Ukusekela Umsebenzi WoMbuso Endaweni Yakithi Nasemhlabeni Wonke

OFAKAZI BAKAJEHOVA baye bashumayela izindaba ezinhle “ezingxenyeni ezikude kakhulu zomhlaba,” begcwalisa isiprofetho sikaJesu sezinsuku zokugcina. (lzE. 1:8; Math. 24:14) Ukuze benze lokhu, baye banikela ngesikhathi namandla bepha abanye izinto ezingokomoya. Bethembele kuJehova ukuba anakekele izisebenzi ezikanye naye, bayaqhubeka bebeka uMbuso kaNkulunkulu kuqala ekuphileni kwabo. (Math. 6:25-34; 1 Kor. 3:5-9) Imiphumela iwubufakazi obucacile bokuvunyelwa uJehova nesibusiso sakhe.

UKUNAKEKELA IZIDINGO ZOMBUSO EMHLABENI WONKE

² Lapho abantu bebona izindlela esishumayela ngazo, beqaphela nokuthi sisakaza amaBhayibheli nezincwadi ezisekelwe kulo ngaphandle kwenkokhiso, abanye bazobuza: “Kwenzeka kanjani konke lokhu?” Kuyavunywa, ukunyathelisa lezi zincwadi kubiza imali. Kudinga imali nokwakha nokunakekela amakhaya aseBethel ezikhonzi ezisebenza ngemishini yokunyathelisa, eziqondisa umsebenzi wokushumayela nezikhonza ngezinye izindlela ukuze ziqhubekisele phambili izindaba ezinhle. Ngaphezu kwalokho, ababonisi abajikelezayo, izithunywa zevangeli ezisensimini, amaphayona akhethekile nabanye abasenkonzweni ekhethekile yesikhathi esigcwele banikezwa usizo oluthile lwezinto ezibonakalayo ukuze bakwazi ukuqhubeka nomsebenzi wabo. Ngokusobala, umsebenzi wokushumayela izindaba ezinhle osukwini lwethu, kungaba sendaweni yakithi noma emhlabeni wonke, uhilela izizumbulu zemali. Ivelaphi yonke le mali?

³ Abaningi abazisa umsebenzi woFakazi BakaJehova wokufundisa iBhayibheli bayakujabulela ukunikelela umsebenzi womhlaba wonke. Noma kunjalo, umsebenzi wethu usekelwa ngokuyinhloko oFakazi ngokwabo, abanye babo bathumela iminikelo yokuzithandela emahhovisi egatsha oFakazi BakaJehova asezweni labo. Babonisa umoya wokuzithandela ofana nowezinceku zikaNkulunkulu zasendulo ezakunikelela ngenhliziyo evumayo ukwakhiwa kwendawo kaJehova yokukhulekela. (Eks. 35:20-29; 1 IziKr. 29:9) Ezinye izipho zamukelwa njengamafa, kanti eminye iminikelo ivela kubantu ngabanye, emabandleni nasezigodini futhi ngokuvamile ithunyelwa ingamanani amancane. Uma isihlanganiswe ndawonye le minikelo, iyanela ukuba igcine umsebenzi uqhubeka.

⁴ OFakazi BakaJehova bakubheka njengelungelo ukusebenzisa imali yabo nezinye izinto ezibonakalayo ngenjongo yokuqhubekisela phambili umsebenzi wokushumayela. UJesu nabafundi bakhe babegcina isikhwama semali okwakukhishwa kuso imali yokuhlangabezana nezindleko. (Joh. 13:29) IBhayibheli lisitshela ngabesifazane abakhonza uJesu nabafundi bakhe. (Marku 15:40, 41; Luka 8:3) Umphostoli uPawulu walwamukela ngokwazisa usizo lothando lwezinto ezibonakalayo olwaluvela kubantu ababekujabulela ukuqhubekisela phambili izindaba ezinhle nababefisa ukuhlanganyela enkonzweni yakhe. (Fil. 4:14-16; 1 Thes. 2:9) OFakazi BakaJehova bayaqhubeka belandela lezi zibonelo zasendulo zenkonzo yentshiseko nezokupha ngenhliziyo evulekile. Ngokwenza kanjalo, abanhliziyo ziqotho yonke indawo banikezwa “amanzi okuphila ngesihle.”—IsAm. 22:17.

UKUNAKEKELA IZIDINGO ZEBANDLA LAKINI

⁵ Izindleko zamabandla ahlukahlukene nazo zikhokhelwa ngeminikelo yokuzithandela. Akuthathwa nkongozelo; akukho namali enqunyiwe noma imali ecelwayo. Ezindaweni zokuhlanganyela kuba namabhokisi eminikelo ukuze umuntu ngamunye anikele “njengoba nje enqumile enhliziyweni yakhe.”—2 Kor. 9:7.

