Ukufuna Izimpendulo Phezulu KuNkulunkulu, Hhayi Phansi Endalweni
UKUZIPHENDUKELA kwemvelo kufundisa ukuthi uchungechunge lwezinguquko lwasishintsha kancane kancane saba izilwane ezingcono. Ngakolunye uhlangothi, iBhayibheli lithi sadalwa siphelele, ngomfanekiso kaNkulunkulu, kodwa ngokushesha ngemva kwalokho, kwangena ukungapheleli futhi isintu saqala ukuwohloka.
Abazali bethu bokuqala, u-Adamu no-Eva, bazifaka kulobu bunzima lapho befuna ukuzibusa futhi belimaza onembeza babo ngokungamlaleli ngamabomu uNkulunkulu. Banqamula uthango lomthetho kaNkulunkulu bangena ebunzimeni esikubo manje, njengoba sesihlushwa ukugula, ukuguga nokufa, ingasaphathwa eyobandlululo lobuhlanga, inzondo engokwenkolo nezimpi ezisabekayo.—Genesise 2:17; 3:6, 7.
Izakhi Zofuzo Zesilwane Noma Ezinephutha?
Yiqiniso, iBhayibheli alichazi ngolimi olungokwesayensi ukuthi kwenzekani emizimbeni ephelele ka-Adamu no-Eva lapho bona. IBhayibheli aliyona incwadi yesayensi, njengoba nje nencwadi yeziqondiso yomnikazi wemoto ingeyona incwadi yobunjiniyela bezimoto. Kodwa njengencwadi yeziqondiso, iBhayibheli linembile; aliyona inganekwane.
Lapho u-Adamu no-Eva beqa uthango lomthetho kaNkulunkulu, imizimba yabo yonakala. Ngemva kwalokho, baqala ukuwohloka kwaze kwaba sekufeni. Ngenxa yofuzo, abantwana babo, umkhaya wesintu, bazuza ukungapheleli njengefa. Ngakho, nabo bayafa.—Jobe 14:4; IHubo 51:5; Roma 5:12.
Ngokudabukisayo, ifa lethu lihlanganisa nokuthambekela esonweni, esibonakala ngobugovu nokuziphatha okubi. Yiqiniso, ubulili bufanelekile endaweni yabo. UNkulunkulu wayala umbhangqwana wokuqala ongabantu: “Zalani, nande, nigcwalise umhlaba.” (Genesise 1:28) Futhi njengoMdali onothando, wenza ukugcwalisa lowo myalo kwaba yinjabulo endodeni nomkayo. (IzAga 5:18) Kodwa ukungapheleli kwabantu kuye kwaholela ekusetshenzisweni kabi kobulili. Eqinisweni, ukungapheleli kuthonya zonke izici zokuphila kwethu, kuhlanganise nokusebenza kwengqondo nomzimba wethu, njengoba sonke siqaphela.
Kodwa ukungapheleli akukawubulali umuzwa wethu wokuziphatha okufanele. Uma sifuna ngempela, singathatha “izintambo” futhi sigweme izihibe zokuphila ngokulwa nokuthambekela kokuphambukela esonweni. Yiqiniso, akekho umuntu ongaphelele ongalwa nesono ngendlela ephumelela ngokuphelele, futhi uNkulunkulu uyakubonelela lokhu.—IHubo 103:14; Roma 7:21-23.
Okwenza Singakufuni Ukufa
IBhayibheli licacisa nenye indida ukuziphendukela kwemvelo okungayichazi ngokwanelisayo: ukungakwamukeli kwabantu ukufa, ngisho nakuba ukufa kungase kubonakale kungokwemvelo futhi kungenakugwenywa.
