Ilungelo Lesiguli Lokuzikhethela
NGUMLOBELI WE-PHAPHAMA! E-ITALY
◼ OFakazi BakaJehova bayenqaba ukumpontshelwa igazi. Ukwenqaba kwabo kusekelwe emiyalweni yeBhayibheli, owokuqala kuyo othi: “Kuphela inyama enomphefumulo wayo—igazi layo—akumelwe niyidle.” AmaKristu ekhulu lokuqala atshelwa ngokuqondile: ‘Qhubekani nideda egazini.’—Genesise 9:4; IzEnzo 15:29; Levitikusi 17:14.
EMonterenzio, e-Italy, abafundi basemabangeni aphansi bacelwa ukuba babhale indaba ekhuluma ngokubaluleka kokuthekelisa ngegazi. Phakathi kwalabo bafundi kwakunoBenedetta, omunye woFakazi BakaJehova, owabhala okulandelayo:
“Kuyaziwa ukuthi oFakazi BakaJehova bayakwenqaba ukumpontshelwa igazi ngenxa yokulandela izimiso zeBhayibheli, kodwa lokhu akusho ukuthi abazamukeli ezinye izindlela zokwelapha. Empeleni, oFakazi BakaJehova bayayazisa impilo yabo. Bazama ngazo zonke izindlela ukuthola ukwelashwa okungcono kakhulu abangase bakuthole bona nezingane zabo. Bazimisele ukubambisana nodokotela, uma nje izinkolelo zabo zihlonishwa.”
UBenedetta wenezela: “Isiguli ngasinye sinelungelo lokuzikhethela ukwelashwa esikholelwa ukuthi kuzosisiza kakhulu, ilungelo okufanele lihlonishwe, nelungelo lokwazi izingozi nezinzuzo zokwelashwa esikukhethayo.”
Igatsha laseMonterenzio le-AVIS (INhlangano Yabathekelisa Ngegazi Yase-Italy) laklomelisa abafundi abaveza imibono yabo ngendlela enhle kakhulu ngale ndaba. Umbiko owawukumagazini i-Monterenzio Vivace wathi: “UBenedetta Barbi waphawulwa ngokukhethekile ngendaba yakhe eyayingafani nhlobo nezinye—eyayingahambisani nhlobo nalokho i-AVIS ekwenzayo—kodwa ngale ndaba lo mfundi wakwazi ukuveza izinkolelo zakhe ngokulinganisela nangesizotha.”
Nakuba isinqumo soFakazi BakaJehova ngokuphathelene negazi “siphambene neningi,” odokotela abaningi sebeyakubona ukubaluleka kwaso. Lesi sinqumo siye saba yimbangela enkulu yentuthuko ezindleleni zokwelapha ezinciphisa ukopha lapho kuhlinzwa. Lokhu kuye kwazuzisa iziguli ezingoFakazi nezingebona. Kodwa, isizathu esikhulu sokwenqaba igazi koFakazi BakaJehova sitholakala eBhayibhelini, njengoba kuphawulwe esethulweni.
Uma oFakazi BakaJehova befika ekhaya lakho, kungani ungababuzi ngombono woMdali ngegazi? Bayokujabulela ukuxoxa nawe, futhi benze kanjalo ‘ngenhlonipho ejulile.’—1 Petru 3:15.
[Ibhokisi/Isithombe ekhasini 30]
UKWAZISWA OKWENGEZIWE
Ngosizo lochwepheshe abaningi abasezingeni eliphakeme, i-DVD ethi Transfusion Alternatives ichaza izimiso zezokwelapha, zezomthetho nezokuziphatha eziphathelene nezinye izindlela zokwelapha ezingasebenzisi ukumpontshelwa igazi. OFakazi BakaJehova banayo.