Umbono WeBhayibheli

Ingabe Ukuthandana Kugunyaza Ubulili Ngaphambi Komshado?

KUYINHLOLO-VO ethile, cishe amaphesenti angu-90 entsha okwakhulunywa nayo yayinomuzwa wokuthi akukubi ukuhlanganyela ubulili ngaphambi komshado uma nje abantu bethandana. Le ndlela yokucabanga ivezwa futhi ikhuthazwe yimithombo yezindaba. Ithelevishini namabhayisikobho kubonisa ubulili njengento evamile ewumphumela wokuthandana.

Yiqiniso, labo abafuna ukujabulisa uNkulunkulu abazifuni ezweni iziqondiso, beqaphela ukuthi libonisa indlela yokucabanga yombusi walo, uDeveli. (1 Johane 5:19) Bayaqiniseka futhi ukuthi abalawulwa yimizwa yabo kuphela, njengoba bazi ukuthi “inhliziyo ikhohlisa ngaphezu kwanoma yini enye futhi yenza ngokuphelelwa yithemba.” (Jeremiya 17:9) Kunalokho, labo abahlakaniphe ngempela bafuna isiqondiso kuMdali naseZwini lakhe eliphefumulelwe.—IzAga 3:5, 6; 2 Thimothewu 3:16.

Ubulili Buyisipho Esivela KuNkulunkulu

UJakobe 1:17 uthi: “Zonke izipho ezinhle nazo zonke izipho eziphelele zivela phezulu, ngoba zehla zivela kuYise wezinkanyiso zasezulwini.” (Jakobe 1:17) Ukusondelana ngokobulili kubantu abashadile kungesinye salezo zipho eziyigugu. (Ruthe 1:9; 1 Korinte 7:2, 7) Senza abantu bakwazi ukuzala, futhi sisiza indoda nomfazi ukuba babe nobuhlobo obuseduze ngokomzimba nangokomzwelo ngendlela enothando nejabulisayo. Inkosi yasendulo uSolomoni yabhala: “Ujabule ngomfazi wobusha bakho. . . . Amabele akhe mawakujabulise kakhulu ngazo zonke izikhathi.”—IzAga 5:18, 19.

Njengoba kulindelekile, uJehova ufuna ukuba sizuze eziphweni zakhe futhi sizijabulele. Ngenxa yaleyo njongo, uye wasinikeza imithetho nezimiso ezingcono kakhulu okufanele siphile ngazo. (IHubo 19:7, 8) UJehova nguye “okufundisayo ukuze uzuze, Lowo okubangela ukuba unyathele endleleni okufanele uhambe ngayo.” (Isaya 48:17) Ingabe uBaba wethu wasezulwini—oluthando—angasigodlela into emnandi ngempela?—IHubo 34:10; 37:4; 84:11; 1 Johane 4:8.

Ubulili Ngaphambi Komshado Abunalo Uthando

Lapho indoda nomfazi beshada, kuba sengathi baba “nyamanye.” Lapho abantu ababili abangashadile behlanganyela ubulili, okubizwa nangokuthi ubufebe, nabo bakha “umzimba owodwa”—kodwa ongahlanzekile emehlweni kaNkulunkulu.a Ngaphezu kwalokho, ukuhlangana okunjalo akunalo uthando. Kanjani?—Marku 10:7-9; 1 Korinte 6:9, 10, 16.

Esinye isizathu ukuthi, ubufebe buwubulili ngaphandle kwesibopho sangempela. Ngaphandle kokuthi buwukungazihloniphi, bungabangela izifo, ukukhulelwa okungafunwa nobuhlungu obungokomzwelo. Ngaphezu kwakho konke, bephula izindinganiso zikaNkulunkulu ezilungile. Ngakho-ke, ubufebe bubonisa ukungayinaki nhlobo inhlalakahle yesikhathi esizayo yomunye umuntu.

