Ubufakazi—Bokholo Lwabo

NGONYAKA ka-1995 kwakugujwa iminyaka engu-50 yokukhululwa kwamakamu okuhlushwa amaNazi. Kulo lonke elaseYurophu, izisulu zamaNazi zakhumbula lesi senzakalo ngemibuthano emikhulu okwaba khona kuyo abaholi bakaHulumeni e-Auschwitz, eBergen-Belsen, eBuchenwald, eDachau, eRavensbrück, eSachsenhausen, nakwamanye amakamu. Umcabango owawugcizelelwa ngokuphindaphindiwe wawungukuthi, “Kwangathi singekhohlwe!”

Ngenxa yalesi sizathu oFakazi BakaJehova benza imibukiso eYurophu phakathi nonyaka wokugubha lesi senzakalo. Iningi lalaboFakazi lalivalelwe uhulumeni kaHitler ngenxa yokwenqaba ukumshayela indesheni nokusekela imizamo yempi. Kusukela ngo-1933 kuqhubeke, izinkulungwane zabo zaboshwa, futhi eziningi zafa ngenxa yempatho ezayithola.

Nokho, ngokuvamile umphakathi awukwazi okuhlangenwe nakho kwabo. Lokhu kuye kwaveza amazwi athi “izisulu zomlando ezilibalekile.” Iqembu loFakazi elasinda lazwakalisa isifiso sokulondoloza inkumbulo yemikhaya yalo nabangane abashushiswa, baboshwa, bahlukunyezwa, noma babulawa nokuveza ubufakazi bokholo nesibindi obashiywa yilama-Bibelforscher, igama oFakazi BakaJehova ababebizwa ngalo emakamu okuhlushwa.

Ngo-September 29, 1994, i-United States Holocaust Memorial Museum, eseWashington, D.C., yaba nomhlangano ophathelene noFakazi BakaJehova emakamu okuhlushwa. Abasinda emakamu baba nemibuthano yesikhumbuzo emibili emikhulu eFrance, eStrasbourg ngo-March 28, 1995, naseParis ngo-March 30. Kwakuthinta inhliziyo ngempela ukuzwa lamaxhegu nezalukazi, asathembekile kuNkulunkulu ngemva kweminyaka engu-50, elandisa okuhlangenwe nakho kwawo. Ngo-April 27, kwaba nomhlangano ofanayo eduze naseBerlin, eBrandenburg, eJalimane, lapho oFakazi abaningi babulawa khona ngokunqunywa ikhanda. Ngakusasa, idlanzana labasinda laba khona emikhosini eyahlelwa isiFundazwe saseBrandenburg futhi lavakashela amakamu ahlukahlukene.

Umbukiso WaseFrance

Kulemihlangano, kwethulwa umbukiso onesihloko esithi “Mémoire de Témoins” (Ubufakazi BoFakazi). Kusukela ngo-May 1995 kuya ku-April 1996, lombukiso wahambela amadolobha angu-42 eFrance namadolobha ahlukahlukene eBelgium nasengxenyeni yeSwitzerland ekhuluma isiFulentshi. Ngaphezu kwalokho, amadoda nabesifazane abakulombukiso bangoFakazi BakaJehova uNkulunkulu. Kodwa futhi bangofakazi bokuhlupheka bona nabanye abakukhuthazelela emakamu okuhlushwa. Bangofakazi bokuzibonela bobandlululo olwabangela ukuhlupheka nokufa kwezigidi zabantu ngenxa yohlanga noma inkolo yabo. Ngaphezu kwalokho, ubufakazi obavezwa oFakazi budalula indlela labo abazisholo ukuthi bangamaKristu abakhetha ngayo uHitler owayezenza umesiya, kunoJesu Kristu; bakhetha ukuzonda umakhelwane kunokuba bamthande; bakhetha ubudlova kunokuba bakhethe ukuthula.

Lombukiso wawunamabhodi angaba ngu-70, aqala ngohlu lokulandelana kwezenzakalo—ukuvulwa kwamakamu eDachau nase-Oranienburg, ngo-March 1933; iMithetho YaseNuremberg “evikela uhlanga lwamaJalimane,” ngo-September 1935; i-Anschluss, noma ukuthathwa kwe-Austria iJalimane, ngo-March 1938; i-Kristallnacht (Ubusuku Obucwathile), ngo-November wangalowo nyaka, lapho kwaphangwa izinkulungwane zezitolo zamaJuda, kwaboshwa futhi kwadingiswa abantu abangaphezu kuka-30 000; ukuvinjelwa okuqhubekayo koFakazi BakaJehova; ukuhlaselwa kweSoviet Union, ngo-June 1941; nokugoduswa kwabagula ngengqondo, kusukela ngo-1939 kuya ku-1941.

Amabhodi ambalwa ayeqokomisa ukufundiswa kwentsha kuyi-Hitler Youth nogqozi imibuthano emikhulu yamaNazi eNuremberg eyayilunikeza izixuku. Izithombe zazikhumbuza ngokwenqaba koFakazi BakaJehova ukusekela ngobuqotho umbusi nokushaya indesheni kaHitler. Amanye amabhodi ayebonisa indlela oFakazi BakaJehova ababa ngayo izisulu ngenxa yokukhohliswa kwabanye nendlela abasakaza ngayo omagazini namapheshana adalula unya lwamaNazi kusukela ngo-1935.

