Mashi

EBhayibhelini sifunda ngabantu abalungile abashintsha baba abantu abangalungile. INkosi uSolomoni ingomunye wabo. Yafundiswa ngokucophelela izindlela zikaNkulunkulu futhi uJehova wayibusisa kakhulu; nokho, kamuva yakhulekela onkulunkulu bamanga. Izono zayo zamthukuthelisa kakhulu uJehova futhi imiphumela yazo yahlala amakhulu eminyaka. Yiqiniso, imiBhalo iyasho ukuthi uSolomoni “washona, wangcwatshwa” namadoda athembekile ahlanganisa neNkosi uDavide. (1 AmaKh. 11:​5-9, 43; 2 AmaKh. 23:13) Ingabe indlela angcwatshwa ngayo yayiyisiqinisekiso sokuthi uzovuswa? IBhayibheli alisho. Uvuko luyisipho esivela kuNkulunkulu onothando. Ulunika labo afuna ukubanika ithuba lokumkhonza phakade. (Jobe 14:​13, 14; Joh. 6:44) USolomoni uyosithola yini leso sipho? NguJehova owazi impendulo; thina asiyazi. Kodwa siyazi ukuthi uJehova uyokwenza okulungile. w24.05 4 ¶9

Lapho sinikezela ukuphila kwethu kuJehova, siba yizimenywa etendeni lakhe elingokomfanekiso. Sijabulela intilibathwa yokudla okungokomoya nobungani nabanye abayizimenywa zikaJehova. Itende lakhe elingokomfanekiso alikho endaweni eyodwa. Lingatholakala nomaphi lapho kunabakhulekeli bakaNkulunkulu abalalelayo. (IsAm. 21:3) Kuthiwani ngabantu abathembekile asebashona? Kunengqondo yini ukuphetha ngokuthi baseyizimenywa etendeni likaJehova? Yebo! Kungani sisho kanjalo? Kungenxa yokuthi bayaphila enkumbulweni kaJehova. UJesu wachaza: “Ukuthi abafile bayavuswa, ngisho noMose wakwenza kwaziwa endabeni ephathelene nesihlahla sameva, lapho ebiza uJehova ngokuthi ‘uNkulunkulu ka-Abrahama noNkulunkulu ka-Isaka noNkulunkulu kaJakobe.’ UnguNkulunkulu wabaphilayo, akayena owabafile, ngoba bonke bayaphila kuye.”—Luka 20:​37, 38. w24.06 3 ¶6-7

UZadoki waya eHebroni ehlomile elungele impi. (1 IziKr. 12:38) Wayezimisele ukuya noDavide empini avikele u-Israyeli ezitheni zakhe. Nakuba uZadoki ayengenaso isipiliyoni esitheni empini, wayenesibindi. Umpristi ofana noZadoki wakufunda kuphi ukuba nesibindi esingaka? Wayazi amadoda amaningi anamandla nanesibindi. Akungabazeki ukuthi wafunda esibonelweni sawo. Ngokwesibonelo, isibonelo sikaDavide ‘sokuhola u-Israyeli emikhankasweni yakhe yempi’ ngesibindi senza wonke u-Israyeli wamsekela ngenhliziyo yonke. (1 IziKr. 11:​1, 2) UDavide wayencike kuJehova ngaso sonke isikhathi ukuze amsize alwe nezitha zakhe. (IHu. 138:3) UZadoki wafunda nakwamanye amadoda anesibindi ayekanye naye—amadoda anjengoJehoyada nendodana yakhe eyiqhawe uBhenaya kanye nezinduna ezingu-22 ezasekela uDavide.—1 IziKr. 11:​22-25; 12:​26-28. w24.07 3 ¶5-6

USawulu waseTarsu wayebashushisa ngonya abalandeli bakaKristu abathandekayo. Cishe amaKristu amaningi ayecabanga ukuthi wayengasoze nanini aphenduke. Kodwa uJesu ovusiwe wayengenawo nhlobo lowo mbono wabantu oyiphutha. Yena noBaba wakhe babona izimfanelo ezinhle kuSawulu. UJesu wathi: “Lo muntu uyisitsha sami engisikhethile.” (IzE. 9:15) UJesu waze wenza nesimangaliso ukuze asize uSawulu aphenduke. (IzE. 7:58–8:3; 9:​1-9, 17-20) Ngemva kokuba umKristu, uSawulu—kamuva owaziwa ngokuthi umphostoli uPawulu—wayevame ukubonga ngendlela aboniswa ngayo umusa nesihe. (1 Thim. 1:​12-15) Lapho uPawulu ezwa ngodaba oluyihlazo olumayelana nokuziphatha okubi okwenzeka ebandleni lobuKristu laseKorinte, walusingatha kanjani lolo daba? Indlela alusingatha ngayo isifundisa lukhulu ngendlela uJehova asiyala ngayo ngothando nangokubaluleka kokubonisa isihe. w24.08 13 ¶15-16