Njengoba iBhayibheli lembula, ukufa kwabangelwa yisono, ngokungalaleli uNkulunkulu. Ukube abazali bethu bokuqala bahlala bethembekile, babeyophila phakade, kanye nabantwana babo. Eqinisweni, uNkulunkulu wayefake engqondweni yomuntu isifiso sokuphila okuphakade. “Ufaké nobuphakade ezinhliziyweni zabantu,” kusho umShumayeli 3:11, ngokwe-New International Version. Ngakho-ke, ukuqalekiswa kwabo ngokufa kwabangela impi yemizwelo kubantu, ukungqubuzana kwemizwa okungapheli.
Ukuze banqande le mpi engokomzwelo futhi banelise ukulangazela okungokwemvelo kokuqhubeka bephila, abantu baye baqamba izimfundiso ezihlukahlukene, kusukela emfundisweni yokungafi komphefumulo kuya enkolelweni yokuphindukuzalwa. Ososayensi bahlola imfihlakalo yokuguga ngoba nabo bafuna ukususa ukufa noma okungenani bakuhlehlise. Izazi zokuziphendukela kwemvelo ezingakholelwa ebukhoneni bukaNkulunkulu zithi isifiso sokuphila phakade siyisu noma icebo lokukhohlisa lokuziphendukela kwemvelo, ngoba singqubuzana nombono wabo wokuthi abantu bamane nje bayizilwane ezingcono. Ngakolunye uhlangothi, amazwi eBhayibheli athi ukufa kuyisitha avumelana nesifiso sethu esingokwemvelo sokuphila.—1 Korinte 15:26.
Khona-ke, ingabe zikhona izimpawu ezisemizimbeni yethu ezibonisa ukuthi sasidalelwe ukuphila phakade? Impendulo inguyebo! Ubuchopho bomuntu bubodwa businikeza ubufakazi obuqand’ikhanda bokuthi sasidalelwe ukuphila isikhathi eside kunaleso esisiphilayo.
Sadalelwa Ukuphila Phakade
Ubuchopho bunesisindo esingamakhilogremu angaba ngu-1,4, futhi bunamangqamuzana ayizigidi eziyizinkulungwane eziyishumi kuya kwayizigidi eziyizinkulungwane eziyikhulu, okuthiwa awekho ngisho namabili kuwo afana nsé. Ingqamuzana ngalinye lingaxhumana namanye angafinyelela kwangu-200 000, okwenza libe likhulu inani lezimiso noma imizila yobuchopho ehlukahlukene. Ngaphezu kwalokho, “ingqamuzana ngalinye liyi-computer eyinkimbinkimbi,” kusho i-Scientific American.
Ubuchopho buzungezwe amakhemikhali athonya indlela amangqamuzana asebenza ngayo. Futhi buyinkimbinkimbi kakhulu ngisho kunane-computer enamandla kunawo wonke. UTony Buzan noTerence Dixon bayabhala: “Ikhanda ngalinye linesikhungo esimangalisayo, isitho esincane, esinekhono elibonakala lingenamkhawulo njengoba siqhubeka sifunda ngaso.” Becaphuna uProfesa Pyotr Anokhin, bayanezela: “Akukabi bikho muntu ongasebenzisa wonke amandla obuchopho bakhe. Yingakho singakwamukeli noma yikuphi ukulinganiselwa okuthiya ikhono lobuchopho bomuntu. Abunakulinganiselwa.”
La maqiniso amangalisayo aphambene nemfundiso yokuziphendukela kwemvelo. Kungani ukuziphendukela kwemvelo “kwakungadalela” abantu abavamile abahlala emigedeni, noma ngisho nabantu banamuhla abayizifundiswa, isitho esinamandla okusebenza izikhathi zokuphila eziyisigidi noma ngisho eziyizigidi eziyinkulungwane? Ngempela, ukuphila okuphakade kuphela okunengqondo! Kodwa kuthiwani ngomzimba wethu?
