Okuphawulwa Abafundi Balo Magazini
Ukunakekela Asebegulela Ukufa—Iyini Injongo Yakho? (July 2011) Njengoba ngingumsizi emsebenzini wezenhlalakahle, ngaqeqeshwa esikhungweni sokunakekela asebegulela ukufa, futhi ngingakufakazela ukuthi kuyiqiniso lokho enikusho kuyi-Phaphama! ka-July 2011. Izikhungo ezikulungele kahle ukunakekela asebegulela ukufa ziyadingeka kuleli zwe esiphila kulo. Ngilangazelela ukufika kombuso kaNkulunkulu lapho engekho oyothi, “Ngiyagula,” futhi uNkulunkulu eyosula izinyembezi emehlweni ethu.—Isaya 33:24; IsAmbulo 21:3, 4.
M. R., Italy
Kwangidumaza futhi kwanginenga ukubona inkulumo ethi “adult diapers” kulesi sihloko. Le nkulumo yehlisa isithunzi kunoma ubani ozithola esesimweni esibizela ukuba agqoke izinto zangaphansi zokuzivikela. Ayikho neyodwa imboni edayisa ama-“protective helps” esebenzisa igama elithi diaper.
Igama ligodliwe, United States
I-“Phaphama!” iyaphendula: Siyakubonga kakhulu ngokusenza sikuqaphele lokhu. Sizwelana kakhulu nanoma ubani obhekene nokugula okungathi sina, futhi asifuni neze ukwenezela ekuhluphekeni kwalowo muntu ngokusebenzisa izinkulumo abanye abangase bazibheke njengezehlisa isithunzi. Siyaxolisa kakhulu ngobuhlungu okungenzeka kububangele abafundi bethu.
Intsha Iyabuza . . . Yini Okufanele Ngiyazi Ngezingosi Zokuxhumana Nabantu? (July 2011) Nginibonga kakhulu ngalesi sihloko. Ngineminyaka engu-26. Bengihlela ukuzivulela i-akhawunti [engosini yokuxhumana nabantu], hhayi ngoba ngifuna ukuba nabangane abengeziwe, kodwa ngenxa yokuthi abaningi bebengikhuthaza ukuba ngenze kanjalo. Lesi sihloko singisize kakhulu. Ungabathola abangane ngaphandle kokuba yilungu lengosi ethile yezokuxhumana.
M. P., Philippines
Ngangilindele ukuba lesi sihloko sikhulume kabi ngezingosi zokuxhumana. Kodwa sasilinganisela ngempela. Sakhuluma ngezici ezinhle nangezimbi futhi sanikeza nendlela yokuzivikela ezingozini ezingase zibe khona ezingosini zokuxhumana. Sagcizelela isidingo sokuqapha engqondweni yami lapho ngibhala ukwaziswa okuyimfihlo okuphathelene nami kuyi-Internet.
C. W., United States
Izimfihlo Zempumelelo Yomkhaya (October 2009) Lo magazini okhethekile uwusize kakhulu umkhaya wami. Ngawajabulela kakhulu amabhokisi athi “Zama lokhu” ayesemfihlweni ngayinye kweziyisikhombisa. Sesikusebenzisile kakade ukusikisela okuqondile okukulesi sihloko.
H. H., Korea
Ukubukeza Komkhaya Sinibonga kakhulu ngalesi sici esivela njalo kulo magazini. Indodakazi yethu eneminyaka eyisithupha iyayijabulela ingxenye ethi Izingane Zifuna Izithombe futhi ikuthanda kakhulu nokufaka imibala ezithombeni. Lezi zihloko zigcizelela indima yabazali ekuqeqesheni izingane zabo zisencane kakhulu. Ubaluleke ngendlela eyisimanga umsebenzi eniwenzela izingane.
M. P., Poland