Phakathi namakhulu eminyaka, kancane kancane uJehova ubelokhu ekwenza kucace ukuthi abantu abanesono bangasondelana kanjani naye. U-Abela, indodana yesibili ka-Adamu no-Eva, waba umuntu wokuqala owabonisa ukholo kuJehova ngemva kwenhlekelele yase-Edene. Ngenxa yokuthi u-Abela wayemthanda uJehova futhi efuna ukumjabulisa nokusondelana naye, wamenzela umhlatshelo. U-Abela wayengumalusi, ngakho wathatha amanye amazinyane akhe wawahlaba, wawanikela kuJehova. Wenzenjani uJehova? ‘Wamamukela u-Abela nomnikelo wakhe.’ (Gen. 4:4) UJehova wayamukela neminye imihlatshelo efanayo eyayenziwa abantu ababemthanda futhi bemethemba—njengoNowa. (Gen. 8:​20, 21) Ngokwamukela imihlatshelo enjalo, uJehova wabonisa ukuthi abantu abanesono bangamjabulisa futhi basondelane naye. w24.08 3 ¶5-6

Singase sizwe ubuhlungu obukhulu futhi sikhathazeke lapho siphathwa ngendlela engenabulungisa. (UmSh. 7:7) Izinceku zikaJehova ezithembekile ezinjengoJobe noHabakuki zazizizwa ngaleyo ndlela. (Jobe 6:​2, 3; Hab. 1:​1-3) Nakuba kungokwemvelo ukuzizwa ngaleyo ndlela, kudingeka siyiqaphe indlela esisabela ngayo ukuze singenzi into ewubuwula bese senza izinto zibe zimbi nakakhulu. Lapho abantu abasiphatha ngendlela engenabulungisa bebonakala bengajeziswa ngenxa yezenzo zabo, singase siqale ukuzibuza ukuthi kuyasiza ngempela yini ukwenza okulungile. Cabanga ngomhubi owayebona abantu ababi bebonakala bechuma ngokuphatha kabi abantu abalungile. Wathi: “Laba yibo ababi, okuhlale kubahambela kahle.” (IHu. 73:12) Naye wayekhathazekile ngenxa yokungabi nabulungisa ayekubona futhi wayecabanga ukuthi kwakungazuzisi ukukhonza uJehova. Wathi: “Lapho ngizama ukukuqonda, kwakungibangela ukukhathazeka.”—IHu. 73:​14, 16. w24.11 3 ¶5-7

Sikhazimulisa uJehova ngoba simhlonipha ngokujulile. Sinezizathu eziningi zokumhlonipha. UJehova unguMninimandla Onke; unamandla angenamkhawulo. (IHu. 96:​4-7) Ukuhlakanipha kwakhe okujulile kubonakala ngokucacile ezintweni azidalile. UnguMthombo wokuphila kwethu noMlondolozi wokuphila. (IsAm. 4:11) Uthembekile. (IsAm. 15:4) Yonke into ayenzayo iyaphumelela futhi uhlale ezigcina izithembiso zakhe. (Josh. 23:14) Yingakho umprofethi uJeremiya athi ngoJehova: “Phakathi kwabo bonke abahlakaniphile kuyo yonke imibuso yomhlaba, akekho nhlobo onjengawe”! (Jer. 10:​6, 7) Ngempela, sinezizathu eziningi zokumhlonipha uBaba wethu osezulwini. Izinto uJehova azenzayo azigcini nje ngokusenza simhloniphe—zenza nokuba simthande. Futhi ngaphezu kwakho konke, sikhazimulisa uJehova ngoba simthanda kakhulu. w25.01 3 ¶5-6

Abaphikisi bakaNkulunkulu bazama ukuzenza zibonakale zizimbi izinto ezinhle ezenziwa inhlangano yakhe. Ngokwesibonelo, sifundile emiBhalweni ukuthi uJehova ulindele ukuba abakhulekeli bakhe bahlanzeke emzimbeni, ngokomoya nasendleleni abaziphatha ngayo. Ufuna ukuba noma ubani oqhubeka eziphatha ngendlela engahlanzekile ongafuni ukuphenduka asuswe ebandleni. (1 Kor. 5:​11, 12; 6:​9, 10) Silalela lowo myalo weBhayibheli. Kodwa abaphikisi bethu bayasigxeka, basimangalele ngokuthi asinawo umqondo ovulekile, sahlulela abanye futhi asinalo uthando. Kumele siqonde ukuthi ubani ngempela ongumthombo walokho kuhlasela. USathane uDeveli nguye ogqugquzela izindaba ezingamanga. ‘Unguyise wamanga.’ (Joh. 8:44; Gen. 3:​1-5) Ngakho kufanele sikulindele ukuthi uSathane uzosebenzisa abalandeli bakhe ukuba basakaze izindaba ezingamanga ngenhlangano kaJehova. w24.04 10-11 ¶13-14