Incwadi ethi Repair and Renewal—Journey Through the Mind and Body ithi: “Indlela amathambo, izicubu nezitho ezilimele okuphola ngayo iyisimangaliso ngempela. Futhi uma sicabanga ngakho, besiyoqaphela ukuthi ukuvuselelwa buthule kwesikhumba nezinwele nezinzipho—kanye nezinye izingxenye zomzimba—kuyakhexisa ngempela: Kwenzeka usuku lonke, ngokunganqamuki, kusivuselela ngokoqobo ngokuphindaphindiwe phakathi nesikhathi sokuphila kwethu.”
Ngesikhathi sikaNkulunkulu esifanele, ngeke abe nenkinga yokwenza le nqubo emangalisayo yokuzivuselela iqhubeke phakade. Khona-ke, ekugcineni, “ukufa [kuyokwenziwa] ize.” (1 Korinte 15:26) Kodwa ukuze sijabule ngempela, sidinga okungaphezu kokuphila okuphakade. Sidinga ukuthula—ukuthula noNkulunkulu kanye nabantu esiphila nabo. Ukuthula okunjalo kungaba khona kuphela uma abantu bethandana ngempela.
Izwe Elisha Elisekelwe Othandweni
“UNkulunkulu uluthando,” kusho eyoku-1 Johane 4:8. Uthando lunamandla—ikakhulukazi uthando lukaJehova uNkulunkulu—kangangokuba luyisizathu esiyinhloko esenza sibe nethemba lokuphila phakade. UJohane 3:16 uthi: “UNkulunkulu walithanda izwe kakhulu kangangokuba waze wanikela ngeNdodana yakhe ezelwe yodwa, ukuze wonke umuntu obonisa ukholo kuyo angabhujiswa kodwa abe nokuphila okumi phakade.”
Ukuphila okumi phakade! Yeka ithemba elimangalisayo! Kodwa njengoba sizuze isono njengefa, asinalo ilungelo lokuphila. IBhayibheli lithi: “Inkokhelo isono esiyikhokhayo iwukufa.” (Roma 6:23) Nokho, ngokujabulisayo uthando lwashukumisa iNdodana kaNkulunkulu, uJesu Kristu, ukuba isifele. Umphostoli uJohane wabhala ngoJesu: “Lowo wanikela umphefumulo wakhe ngenxa yethu.” (1 Johane 3:16) Yebo, wanikela ngokuphila kwakhe kobuntu okuphelele ‘njengesihlengo esenana abaningi’ ukuze thina esibonisa ukholo kuye sithethelelwe izono zethu futhi sijabulele ukuphila okumi phakade. (Mathewu 20:28) IBhayibheli liyachaza: “UNkulunkulu wathumela iNdodana yakhe ezelwe yodwa ezweni ukuze sizuze ukuphila ngayo.”—1 Johane 4:9.
Khona-ke, kufanele sisabele kanjani othandweni uNkulunkulu neNdodana yakhe abasibonise lona? IBhayibheli liyaqhubeka: “Bathandekayo, uma kuyilendlela uNkulunkulu asithanda ngayo, khona-ke nathi ngokwethu singaphansi kwesibopho sokuthandana.” (1 Johane 4:11) Kumelwe sifunde ukuthanda, ngoba leyo mfanelo iyoba isisekelo sezwe elisha likaNkulunkulu. Namuhla abaningi bayakuqaphela ukubaluleka kothando, njengoba lugcizelelwa uJehova uNkulunkulu eZwini lakhe, iBhayibheli.
Incwadi ethi Love and Its Place in Nature yaphawula ukuthi ngaphandle kothando “abantwana bavame ukufa.” Nokho, leso sidingo sothando asipheli lapho abantu sebekhulile. Isazi esaziwayo semvelaphi yabantu saphawula ukuthi uthando “luwumgogodla wazo zonke izidingo zabantu njengoba nelanga lisenkabeni yesimiso sethu sonozungezilanga . . . Umntwana ongaluboniswanga uthando uhluke kakhulu ngokwakheka nangokwengqondo kulowo oye waboniswa uthando. Ongaluboniswa uthando ukhula ngisho nangendlela ehlukile kunoluboniswayo.”