⁶ Okokuqala, imali enikelwayo ikhokhela ukusebenza kweHholo LoMbuso nokuligcina lisesimweni esihle. Indikimba yabadala ingase inqume ukuba enye yaleyo mali ithunyelwe ehhovisi legatsha loFakazi BakaJehova lakini ukuze isetshenziselwe ukuqhubekisela phambili umsebenzi woMbuso emhlabeni wonke. Ibandla liyothatha izwi lesinqumo ngokuqondene nalokhu. Amabandla amaningi ayenza ngale ndlela iminikelo yasikhathi sonke yomsebenzi womhlaba wonke. Uma sonke siziphaphamele izidingo zebandla ezidamane ziphakama, ngeke kudingeke kwenziwe izaziso eziningi ezimayelana neminikelo.

UKUPHATHWA KWEMINIKELO

⁷ Ngemva komhlangano ngamunye, abazalwane ababili bakhipha imali efakwe emabhokisini omnikelo bese beyibhala phansi. (2 AmaKh. 12:9, 10; 2 Kor. 8:20) Indikimba yabadala iyokwenza amalungiselelo afanele okulondoloza le mali kuze kube yilapho ithunyelwa ehhovisi legatsha noma isetshenziselwa izidingo zebandla. Umzalwane ophatha izimali zebandla wenza isitatimende sanyanga zonke ukuze kwaziswe ibandla, futhi njalo ngemva kwezinyanga ezintathu, umxhumanisi wendikimba yabadala uhlela ukuba kubalwe izimali.

IZINDLEKO ZESIGODI

⁸ Izindleko zemihlangano yesigodi kanye nezinye izindleko zesigodi zikhokhwa ngeminikelo yoFakazi abakha leso sigodi. Kuba namabhokisi eminikelo ezindaweni zemihlangano ukuze abazalwane bakwazi ukunikelela isigodi ngeminikelo yokuzithandela. Ngaphezu kwalokho, ukuze kuqhutshekwe kunakekelwa izindleko, amabandla anganikela nangezinye izikhathi.

⁹ Izigodi kufanele zikwazi ukunakekela noma yiziphi izindleko zazo, bese kuthi imali esele inikelwa emsebenzini womhlaba wonke. Uma i-akhawunti yesigodi ingenayo imali eyanele yokukhokhela izindleko zomhlangano okuphunywa kuwo noma izindleko zokuqala umhlangano olandelayo, njengesibambiso sokuqasha isakhiwo, umbonisi wesigodi angase akhiphe isiqondiso sokuba amabandla atshelwe ngelungelo lawo lokunikela. Indikimba yabadala ngayinye iyoxoxa ngale ndaba futhi inqume ukuthi ibandla labo liyonikela ngamalini esikhwameni sesigodi. Iyobe isisingatha lokhu isebenzisa izwi lesinqumo.

¹⁰ Lapho kuphakama izidingo zemali ezidinga ukunakekelwa abadala besigodi, umhlangano wabadala besigodi uyokwenziwa ngosuku lomhlangano wesigodi. Zonke izinqumo, ngaphandle kwezezindleko ezikhethiwe zesigodi, kufanele zisingathwe njengezwi lesinqumo elamukelwe abadala. Leli zwi lesinqumo kumelwe libhalwe amanani aqondile futhi lethulwe ukuze ligunyazwe njalo nje lapho kukhishwa izimali zesigodi.

¹¹ Kwenziwa amalungiselelo ngezikhathi ezithile okubalwa kwezimali ze-akhawunti yesigodi.

UKUNAKEKELA ABAMPOFU

¹² Enye injongo yesikhwama semali esasigcinwa uJesu nabafundi bakhe kwakuwukusiza abampofu. (Marku 14:3-5; Joh. 13:29) Lowo mthwalo wamaKristu usaqhubeka ngoba uJesu wathi: “Abampofu ninabo ngaso sonke isikhathi.” (Marku 14:7) OFakazi BakaJehova bawufeza kanjani lo mthwalo wabo wemfanelo namuhla?

