokuvela eBhayibhelini ithemba elingokoqobo lokuphila okwenelisa ngokwengeziwe epharadesi ‘lomhlaba omusha.’ (2 Pet. 3:13) Kulolohlelo olusha olwenziwa uNkulunkulu abantu bayophila ngokuthula, nokwaneliseka nangokuchuma okungokoqobo ngokwezinto ezibonakalayo, bekhululeke kukho konke ukukhungatheka kwanamuhla, njengoba umprofethi uIsaya abikezela: “Bayakwakha izindlu, bahlale kuzo; bayakutshala izivini, badle izithelo zazo. Abayikwakha, kuhlale omunye, abayikutshala, kudle omunye, ngokuba izinsuku zabantu bami ziyakuba-njengezinsuku zomuthi.”—Isaya 65:21, 22; IHu. 37:11.