Ngisho nangemva kokuqala kosizi olukhulu, kungenzeka abanye abayobe bebona ukubhujiswa ‘kweBhabhiloni Elikhulu’ bayokhumbula ukuthi oFakazi BakaJehova bakhuluma ngalezi zinto kusengaphambili. Lapho abanye bebona kubhujiswa “iBhabhiloni Elikhulu,” kungenzeka yini babonise ukholo? (IsAm. 17:5) Uma benza kanjalo, bayobe benza into efana naleyo eyenzeka eGibhithe ngosuku lukaMose. Khumbula ukuthi “iqembu elikhulu elixubile” lahamba nama-Israyeli lapho ehamba eGibhithe. Kungenzeka ukuthi abanye kulabo bantu baqala ukuba nokholo lapho bebona iZinhlupho Eziyishumi uMose axwayisa ngazo zenzeka. (Eks. 12:38) Uma kungenzeka okufanayo ngemva kokubhujiswa kweBhabhiloni Elikhulu, ingabe kufanele sidumazeke lapho abantu bephenduka ngaphambi nje kokuba ukuphela kufike? Lutho neze! Sifuna ukulingisa ubuntu bukaBaba wethu osezulwini, “uNkulunkulu onesihe nozwela, owephuza ukuthukuthela nochichima uthando oluqotho neqiniso.”—Eks. 34:6. w24.05 11 ¶12-13

Yini engenzeka uma singachezuka “esibonelweni samazwi anempilo”? Cabanga ngalesi sibonelo. Ngekhulu lokuqala, amanye amaKristu ayesakaza amahemuhemu athi usuku lukaJehova selufikile. Kungenzeka kwakunencwadi—okwakucatshangwa ukuthi yayibhalwe umphostoli uPawulu—eyayisho lokho. Kunokuba azinike isikhathi sokuhlola ukuthi kwakuyiqiniso yini lokho, amanye amaKristu aseThesalonika awakholwa lawo mahemuhemu, aze awasakaza nokuwasakaza. Ayengeke akhohliseke ukube azikhumbula izinto uPawulu ayewafundise zona ngesikhathi esenawo. (2 Thes. 2:​1-5) UPawulu weluleka abafowabo ukuba bangakholwa yiyo yonke into abayizwayo. Ukuze abasize esikhathini esizayo, uPawulu waphetha incwadi yakhe yesibili eya kwabaseThesalonika ngamazwi athi: “Nanku umkhonzo wami, mina Pawulu, ngesandla sami siqu, okuwuphawu kuzo zonke izincwadi; yile ndlela engibhala ngayo.”—2 Thes. 3:17. w24.07 12 ¶13-14

AmaKristu angamaHebheru kwakuyodingeka akhuthazelele ukuvivinywa kokholo lwawo njengoba isimo sasiya siba sibi nakakhulu eJudiya. Nakuba amanye amaKristu angamaHebheru ake abhekana noshushiso olunzima esikhathini esingaphambili, amaningi amukela ubuKristu ngesikhathi kunokuthula ngezinga elithile. Umphostoli uPawulu wathi nakuba ayekhuthazelele ukuvivinywa kokholo lwawo okunzima, ayengahluphekanga njengoJesu, okuwukuthi, kuze kube seqophelweni lokufa. (Heb. 12:4) Nokho, ngenxa yokuthi babanda abantu abangamaKristu, abaphikisi abangamaJuda babethukuthela ngisho nakakhulu futhi babenodlame. Eminyakeni embalwa nje ngaphambi kokuba lokho kwenzeke, amaJuda angaphezu kuka-40 “afunga ukuthi ngeke adle noma aphuze aze ambulale uPawulu.” (IzE. 22:22; 23:​12-14) Nakuba lawo maKristu ayezozondwa futhi ashushiswe, kwakusadingeka ahlangane ndawonye ukuze akhonze uNkulunkulu, ashumayele izindaba ezinhle, agcine nokholo lwawo luqinile. w24.09 12 ¶15

UJohane wayengumphostoli uJesu Kristu ayemthanda. (Math. 10:2) UJohane wahamba noJesu phakathi nayo yonke inkonzo yakhe, wabona izimangaliso azenza, wanamathela kuye ngisho nasebunzimeni. Wayebukele ngesikhathi uJesu ebulawa, wambona lapho esevusiwe. Wabona nalapho amaKristu anda ngekhulu lokuqala, esuka ekubeni iqembu elincane lamaKristu athembekile kwaze kwaba yilapho izindaba ezinhle ‘sezishunyayelwe kuyo yonke indalo engaphansi kwezulu.’ (Kol. 1:23) Lapho uJohane esekhulile, waba nelungelo lokubhala iZwi likaNkulunkulu eliphefumulelwe. Wabhala “isambulo sikaJesu Kristu” esimangalisayo. (IsAm. 1:1) UJohane wabhala iVangeli elibizwa ngegama lakhe. Wabhala nezincwadi ezintathu eziphefumulelwe. Incwadi yakhe yesithathu wayibhalela umKristu othembekile uGayu, lowo uJohane ayembheka njengomntwana wakhe ongokomoya othandekayo. (3 Joh. 1) Lokho le ndoda esikhulile eyakubhala kusabakhuthaza abalandeli bakaJesu ngisho nanamuhla. w24.11 12 ¶15-16

