Ukubuka Okwezwe
AmaJesuit Enqatshelwa Ukubhalisa ERussia
I-National Catholic Reporter ibika ukuthi uMnyango Wezobulungisa WaseRussia wenqabe isicelo se-Society of Jesus sokubhalisa njengenhlangano yenkolo ezimele. I-Society of Jesus, ngokuvamile eyaziwa ngokuthi amaJesuit, yasungulwa ngo-1540. Ngaphansi komthetho wenkolo omusha waseRussia, izinhlangano eziningi zenkolo kudingeka zibhalise kabusha ukuze ziqashelwe ngokomthetho. Amaqembu enqatshelwa ukubhalisa ngeke akwazi ukunyathelisa noma ukusakaza izincwadi zenkolo, ukumema izakhamuzi zakwamanye amazwe zize ezinkonzweni zenkolo noma amise izikhungo zokufundisa. OFakazi BakaJehova babhaliswa kabusha kuleli zwe ngo-April 29, 1999.
Ukuzibulala Kuyanda EJapane
I-Daily Yomiuri ibika ukuthi abantu abazibulele ngo-1998 eJapane baningi ukwedlula noma imuphi omunye unyaka. Ngokwe-National Police Agency yaseJapane, bangu-32 863 abantu abazibulala ngo-1998—inani elingaphezu kokuphindwa kathathu kwenani labantu abafa ezingozini zezimoto eJapane. Ukwanda okungaka kuthiwa kungenxa yezinkinga zezimali ezibangelwa ukuntuleka kwemisebenzi, okuye kwahlasela leli zwe ngemva kokuwa komnotho muva nje. Ukuzibulala kungokwesithupha ezimbangeleni zokufa ezihamba phambili eJapane.
Ukungcola Komoya Okubulalayo
Umthombo wezindaba i-Reuters ubika ukuthi “izimoto yizo eziyimbangela eyanda ngokushesha yokungcola komoya eYurophu futhi kwamanye amazwe baningi abantu ababulawa yilokhu kungcola kunabafa ezingozini [zezimoto].” Ngokokuhlola okwenziwa yi-World Health Organization, unyaka ngamunye abantu abangu-21 000 e-Austria, eFrance naseSwitzerland bafa ngaphambi kwesikhathi ngenxa yesifo semigudu yokuphefumula noma senhliziyo esibangwa ukungcola komoya. Embikweni ohlukile, kulinganiselwa ukuthi emadolobheni aseNdiya angu-36, nsuku zonke abantu abangu-110 bafa ngaphambi kwesikhathi ngenxa yokungcola komoya.
Ukugcinwa Kokwaziswa Emishinini Kuphela Ngokushesha
Sekuyiminyaka ososayensi bama-computer bethi ukugcina ukwaziswa emishinini kungcono kakhulu kunokukugcina ephepheni. Nokho, manje abasebenzi basemitatsheni yezincwadi noma ezinqolobaneni zokugcina imilando sebeqala ukusho okuhlukile. Umagazini i-Newsweek uthi: “Silahlekelwa ulwazi oluningi olubalulekile kwezesayensi nasemlandweni ngenxa yokuphuka noma ukuphelelwa isikhathi kwemishini.” Isimiso semishini sokugcina ukwaziswa njengama-disk drive asizwani nokushisa, umswakama, ukugqwala nama-magnetic field agqagqene. Futhi kuye ngokuthi izimo egcinwe kuzo zinjani, i-magnetic tape okugcinwa kuyo ukwaziswa ingahlala iminyaka eyishumi kuphela, kusho lo magazini. Enye inselele ababhekana nayo labo abazama ukulondoloza ukwaziswa emshinini, ukushintsha okusheshayo kwezobuchwepheshe. Izinto ezisetshenziselwa ukugcina ukwaziswa zishintsha ngokushesha kakhulu kangangokuthi izimiso zemishini zokulondoloza ukwaziswa zisheshe ziphelelwe isikhathi. U-Abby Smith, we-Council on Library and Information Resources uthi: “Ukwaziswa akunalo ithuba elingako lokusinda, ngaphandle kokuba wenze umnyuziyamu wamakhasethi alalelwayo nama-PC [ama-computer].”
