Intsha Iyabuza . . .

Ngingazigwema Kanjani Izingozi Zezingosi Zengevu?

“Ngangivame ukuchitha amahora amathathu noma amane ngosuku ngixoxa kuyi-Internet. Ngezinye izikhathi ngangichitha amahora ayisithupha kuya kwayisikhombisa ngaphandle kokunqamula ingxoxo.”—UJosé.a

IZINGOSI ZENGEVU—njenganoma iyiphi enye indawo lapho abantu abangazani beba nobudlelwano khona—inezingozi okudingeka ukuba uziqaphele. Ngokwesibonelo, uma ubungavakashela edolobheni elikhulu, ubungazama ngayo yonke indlela ukuba ungazifaki engozini, ngokuba oqaphile futhi ugweme nezindawo ezingase zibe yingozi.

Kusebenza umqondo ofanayo lapho kufanele usebenzise izingosi zengevu. Esihlokweni se-Phaphama! ka-October 8, kwaxoxwa ngezingozi ezimbili ezikhona ezingosini zengevu, njengokuxhumana nabanukubezi bezingane kanye nesilingo sokuba umkhohlisi. Kunezinye izingozi okuyinzuzo ukuzicabangela. Kodwa okokuqala, izingosi zengevu zihlelwe kanjani?

Zihlelelwe Injongo

Izingosi zengevu ngokuvamile zihlelwa ngokwezihloko ezithakazelisa uhlobo oluthile lwabantu. Ezinye zingase zihlelelwe abashisekeli bohlobo oluthile lomdlalo noma okuthile kokuchitha isizungu. Ezinye zingase zihlelelwe ukuxoxa ngohlelo oluthile lwethelevishini. Ezinye kungase kube ezabantu abathi bangabenkolo ethile.

Uma unguFakazi KaJehova, ilukuluku lokwazi lingase likwenze ukuba ungene engosini yengevu ezishaya indawo yokwenza abangane yentsha engoFakazi emhlabeni wonke. Ukuthola abangane phakathi kwentsha ohlanganyela nayo ukholo kuwumgomo omuhle. Kodwa, lezi zingosi zengevu zinezingozi ezicashile kumaKristu. Hlobo luni lwezingozi?

Ziletha Ukonakala Kokuziphatha

“Ngangisengosini yengevu neqembu labantu engangicabanga ukuthi lingoFakazi BakaJehova,” kusho osemusha ogama lakhe linguTyler. “Nokho ngemva kwesikhathi, abanye baqala ukukhuluma kabi ngezinkolelo zethu. Ngokushesha, kwacaca ukuthi bayizihlubuki.” Babengabantu ababezama ngabomu ukululaza izindinganiso zokuziphatha zalabo abathi bakholwa kanye nabo.

INdodana kaNkulunkulu, uJesu Kristu, yaxwayisa ngokuthi abanye balabo ababeyilandela babeyophendukela abangane babo. (Mathewu 24:48-51; IzEnzo 20:29, 30) Laba umphostoli uPawulu wababiza ngokuthi abazalwane bamanga wathi bangene “ngokunyenya” ukuze balimaze labo abasebandleni lobuKristu. (Galathiya 2:4) Umlobi weBhayibheli uJude uthi bangena “ngokunyenya” benomgomo ‘wokuphendula umusa ongafanelwe kaNkulunkulu wethu bawenze izaba zokuziphatha okubi.’ (Jude 4) Ubachaza nangokuthi “bangamadwala afihleke ngaphansi kwamanzi.”—Jude 12.

Qaphela ukuthi bobabili uPawulu noJude baveza izindlela zokunyenya ezisetshenziswa yizihlubuki. Laba balobi beBhayibheli baqaphela ukuthi izihlubuki ‘ziyanyenya,’ zinomgomo wokonakalisa ukuziphatha kwalabo abasebandleni lobuKristu. Namuhla, izingosi zengevu zinikeza labo bantu abonakele isembatho esikahle sokufihla izinhloso zabo ezibheke eceleni. Njengamadwala afihleke ngaphansi kwamanzi, la maKristu amanga afihla izinhloso zawo ngokumbuluza azenze abantu abakhathalela intsha engoFakazi. Kodwa umgomo wabo ukuphahlaza umkhumbi wokholo walabo abangaqaphile.—1 Thimothewu 1:19, 20.

Lo magazini kanye nezinye izincwadi ezinyatheliswa oFakazi BakaJehova sezixwayise kaningi ngale ngozi.b Ngakho-ke, noma ubani ohlangana naye engosini yengevu okuthiwa eyoFakazi BakaJehova, uma engesona isihlubuki, ungumuntu ongasinaki lesi seluleko. Ingabe uyafuna ngempela ukukhetha umuntu ongazinaki iziqondiso ezisekelwe eBhayibhelini njengomngane wakho?—IzAga 3:5, 6; 15:5.

Ugibe Lokuzihlukanisa

Esinye isici sezingosi zengevu owenza kahle ukusicabangela, isikhathi ezisichithayo. UJosé, okukhulunywe ngaye ekuqaleni kwalesi sihloko, uthi: “Ngezinye izikhathi ngangigxila kakhulu ezingxoxweni engosini yengevu kangangokuba ngangingadli nokudla.”

