Ukubuswa Ukholo KuNkulunkulu Ezweni LamaKhomanisi
NJENGOBA ILANDISWA U-ONDREJ KADLEC
PHAKATHI nehlobo lango-1966, ngangibukisa izivakashi idolobhana lakithi—iPrague, eCzechoslovakia. Ngishisekela ukholo lwami olusha, ngangikhuluma ngoNkulunkulu lapho ngibonisa leli qembu amasonto namathempeli akhangayo edolobha lakithi.
“Ingabe ungomunye woFakazi BakaJehova?” kubuza uprofesa othile wezomnotho waseMelika.
“Cha,” ngiphendula. “Angikaze ngizwe ngoFakazi BakaJehova. NgingumRoma Katolika.”
Ukukholelwa KuNkulunkulu
Ngakhuliswa abazali ababevelele emikhakheni yezemfundo, ezombangazwe, nezokwelapha. Ngokushesha ngemva kokuzalwa kwami ngo-1944 nangemva kokuphela kweMpi Yezwe II ngonyaka olandelayo, ubaba waba iKhomanisi. Eqinisweni, wayengomunye wabasunguli benhlangano yamaKhomanisi elwela izinguquko, futhi ngo-1966 waba ishansela lase-University of Economics yasePrague. Eminyakeni embalwa kamuva, wamiswa njengongqongqoshe wezemfundo waseCzechoslovakia, ngaleso sikhathi okwakuyizwe lamaKhomanisi futhi elalingakholelwa ebukhoneni bukaNkulunkulu.
Umama wayengowesifazane oqotho, onesiphiwo. Wayengudokotela ohlinza amehlo, owayaziwa njengodokotela ophambili ezweni. Nokho, wayebelapha mahhala abantu abaswele. Wayevame ukuthi: “Kungakhathaliseki ukuthi umuntu unaziphi iziphiwo, kumelwe zisetshenziselwe inzuzo yomphakathi nesizwe.” Akazange athathe ngisho neholide lapho ngizalwa ukuze abe khona emtholampilo wakhe.
Kwakulindeleke ukuba ngikhaliphe kakhulu esikoleni. Ubaba wayebuza: “Ingabe ukhona ohlakaniphe ngaphezu kwakho?” Ngase ngikujabulela lokhu kuncintisana, njengoba ngangivame ukuthola imiklomelo yokubaqwaqwada emakhanda esikoleni. Ngafunda isiRussia, isiNgisi, nesiJalimane futhi ngangivakashela kakhulu emazweni amaKhomanisi nakwamanye. Ngangikujabulela ukuphikisa imiqondo engokwenkolo ngokuthi iyizinkolelo-ze zobuwula. Futhi nakuba ngakwamukela ngokugcwele ukungakholelwa ebukhoneni bukaNkulunkulu, ngangikwenyanya ukusetshenziswa kwako kwezombangazwe.
Uhambo lokuya eNgilandi ngo-1965, lapho ngineminyaka engu-21 kuphela, lwaba nethonya elikhulu kimi. Ngahlangana nabantu ababevikela ukukholelwa kwabo kuMuntu Ophakeme ngokuqiniseka nangobuhlakani. Ngemva kokubuyela ePrague, othile engimjwayele owayengumRoma Katolika wasikisela: “Ungafundi ngobuKristu. Funda iBhayibheli.” Yilokho engakwenza. Kwangithatha izinyanga ezintathu ukuba ngiliqede.
Okwangihlaba umxhwele indlela abalobi beBhayibheli ababebeka ngayo izigijimi zabo. Babengagunci futhi babewaveza amaphutha abo. Ngakholelwa ukuthi ikusasa elihle ababekhuluma ngalo kwakungokuthile okungacatshangwa futhi kulungiselelwe kuphela uNkulunkulu ongumuntu.
Ngemva kwezinyanga eziningi ngifunda iBhayibheli ngasese futhi ngizindla ngalo, ngazizwa ngikulungele ukubhekana nobaba nabangane bami. Ngangazi ukuthi babeyolubekela inselele ukholo lwami olusha. Ngemva kwalokho, ngaba umshumayeli oshisekayo. Noma ubani enganginaye—njengalowo profesa waseMelika okukhulunywe ngaye ekuqaleni—kwakumelwe ngimshumayeze. Ngalengisa ngisho nesiphambano odongeni ngenhla kombhede wami ukuze wonke umuntu aqaphele ukholo lwami.
