Ukulungiselela Izinkulumo Zebandla

ISIMISO seSikole Senkonzo Esingokwasezulwini silungiselelwe ukuba sizuzise lonke ibandla. Kunikezwa izinkulumo ezizuzisayo nasemihlanganweni emikhulu nakweyebandla. Uma wabelwe inkulumo komunye wale mihlangano, unikezwe umthwalo osindayo. Umphostoli uPawulu wanxusa umbonisi ongumKristu uThimothewu ukuba akunake njalo ukufundisa kwakhe. (1 Thim. 4:16) Labo abasuke bekhona emihlanganweni yobuKristu basuke bebekele eceleni isikhathi esiyigugu—kanti abanye basuke benze umzamo omkhulu—ukuba babe khona ukuze bafundiswe izici ezithinta ubuhlobo babo noNkulunkulu. Ukufundisa ngale ndlela kuyilungelo elikhulu kakhulu! Ungalisingatha kanjani kahle?

Amaphuzu Avelele Ekufundweni KweBhayibheli

Le ngxenye yesikole isekelwe ekufundweni kweBhayibheli okwabelwe lelo sonto. Kumelwe kugcizelelwe ukuthi leyo ndaba isithinta kanjani thina namuhla. Njengoba kubikwa kuNehemiya 8:8, u-Ezra nabangane bakhe bafundela iningi iZwi likaNkulunkulu, ‘belichasisa,’ futhi belenza liqondwe kahle. Ukuveza amaphuzu avelele kukunika ithuba lokwenza lokho nawe.

Kumelwe usilungiselele kanjani lesi sabelo? Uma kungenzeka, funda ingxenye oyabelwe yeBhayibheli kusasele isonto noma amasonto. Yibe usucabanga ngebandla okulo nezidingo zalo. Thandaza ngakho. Kule ndima yeZwi likaNkulunkulu, yisiphi iseluleko, izibonelo, nezimiso ezihlangabezana nalezo zidingo?

Kubalulekile ukucwaninga. Ingabe ikhona i-Watchtower Library kuyi-CD-ROM noma i-Watch Tower Publications Index ngolimi oluqondayo? Uma kungenjalo, ungase usebenzise izikhombo ze-Nqabayokulinda yokuphela konyaka. Ngokwenza ucwaningo ngalokho okuye kwanyatheliswa emavesini okhethe ukugxila kuwo, ungase uthole ukwaziswa okuyokukhanyisela, incazelo yeziprofetho, ukuhlaziywa kwalokho okuvezwa imibhalo ethile ngoJehova, noma ingxoxo ngezimiso. Ungazami ukuhlanganisa amaphuzu amaningi. Gxila nje emavesini ambalwa owakhethile. Kungcono ukukhulumela amavesi ambalwa, ukwenze kahle.

Isabelo sakho singase sidinge ukuba ucele izilaleli zikhulumele indlela ezizuze ngayo ekufundweni kweBhayibheli kwamasonto onke. Yini eziyitholile eyozizuzisa esifundweni sazo siqu nesomkhaya noma enkonzweni yazo noma endleleni yazo yokuphila? Iziphi izimfanelo zikaJehova ezabonakala ekusebenzelaneni kwakhe nabantu nezizwe? Yini izilaleli eziyifundile eziqinise ukholo futhi yakha ukwazisa ngoJehova? Ungagxili emaphuzwini ayinkimbinkimbi angezwakali. Gcizelela incazelo nosizo lwamaphuzu owakhethile.

Inkulumo Yokuyala

Le nkulumo ingase isekelwe endabeni enyathelisiwe njenge-Nqabayokulinda ne-Phaphama! noma engxenyeni ethile yencwadi. Ezimweni eziningi, kuba nokwaziswa okuningi okudlula isikhathi osinikiwe. Kumelwe usisingathe kanjani leso sabelo? Njengomfundisi, hhayi nje njengomuntu ohlanganisa indaba. Umbonisi kumelwe ‘afanelekele ukufundisa.’—1 Thim. 3:2.

Qala ukulungiselela ngokutadisha indaba oyabelwe. Bheka imibhalo. Zindla. Zama ukwenza lokho kusasele isikhathi ngaphambi kosuku lwenkulumo yakho. Khumbula ukuthi abazalwane bakhuthazwa ukuba bayifunde kusengaphambili indaba inkulumo esekelwe kuyo. Injongo yenkulumo yakho ayikona nje ukubukeza noma ukubeka indaba ngamafuphi, kodwa iwukubonisa indlela esebenza ngayo. Izingxenye ezifanelekayo zendaba zibeke ngendlela eyolizuzisa ngempela ibandla.

