Ukubuka Okwezwe
◼ Unyaka odlule “wawushisa kunayo yonke eyaziwayo emlandweni waseNyakatho Nenkabazwe” futhi “ungowesibili kweyayishisa kunayo yonke emhlabeni jikelele.” “Iminyaka engu-8 kweyishumi [eyaqopha umlando] ngokushisa ibe phakathi nale minyaka eyishumi edlule.”—I-BBC NEWS, EBRITHANI.
◼ Inkathi yeziphepho zase-Atlantic ngo-2005 kwakuyiyona nkathi “ematasa kunazo zonke” futhi “ngokobufakazi obukhona . . . yayiyinezinhlekelele ezinkulu kunazo zonke” emlandweni. Kwabikwa ukuthi iziphepho ezingu-7 kwezingu-14 zazihamba ngesivinini esingamakhilomitha angu-177 ngehora.—I-U.S. NATIONAL OCEANIC AND ATMOSPHERIC ADMINISTRATION.
◼ “Ngo-1850, kwakunezinguzunga zeqhwa ezingaphezu kuka-150 eGlacier National Park eMontana [e-U.S.A.]. Manje sekunezingu-27.”—I-WALL STREET JOURNAL, E-U.S.A.
◼ “Iqiniso elimsulwa kwezombangazwe uma kuziwa endabeni yokushintsha kwesimo sezulu liwukuthi alikho izwe elifuna ukudela ingcebo yalo ukuze libhekane nale nselele.”—UTONY BLAIR, UNDUNANKULU WASEBRITHANI.
AmaKatolika Angena “Indlu Nendlu”?
NgokukaCláudio Hummes, umbhishobhi omkhulu waseSão Paulo, isilinganiso sabantu baseBrazil abangamaKatolika siye sehla sisuka kumaphesenti angu-83 saya kumaphesenti angu-67 kule minyaka engu-14 edlule. Lo mbhishobhi usola isonto ngenxa “yokwehluleka kwalo, ngezizathu ezihlukahlukene, ukushumayela ivangeli ngokugcwele emalungwini alo abhapathiziwe.” UHummes uthi: “Kumelwe sizame ukufinyelela amakholwa, sishumayele endlini ngendlu, ezikoleni nasezikhungweni ezithile, hhayi emasontweni nje kuphela.” I-Folha Online ithi lo msebenzi kuyomelwe wenziwe abantu abavamile abaqeqeshwe njengezithunywa zevangeli. Ukuntuleka kwabefundisi kungenye yezinkinga ezinkulu iSonto LamaKatolika elibhekene nazo eBrazil nakuwo wonke amazwe aseLatin America.
Ukuqashelwa Ngokomthetho EJalimane
Esinqumweni sayo esakhishwa ngo-February 10, 2006, iNkantolo KaHulumeni eLeipzig, eJalimane, yathi uMbuso WaseBerlin kumelwe uqaphele iNhlangano Yenkolo YoFakazi BakaJehova eJalimane njengenhlangano evumelekile ngokomthetho womphakathi. Lokhu kwaqeda umshikashika wecala eselithathe iminyaka engu-15, futhi kuye kwafakwa izikhalo ezinkantolo ezihlukahlukene zaseJalimane, kuhlanganise neNkantolo Yomthetho-sisekelo. Njengenhlangano evumelekile ngokomthetho womphakathi, iNhlangano Yenkolo YoFakazi BakaJehova inelungelo lokungayikhokhi intela nokujabulela amanye amalungelo anikezwa izinhlangano ezinkulu zamasonto akuleli zwe.
Intsha YaseChina Eyimilutha Yemidlalo Ye-Internet
Iphephandaba laseHong Kong i-South China Morning Post lithi: “Ukuluthwa imidlalo ye-Internet sekwande kakhulu phakathi kwentsha yaseChina.” Lo mkhuba uyabonakala nasentsheni evela kwezinye izingxenye zamazwe aseMpumalanga, njengaseHong Kong, eJapane naseRepublic of Korea. Leli phephandaba lithi: “Isifiso esikhulayo sokugxila emidlalweni ye-Internet bese ukhohlwa yikho konke okunye siveza umuzwa izingane ezinawo wokumelana ngokuqinile nethonya lomphakathi elibangelwa ukuthi abazali balindele lukhulu kuzo futhi kunokuncintisana okunonya kokuba zilwele ukungena eyunivesithi.” Kulinganiselwa ukuthi izingane zaseChina eziyizigidi eziyisithupha zidinga usizo ukuze zinqobe lo mkhuba.