Ukuphila Ngenkathi Yezinguquko Ezinkulu EKorea

Njengoba Ilandiswa UChong-il Park

“Gwala ndini! Wesaba ukufela empini. Uzama ukubalekela ukuba yisosha ngokuvika ngenkolo yakho.” Lawa amazwi angihlasela ngawo ukaputeni we-Counter Intelligence Corps (CIC) lapho ngivele phambi kwakhe ngo-June 1953, eminyakeni engu-55 edlule.

LOKHU kwenzeka phakathi nempi yaseKorea. Ukaputeni wabe esekhipha isibhamu wasibeka phezu kwetafula. Wathi: “Manje uzofela la kunasempini. Ingabe uyafuna ukushintsha umqondo?”

Ngaphendula ngokunganqikazi, “Cha.” Ngemva kwalokho, ukaputeni wayala elinye isosha ukuba lenze amalungiselelo okuba ngibulawe.

Ngaba kulesi simo ngenxa yokuthi ngangibizelwe ebusosheni kodwa ngenqaba. Njengoba sasilindile, ngatshela ukaputeni ukuthi ngase nginikezele ukuphila kwami kuNkulunkulu, ngakho ngikholelwa ukuthi kungaba okungalungile ukukudela ngenxa yanoma yini enye ngaphandle kokukhonza uNkulunkulu. Kwaphela imizuzu kuthe cwaka. Ngokushesha ngemva kwalokho, labuya isosha labika ukuthi ayesenziwe amalungiselelo okuba ngibulawe.

Ngaleso sikhathi abantu abaningi eNingizimu Korea kuncane kakhulu ababekwazi ngoFakazi BakaJehova uma kukhona, ingasaphathwa eyokwenqaba ukuhlanganyela kunoma yimiphi imisebenzini yezempi kahulumeni ngenxa kanembeza wethu. Ngaphambi kokuba ngichaze okwenzeka, ake ngichaze ukuthi ngasifinyelela kanjani isinqumo engasitshela ukaputeni wezempi.

Ukuphila Kwami Kwangaphambili

Ngazalwa ngo-October 1930 eduze nedolobha iSeoul eyayiyinhloko-dolobha yaseKorea, ngiyizibulo ekhaya. Umkhulu wami wayeyilungu elishisekayo lemfundiso kaConfucius, futhi wangiqeqesha ukuba ngilandele leyo mfundiso. Wamelana nokuba ngithole imfundo yasesikoleni, ngakho angizange ngiye esikoleni kwaze kwaba ngemva kokufa kwakhe, lapho ngineminyaka eyishumi. Khona-ke ngo-1941, iJapane yalwa ne-United States eMpini Yezwe II.

Njengoba iKorea yayibuswa iJapane, njalo ekuseni thina bafundi kwakufanele sihlanganyele emkhosini wokudumisa umbusi waseJapane. Ubabekazi nomyeni wakhe base bengoFakazi BakaJehova futhi babeboshiwe eKorea phakathi neMpi Yezwe II, ngoba ngenxa yezinkolelo zabo, benqaba ukuhileleka kunoma yimiphi imisebenzi esekela impi. Indlela oFakazi ababephethwe ngayo amaJapane yayinesihluku kangangokuba abanye babo bafa, kuhlanganise nomyeni kababekazi wami. Kamuva ubabekazi wahlala nomndeni wakithi.

IKorea yaphuma ngaphansi kokubuswa yiJapane ngo-1945. Ngosizo lukababekazi nabanye oFakazi ababesinde ekuboshweni, ngaqala ukufunda iBhayibheli ngokuzimisela futhi ngabhapathizwa ngaba omunye woFakazi BakaJehova ngo-1947. Ngo-1949 eSeoul kwafika uDon no-Earlene Steele, izithunywa zevangeli zokuqala ezaqeqeshwa e-Watchtower Bible School of Gilead, zabe sezabelwa eKorea. Ngemva kwezinyangana nje kwafika ezinye.