Njengoba nje ingane ngayinye inobuntu bayo siqu, nebandla linezici zalo ezilihlukanisa kwamanye. Umzali ofundisa ngokuphumelelayo akamane nje ahlabelele izimiso zokuziphatha enganeni. Ubonisana nayo ingane. Ucabangela ubuntu bengane nezinkinga ingane ebhekana nazo. Ngendlela efanayo, abafundisi ebandleni bazama ukuqonda izidingo zeqembu abakhuluma nalo. Nokho, umfundisi onokuqonda uyogwema ukusebenzisa izibonelo ezingase zibangele amahloni kothile ezilalelini. Uyoqokomisa izinzuzo esezijatshulelwa kakade ngenxa yokuhamba ezindleleni zikaJehova futhi aqokomise iseluleko esivela emiBhalweni esiyosiza ibandla libhekane ngokuphumelelayo nezinkinga.

Ukufundisa okuhle kuthinta izinhliziyo zezilaleli. Lokhu akuhileli nje ukusho amaqiniso, kodwa kuhilela nokwakha ukwazisa ngalokho okushiwo yilawo maqiniso. Kudinga ukubakhathalela ngempela labo abafundiswayo. Abelusi abangokomoya kumelwe bawazi umhlambi. Uma behlale bekhumbula ngothando izinkinga abaningi ababhekene nazo, bayokwazi ukukhuluma ngendlela ekhuthazayo bebonisa ukuqonda, uzwela nesisa.

Njengoba abafundisi abaphumelelayo bazi, inkulumo kumelwe ibe nenjongo ecacile. Indaba kumelwe ibekwe ngendlela yokuba amaphuzu ayisihluthulelo aqhame futhi akhunjulwe. Izilaleli kumelwe zikwazi ukukhumbula amaphuzu awusizo ayothonya ukuphila kwazo.

Umhlangano Wenkonzo

Lapho unikeza inkulumo esekelwe esihlokweni se-Nkonzo Yethu YoMbuso, ungase uyibeke ngendlela ethé ukwehluka. Lapha uyothola ukuthi kufuneka udlulisele ezilalelini konke lokho okunikeziwe, hhayi nje ukukhetha lokho okufaneleka kakhulu kunokunye. Siza izilaleli ukuba zicabange ngemibhalo esekela iseluleko osinikezayo. (Thithu 1:9) Isikhathi sisuke silinganiselwe, ezimweni eziningi asivumi ukuba ufake ukwaziswa okwengeziwe.

Ngakolunye uhlangothi, ungase wabelwe ukuba unikeze inkulumo ngesihloko esingaveli kuyi-Nkonzo Yethu YoMbuso. Kungase kukhonjwe isihloko se-Nqabayokulinda, noma isabelo singase sibe namaphuzu ambalwa nje. Kukuwe njengomfundisi ukuba ucabangele izidingo zebandla ngokuvumelana nendaba oyabelwe. Kungase kudingeke wenze umzekeliso omfushane oshaya emhloleni noma uxoxe ngokuhlangenwe nakho okuhambisana nendaba. Khumbula ukuthi inkulumo yakho ayikona nje ukuxoxa ngendaba oyabelwe, kodwa ukuyisingatha ngendlela yokusiza ibandla ukuba lifeze umsebenzi obekwe eZwini likaNkulunkulu futhi lithole injabulo ekwenzeni kanjalo.—IzE. 20:20, 21.

Njengoba ulungiselela inkulumo yakho, cabanga ngezimo zalabo abasebandleni. Bancome ngalokho asebekwenza kakade. Ukusebenzisa kwabo ukusikisela okunikezwa enkulumweni oyabelwe kungayandisa kanjani impumelelo yabo nenjabulo yabo enkonzweni?

Ingabe isabelo sakho sidinga umboniso noma ingxoxo nothile? Uma kunjalo, kumelwe kulungiselelwe kusenesikhathi. Kungaba lula ukuba umane ucele othile ukuba awulungiselele, kodwa lokho akubi nemiphumela emihle ngaso sonke isikhathi. Uma kungenzeka, prakthiza umboniso noma ingxoxo ngaphambi kosuku lomhlangano. Qiniseka ukuthi lesi sici senkulumo yakho senziwa ngendlela eyiphelelisayo ngempela imfundo oyinikezayo.