Ungacabanga yini ukuthi ukuphila kuyoba njani lapho bonke emhlabeni bethandana ngempela? Phela, abantu ngeke besaba nobandlululo ngoba umuntu engowohlanga oluhlukile, eyilungu lesinye isizwe, noma ngoba ibala lesikhumba sakhe lingafani nelabo! Ngaphansi kokuqondisa kweNkosi emiswe uNkulunkulu, uJesu Kristu, umhlaba uyogcwala ukuthula nothando, lapho kugcwaliseka ihubo leBhayibheli eliphefumulelwe:
“Nkulunkulu, nika inkosi izahlulelo zakho . . . Izakubahlulela abahluphekileyo kubantu, isindise abantwana babampofu, imphohloze onokhahlo. . . . Ezinsukwini zayo olungileyo uyakuqhakaza, kuvame ukuthula, ize ingabikho inyanga. Iyakubusa kusukela elwandle kuze kube-selwandle, kusukela emfuleni kuze kube-semikhawulweni yomhlaba. Ngokuba iyakukhulula ompofu ozikhalela kuyo, nohluphekayo ongenamsizi. Iyakuhawukela odangeleyo nompofu; iyakusindisa imiphefumulo yabampofu.”—IHubo 72:1, 4, 7, 8, 12, 13.
Ababi ngeke bavunyelwe ukuba baphile ezweni elisha likaNkulunkulu, njengoba kuthenjiswa kwelinye ihubo leBhayibheli: “Ababi bazakuchithwa, kepha abalindela uJehova bazakudla ifa lomhlaba. Kusengumzuzwana, omubi angabe esabakho; kuyakuthi lapho uhlola indawo yakhe, uyakube engasekho. Kepha abathobekileyo bazakulidla ifa lomhlaba, bathokoze ngokuthula okukhulu.”—IHubo 37:9-11.
Khona-ke, izingqondo nemizimba yabo bonke abantu abalalelayo, kuhlanganise nalabo abavuswe ethuneni ngovuko lwabafileyo, kuyobe sekuphulukisiwe. Ekugcineni, bonke abaphilayo bayoba umfanekiso kaNkulunkulu ngokuphelele. Ekugcineni umshikashika onzima wokwenza okulungile uyobe usuphelile. Ukungqubuzana kokulangazelela kwethu ukuphila kanye nesimo esinzima sokubhekana nokufa nakho kuyobe sekuphelile! Yebo, lesi isithembiso esiqinisekile sikaNkulunkulu wethu onothando: “Ukufa ngeke kusaba khona.”—IsAmbulo 21:4; IzEnzo 24:15.
Ngakho-ke, kwangathi ungelokothe udikibale empini yokwenza okulungile. Lalela umyalo waphezulu: “Yilwa ukulwa okuhle kokholo, bambisisa ukuphila okuphakade.” Lokho kuphila ezweni elisha likaNkulunkulu yilokho iBhayibheli elikubiza ngokuthi “ukuphila kwangempela.”—1 Thimothewu 6:12, 19.
Kwangathi ungaqaphela iqiniso elivezwa eBhayibhelini: “UJehova unguNkulunkulu; nguye osenzileyo, akuthina.” Ukuqaphela lelo qiniso kuyisinyathelo esibalulekile sokufanelekela ukuphila ezweni elisha likaJehova lothando nokulunga.—IHubo 100:3; 2 Petru 3:13.
[Amazwi acashunwe esihlokweni ekhasini 11]
Ukuphila ezweni elisha likaNkulunkulu yilokho iBhayibheli elikubiza ngokuthi “ukuphila kwangempela.”—1 Thimothewu 6:19
[Isithombe ekhasini 9]
Abantu baye beqa uthango lwemithetho kaNkulunkulu, okulethe imiphumela eyinhlekelele
[Isithombe ekhasini 10]
Ngaphansi kokubusa kukaNkulunkulu, isintu siyojabulela izwe elisha lokuthula