Inani Labantu BaseNdiya Selingaphezu Kwezigidi Eziyinkulungwane
Ngokwe-United Nations Population Division, inani labantu baseNdiya ladlula izigidi eziyinkulungwane ngo-August 1999. Eminyakeni engaphezudlwana nje kwengu-50 edlule, inani labantu baseNdiya laliyingxenye yesithathu kulokho eliyikho manje. Uma liqhubeka likhula ngezinga elikhula ngalo manje, elingamaphesenti angu-1,6 ngonyaka, cishe emashumini amane eminyaka, elaseNdiya lizobe selidlula iChina ngokuba izwe elinabantu abaningi kunabo bonke emhlabeni. I-New York Times ibika ukuthi “kakade elaseNdiya neChina linabantu abangaphezu kwengxenye yesithathu yabantu abasemhlabeni wonke.” Eminyakeni engaphansi kwengu-50, iminyaka ephilwa abantu baseNdiya iye yanyuka isuka eminyakeni engu-39 iya kwengu-63.
Ukwehla Kwezinga Lokushada E-United States
Ukuhlola okwenziwa yi-National Marriage Project ye-Rutgers University kwathola ukuthi izinga lokushada e-United States liye lehla ukudlula noma inini emlandweni, kubika i-Washington Post engosini yayo ye-Internet. Lokhu kuhlola kwaphawula nokuthi ngemva nje kweMpi Yezwe II, izingane ezingamaphesenti angu-80 zazikhulela emikhayeni enabo bobabili abazali abazizalayo. Nokho, namuhla leli nani selehle laba ngamaphesenti angu-60. Lo mbiko uthi: “Inani lamaphesenti amantombazane athi ukuba nengane ungashadile ‘indlela yokuphila enhle’ lenyuka lisuka kumaphesenti angu-33 liya kwangu-53 emashumini amabili eminyaka edlule.” Akumangalisi ukuthi lo mbiko wathi: “Isiko lomshado lisenkingeni ngempela”!
Usizi Lwemfundo E-Afrika
I-All Africa News Agency ibika ukuthi izingane ezingaphezu kwezigidi ezingu-40 esezingangena esikoleni e-Afrika eseningizimu yeSahara azifundi. Izinkinga eziningi ziye zaphazamisa izikole zakule ndawo. Ngokwesibonelo, ngenxa yezinkinga ezingokomnotho, izikole eziningi azinamanzi futhi zinezindlu zangasese ezimbalwa noma azinazo nhlobo. Azikho izincwadi kanti nothisha abaqeqeshiwe kahle. Ngaphezu kwezinkinga ezingokomnotho, kuyanda ukukhulelwa kwamantombazane, okuyimbangela eyinhloko yokuyeka kwawo isikole. Ingculaza nayo iye yalithinta inani lezingane ezifundayo. I-Africa News ithi: “Ngenxa yokushesha ihlanganyele ubuhlobo bobulili, intsha eningi iye yaphathwa ingculaza.” Kokunye amantombazane angenayo ingculaza kudingeka ahlale ekhaya anakekele izihlobo ezinalesi sifo. UDkt. Edward Fiske, uchwephweshe wemfundo yasesikoleni sabaqalayo we-United Nations Educational, Scientific, and Cultural Organization uthi: “Ngaphandle kwemfundo, ikusasa lamazwe amaningi e-Afrika eseNingizimu yeSahara lisengcupheni.”
Isidumbu Esomisiwe Kutholakale Ukuthi Sinozwane Lokufakelwa
I-Sunday Times yaseLondon ithi: “Uzwane lokufakelwa olwatholakala esidunjini kubonakala sengathi lwalusetshenziswa lapho sisaphila ngaphambi kokuba lungcwatshwe nomnikazi walo eminyakeni engu-2 500 edlule.” Uzwane lokufakelwa, olwenziwe ngelineni elifakwe inhlaka yezilwane nosimende waseParis, luchazwa uDkt. Nicholas Reeves “njengomkhiqizo ophucuzekile, oklanywe kahle, owenziwe ngobuciko noqinile, futhi ngokusobala lwa-odwa ngokhethekile.” Lolu zwane lwafika lufakwe uzipho futhi lumbozwe yinto enjengenyama. Kwakubhotshozwe uhide lwezimbobo ezingu-8 ozwaneni ukuze lunanyathiselwe. Izimbobo zihamba lapho kuhamba khona ibhande lezimbadada ezime njengo-Y ukuze kuthi lapho uzwane lufakiwe, izimbobo zivalwe ibhande lezimbadada.
