Ukuqondisisa Izindaba
“Inhliziyo Ikwedlula Konke”
● Izazi zenhliziyo manje zikholelwa ukuthi cishe ingxenye eyodwa yeziguli iba nezinkinga ezingokomzwelo ngemva kokuhlinzwa. Lokhu ngokuvamile kuqala ngemva cishe kosuku lwesibili ngemva kokuhlinzwa futhi kungase cishe kuthathe isonto. Iziguli ezithile ziyabheda; ezinye ziphuphe izinto ezesabekayo futhi zibe nemibono yezinto ezingekho; ezinye zikhathazeka isikhathi eside futhi zicindezeleke. Ukuze kunqotshwe izinkinga ezingokomzwelo lezo iziguli ezithile eziba nazo ngemva kokuhlinzwa, odokotela benhliziyo nezazi zengqondo ezweni lonke, babumbe inyonyana yezwe lonke. Lenyonyana izofuna ukuba odokotela nabahlengikazi banakekele kakhulu isimo esingokomzwelo sesiguli ngemva kokuhlinzwa inhliziyo njengoba benza ekushayeni kwenhliziyo.
Izazi zikhuluma ngokubaluleka okungokwengqondo kwenhliziyo. Ngokwesibonelo, isazi sengqondo uRichard S. Blacher of Tufts—New England Medical Center eBoston sithi ngenhliziyo: “lyisitho esikhetheke kakhulu. Abantu ngokuvamile bayicabangela njengendawo ehlala imizwelo. Ezingqondweni zethu, inhliziyo ikwedlula konke.”—“Newsweek,” May 25, 1981, k. 63.
Yeka indlela okuyiqiniso ngayo ukuthi inhliziyo ibonakala inqoba ikhanda, indawo yokuhlakanipha! Ngenxa yalokhu, inhliziyo, ngaphezu kwakho konke kumelwe iqeqeshwe futhi ifundiswe ukusabela ekuqondiseni kweBhayibheli. Kumelwe ifundiswe ukwazisa izimfanelo ezingokomoya. Lezimfanelo zivela kuNkulunkulu. “Phezu kwakho konke okugcinayo, gcina inhliziyo yakho, ngokuba kuyilapho kuvela khona ukuphila.”—IzAga 4:23, qhathanisa noMathewu 15:19.
Isikhundla SikaKristu Asinakwa
● “Umbuso kaNkulunkulu ungowezombangazwe.” Washo kanjalo umbhishobhi oyiNgisi uSteven Mumba njengoba ekhuthaza amaKristu ukuba angazibalekeli ezombangazwe. Eqinisweni, umbhishobhi waseAfrika umane nje uphinda umbono womholi oyiNgisi, uRobert Runcie, umbhishobhi omkhulu waseCanterbury, owathi muva nje emzini waseNew York eSontweni elikhulu iSt. Phillips: “ISonto alikho mahhala, kodwa ukuze lakhe umbuso kaNkulunkulu emphakathini elithunyelwe kuwo.”
Lapho umfundisi weLobukholwa ehlanganisa umbuso kaNkulunkulu nezombangazwe, akabatsheli abantu abaya esontweni isikhundla sikaKristu endabeni. Ngokwesibonelo, uJesu wakwenqaba konke ukusebenzelana okungokwezombangazwe, ngisho nakuba ayenikezwa ubukhosi izikhathi eziningi. (Mat. 4:8-11; Joh. 6:15) UJesu wathi kubalandeli bakhe “abasibo abezwe, njengalokhu nami angisiye owezwe.” Futhi lapho ebuzwa ngegunya lakhe njengenkosi, uJesu watshela umbusi ongumRoma uPontiyu Pilatu: “Umbuso wami awusiwo owalapha.”—Joh. 17:16; 18:36.
Ukusina Emlilweni Kuyicebo Lokuphamba
● Ngemva kokubuka iqembu labantu ababesina phezu kwamalahle avuthayo eGrisi, umMelika owayevakashile wafisela ukukuzama ngokwakhe. Wagxumela emalahleni—kodwa wathola imiphumela edabukisayo. Washa isikhumba sezithende zakhe. Inkinga kwakungebona nje ubuhlungu obunzima kuphela, kodwa wacishe wabulawa abantu ababeshisekela inkolo ababesina emlilweni ababembheka njengowonakalisa umkhosi wabo. Kwadingeka ukuba amaphoyisa ayihlenge lendoda esixukwini.
“Ngangicabanga ukuthi babemane nje bagxumele kolunye uhlangothi ngokushesha, futhi kwakumane nje kuyicebo lokuphamba,” kwasho umlisa oneminyaka engama-29 ongumMelika esembhedeni wakhe esibhedlela. Wanezela: “Isimo sobuhlanya esingokwenkolo abantu abasina phezu komlilo ababa kuso lapho bekwenza asikholeki ngempela. Anginakuyalela noma ubani ukuba akuzame. Ukuphela kwento engaqiniseka ngayo ukuthi labantu bangokoqobo.”
Ukuhamba nokusina phezu komlilo, okubonakala ngezinhlobo ezahlukene, akumelwe nakancane kubhekwe njengecebo lokuphamba. Kungaba okungokoqobo ngokomqondo wokuthi amandla angaphezu kwawomuntu ahilelekile. Ngenxa yokuthi amandla emimoya emibi yiwona asekela lezizenzo zomlingo nezokubhula eziphawulwe kuDuteronomi 18:10-12, uNkulunkulu weqiniso ubheka okunjalo ‘njengokwenyanyekayo’ emehlweni akhe. Lezingelosi ezingamademoni ziyazazi izindlela zokuvikela isikhumba emlilweni oshisayo.