Imfihlo 2: Ukuzibophezela

“Lokho uNkulunkulu akubophele ndawonye makungahlukaniswa muntu.”—Mathewu 19:6.

Okushiwo yilokhu. Umbhangqwana ophumelelayo ubheka umshado wawo njengesibopho esihlala njalo. Uma kuphakama izinkinga, uzama ukuzixazulula kunokuba uzisebenzise njengezaba zokuqeda umshado. Uma umbhangqwana unomuzwa wokuzibophezela, uzizwa ulondekile. Ngamunye uba nethemba lokuthi nomunye uyoqhubeka esihlonipha isibopho somshado.

Kungani kubalulekile? Ukuzibophezela kuwumgogodla ngezindlela eziningi ebuhlotsheni bomshado. Nokho, ngemva kwezingxabano eziningi, ukuzibophezela kungase kubonakale kuwugibe esikhundleni sokwethemba. Empeleni, isifungo esithi, “size sihlukaniswe ukufa,” siphenduka isivumelwano esingasho lutho—umbhangqwana ofisa ukuthola ibhaxa lokungasifezi. Bangase bangahlukanisi ngokoqobo, kodwa bavele bakhethe ‘ukuphuma’ ngezinye izindlela—ngokwesibonelo, ngokuvele baqudulelane nje lapho kunezindaba ezidinga ukuxoxwa.

Zama lokhu. Hlaziya izinga ozibophezele ngalo, usebenzisa imibuzo elandelayo njengesiqondiso.

◼ Lapho sixabene, ingabe ngizithola ngizisola ngokushada nomuntu engishade naye?

◼ Ingabe ngivame ukuzibona nginothile engingashadile naye?

◼ Ingabe ngezinye izikhathi ngitshela engishade naye ukuthi “ngizomshiya” noma “ngizothola omunye ozongithanda”?

Zenzele isinqumo. Cabanga ngesinyathelo esisodwa noma ezimbili ongazithatha ukuze uqinise ukuzibophezela kwakho. (Amanye amacebiso: Bhalela oshade naye umyalezo omnandi ngezikhathi ezithile, yiba nesithombe sakhe lapho usebenza khona, noma umshayele ucingo njalo lapho usemsebenzini ukuze nje nihlale nithintana.)

Kungani ungavezi amacebiso amaningana bese ubuza oshade naye ukuthi iliphi abona ukuthi lingasebenza kahle?

[Isithombe ekhasini 4]

Ukuzibophezela kunjengesiqondiso esivikela umshado wakho ukuba ungaphumi endleleni

[Umthombo]

© Corbis/age fotostock