Umyeni othanda umkakhe uyamazisa futhi umphatha kahle. Umbheka njengesipho esiyigugu esivela kuJehova. (IzAga 18:22; 31:10) Ngenxa yalokho, umbonisa umusa nenhlonipho ngisho nalapho benza ucansi. Ngeke amphoqe ukuba enze izenzo zocansi ezimenza angakhululeki, ezimlulazayo noma ezihlupha unembeza wakhe. Naye umyeni uyolwela ukuhlale enonembeza ohlanzekile phambi kukaJehova. (IzE. 24:16) Bayeni, ningaqiniseka ngokuthi uJehova uyajabula lapho enibona nenza konke eningakwenza ukuze nibabonise uthando nenhlonipho omkenu kukho konke enikushoyo nenikwenzayo. Zimisele ukumazisa umkakho ngokuthi ugweme ukuziphatha okuyihlazo, umbonise umusa, inhlonipho nothando. Ngokwenza kanjalo, ubonisa ukuthi uyamthanda futhi ubalulekile kuwe. Mbonise uthando nenhlonipho umkakho ngokwenza kanjalo uyovikela ubuhlobo obubaluleke kakhulu kuwe—ubungani bakho noJehova.—IHu. 25:14. w25.01 13 ¶17-18

Into eyenza izinceku zikaJehova zihluke kubantu abathi bangamaKristu ukuthi zona zishumayela ngentshiseko. Yini engasisiza ukuba sihlale sishiseka noma sikhulise intshiseko yethu emsebenzini wokushumayela? Singafunda okuthile ngokuba nentshiseko emsebenzini wokushumayela ngokuzindla ngesibonelo sikaJesu. Phakathi nenkonzo yakhe, uJesu akazange ayeke ukushiseka. Empeleni, njengoba isikhathi sasiqhubeka, wandisa inkonzo yakhe. Njengomgcini-sivini owayesechithe iminyaka emithathu ezama ukunakekela isihlahla somkhiwane esasingatheli, uJesu wachitha iminyaka engaba mithathu eshumayeza amaJuda, iningi lawo elingazange limlalele. Nokho, njengoba nje nomgcini-sivini ayelokhu enethemba lokuthi isihlahla somkhiwane sasizothela, noJesu akazange alilahle ithemba ngalawo maJuda noma anciphise intshiseko ayenayo ngenkonzo. (Luka 13:​6-9) Ukufunda kulokho akufundisa nokulingisa lokho akwenza kuzosisiza sihlale sishiseka namuhla. w25.03 14-15 ¶1-4

Kuthiwani uma ucabanga ukuthi othile angase abe umngani womshado okahle? Ingabe kufanele usheshe umtshele indlela ozizwa ngayo lowo muntu? IBhayibheli lithi umuntu ohlakaniphile uqongelela ulwazi ngaphambi kokuba athathe isinyathelo. Ngakho uyobe wenza ngokuhlakanipha uma ufunda umuntu engazi okwesikhathi esithile ngaphambi kokuba umtshele indlela ozizwa ngayo. Ungamfunda kanjani umuntu engazi? Emihlanganweni yobuKristu noma emibuthanweni yokuzijabulisa, ungase uqaphele izinto ezithile ngengokomoya lakhe, ubuntu bakhe nendlela aziphatha ngayo. Obani abangani bakhe futhi yini akhuluma ngayo? (Luka 6:45) Imigomo yakhe iyafana yini neyakho? Ungase ukhulume nabadala basebandleni akulo noma namanye amaKristu avuthiwe amazi kahle. (IzAga 20:18) Ungase ubuze ngedumela lakhe nangezimfanelo zakhe. (Ruthe 2:11) Njengoba umfunda lowo muntu, qiniseka ukuthi awumenzi azizwe engakhululekile. Hlonipha imizwa yakhe, ugweme ukuhlale ulandelana naye nokuzama ukuthola yonke into ngaye. w24.05 22 ¶7-8