Nokho, umama waphika ukuthi ngingumKristu, njengoba ngangifana nsé nobaba, iKhomanisi elishisekayo. Nokho, ngaphikelela. Ngafunda iBhayibheli okwesibili nokwesithathu. Ngaleso sikhathi ngaqaphela ukuthi ukuze ngithuthuke, ngangidinga isiqondiso.
Ukufuna Kwami Kuyavuzwa
Ngaxhumana neSonto LamaRoma Katolika. Okuwukuphela kwento eyayikhathalelwa umpristi oseyinsizwa kwakuwukungifundisa izimfundiso zesonto, engazamukela ngokugcwele. Khona-ke, ngo-1966—okwahlazisa ubaba—ngabhapathizwa. Ngemva kokungifafaza ngamanzi, lompristi wasikisela ukuba ngifunde iBhayibheli, kodwa wanezela: “Upapa useyamukele kakade inkolelo-mbono yokuziphendukela kwemvelo, ngakho ungakhathazeki; sizozishaya indiva izingxenye ezingasebenzi.” Ngashaqeka lapho ngithola ukuthi incwadi eyayingenze ngaba nokholo yayingatshazwa.
Phakathi naleso sikhathi, ekwindla ngo-1966, ngakhuluma nomngane wami othile ozalwa emkhayeni wamaKatolika futhi ngahlanganyela naye izinkolelo zami. Naye wayejwayelene neBhayibheli, futhi wakhuluma nami nge-Armagedoni. (IsAmbulo 16:16) Wathi wayexhumana noFakazi BakaJehova, engangiqale ukuzwa ngabo ezinyangeni ezimbalwa ngaphambili lapho ngangibukisa iqembu lezivakashi okukhulunywe ngalo ekuqaleni. Nokho, elakhe iqembu ngangilibheka njengelingelutho uma liqhathaniswa nelami elinamandla, elinothile, futhi elinabantu abaningi okuyiSonto LamaRoma Katolika.
Phakathi nezinye izingxoxo, sahlola izimpikiswano ezintathu ezibalulekile. Eyokuqala, Ingabe iSonto LamaRoma Katolika liyindlalifa yobuKristu bekhulu lokuqala? Eyesibili, Yikuphi okufanele kubhekwe njengegunya elinamandla—isonto lami noma iBhayibheli? Futhi eyesithathu, Yikuphi okuyiqiniso, ukulandisa kweBhayibheli ngokudala noma inkolelo-mbono yokuziphendukela kwemvelo?
Njengoba iBhayibheli laliwumthombo wokholo lwethu sobabili, umngane wami akazange abe nobunzima ekungiboniseni ukuthi izimfundiso zeSonto LamaKatolika zihluke kakhulu kulezo zobuKristu bokuqala. Ngokwesibonelo, ngafunda ukuthi ngisho nemithombo yamaKatolika iyavuma ukuthi imfundiso evelele yesonto kaZiqu-zintathu ayisekelwe ezimfundisweni zikaJesu Kristu nabaphostoli bakhe.
Lokhu kwasiletha embuzweni ohlobene nalendaba wokuthi yikuphi okufanele kube igunya lethu elinamandla. Ngabhekisela emazwini kaSt. Augustine athi: “Roma locuta est; causa finita est,” okuwukuthi, “IRoma isikhulumile; indaba isinqunyiwe.” Kodwa umngane wami wathi iZwi likaNkulunkulu, iBhayibheli, kufanele libe igunya lethu eliphakeme. Kwadingeka ngivumelane namazwi omphostoli uPawulu: “UNkulunkulu makatholakale eqinisile, nakuba wonke umuntu engatholakala engumqambimanga.”—Roma 3:4.
Ekugcineni, umngane wami wanginikeza incwajana egugile eyayibhalwe ngomshini, eyayinesihloko esithi Evolution Versus the New World. Ngenxa yokuthi oFakazi BakaJehova babevinjelwe eCzechoslovakia ngasekupheleni kwawo-1940, babenza amakhophi ezincwadi zabo bese beqapha ukuthi ubani owatholayo. Ngemva kokufunda lencwajana, ngaqonda ukuthi yayiqukethe iqiniso. Umngane wami waqala ukungiqhubela isifundo seBhayibheli. Wayengiboleka amakhasi ambalwa ngesikhathi ensiza-kufundisa yeBhayibheli ethi “UNkulunkulu Makabe Oneqiniso,” futhi sasixoxa ngalamakhasi ndawonye.
