Ukubuka Okwezwe

◼ “Kunobufakazi obuningi obungokwesayensi obusekela ukuziphendukela kwemvelo obubonakala buyiqiniso esilibonayo futhi obunezela olwazini lwethu lokuphila.”—UPAPA BENEDICT XVI.

◼ “Iziphathimandla zashabasheka . . . ukuze zithole imali yokuhlola nokulungisa amabhuloho ‘onakele’ angu-74 000 e-U.S., ngemva kokuba ibhuloho elineminyaka engu-40 lomgwaqo omkhulu waseMinneapolis [eMinnesota] elaligcwele izimoto liwe ibanga [elingamamitha angu-18] layongena eMfuleni iMississippi, labulala [abantu abangu-13].”—I-WEEK, E-U.S.A.

Iningi Liyawephula Umthetho

Iphephandaba laseLondon i-Times lithi: “Umbono wokuthi ‘iningi liyawugcina umthetho’ uyinganekwane. Abantu abaningi baseBrithani bayavuma ukuthi balalela imithetho abayifunayo kuphela, uma befuna.” Ucwaningo lwe-Centre for Crime and Justice Studies eKing’s College, eLondon, lwembula ukuthi iningi lezaphulamthetho livela ezindaweni ezinemiphakathi “ehloniphekile.” Ingxenye eyodwa kwezintathu yalabo okwaxoxwa nabo ikhokha ngokheshe ukuze ibalekele intela, ingxenye yesithathu iyayigcina imali uma inikwe ushintshi omningi, kanti ingxenye eyodwa kwezinhlanu iyavuma ukuthi iyeba emsebenzini. Abacwaningi baphetha ngokuthi lokhu kuziphatha “kuveza isimilo somphakathi—mhlawumbe ngisho nangaphezu kobudlova nobugebengu basemgwaqweni.”

Izikhali Zenuzi “Zisezandleni ZikaNkulunkulu”?

ISonto Lobu-Orthodox laseRussia liye labusisa umsebenzi wamadoda nabesifazane abanomthwalo wokugcina izikhali zenuzi zaseRussia. Emyalezweni owafundwa phakathi nomkhosi owawuseSontweni LikaKristu UMsindisi, eMoscow, owabikwa yiphephandaba i-Krasnaya Zvezda, inhloko yobu-Orthodox eRussia, u-Alexis II, yathi: “Ngithandaza kuNkulunkulu . . . ukuba izikhali zenuzi enizenzile neniziphathisiwe zihlale zisezandleni zikaNkulunkulu futhi zibe yizikhali zokunqanda impi nokuziphindiselela kuphela.”

Uju Kwa-Israyeli Wasendulo

IHebrew University of Jerusalem Institute of Archaeology ithi: “Ubufakazi bemivubukulo bendlela iBhayibheli elichaza ngayo elakwa-Israyeli . . . ‘njengezwe lobisi noju’ (noma okungenani izwe loju) sebutholakele.” Lobu bufakazi, obuseTel Rehov eSigodini saseBeth Shean kwa-Israyeli, buyizinhlu ezintathu zezindlu zezinyosi ezakhiwe ngobumba eziyizitezi ezintathu. Lo mbiko uthi le ndawo yaba khona kusukela “ekhulwini leshumi kuya ekuqaleni kwelesi-9 B.C.E.” futhi “yayingaba nezidleke ezibalelwa ekhulwini.” Abafuyi bezinyosi balinganisela ukuthi le ndawo kungenzeka yayikhiqiza “uju olungaba yingxenye yethani” unyaka ngamunye.

Izilwane Ezifuywayo Ziza Kuqala

Ngokwenhlolo-vo ye-Internet, “umuntu wase-Australia oyedwa kwabane uthi isilwane asifuyile siyilungu eliyigugu kunawo wonke emkhayeni, ngisho nangaphezu komngane womshado noma abazali,” kusho uhlelo lwe-Sydney Morning Herald kuyi-Internet. Umuntu oyedwa kwabathathu owasabela kuyinhlolo-vo eyenziwa yinkampani yezezimali yase-Australia wayechitha “isikhathi nemali eyengeziwe esilwaneni asifuyile kunasezintweni zezokwelapha azidingayo yena.” Izindlela zokunakekela impilo yesilwane esifuyiwe umuntu angakhetha kuzo zihlanganisa i-magnetic resonance imaging, ukuhlinzwa kokubeka uphawu, ukuxhunyelelwa kwamathambo, ukwelashelwa umdlavuza, ukufakelwa izitho, ukushintshwa kwethambo lenqulu ngisho nokuhlinzwa ubuchopho.