Abadala abasheshi baphethe ngokuthi umuntu owenze isono ngeke aphenduke. Nakuba abanye bengase baphenduke lapho behlangana okokuqala nekomiti, abanye bangase badinge isikhathi esengeziwe. Ngakho abadala bangahlela ukuhlangana nomuntu owonile izikhathi ezingaphezu kwesisodwa. Mhlawumbe ngemva kokuhlangana nabadala okokuqala, umKristu owonile uyoqala ukucabangisisa ngalokho abamtshele kona. Angase azithobe athandaze kuJehova. (IHu. 38:18) Ngenxa yalokho, emhlanganweni olandelayo umuntu owonile angase abonise isimo sengqondo esihlukile kunaleso abesibonise ekuqaleni. Ukuze abadala basize umuntu owonile aphenduke, babonisa uzwela nomusa. Bathandazela ukuba uJehova ayibusise imizamo yabo, benethemba lokuthi umKristu owonile uzosanguluka bese ephenduka.—2 Thim. 2:​25, 26. w24.08 22-23 ¶12-13

UJehova akafisi ukuba kubhubhe ngisho noyedwa! Ufuna ukuba izoni zibuyisane naye. (2 Kor. 5:20) Yingakho kuwo wonke umlando uJehova asincenga ngokuphindaphindiwe isizwe sakhe esinenkani—kanye nabantu abanenkani ngabanye—ukuba baphenduke futhi babuyele kuye. Abadala bebandla banelungelo lokuba yizisebenzi ezikanye noJehova njengoba bezama ukusiza labo abenze izono ezinkulu ukuba baphenduke. (Roma 2:4; 1 Kor. 3:9) Cabanga nje ukuthi kuba nenjabulo enkulu kangakanani ezulwini lapho izoni ziphenduka! UBaba wethu osezulwini, uJehova, ujabula kakhulu isikhathi ngasinye lapho imvu yakhe elahlekile ibuyela ebandleni. Siya simthanda nakakhulu uJehova njengoba sizindla ngozwela lwakhe, isihe sakhe nomusa wakhe omkhulu.—Luka 1:78. w24.08 31 ¶16-17

Ukube uJesu wavuma ukuba isixuku simenze inkosi wayeyobe ehlanganyela kwezepolitiki zamaJuda, ayebuswa amaRoma ngaleso sikhathi. UJesu “wasuka waya entabeni eyedwa.” Ngakho, naphezu kokucindezelwa abanye wayengeke azihlanganise nezepolitiki. Yisifundo esibaluleke ngempela lesi! Yiqiniso ukuthi abanye ngeke basicele ukuba sandise isinkwa, noma selaphe abagulayo ngokuyisimangaliso; noma bazame ukusenza inkosi noma umbusi wezwe. Kodwa bangase basinxenxe ukuba sihlanganyele kwezepolitiki ngokuthi sivote noma sibonise ukuthi siyamsekela umuntu abanomuzwa wokuthi uzokwenza izinto zibe ngcono. Nokho, isibonelo sikaJesu sicacile. Wenqaba ukuzihlanganisa nezindaba zepolitiki, kamuva waze wathi: “UMbuso wami awuyona ingxenye yaleli zwe.” (Joh. 17:14; 18:36) Namuhla amaKristu enza kahle ngokulingisa indlela uJesu ayecabanga ngayo nayenza ngayo. Sisekela uMbuso kaNkulunkulu, sitshele abanye ngawo futhi siwuthandazele.—Math. 6:10. w24.12 4 ¶5-6

Njengoba utadisha, bheka izindlela ongakusebenzisa ngazo lokho okufundayo. Ngokwesibonelo, yiba nobulungisa njengoJehova ngokungakhethi iphela emasini lapho usebenzelana nabanye. Lingisa indlela uJesu athanda ngayo uBaba wakhe nabanye ngokuzimisela ukuhlupheka ngenxa yegama likaJehova nangokusiza amaKristu okholwa nawo, ngisho noma lokho kusho ukuzidela ngezinye izikhathi. Lingisa uJesu nangokushumayeza abanye ukuze nabo babe nethuba lokwamukela isipho sikaJehova esiyigugu. Njengoba siqhubeka sifunda ngesihlengo futhi sisazisa, siyomthanda nakakhulu uJehova neNdodana yakhe. Nabo bayosithanda ngisho nakakhulu. (Jak. 4:8) Ngakho masiqhubeke sifunda ngesihlengo, sisebenzisa amalungiselelo uJehova asinike wona. w25.01 25 ¶16-17

UmBhalo wosuku wanamuhla ungahunyushwa nangokuthi: “Zonke izono zami uzisusile phambi kwakho”. Lokho kusho ukuthi uJehova uthatha izono zalabo abaphendukayo azilahle zisuke phambi kwakhe. Le nkulumo ingahunyushwa nangokuthi: “Wenze [izono zami] kwaba sengathi azikaze zibe khona.” IBhayibheli liphinde liligcizelele leli phuzu komunye umfanekiso okuMika 7:​18, 19. Kulawo mavesi kuthiwa uJehova uziphonsa ekujuleni kolwandle izono zethu. Ezikhathini zasendulo, umuntu wayengeke akwazi ukuthola into ephonswe ekujuleni kolwandle. Ngale mifanekiso sifunde ukuthi lapho uJehova esithethelela, usethula umthwalo wezono zethu. Ngempela, njengoba nje uDavide asho, “bayajabula labo okuthethelelwe izenzo zabo zokungabi namthetho nabazono zabo zimboziwe.” (Roma 4:7) Leyo intethelelo yeqiniso! w25.02 9 ¶7-8