Imihlangano Emincane Nemikhulu

Abazalwane abahlakulela izimfanelo ezinhle ezingokomoya futhi ababa izikhulumi nabafundisi beningi abaphumelelayo, ngokuhamba kwesikhathi bangase bacelwe ukuba bahlanganyele esimisweni somhlangano wesifunda noma wesigodi. Lezi yizenzakalo ezikhetheke ngempela zemfundo engokwasezulwini. Isabelo esinjalo singase size njengenkulumo efundwayo noma inkulumo ewuhlaka, iziqondiso zedrama yeBhayibheli nendlela esebenza ngayo namuhla noma nje isigatshana seziqondiso ezithile. Uma unelungelo lokukhonza esimisweni esinjalo, yitadishe ngokucophelela indaba oyinikeziwe. Yifunde kuze kube yilapho usukubona kahle ukubaluleka kwayo.

Labo ababelwe inkulumo efundwayo kufanele bayifunde njengoba injalo. Akufanele bayibeke ngenye indlela indaba noma bayihlele kabusha. Bayayitadisha ukuze bawaqonde ngokucacile amaphuzu asemqoka nokuthi avezwe kanjani. Baprakthiza ukufunda ngokuzwakalayo kuze kube yilapho bebeka inkulumo ngokugcizelela okufanele, ngomdlandla, ngemfudumalo, ngomuzwa, ngentshiseko nangokuqiniseka, nangezwi elizwakala kahle nangomfutho ofanele izilaleli eziningi.

Abazalwane ababelwe inkulumo ewuhlaka banomthwalo wemfanelo wokuthuthukisa indaba yabo ngendlela evumelana nohlaka. Kunokufunda uhlaka phakathi nenkulumo noma ukuyilungiselela njengenkulumo efundwayo, isikhulumi kumelwe siyibeke ngamazwi aso ngokusuka enhliziyweni. Kubalulekile ukunamathela esikhathini osinikiwe ohlakeni ukuze uveze iphuzu ngalinye eliyinhloko ngokucacile. Isikhulumi kufanele siwasebenzise kahle amaphuzu nemibhalo ebekwe ngaphansi kwamaphuzu asemqoka. Akufanele sinezele awaso amaphuzu esiwathandayo sishiye lawo asohlakeni. Yiqiniso, imfundo isekelwe eZwini likaNkulunkulu. Umthwalo wemfanelo wabadala abangamaKristu ‘uwukushumayela izwi.’ (2 Thim. 4:1, 2) Ngakho-ke, isikhulumi kumelwe siyinake ngokukhethekile imibhalo esohlakeni—siyichaze kahle futhi sibonise ukuthi isebenza kanjani.

Ungazihlehlisi Izinto

Ingabe ukhonza ebandleni lapho emaningi khona amathuba okukhuluma? Ungawasebenzisa kanjani kahle wonke? Gwema ukulungiselela izinkulumo zakho ngomzuzu wokugcina.

Izinkulumo ezilizuzisa ngempela ibandla zidinga ukucatshangelwa kusengaphambili. Ngakho-ke, zijwayeze ukufunda indaba ngokushesha nje lapho uthola isabelo senkulumo ngayinye. Lokhu kuyokwenza ukwazi ukucabanga ngayo njengoba uqhubeka neminye imisebenzi yakho. Ezinsukwini noma emasontweni angaphambi kokuba unikeze inkulumo, ungase uzwe izinkulumo ezingakusiza ubone indlela enhle kakhulu ongayisebenzisa ngayo le ndaba. Kungavela izimo ezingabonisa ukuthi le ndaba ifike ngesikhathi. Ukufunda nokucabanga ngenkulumo yakho ngokushesha nje lapho uyithola kuthatha isikhathi, kodwa lesi yisikhathi esiyobe sisetshenziswe kahle. Lapho ekugcineni uhlala phansi ukuze wenze uhlaka, uyothola imivuzo yokuyicabangela kahle kusengaphambili inkulumo. Ukulungiselela izinkulumo ngale ndlela kuyonciphisa ukucindezeleka futhi kuyokusiza ukuba unikeze inkulumo ngendlela ezuzisayo nefinyelela izinhliziyo zalabo abasebandleni.

Izinga osazisa ngalo isipho osinikiwe ngokuqondene nesimiso sikaJehova sokufundiswa kwabantu bakhe, liyokwenza umdumise futhi uyoba isibusiso kulabo abamthandayo.—Isaya 54:13; Roma 12:6-8.