¹³ Ngezinye izikhathi abathembekile ebandleni bangase badinge usizo lwezinto ezibonakalayo ngenxa yokukhula, ubuthaka noma usizi oluthile olungaphezu kwamandla abo. Amalungu omkhaya, izihlobo nabanye abezwayo ngesidingo esinjalo bangase bashukumiseleke ukuba basize. Lokhu kuvumelana namazwi omphostoli uJohane: “Noma ubani onezinto zaleli zwe zokusekela ukuphila futhi abone umfowabo eswele nokho amvalele umnyango wobubele bakhe besisa, uthando lukaNkulunkulu luhlala ngayiphi indlela kuye? Bantwanyana, masibe nothando, hhayi ngezwi noma ngomlomo, kodwa ngesenzo nangeqiniso.” (1 Joh. 3:17, 18; 2 Thes. 3:6-12) Ukukhulekela kweqiniso kuhilela ukunakekela abathembekile nabaqotho okungenzeka badinga usizo lwezinto ezibonakalayo.—Jak. 1:27; 2:14-17.

¹⁴ Encwadini yakhe yokuqala kuThimothewu, umphostoli uPawulu wachaza ukuthi usizo lwezinto ezibonakalayo lunganikezwa kanjani kwabalufaneleyo. Ungasifunda iseluleko sakhe kweyoku-1 Thimothewu 5:3-21. Umthwalo wemfanelo oyinhloko uphezu komKristu ngamunye ukuba anakekele izidingo zabendlu yakhe. Asebekhulile noma ababuthaka kufanele bathole usizo kubantababo, abazukulu noma ezinye izihlobo eziseduze. Kuye kwenzeke kutholakale usizo lwezinto ezibonakalayo kuhulumeni noma kwezenhlalakahle, ngakho izihlobo noma abanye bangasiza oswele ukuba afake izicelo ezifanele zosizo olunjalo. Kungase kuphakame isimo esingase sidinge ukuba ibandla lilonke licabangele ukunikeza uhlobo oluthile losizo kubazalwane nodade abathile abantulayo abanomlando omude wenkonzo yokwethembeka. Uma engekho amalungu omkhaya noma ezinye izihlobo ezingasiza abanjalo, futhi lungatholakali usizo olwanele ezinhlanganweni zikahulumeni, indikimba yabadala ingenza ukutusa okufanelekile kokunikeza usizo oluthile. AmaKristu akubheka njengelungelo ukuhlanganyela nabaswele izinto zawo ezibonakalayo.

¹⁵ Abafowethu nodadewethu abaningi bangase baswele ngenxa yoshushiso, izimpi, ukuzamazama komhlaba, izikhukhula, indlala noma ezinye izinhlekelele ezibhokile kulezi zikhathi ezibucayi. (Math. 24:7-9) Amabandla akuleyo ndawo angase angabi nalutho angabelana ngalo, ngakho iNdikimba Ebusayo iqondisa ukuba abazalwane kwezinye izindawo babambisane ukuze balungiselele okudingekayo. Lokhu kufana nendlela amaKristu e-Asia Minor alungiselela ngayo abazalwane baseJudiya ukudla ngesikhathi sendlala. (1 Kor. 16: 1-4; 2 Kor. 9: 1-5) Ngokulandela isibonelo sawo, siqinisekisa uthando lwethu ngabafowethu futhi sizibonisa singabafundi beqiniso bakaJesu Kristu.—Joh. 13:35.

UKUSAKAZWA KWEZINCWADI

¹⁶ AmaBhayibheli nezincwadi zeBhayibheli kufeza indima ebalulekile ekusakazeni isigijimi soMbuso. Ngokuvamile indikimba yabadala yabela inceku ekhonzayo ukuba inakekele izincwadi zebandla. Abazalwane ababelwe ukunakekela lezi zincwadi bayithatha njengebaluleke kakhulu imisebenzi yabo. Bagcina amarekhodi okuthi yiziphi ezikhona nezingekho ukuze kuhlale kukhona ezizokwanelisa izidingo zebandla.

¹⁷ NjengamaKristu azinikezele, siyaqaphela ukuthi isikhathi sethu, amandla ethu engqondo nawomzimba, amakhono ethu, izinto zethu ezibonakalayo, ngisho nokuphila kwethu uqobo, konke kuyizipho ezivela kuNkulunkulu futhi zihloselwe ukuba sizisebenzise enkonzweni yakhe. (Luka 17:10; 1 Kor. 4:7) Ngokuzisebenzisa kahle zonke izinto esinazo, sibonisa ukujula kothando lwethu ngoJehova. Sifisa ukudumisa uJehova ngezinto zethu eziyigugu ngoba siyazi ukuthi ujatshuliswa yinoma isiphi isipho esisinikela njengesibonakaliso sokuzinikela ngomphefumulo wonke. (IzAga 3:9; Marku 14:3-9; Luka 21:1-4; Kol. 3:23, 24) UJesu wathi: “Namukelé ngesihle, yiphani ngesihle.” (Math. 10:8) Lapho sizinikela thina nempahla yethu enkonzweni kaJehova, sithola injabulo enkulu.—IzE. 20:35.