Emhlabeni namuhla kunepharadesi eligcwele abantu abenza izinto ezinhle. Linezigidi zabantu abajabulela ukuthula kwangempela. Labo abakuleli pharadesi bazimisele ukungalokothi balishiye. Bafuna nokuba abantu abaningi ngangokunokwenzeka babe yingxenye yaleli lungiselelo elikhethekile. Liyini leli lungiselelo? Yipharadesi elingokomoya! Ngokumangalisayo, uJehova wenze indawo enokuthula ezweni uSathane alenze lagcwala inzondo, ububi nobungozi. (1 Joh. 5:19; IsAm. 12:12) UNkulunkulu wethu onothando uyayibona imiphumela elimazayo yaleli zwe futhi usinikeza isivikelo esisidingayo ukuze siqhubeke simkhonza ngenjabulo. IZwi laKhe lichaza ipharadesi elingokomoya ngokuthi “isiphephelo” nangokuthi ‘ingadi eniselwa kahle.’ (Isaya 4:6; 58:11) Ngenxa yokuthi babusiswa uJehova, labo abahlala kuleli pharadesi bazizwa bejabule futhi bevikelekile phakathi nalezi zinsuku zokugcina ezinzima.—Isaya 54:14; 2 Thim. 3:1. w24.04 20 ¶1-2

Akungabazeki ukuthi ukuthandazele ukuthola umuntu ozoshada naye, uma kuwukuthi uyafisa ukushada. Yiqiniso, uJehova akathembisi muntu umngani womshado. Kodwa unendaba nezidingo zakho nemizwa yakho futhi angakusiza njengoba uzama ukuthola umuntu ozoshada naye. Ngakho qhubeka umtshela lokho okufisayo nendlela ozizwa ngayo. (IHu. 62:8) Thandazela ukuba nesineke nokuhlakanipha. (Jak. 1:5) Ngisho noma ungasheshi ukumthola umuntu ozoshada naye, uJehova uthembisa ukuthi uzoqhubeka ezinakekela izidingo zakho ezingokwenyama nezingokomzwelo. (IHu. 55:22) Nokho, qaphela: Ungavumeli ukufuna umuntu ozoshada naye kube iyona nto ohlale ucabanga ngayo. (Fil. 1:10) Injabulo yangempela ayincikile ekutheni ushadile noma awushadile, kodwa incike ebuhlotsheni bakho noJehova. (Math. 5:3) Njengoba ungakashadi, ungase ube namathuba amaningana okwandisa inkonzo yakho. (1 Kor. 7:​32, 33) Sisebenzise kahle lesi sikhathi. w24.05 21 ¶4; 22 ¶6

Kufanele nithandane isikhathi eside kangakanani? Izinqumo ezenziwe ngokuxhamazela zivame ukuba nemiphumela ebuhlungu. (IzAga 21:5) Ngakho kufanele nithandane isikhathi eside ngokwanele ukuba nazane kahle. Nokho, akufanele nithandane isikhathi eside ngokungenasidingo. NeBhayibheli liyasho: “Ukuhlehliswa kwento elindelwe kuyayigulisa inhliziyo.” (IzAga 13:12) Yini abanye abangayenza uma kukhona abathandanayo ababaziyo? Singabamema ukuba bazodla nathi, babe kanye nathi ekukhulekeleni komndeni noma ukuba bazozijabulisa nathi. (Roma 12:13) Bayamdinga yini umuntu ozobabheka, ozobasiza ngento yokuhamba noma indawo abangaxoxa kuyo ngasese? Uma kunjalo, singakwazi yini ukubasiza? (Gal. 6:10) Uma abathandanayo bekucela ukuba ubabheke, kungani ungakubheki njengelungelo lokho? Qaphela ukuba ungabashiyi bodwa ngokuphelele labo abathandanayo, kodwa bona nalapho sekufanele ubanike ithuba lokuba baxoxe bebodwa. w24.05 30 ¶13-14