Ngo-January 1, 1950, mina kanye nabanye abathathu baseKorea saqala ukukhonza njengamaphayona, njengoba izikhonzi zesikhathi esigcwele zoFakazi BakaJehova zibizwa kanjalo. Saba ngamaphayona okuqala eKorea ngemva kweMpi Yezwe II.

Phakathi Nempi YaseKorea

Ngokushesha ngemva kwalokho, ngeSonto, ngo-June 25, 1950, kwagqashuka impi phakathi kweNyakatho Korea neNingizimu Korea. Ngaleso sikhathi, kulo lonke elaseKorea kwakunebandla loFakazi elilodwa vo, liseSeoul, lakhiwa abamemezeli abangu-61. Ihhovisi Lenxusa lase-United States layala zonke izithunywa zevangeli ukuba zibuyele ezweni lazo ukuze zivikeleke. OFakazi abaningi bendawo bayishiya iSeoul bagcwala kuyo yonke ingxenye eseningizimu yezwe.

Kodwa, uhulumeni waseNingizimu Korea wayivimbela intsha engabafana njengami eyayisikhule ngokwanele ukubuthelwa empini ukuba ishiye iSeoul. Kungazelelwe, amasosha amaKhomanisi angena edolobheni futhi iSeoul yaqala ukulawulwa amasosha amaKhomanisi. Ngisho naphakathi naleyo nkathi, kwadingeka ukuba ngicashe ekamelweni elincane izinyanga ezintathu, ngangikwazi ukushumayela kubantu ngoMbuso kaNkulunkulu. Ngokwesibonelo, ngahlangana nothisha naye owayecashele amaKhomanisi. Wagcina esehlala nami, futhi ngangifunda naye iBhayibheli nsuku zonke. Ngokuhamba kwesikhathi, wabhapathizwa waba omunye woFakazi BakaJehova.

Ngokuhamba kwesikhathi iziphathimandla zamaKhomanisi zaseNyakatho Korea zagcina zisitholile lapho sasicashe khona. Sasho ukuthi singabafundi beBhayibheli futhi sachaza nemfundiso yeBhayibheli ngoMbuso kaNkulunkulu. Kwasimangaza ukuthi esikhundleni sokusibopha zabonisa isithakazelo esigijimini seBhayibheli. Empeleni, ezinye zazo zabuya izikhathi ezimbalwa zifuna ukuzwa okwengeziwe ngoMbuso kaNkulunkulu. Lokhu kwaqinisa ukholo lwami ngesivikelo sikaJehova.

Ngemva kokuba amabutho e-UN esephinde athatha izintambo zokulawula eSeoul, ngo-March 1951 ngathola imvume ekhethekile yokuya edolobheni iTaegu. Lapho ngakwazi ukujabulela ukushumayela nabanye oFakazi izinyanga eziningana. Ngo-November 1951, ngaphambi kokuba impi iphele, uDon Steele wabuyela eKorea.

Ngamsiza ekuhleleni kabusha umsebenzi wokushumayela. INqabayokulinda, kanye ne-Informant manje ebizwa ngokuthi INkonzo Yethu YoMbuso—eyayinikeza oFakazi iziqondiso zokuqhubeka nomsebenzi wokushumayela—kwakudingeka ukuba zihunyushelwe olimini lwaseKorea, zibhalwe ngomshini, zinyatheliswe. Lezi zincwadi zazithunyelwa emabandleni ayekhona ngaleso sikhathi emadolobheni ahlukahlukene. Ngezikhathi ezithile mina noDon sasihamba sobabili, sivakashele amabandla ukuze siwakhuthaze.

Ngo-January 1953, ngajabula lapho ngithola incwadi engimemela esikoleni saseGileyadi eNew York ukuze ngiqeqeshelwe umsebenzi wokuba yisithunywa sevangeli. Kodwa ngemva kokuba sengithenge ithikithi lebhanoyi, ngathola incwadi evela ehhovisi likahulumeni waseKorea, eyayingiyala ukuba ngiyoqeqeshelwa impi.