Ngokushesha ngemva kokuqala lezi zingxoxo—phakathi nenkathi kaKhisimusi ngo-1966—abangane bami baseNtshonalanga Jalimane beza ePrague bezongivakashela. Kwenye yezingxoxo zethu, baklolodela amaKristu ngokuba abazenzisi abakhuthaza impi. Bathi: “Njengamasosha amazwe e-NATO, sasingalwa nawe njengomKristu wokuzisholo ohlala ezweni le-Communist Warsaw Pact.” Isiphetho sabo sasiwukuthi: “Kungcono ukungathembi muntu kunokuba umzenzisi.” Ngaba nomuzwa wokuthi mhlawumbe babeqinisile. Ngakho esifundweni sami seBhayibheli esalandela, ngabuza umngane wami indlela amaKristu eqiniso abhekana ngayo nempi nokuyiqeqeshelwa.
Izinqumo Engabhekana Nazo
Yangibambisa ongezansi impendulo ecacile yomngane wami. Nokho, ukuvumelana nemfundiso yeBhayibheli ‘yokukhanda izinkemba zibe ngamakhuba’ kwakuyokushintsha ngokuphawulekayo ukuphila kwami nomsebenzi engangiwuhlosile. (Isaya 2:4) Ezinyangeni ezinhlanu ngangizophothula eyunivesithi yezokwelapha, futhi kamuva kudingeke ngisebenze isikhathi esithile ngokuyisibopho embuthweni wezempi. Kwakufanele ngenzenjani? Ngangixakekile. Ngakho ngathandaza kuNkulunkulu.
Ngemva kokuzindla ngokujulile izinsuku eziningi, angitholanga zaba zokungavumelani nemfuneko yamaKristu eqiniso yokuba abe abantu bokuthula. Ngemva kokuphothula eyunivesithi, nganquma ukuthi ngiyosebenza esibhedlela kuze kube yilapho ngigwetshwa ngenxa yezizathu zikanembeza. Kodwa-ke ngafunda lokho okushiwo iBhayibheli ngokudeda egazini. Ngiqaphela ukuthi umsebenzi wami wawungase ungihilele ekumpompeleni igazi, nganquma ukuyeka ukusebenza esibhedlela. (IzEnzo 15:19, 20, 28, 29) Lesi sinqumo saphumela ekubeni ngibe nedumela elibi kakhulu emphakathini.
Ubaba, ngemva kokuqiniseka ukuthi ngangingeyena umphehli wodweshu wangamabomu owayefuna ukonakalisa umsebenzi wakhe wezombangazwe, wangenela futhi wahlehlisa ukubuthwa kwami okuyisibopho ngonyaka. Lelo hlobo lango-1967 lalinzima kimi. Cabangela isimo sami: Ngangingumfundi weBhayibheli osemusha kanti umuntu owayengifundela, okuwukuphela kukaFakazi engangimazi ngaleso sikhathi, wayeseholidini lasehlobo. Futhi wayeshiye izahluko ezimbalwa kuphela zencwadi ethi “UNkulunkulu Makabe Oneqiniso” ukuze ngizifundele zona. Lezi zahluko neBhayibheli lami kwakuwukuphela kwemithombo yesiqondiso sami esingokomoya.
Kamuva, ngajwayelana nabanye oFakazi, futhi ngo-March 8, 1968, ngabonakalisa ukuzinikezela kwami kuJehova uNkulunkulu ngobhapathizo lwamanzi. Ngonyaka olandelayo nganikezwa ithuba lokwenza izifundo zeminyaka emibili zangemva kokuphothula e-University of Oxford eNgilandi. Abanye basikisela ukuba ngithathe leli thuba ngiye eNgilandi lapho ngangizothuthuka kahle khona ngokomoya ezweni oFakazi ababengavinjelwe kulo. Ngesikhathi esifanayo, ngangizofundela umsebenzi omuhle wezobuchwepheshe. Kodwa, umdala othile ongumKristu wathi ngangingadingeki kakhulu eNgilandi njengoba ngangidingeka eCzechoslovakia. Ngakho nganquma ukungalithathi lelo thuba lokuqhuba imfundo yami yezwe, futhi ngahlala eCzechoslovakia ukuze ngisize emsebenzini wethu wokushumayela ngomshoshaphansi.