Ungase ungachithi isikhathi esiningi engosini yengevu njengoJosé. Nokho, ukuze ube nesikhathi sokuxoxa kuyi-Internet kufanele uzithengisisele ithuba kwezinye izinto. Imisebenzi engase iphazamiseke ngokushesha kungase kungabi imisebenzi yesikole noma imisebenzi yasendlini. Into yokuqala ephazamisekayo kungase kube ukukhulumisana nomkhaya wakini. U-Adrian ohlala eSpain uthi: “Ngangisuka ngokushesha etafuleni ngemva kokudla ngiyoxoxa kuyi-Internet. Ngagxila kakhulu ezingosini zengevu ngaze ngacishe ngayeka ukukhuluma nomkhaya wakithi.”

Uma uchitha isikhathi esibalulekile ezingosini zengevu, ungase uzihlukanise kulabo ababaluleke kakhulu kuwe. IBhayibheli linikeza lesi seluleko esifanele kulokhu: “Ozihlukanisayo uyozifunela isifiso sobugovu; uyophulukundlela aphambane nakho konke ukuhlakanipha okusebenzayo.” (IzAga 18:1) Mancane amathuba okuba abantu ongabazi ohlangana nabo ezingosini zengevu bakukhuthaze ukuba uphile ngokuhlakanipha okusebenzayo okutholakala eBhayibhelini. Maningi amathuba okuba bakukhuthaze ukuba ufune izifiso eziwubugovu futhi bayokuthonyela ukuba uyeke izindinganiso zobuKristu zokuziphatha.

Kuyiqiniso, olunye lwezingibe zezingosi zengevu kungaba ukuthi ukuthola kulula ukukhuluma kuyi-Internet kunokukhulumisana namalungu omkhaya. Labo oxoxa nabo engosini yengevu bangase babonakale bemagange ukuzwa umbono wakho ezintweni futhi baveze imizwa yabo ngokukhululekile. Ngakolunye uhlangothi, amalungu omkhaya wakini angase abonakale ematasa kakhulu ukuba alalele izinto ezikukhathazayo futhi angase akuthole kunzima ukuveza imizwa yawo ngokukhululekile.

Nokho, zibuze: ‘Ingabe bayazi ukuthi ngingubani ngempela labo engixoxa nabo engosini yengevu? Ingabe bayayikhathalela inhlalakahle yami yesikhathi esizayo?’ Umkhaya wakini cishe uyoyikhathalela kakhulu imizwelo nengokomoya lakho. Uma abazali bakho bezama ukuphila ngezindinganiso zeBhayibheli, banesithakazelo esikhulu sokuxoxa nawe. (Efesu 6:4) Uma ubavezela imicabango nemizwa yakho ngenhlonipho, bangakumangaza ngokusabela ngendlela enomusa obungayilindele.—Luka 11:11-13.

Ukugwema Izingozi

Ungase ube nesizathu esikuphoqayo ukuba ungene engosini yengevu—ngokwesibonelo, ngenxa yomsebenzi othile wesikole odingekayo.c Uma kunjalo, ungaqiniseka ukuthi izingosi zengevu azibi ugibe kuwe ngokulandela izinyathelo zokuzivikela ezilandelayo.

Okokuqala, gwema ukusebenzisa i-computer exhunywe kuyi-Internet ngasese ekamelweni lakho. Ukwenza kanjalo kungaba njengokuhambahamba esitaladini esimnyama edolobheni ongalazi—okungaba ukuzidonsela amanzi ngomsele. Kunalokho, gcina i-computer isendaweni esobala endlini lapho abanye bengase bakubone khona.

Okwesibili, hlakulela ukukhulumisana okungcono nabazali bakho ngokubabonisa izingosi ongena kuzo nangokubachazela ukuthi kungani kudingeka ungene engosini ethile yengevu. Futhi, zibekele isikhathi ozoqala futhi uqede ngaso ukusebenzisa i-computer, bese uyasigcina.

Okwesithathu, faka kuyi-computer yakho izinhlelo ezizokuvikela ekuhlukumezekeni okungokobulili kuyi-Internet okufika ngemiyalezo. Uma kwenzeka unxenxwa ngokobulili kuyi-Internet, tshela abazali noma uthisha wakho ngokushesha. Kwamanye amazwe abantu abadala abakunxenxa ngemiyalezo esikisela ubulili noma izithombe zobulili ezingcolile nakuba bazi ukuthi usemncane basuke bephula umthetho. Kufanele babikwe emaphoyiseni.

Ngaphezu kwalokho, unganikezi muntu ohlangana naye engosini yengevu igama lakho, ikheli, igama lesikole ofunda kuso noma inombolo yocingo lwakho. Ungavumi uma umuntu ohlangane naye kuyi-Internet ekumema ukuba nibonane ubuso nobuso!

Nakuba amazwi enkosi ehlakaniphile uSolomoni abhalwa eminyakeni eyizinkulungwane edlule, ayahambisana nezingozi ezilethwa yizingosi zengevu: “Unokuqonda lowo oboné inhlekelele wabe esecasha, kodwa abangenalwazi baye badlula ngakuyo futhi kumelwe bakhokhe.”—IzAga 22:3.

[Imibhalo yaphansi]

[Isithombe ekhasini 18]

Ngokuhlakanipha, bonisa abazali bakho izindawo ongena kuzo kuyi-Internet