KumKristu, ubufebe buwukweqa amalungelo omzalwane noma udade ongokomoya. (1 Thesalonika 4:3-6) Ngokwesibonelo, labo abathi bayizinceku zikaNkulunkulu abahlanganyela ubulili ngaphandle komshado baletha ukungcola ebandleni lobuKristu. (Hebheru 12:15, 16) Futhi baphuca lowo abafeba naye ukuma okuhle kokuziphatha, kanti uma lowo muntu engashadile, bamphuca nethuba lokushada ehlanzekile ngokokuziphatha esikhathini esizayo. Bangcolisa nomlando omuhle womkhaya wakubo, futhi bone nomkhaya walowo abahlanganyela naye ubulili. Ekugcineni, babonisa ukungamnaki uNkulunkulu, abamzwise ubuhlungu ngokwephula imithetho nezimiso zakhe ezilungile. (IHubo 78:40, 41) UJehova ‘uyokhipha isijeziso’ sazo zonke izenzo ezinjalo zobubi ezenziwa abantu abangaphenduki. (1 Thesalonika 4:6) Kuyamangalisa-ke yini ukuthi iBhayibheli lisitshela ukuthi ‘sibalekele ubufebe’?—1 Korinte 6:18.

Ingabe uthandana nothile futhi uhlela ukushada? Khona-ke kungani ungasebenzisi ukuqomisana njengesisekelo esihle sokwethembana nokuhloniphana? Cabanga: Owesifazane angayethemba kanjani ngokugcwele indoda eye yazibonakalisa ingenakho ukuzithiba? Kulula yini ngendoda ukuba yazise futhi idumise owesifazane ongawunaki umthetho kaNkulunkulu ukuze nje anelise imizwa yothando noma ajabulise indoda?

Khumbula futhi ukuthi labo abenqaba izindinganiso zikaNkulunkulu zothando bavuna lokho abakuhlwanyelayo. (Galathiya 6:7) IBhayibheli lithi, “Lowo ofebayo wona owakhe umzimba.” (1 Korinte 6:18; IzAga 7:5-27) Kuyiqiniso, uma umbhangqwana othembisene umshado oye wahlanganyela ubulili ngaphambi komshado uphenduka ngempela, usebenze kanzima ukuze uvuselele ubuhlobo bawo noNkulunkulu, futhi uqinise ukwethembana kwawo, ngokuhamba kwesikhathi imizwa yecala ingaphela. Noma kunjalo, ukuziphatha kwawo kwangaphambili ngokuvamile kushiya isibazi. Omunye umbhangqwana osemusha osushadile manje uzisola kakhulu ngokuthi wafeba. Ngezinye izikhathi, umyeni uke azibuze, ‘Ingabe ukungezwani kwethu emshadweni ngandlela-thile kungenxa yalesi siqalo esingcolile?’

Uthando Lwangempela Alunabugovu

Nakuba lungase luhambisane nemizwa yothando, uthando lweqiniso “aluziphathi ngokuhlazisayo” noma ‘luzifunele izinzuzo zalo siqu.’ (1 Korinte 13:4, 5) Kunalokho, luthuthukisa inhlalakahle nenjabulo ehlala njalo yomunye. Uthando olunjalo lushukumisela indoda nowesifazane ukuba badumisane futhi ukusondelana kwabo ngokobulili bakunike indawo yakho efanele, obuyinikwe uNkulunkulu—umbhede womshado.—Hebheru 13:4.

Ibaluleke ngempela imizwa yokwethembana neyokulondeka eyenza umshado ujabulise ikakhulukazi lapho kuzalwa abantwana, ngoba uNkulunkulu wayehlose ukuba abantwana bakhulele endaweni enothando, ezinzile futhi enokulondeka. (Efesu 6:1-4) Kusemshadweni kuphela lapho abantu ababili bezibopha ngempela komunye nomunye. Ezinhliziyweni zabo, futhi ngokuvamile nangomlomo, bayafunga ukuthi bazonakekelana futhi basekelane ebuhleni nasebubini ukuphila kwabo konke.—Roma 7:2, 3.

Ubulili phakathi kwendoda nomfazi bungaqinisa isibopho. Emshadweni ojabulisayo, abashadile baye bathole ukuthi ubulili bujabulisa kakhulu futhi bunenjongo—futhi lokho akuwenzi umshado ube nesisihla, kukhathaze unembeza noma kungamhloniphi uMdali.

[Umbhalo waphansi]

WAKE WAZIBUZA?

◼ Uyini umbono kaNkulunkulu ngobulili ngaphambi komshado?—1 Korinte 6:9, 10.

◼ Kungani ubufebe buyingozi?—1 Korinte 6:18.

◼ Abantu ababili abathandanayo bangalubonisa kanjani uthando lweqiniso?—1 Korinte 13:4, 5.