Abadala bazama ukuthola ukuthi yiziphi izimo eziholele ekutheni lowo muntu one. Ngokwesibonelo, ingabe lowo mKristu waba buthaka kancane kancane ngenxa yokuthi wayeka ukuba nesifundo somuntu siqu noma ukuya enkonzweni yasensimini? Ingabe wayeka ukuthandaza njalo kuJehova noma ubesenza imithandazo yokugcina icala? Ingabe ubesevumela ukulawulwa izifiso ezingalungile? Ingabe ubenabangani abangalungile, noma ubezijabulisa ngezinto ezingafanele? Lokho abekhetha ukukwenza kuyithonye kanjani inhliziyo yakhe? Uyaqaphela yini ukuthi izinqumo zakhe nezenzo zakhe zamuva zimenze wazizwa kanjani uBaba wakhe uJehova? Abadala babuza umuntu imibuzo emsiza azihlole ukuthi yini eyenze ubuhlobo bakhe noJehova baba buthaka nokuthi yini emholele esonweni, lokhu bakwenza ngomusa futhi abamgubhi umuntu aze akhiphe imininingwane engabadingi. (IzAga 20:5) Ngaphezu kwalokho, bangase basebenzise imifanekiso ukuze basize umuntu acabange ngezenzo zakhe futhi abone ububi bazo. Mhlawumbe lapho behlangana okokuqala, lowo muntu uzoqala ukuzisola ngezenzo zakhe. Kungenzeka nokuba aphenduke. w24.08 22 ¶9-11

UJesu washumayela “izindaba ezinhle zoMbuso” ngentshiseko ngoba wayazi ukuthi lowo kwakuwumsebenzi uNkulunkulu ayefuna awenze. UJesu wenza inkonzo yeza kuqala ekuphileni kwakhe. Ngisho nangasekupheleni kwenkonzo yakhe, wahamba “idolobha nedolobha, umuzi nomuzi,” efundisa abanye. (Luka 13:22) Waqeqesha nabafundi abengeziwe ukuba bashumayele njengaye. (Luka 10:1) Nanamuhla, ukushumayela izindaba ezinhle kusewumsebenzi oyinhloko uJehova noJesu abafuna siwenze. (Math. 24:14; 28:​19, 20) Singakhulisa intshiseko esinayo ngenkonzo ngokubheka abantu ngendlela uJehova ababheka ngayo. Ufuna ukuba abantu abaningi ngangokunokwenzeka bezwe izindaba ezinhle futhi bazamukele. (1 Thim. 2:​3, 4) Ngenxa yalokho, uyasiqeqesha ukuze sithuthukise indlela esifundisa ngayo lapho sixoxa nabantu ngomyalezo osindisa ukuphila. Ngisho noma abantu bengawamukeli manje umyalezo esiwushumayelayo, bangase babe nethuba lokuwamukela ngaphambi kokuba kuphele usizi olukhulu. w25.03 15-16 ¶5-7

UmKristu ngamunye kudingeka asebenzise unembeza wakhe oqeqeshwe ngeBhayibheli lapho esebenzelana nomuntu osusiwe ebandleni. Abanye bangazizwa bekhululekile ukumbingelela lowo muntu noma ukumamukela emhlanganweni webandla. Nokho, ngeke sibe nezingxoxo ezinde naye noma sichithe isikhathi senza ezinye izinto naye. Abanye bangase bazibuze, ‘IBhayibheli alisho yini ukuthi umKristu obingelela umuntu onjalo uhlanganyela naye emisebenzini yakhe emibi?’ (2 Joh. 9-11) Umongo walo mBhalo ubonisa ukuthi lesi siqondiso sikhuluma ngezihlubuki kanye nabanye abantu abagqugquzela ukuziphatha okungalungile. (IsAm. 2:20) Ngakho-ke, uma umuntu esakaza izimfundiso zezihlubuki noma egqugquzela abanye ukuba benze isono, abadala ngeke bamvakashele. Noma kunjalo, likhona ithemba lokuthi lowo muntu usengaphenduka. Nokho, kuze kube yilapho lokho kwenzeka, ngeke simbingelele lowo muntu noma simmemele emhlanganweni webandla. w24.08 30-31 ¶14-15

Ngemva kokuba uJesu ephe isixuku ukudla, wayala abafundi bakhe ukuba bahambe kuleyo ndawo baphindele eKapernawume ngesikebhe, yena waya entabeni ebalekela isixuku esasifuna ukumenza inkosi. (Joh. 6:​16-20) Ngesikhathi abaphostoli besesikebheni kwaba nesiphepho esinamandla, kwavunguza umoya kwaba namagagasi amakhulu. UJesu wabe eseya kubo ehamba phezu kwamanzi. Wabe esetshela umphostoli uPetru ukuba naye ahambe phezu kwamanzi. (Math. 14:​22-31) Lapho nje uJesu eqeda kungena esikebheni isiphepho sanqamuka. Lokho kwenza abafundi bathi: “Ngempela wena uyiNdodana kaNkulunkulu.” (Math. 14:33) Kuyamangaza ukuthi abafundi basho la mazwi ngemva kokuba uJesu ehambe phezu kwamanzi, hhayi ngemva kokuba andise isinkwa ngokuyisimangaliso. UMarku uyenezela: “[Abaphostoli] bamangala kakhulu ngoba babengayiqondanga incazelo yesimangaliso sezinkwa.” (Marku 6:​50-52) Ngempela, behluleka ukuqonda amandla okwenza izimangaliso uJehova ayewanike uJesu. w24.12 5 ¶7

