Umbono WeBhayibheli

Ingabe UNkulunkulu Kufanele Akhulekelwe Ngezithombe?

“Ngafundiswa ukuthi izithombe zazizongenza ngizizwe ngisondelene noNkulunkulu.”—UMack.

“Ekhaya kwakugcwele izithixo zenkolo. Sasicabanga ukuthi lokhu kwakwenza ikhaya lethu limthokozise uNkulunkulu.”—UHerta.

“Sasikhothamela izithombe ezithile. Sasingacabangi nhlobo ngokuthi lesi senzo sasimenza azizwe kanjani uNkulunkulu.”—USandra.

UZIZWA kanjani ngalawo mazwi? Abaningi bakholelwa ukuthi izithombe zenkolo zibasiza ekukhulekeleni uNkulunkulu. Ingabe banombono ofanele? Okubaluleke nakakhulu, uzizwa kanjani uNkulunkulu ngale ndaba? Cabangela lokho okushiwo yiZwi lakhe elilotshiwe, iBhayibheli Elingcwele.

Umbono KaNkulunkulu Ngezithombe Zenkolo

Izithixo nemifanekiso yenkolo kuyizimpawu zanoma yini ekhulekelwayo noma ehlonishwayo. Kuhlanganisa iziphambano, imifanekiso eqoshiwe, izithombe nanoma yini efana nezinto ezisezulwini noma emhlabeni.a Namafulege angaba yizinto ezikhulekelwayo.

Ukusetshenziswa kwezinto ezinjalo ekukhulekeleni kuhlehlela emuva eminyakeni eyizinkulungwane edlule. Ngakho, ngo-1513 B.C.E., lapho enikeza isizwe sakwa-Israyeli esisanda kumiswa iMiyalo Eyishumi, uNkulunkulu wayiveza ngokucacile indlela ayezibheka ngayo izithombe zenkolo. Wathi: “Ungazenzeli umfanekiso oqoshiwe noma isimo esinjenganoma yini esemazulwini phezulu noma esemhlabeni ngaphansi noma esemanzini ngaphansi komhlaba. Ungazikhothameli futhi unganxenxelwa ukuba uzikhonze, ngoba mina Jehova uNkulunkulu wakho nginguNkulunkulu ofuna ukuzinikela kimi kuphela.”—Eksodusi 20:4, 5.

Phawula umyalo kaNkulunkulu onqabelayo okabili: Okokuqala, abantu bakhe kwakungafanele benze izithombe zokukhulekela, okwesibili, kwakungafanele ‘bazikhothamele’ noma bazikhonze. Kungani uMdali wethu ekwenqabela ukwenziwa kwezithombe? Esinye sezizathu zokuba singazenzi izithombe zikaNkulunkulu siwukuthi “akekho umuntu oye wabona uNkulunkulu noma nini.” UNkulunkulu akayona inyama kodwa ungumoya futhi uhlala endaweni yomoya. (Johane 1:18; 4:24) Isizathu sokungazenzi izithombe zanoma yini siwukuthi uNkulunkulu ufuna ‘ukuzinikela kuye yedwa.’ “Angisoze nganika muntu omunye inkazimulo yami, noma imifanekiso ebaziwe udumo lwami.” (Isaya 42:8) Ngenxa yalesi sizathu, kuyiphutha nokwenza isithombe ukuze sisisize ekukhulekeleni. Lapho umholi wakwa-Israyeli okuthiwa u-Aroni enza lokho, uJehova wacasuka kakhulu.—Eksodusi 32:4-10.

Kungani Kungafanele Zikhothanyelwe?

Ngokuphathelene nezithixo, iBhayibheli lithi: “Zinomlomo, kodwa azikwazi ukukhuluma; zinamehlo, kodwa azikwazi ukubona; zinezindlebe, kodwa azikwazi ukuzwa.” Libe selinezela lesi sixwayiso esisangulukisayo: “Abazenzayo bayofana nsé nazo”—abaphili!—IHubo 115:4-8.