Isimo Esisho Ukufa Nokuphila

Esikhungweni sokubhalisela ubusosha, ngachazela isosha isimo sami sokungathathi hlangothi nokwenqaba ukuba yisosha. Lapho lizwa lokho langidlulisela kuyi-CIC ukuze kutholakale ukuthi angilona yini iKhomanisi. Yilapho-ke la ngabhekana khona nesimo esisho ukufa nokuphila engikhulume ngaso ekuqaleni. Kodwa kunokuba angidubule, ukaputeni wavele wasukuma, wanika isosha umshiza, walitshela ukuba lingibhambabule. Nakuba ubuhlungu babubukhulu kakhulu, ngajabula ukuthi ngakwazi ukububekezelela.

I-CIC yangibuyisela esikhungweni sokubhalisela ubusosha, lapho abaphathi bavele bazishaya indiva izinkolelo zami, banginika inombolo kamazisi yasebusosheni, base bengiyisa esikhungweni sokuqeqeshelwa impi esiqhingini saseCheju eduze neKorea. Ngakusasa abasanda kubuthwa, kuhlanganise nami, kwakufanele bafunge ukuze babe amasosha. Ngenqaba. Ngenxa yalokho, ngagwetshwa ngavalelwa ejele iminyaka emithathu.

Izigidi Zilondoloza Ubuqotho

Ngosuku engangizohamba ngalo ngiyoqeqeshelwa umsebenzi wokuba isithunywa sevangeli, ngabona indiza ihamba phezulu. Kwakuyindiza engangizohamba ngayo. Kunokuba ngibe nenhliziyo ebuhlungu ngenxa yokuthi angisayi eGileyadi, nganeliseka ngokujulile ngokuthi ngangilondoloze ubuqotho bami kuJehova. Futhi akumina ngedwa uFakazi waseKorea oweyenqabe ukubuthelwa ebusosheni. Empeleni, abanye oFakazi abangaphezu kuka-13 000 eminyakeni engaphambi kwaleyo babenqabile ukuya empini. Badonsa ingqikithi yeminyaka engu-26 000 emajele aseKorea.

Ngemva kokudonsa iminyaka emibili kwemithathu, ngathola ushwele ngo-1955 ngenxa yokuba yisiboshwa esiyisibonelo. Ngaphinde ngaqala inkonzo yesikhathi esigcwele. Kamuva, ngo-October 1956, ngathola isabelo sokukhonza emahhovisi oFakazi BakaJehova eNingizimu Korea. Kwathi ngo-1958, ngaphinde ngamenyelwa eGileyadi. Ngosuku lokuthweswa kwami iziqu ngabelwa khona futhi eKorea.

Ngemva kwesikhathi ngibuyele eKorea, ngahlangana no-In hyun Sung, uFakazi othembekile, futhi sashada ngo-May 1962. Wayekhulele emkhayeni wobuBuddha futhi wafunda iqiniso ngoFakazi kothile ayefunda naye esikoleni. Eminyakeni emithathu yokuqala, sasivakashela ibandla elihlukile eKorea isonto ngalinye sinomgomo wokuqinisa amalungu alo ngokomoya. Kusukela ngo-1965 besilokhu sisebenza ehhovisi legatsha loFakazi, manje eliqhele ngamakhilomitha angu-60 ukusuka eSeoul.

Ukucabanga Ngoshintsho

Uma ngicabanga ngokwenzeka, kuyangimangaza ukubona ukuthi kuningi kangakanani osekushintshile kuleli zwe. Ngemva kwempi yezwe yesibili nokulwa neNyakatho Korea, iNingizimu Korea yasala iyincithakalo. Amadolobha nemigwaqo kwacekeleka phansi. Ugesi wawutholakala ngezikhathi ezithile kuphela. Futhi isimo sezomnotho sasisibi kakhulu. Eminyakeni engu-50 kamuva, iNingizimu Korea ithuthuke kakhulu.