Ukuphathwa Ikhanda Okubangwa Amaphilisi Ezinhlungu!
Labo abaphuza amaphilisi ekhanda izikhathi ezintathu noma ezine ngesonto bangase baphathwe ikhanda elibangelwa ukusebenzisa kabi amaphilisi (MMH [medication misuse headache]). Njengoba kucatshangwa ukuthi ithinta umuntu oyedwa kwabangu-50, i-MMH ibangelwa amaphilisi avamile, njenge-aspirin, kanye namaphilisi ezinhlungu agunyazwe udokotela. Lapho amandla okuqeda izinhlungu ephela, amaphilisi angabangela ukuphathwa ikhanda isiguli esicabanga ukuthi ikhanda elivamile noma ikhanda elihambisana nokucanuzela kwenhliziyo nokuphalaza. Isiguli siphuza amanye amaphilisi, amane aphinde umjikelezo ofanayo. UDkt. Tim Steiner, we-Imperial College, eLondon, uyachaza ukuthi “noma isiphi isiguli esikhononda ngokuphathwa ikhanda elibeleselayo kumelwe kusolwe ukuthi sine-MMH.” Uphawula nokuthi nakuba lesi simo sekuyiminyaka saziwa, odokotela bemikhaya abaningi abasazi futhi bavele banike isiguli amanye amaphilisi ezinhlungu anamandla kakhudlwana, kuyilapho kudingeka nje kuphela ukuba isiguli siyeke ukuphuza amaphilisi, kubika i-Sunday Telegraph yaseLondon.
Ukunakekela Ulimi
Amagciwane acasha ngemva kolimi lwakho angakhiqiza ama-sulfur gas abangela ukunuka komlomo, kusho umbiko ephephandabeni i-Prince George Citizen. Lo mbiko uthi: “Amagciwane ayachuma endaweni eyomile, engenawo umoya-mpilo, yikho lokho okwenza ahlale emifantwini nasezikhoxeni ezikude nomoya esiwuthumela emaphashini ethu.” Ukuxubha nokuvungula amazinyo kungakusiza, kodwa amaphesenti angaba ngu-25 kuphela amagciwane aqedwa ukuxubha. Udokotela wamazinyo u-Allan Grove ukholelwa ukuthi ukuhwaya ulimi, isiko elidala laseYurophu, “kuwukuphela kwento ebaluleké kakhulu ongayenza ukuze uvimbele ukunuka komlomo.” I-Citizen ithi ukusebenzisa isihwayo sepulasitiki “kungcono kakhulu kunesixubho ekugcineni ulimi luhlanzekile futhi lubomvana.”
Iso Elisha Lokuhlola Umkhathi
IGemini North telescope, eseMauna Kea, eHawaii, yaqala ukuhlola umkhathi ngo-June 1999. Iphephandaba i-Independent yaseLondon libika ukuthi isibuko sayo esiqoqa ukukhanya, esingamamitha angu-8,1 ububanzi, sizokwenza izazi zezinkanyezi zikwazi ukubona izinto ezilufifi ezikude phakathi naphakathi emkhathini. Kokubili iGemini North neHubble telescope esemkhathini kusiza izazi zezinkanyezi ukuba zibone izenzakalo ezenzeka kudala futhi ngaleyo ndlela “zihlehlele emuva.” Into engcono ngeHubble telescope ukuthi isemkhathini. IGemini, nakuba isemhlabeni, ithembele kuma-computer ukuze iqede ukungabonakali kahle okubangelwa ukuphazamiseka emkhathini, futhi ikhipha izithombe ezicace njengezeHubble—uma zingazedluli.