Ukukhulekela izithixo kuyisenzo sokungabi nabulungisa. Zibuze, ‘Bengingazizwa kanjani uma ngipha ingane yami isipho esiyigugu bese yona iyahamba iyobonga umuntu engingamazi nhlobo noma ngisho into engaphili?’ Lokho kungakusiza ukuba uqonde indlela uMdali wethu noMniki-kuphila azizwa ngayo lapho abanye—kuhlanganise nezithixo ezingaphili—bethola udumo nokukhulekelwa okumfanele.—IsAmbulo 4:11.

Cabanga nangendlela okumlulaza ngayo umuntu—owenziwe ngomfanekiso kaNkulunkulu uqobo—ukukhulekela into engaphili! (Genesise 1:27) Ngokuphathelene nabathile abenza lokho kanye, umprofethi u-Isaya wabhala: “Bakhothamela umsebenzi wezandla zomuntu, lokho okwenziwe yiminwe yomuntu. Umuntu wasemhlabeni uyakhothama, umuntu abe phansi, futhi [wena Jehova uNkulunkulu] akunakwenzeka ukuba ubaxolele.”—Isaya 2:8, 9.

Okwenza ukukhulekela kwamanga kumcasule nakakhulu uNkulunkulu ukuthi empeleni kuwukukhulekela amademoni—izitha zaKhe. Lapho abakwa-Israyeli belahla uJehova bekhulekela izithixo, uDuteronomi 32:17 uthi “bahlabela amademoni, hhayi uNkulunkulu.”

Ingabe abalandeli bakaJesu Kristu bokuqala bazihlonipha izithombe noma bazisebenzisa ukuze zibasize ekukhulekeleni? Cha! Umphostoli kaJesu uJohane wabhala: “Bantwanyana, ziqapheni ezithombeni.” (1 Johane 5:21) Incwadi ethi Early Church History to the Death of Constantine ithi: “Ayikho into ebingacasula kakhulu kubafundi bokuqala ukudlula ukukhulekela izithombe.”

Indlela Yokukhulekela Efanele

UJesu wathi: ‘Abakhulekeli beqiniso bayokhulekela uBaba ngomoya nangeqiniso, ngoba ngempela uBaba ufuna abanjalo ukuba bamkhulekele.’ (Johane 4:23) Yebo, uNkulunkulu ufuna ukuba simazi njengomuntu—lokho akuthandayo, angakuthandi, izindinganiso zakhe nenjongo yakhe ngathi. (Johane 17:3) Empeleni, yingakho enza ukuba kulotshwe iBhayibheli. (2 Thimothewu 3:16) Futhi ngenxa yokuthi uNkulunkulu ‘akakude kulowo nalowo kithi,’ singathandaza kuye noma nini, noma kuphi futhi ngaphandle kosizo lwezithombe zenkolo.—IzEnzo 17:27.

USandra ocashunwe ekuqaleni wathi: “Lapho ngingena eHholo LoMbuso loFakazi BakaJehova, angibonanga ngisho nesisodwa isithombe sokukhulekela. OFakazi basebenzisa iBhayibheli ukuze bangibonise izimfanelo zikaNkulunkulu nalokho akufunayo. Ngaleyo ndlela, ngafunda indlela yokuthandaza ukuze uNkulunkulu angizwe. Manje nginomuzwa wokuthi sengimqonda ngempela uMdali futhi nginobuhlobo obuseduze naye.” Yebo, uSandra wafunda ukuthi amaqiniso eBhayibheli aqabula futhi akhulula kangakanani ngempela. (Johane 8:32) Nawe ungenza okufanayo.

[Umbhalo waphansi]

WAKE WAZIBUZA?

◼ Kungani kufanele sigweme zonke izinhlobo zezithombe ekukhulekeleni?—IHubo 115:4-8; 1 Johane 5:21.

◼ Kufanele akhulekelwe kanjani uNkulunkulu weqiniso?—Johane 4:24.

◼ Ungalifunda kanjani iqiniso ngoNkulunkulu, futhi ungazuza kanjani?—Johane 8:32; 17:3.