Ngo-1969, ngamenyelwa eSikoleni Sokuqeqeshela Inkonzo esasinikeza imfundo ekhethekile yababonisi abangamaKristu. Ngalowo nyaka ngazuza umfundaze njengesazi esingumuntu osemusha esiphambili sesayensi yokuthakwa kwemithi eCzechoslovakia. Ngenxa yalokho, ngaya emhlanganweni we-International Union of Pharmacology eSwitzerland.
Usosayensi Ushintsha Imibono Yakhe
Phakathi nezifundo engaya kuzo ngo-1970, usosayensi okuthiwa uFrantis̆ek Vyskočil wachaza indaba eyinkimbinkimbi yokusebenza kwezinzwa. Wathi noma yinini lapho kuphakama isidingo esidalweni, kwakuvela ikhambi eliyisimangaliso. Waphetha: “Imvelo, uMenzi Wezimangaliso, iyakwazi ukwenza lokhu.”
Ngemva kwalezi zifundo ngaya kuye. Ngabuza: “Awucabangi yini ukuthi udumo lokuklanywa okuphakeme kwezinto eziphilayo kufanele luye kuNkulunkulu?” Umbuzo wami wammangalisa, njengoba ayengakholelwa ebukhoneni bukaNkulunkulu. Waphendula ngemibuzo engavamile. Wabuza: “Bavelaphi ububi?” futhi, “Ubani okumelwe asolwe ngokuthi izingane eziningi kangaka ziyizintandane?”
Lapho nginikeza izimpendulo ezinengqondo, ezisekelwe eBhayibhelini, waba nesithakazelo. Kodwa wabuza ukuthi kungani iBhayibheli linganikezi ukwaziswa okukhethekile okungokwesayensi, njengencazelo yokwakheka kwengqamuzana, ukuze abantu baqaphele kalula ukuthi umlobi walo unguMdali. “Yikuphi okunzima kakhulu,” ngiphendula, “ukuchaza noma ukudala?” Ngamboleka incwadi ethi Did Man Get Here by Evolution or by Creation?
Ngemva kokuyifunda ngokushwampuluza, uFrantis̆ek wathi intula ukwaziswa futhi inamaphutha. Wagxeka nalokho okushiwo iBhayibheli ngesithembu, ukuphinga kukaDavide, nokubulala kwakhe indoda engenacala. (Genesise 29:23-29; 2 Samuweli 11:1-25) Ngamphikisa, ngibonisa ukuthi iBhayibheli likubika ngobuqotho ukushiyeka ngisho nokwezinceku zikaNkulunkulu, kanye nokona kwazo ngokuqondile.
Ekugcineni, kwenye yezingxoxo zethu, ngatshela uFrantis̆ek ukuthi uma umuntu engenaso isisusa esihle, uma engalithandi iqiniso, alukho uhlobo lwengxoxo noma isizathu esingamgculisa ngobukhona bukaNkulunkulu. Lapho sengizohamba, wangimisa futhi wacela isifundo seBhayibheli. Wathi wayezophinde ayifunde incwadi ethi Did Man Get Here by Evolution or by Creation?—manje ngomqondo ovulekile. Kamuva, isimo sakhe sengqondo sashintsha ngokuphelele, njengoba kufakazelwa ingcaphuno elandelayo ayifaka kwenye yezincwadi zakhe: “Ukuzikhukhumeza kwabantu kuyakufoliswa, nokuziphakamisa kwamadoda kuyakuthotshiswa, kuphakame uJehova kuphela ngalolosuku.”—Isaya 2:17.
Ehlobo lango-1973, uFrantis̆ek nomkakhe babhapathizwa njengoFakazi BakaJehova. Njengamanje, ukhonza njengomdala kwelinye lamabandla asePrague.