Okuhlangenwe Nakho Komuntu Siqu

Amabhodi angaba ngu-40 ayelandisa okuhlangenwe nakho kwamadoda nabesifazane abavamile bakulo lonke elaseYurophu abashushiwa futhi baze babulawa ngenxa yokholo lwabo. Abasinda basekela lombukiso ngokuba khona, futhi izivakashi zabalalelisisa. Izingane zalalela ngokucophelela njengoba uLouis Arzt elandisa indaba yakhe. Njengoba ayedabuka eMulhouse eFrance, wathathwa kubazali bakhe wathunyelwa eJalimane ngenxa yokwenqaba ukuthi “Heil Hitler!” esikoleni. “Isosha lama-SS langishaya ngenxa yokwenqaba ukushayela uHitler indesheni. Langishaya imivimbo engu-30. Ezinsukwini ezimbili kamuva langigaxa ehlombe ngengalo futhi lazama ukunginxenxa. ‘Cabanga ngonyoko. Angajabula kakhulu uma engakubona. Okudingeka ukwenze nje ukuthi “Heil Hitler!” futhi ungangena esitimeleni uhambe.’ Kwakunzima enganeni eneminyaka engu-12 ubudala,” enezela. Abaningi kwabathinta okuhlangenwe nakho kukaJoseph Hisiger owayeboleka iBhayibheli lomProthestani ayevalelwe naye ngokuba amnikeze isinkwa sakhe sesonto lonke.

Izingxoxo ezithwetshulwe nge-video zababedingisiwe zazingesinye isici salombukiso. Ezinye izingxoxo zenzelwa khona kanye emakamu—ngokwesibonelo, e-Ebensee e-Austria naseBuchenwald naseSachsenhausen eJalimane. Ezinye izingxoxo zaziveza izici ezihlukahlukene zokuphila kwasekamu noma okukhunjulwa oFakazi abadingiswa beseyizingane.

Ukuvulwa Kombukiso

Umbukiso ngamunye wawuvulwa ngomkhosi omfushane, lapho ummeleli wababedingisiwe ayechaza khona ukuqina koFakazi BakaJehova ngokomoya ekumelaneni nobuNazi. Ababedingisiwe abangebona oFakazi kanye nedlanzana lezazi-mlando nezikhulu, kuhlanganise nowayeyisikhulu sikahulumeni waseFrance, nabo bavuma ukusho amazwi ambalwa.

Owayedingisiwe owayazi oFakazi BakaJehova eBuchenwald wathi ngabo: “Alikho elinye iqembu engilaziyo labadingiswa, ngaphandle kwamaJuda, elaphathwa kabi njengabo: babeshaywa, belulazwa, bethukwa, benikezwa imisebenzi enyanyeka ngempela. Ngaphandle kokholo lwabo, babengeke bamelane nakho. Ngiyabahlonipha futhi ngibancoma kakhulu.”

Ukusabela

Abantu abangaphezu kuka-100 000 baya kulombukiso. Kwezinye izindawo abantu abangamakhulu, phakathi kwabo kukhona nentsha eningi, babeshaya uhele beya ehholo lombukiso. Izivakashi eziningi zazwakalisa imizwa yazo ngamazwi ambalwa encwadini yezivakashi. Ngokwesibonelo, omunye osemusha wabhala: “Igama lami nginguSabrina. Ngineminyaka eyishumi ubudala futhi ngingathanda ukuba nesibindi njengoRuth ukuze ngithokozise uJehova.”a

Imithombo yezindaba nayo yakhuluma ngalombukiso. Ngokuvamile, edolobheni ngalinye kwakuba nesihloko esisodwa noma ezimbili ephephandabeni lendawo. Ngaphezu kwalokho, iziteshi zomsakazo zendawo zazivame ukumemezela lombukiso futhi zisakaze izinhlelo okwakuxoxwa kuzo nababedingisiwe. Isiteshi sethelevishini sendawo senza imibiko emifushane. Omunye umbiko wezindaba kuthelevishini wachaza lombukiso ngokuthi “indaba ecacile kodwa edabukisayo ehlola umnyombo wobubi obusabekayo. ‘Ubufakazi BoFakazi’ obunikeza isithunzi esingasoze sasuswa.”

Kwabasinda, ukugujwa kweminyaka engu-50 yokukhululwa kuyogxila ezingqondweni zabo isikhathi eside. Nakuba kwakungemnandi ukuthunuka amanxeba, ngokuhlanganyela lezi zinkumbulo nabanye nangokuziveza, laboFakazi bakwazi ukuqinisa ukholo lwabanye. Bakubheka njengelungelo ukuhlanganyela kulombukiso nokuqeda olunye lobandlululo nokungazi okusasele ngemva kweminyaka engu-50. Okubaluleke ngaphezu kwakho konke, bazuza ukwaneliseka ngokwazi ukuthi ubufakazi babo buletha udumo kuNkulunkulu wabo, uJehova, futhi buqinisekisa ukuthi abanye abasoze bakukhohlwa lokho abakukhuthazelela njengoFakazi bakhe.

[Umbhalo waphansi]

[Isithombe ekhasini 16]

Izihloko ze-“Golden Age” zalulahla unya lobuNazi

[Isithombe ekhasini 16]

Amabhodi angaba ngu-70 alandisa ngokushushisa kwamaNazi amadoda, abesifazane, nabantwana abenqaba ukuphika ukholo lwabo

[Isithombe ekhasini 16, 17]

Abanye boFakazi BakaJehova ababedingisiwe futhi bavalelwa uhulumeni kaHitler balandisa indaba yabo