Okuphawulwa Abafundi Balo Magazini
Ikusasa Libuphatheleni UbuKristu? (February 2007) Okuningi kwalokho enikushoyo kuyiqiniso ngokweZwi likaNkulunkulu, futhi ngivumelana nani. Kodwa kunezinto ezimbili kumagazini wenu engingazijabuleli kahle. Eyokuqala yindlela enikhuluma kabi ngayo ngamasonto obuKristu, kanti eyesibili yindlela okubonakala niziphakamisa ngayo ngaphezu kwabo bonke abanye. Bekuyoba kuhle kakhulu ukube sonke besivumelana futhi sisenkolweni eyodwa, kodwa akunjalo. Alikho isonto noma inkolo engiyibheka njengengcono kunenye.
S. S., United States
I-“Phaphama!” iyaphendula: OFakazi BakaJehova abamelene nabantu bezinye izinkolo, futhi asizibheki njengabangcono kunabanye. Siyaqaphela ukuthi ‘sonke sonile futhi siyasilela enkazimulweni kaNkulunkulu.’ (Roma 3:23) Sicabanga ngalokho, siyazikhandla futhi sisebenzisa ingcebo yethu, sinikele isikhathi esiningi ukuze sihambele imizi sitshele abanye ngamaqiniso eBhayibheli, kuhlanganise nethemba elimangalisayo eliseBhayibhelini. Kodwa, njengoba nje uJesu nabafundi bakhe babudalula ngesibindi ubuzenzisi namaphutha enkolo, noFakazi BakaJehova benza okufanayo.
Ubungaphendula Kanjani? Esikhathini esidlule ngangingavamile ukufunda le ngxenye nezingane zami ezimbili. Manje ngiyibheka njengethuluzi elinamandla engingalisebenzisela ukugxilisa iqiniso leBhayibheli ezinhliziyweni zezingane zami. Ngaphezu kwalokho, nami ngiyayijabulela njengethuluzi lokuqinisa ukholo lwami.
I. H., Czech Republic
Ngiyabonga kakhulu ngalesi sihloko esithakazelisayo, esinginika izihloko engingenza ngazo isifundo somuntu siqu. Konke kucatshangelwe kahle, ngisho nemininingwane emincane! Singisondeza ngisho nakakhulu kuBaba ohlakaniphile, uJehova.
A. S., Russia
“Jehova, Ngicela Ungivumele Ngikukhonze” (July 2007) Ukholo lwami kuJehova lwaqina lapho ngifunda indaba kaDanielle Hall. Lapho esemncane, wayengesabi ukubatshela bonke esikoleni ukuthi ungomunye woFakazi BakaJehova. Ngiyaqiniseka ukuthi izingane eziningi zoFakazi zizokwenza okufanayo.
A. R., Madagascar
Ngineminyaka engu-9 ubudala. Mina nomama sisanda kufunda indaba kaDanielle. Ingenze ngaqaphela ukuthi nginenhlanhla ngoba abazali bami baseqinisweni futhi akunzima ukuba ngikhonze uJehova. Ngilithandile ngempela iphuzu lokuthi “kungakhathaliseki ukuthi sihlala kuphi, uJehova uhlale eseduze nathi.” Ngikuthandile nokuthi lapho uDanielle efika ekhaya evela esikoleni, wayehlala embhedeni akhulume noJehova ngosuku lwakhe, njengokungathi unguyise. Ngifuna ukufunda okuthile kulokhu!
A. D., Italy
“Intsha Iyabuza . . . Kungani Ngikhishwa Inyumbazana Njalo?” (July 2007) Lesi sihloko sasisihle kakhulu ngoba ngaba nomuzwa wokuthi sibhalelwe mina. Futhi ngayijabulela imibuzo eyabuzwa kuso nezikhala zokubhala izimpendulo. Ngiyabonga. Sangisiza kakhulu.
C. A., Canada