Singabonisa ukuthi siyabonga ngothando lukaJehova ngokuthi sisebenzise inkathi yeSikhumbuzo ukuze sibonise uJehova ukuthi sibonga kangakanani ngesihlengo. Ngaphandle kokuhlela ukuba sibe khona eSikhumbuzweni, singamema nabanye ukuba babe khona. Chazela labo ozobe ubamemile ukuthi yini ezobe yenzeka eSikhumbuzweni. Uyokuthola kuwusizo ukubabonisa ividiyo ethi Kungani UJesu Afa? nethi Khumbula Ukufa KukaJesu ku-jw.org/zu. Abadala kufanele baqikelele ukuthi bayabamema abapholile. Cabanga ngenjabulo eba khona ezulwini nasemhlabeni uma ezinye izimvu zikaJehova ezilahlekile zithinteka bese zibuyela emhlanjini wakhe! (Luka 15:​4-7) ESikhumbuzweni, masizibekele umgomo wokuthi singagcini nje ngokubingelelana sodwa, kodwa sinake kakhulu labo abazobe beqala ukufika noma labo asebenesikhathi eside bagcina ukuba khona. Sifuna bazizwe besekhaya!—Roma 12:13. w25.01 29 ¶15

Nakuba isihlengo sisisiza siqonde ukuthi uJehova unobulungisa, ngokukhethekile sisisiza siqonde ukujula kothando lwakhe. (Joh. 3:16; 1 Joh. 4:​9, 10) Isihlengo sisifundisa ukuthi uJehova akafuni nje sigcine ngokuthola ukuphila okuphakade, kodwa ufuna nokuba sibe yingxenye yomndeni wakhe. Cabanga ngalokhu: Lapho u-Adamu ona, uJehova wamxosha emndenini wabakhulekeli bakhe. Ngenxa yalokho, sonke sizalwe singewona amalungu omndeni kaNkulunkulu. Kodwa ngenxa yesihlengo, uJehova uthethelela izono zethu futhi ekugcineni bonke abantu ababonisa ukholo nabamlalelayo bayoba amalungu omndeni wakhe. Ngisho kwamanje, singakwazi ukuba nobuhlobo obuseduze noJehova nesikholwa nabo. Ngempela, siyaluzwa uthando lukaJehova!—Roma 5:​10, 11. w25.01 21 ¶6

Ngokuqinisekile uyavuma ukuthi isihlengo siyisipho esiyigugu kakhulu! (2 Kor. 9:15) Ngenxa yokuthi uJesu wasifela, ungakwazi ukuba umngani noJehova uNkulunkulu. Ungakwazi nokuba nethemba lokuphila phakade. Kuyafaneleka ngempela ukuba sibonise ukuthi siyabonga ngesihlengo nangoJehova, owasilungiselela isihlengo ngoba esithanda! (Roma 5:8) Ukuze asisize sihlale sisazisa isihlengo futhi singalokothi sisithathe kalula, uJesu wamisa iSikhumbuzo sokufa kwakhe esenziwa minyaka yonke. (Luka 22:​19, 20) Kulo nyaka, iSikhumbuzo sizoba ngoLwesine, ngo-Ephreli 2, 2026. Akungabazeki ukuthi sonke sihlela ukuba sibe khona eSikhumbuzweni. Emavikini angaphambi nangemva kweSikhumbuzo, kuyosizuzisa kakhulu ukuzinika isikhathi sokuzindla ngalokho uJehova neNdodana yakhe abasenzele kona. w25.01 20 ¶1-2

Ungaqhubeka ufunda ngendlela uJehova uNkulunkulu noJesu Kristu abasithanda ngayo uma uqhubeka uzindla ngezinto abasenzele zona. Mhlawumbe phakathi nenkathi yeSikhumbuzo yalo nyaka ungafunda iVangeli elilodwa noma amaningana ngokucophelela. Ungazami ukufunda into eningi ngesikhathi esisodwa. Kunalokho yehlisa ijubane, ubheke nezizathu ezengeziwe zokuthi kungani kufanele sithande uJehova noJesu. Uma usunesikhathi eside ubhapathiziwe, ungase uzibuze ukuthi kukhona yini okusha osengakufunda ngobulungisa bukaNkulunkulu, uthando lwakhe nesihlengo. Iqiniso liwukuthi siyohlale sifunda okusha ngalezo zinto nangokunye. Ngakho lusebenzise ngokugcwele ulwazi oluningi olutholakala ezincwadini zethu. w25.01 24-25 ¶13-15