Namuhla iNingizimu Korea ingeye-11 emazweni anothe kakhulu emhlabeni. Yaziwa ngamadolobha ayo esimanje, izitimela ezinejubane elikhulu, ubuchwepheshe kweze-electronics, nobuchwepheshe kwezokwakha. Namuhla iNingizimu Korea iyizwe lesihlanu kwakhiqiza izimoto eziningi emhlabeni. Kodwa okubaluleke nakakhulu kimi kube intuthuko eyenzekile eNingizimu Korea ekuhlonipheni amalungelo ezakhamuzi zakhona.

Lapho ngivela enkantolo ngo-1953, uhulumeni waseKorea wawungaqondi ukuthi umuntu angenqaba kanjani ukuba yisosha ngenxa kanembeza. Abanye bethu babesolwa ngokuba amaKhomanisi, futhi oFakazi abambalwa bashaywa baze bafa. Abaningi ababoshwa ngenxa kanembeza lapho besengabafana abancane baye babona amadodana abo, ngisho nabazukulu, beboshwa ngenxa yesizathu esifanayo.

Eminyakeni embalwa edlule, imithombo yezindaba inikeze imibiko ewusizo lapho iphawula ngezehlakalo ezihilela ukwenqaba koFakazi BakaJehova ukuba nengxenye ezindabeni zezempi zanoma yiliphi izwe. Omunye ummeli owayeshushise uFakazi owenqaba ukuba yisosha ngenxa kanembeza waze wabhala ngisho nencwadi exolisa ngalokho akwenza, futhi yanyatheliswa kumagazini odumile.

Ngithemba ukuthi ilungelo lethu lokunqaba ngenxa kanembeza lizohlonishwa eNingizimu Korea njengoba kunjalo nakwamanye amazwe amaningi. Ngithandazela ukuba iziphathimandla zaseNingizimu Korea zibamukele nabanye abantu abanezinkolelo ezifana neyami futhi ziqede umkhuba wokuvalela intsha ejele ngokwenqaba ukuya empini ngenxa kanembeza, “ukuze siqhubeke siphila ukuphila okuzolile nokunokuthula.”—1 Thimothewu 2:1, 2.

Njengezikhonzi zikaNkulunkulu, uJehova, siyalazisa ithuba lokumelela ilungelo lakhe lokuba uMbusi wethu. (IzEnzo 5:29) Isifiso sethu esisuka enhliziyweni siwukujabulisa inhliziyo yakhe ngokwethembeka kwethu kuye. (IzAga 27:11) Ngiyajabula ukuthi ngiphakathi kwezigidi ezikhethe ‘ukwethembela kuJehova ngayo yonke inhliziyo yazo, zingenciki kokwazo ukuqonda.’—IzAga 3:5, 6.

[Amazwi acashunwe esihlokweni ekhasini 13]

“Kwasimangaza ukuthi esikhundleni sokusibopha zabonisa isithakazelo esigijimini seBhayibheli”

[Amazwi acashunwe esihlokweni ekhasini 14]

OFakazi baseKorea badonse ingqikithi yeminyaka engu-26 000 emajele ngenxa yokwenqaba kwabo ukuba amasosha

[Isithombe ekhasini 12]

Ejele lezempi, ngo-1953

[Isithombe ekhasini 15]

Ngivakashele amabandla noDon Steele phakathi nempi, ngo-1952

[Isithombe ekhasini 15]

Ngaphambi komshado wethu ngo-1961

[Isithombe ekhasini 15]

Ngisiza ngokutolikela umbonisi ojikelezayo, ngo-1956

[Isithombe ekhasini 15]

Ngino-In hyun Sung namuhla