Ukushumayela Ngaphansi Kokuvinjelwa
Phakathi nokuvinjelwa sayalwa ukuba siqhube inkonzo yethu yasensimini ngokuqapha. Ngesinye isikhathi, uFakazi osemusha wayelokhu engicela ukuba ngihlanganyele naye emsebenzini wokushumayela. Wayengabaza ukuthi labo abaholayo enhlanganweni yoFakazi BakaJehova bayaya ngempela yini nabo enkonzweni. Sajabulela izingxoxo ezimnandi eziningi enkonzweni yethu yokushumayela ngokwethukela. Kodwa ekugcineni sahlangana nendoda ethile, nakuba ngangingaqapheli ngaleso sikhathi, eyayingikhumbula ngoba ingibone ebhukwini lezithombe lamaphoyisa kahulumeni omshoshaphansi. Nakuba ngingaboshwanga, kusukela ngaleso sikhathi kuqhubeke ngangibhekwe ngeso elibukhali abomthetho okwakuphazamisa ukuphumelela kwami emsebenzini wethu wokushumayela ngomshoshaphansi.
Phakathi nehlobo lango-1983, njengoba kwakuwumkhuba wami eminyakeni engaphambili, ngahlanganisa iqembu loFakazi abasebasha ukuze sichithe izinsuku ezimbalwa sifakaza ngokwethukela engxenyeni esemajukujukwini yezwe. Ngenxa yokungalaleli iseluleko esihlakaniphile, ngashayela imoto yami ngoba kwakulula ukuhamba ngayo kunokusebenzisa izinto zomphakathi zokuthutha. Lapho sihlaba ikhefu ukuze sithenge izimpahla ezimbalwa esitolo, ngapaka imoto yami ngaphambili. Lapho ngikhokhela lezi zimpahla, ngabhekisela kwenye intsha eyizisebenzi zasesitolo futhi ngaphawula esisebenzini esesikhulile: “Esikhathini esizayo, sonke singaba basha.” Lentokazi yamomotheka. “Nokho, thina njengabantu asinakukwenza,” ngiqhubeka. “Kuyodingeka usizo lwaphezulu.”
Njengoba kungazange kube nampendulo, ngahamba. Ngingazi, lesi sisebenzi, sisola ukuthi ngangisakaza imibono engokwenkolo, sangilunguza ngefasitela njengoba ngifaka izimpahla emotweni. Sabe sesitshela amaphoyisa. Emahoreni athile kamuva, ngemva kokuhlanganyela ekufakazeni ngokwethukela kwezinye izingxenye zedolobhana, mina nengangisebenza naye saphindela emotweni. Ngokungazelele, kwafika amaphoyisa amabili asibopha.
Esiteshini samaphoyisa, saphenywa isikhathi eside ngaphambi kokuba sidedelwe. Into yokuqala engacabanga ngayo kwakuwukuthi ngizokwenzenjani ngamakheli abantu abathakazelayo esasiwathole ngalelo langa. Ngakho ngaya endlini yangasese ukuze ngiwamukise namanzi. Kodwa ngaphambi kokuba ngikwenze, ngavinjwa isandla esinamandla sephoyisa. Lawakhipha lamaphepha emanzini endlini yangasese lawasula. Lokhu kwangibangela ukucindezeleka ngokwengeziwe, njengoba abantu ababenginikeze amakheli abo base besengozini.
Kamuva, sonke sayiswa ehhotela esasifikele kulo, lapho amaphoyisa ayesephequlule khona ikamelo lethu. Kodwa ayengawatholanga amanye amakheli abantu abathakazelayo, nakuba ayengafihliwe ngokucophelela. Kamuva, emsebenzini lapho ngisebenza khona njengodokotela wokwelapha izinzwa, ngasolwa obala ngenxa yokuhileleka kwami emsebenzini ongekho emthethweni. Futhi, ngajeziswa umbonisi womsebenzi wokushumayela eCzechoslovakia, ngaphambili owayengixwayisile ukuba ngingasebenzisi imoto yami lapho siyohlanganyela enkonzweni.
Ukwamukela Ukuyalwa
Ngo-1976, ngangabelwe ekomitini eyengamela umsebenzi wokushumayela woFakazi BakaJehova eCzechoslovakia. Kodwa njengoba ukuphila kwami kwase kubhekwe ngeso elibukhali amaphoyisa omshoshaphansi ngenxa yokungasebenzisi ukuhluzeka kwengqondo ezimweni ezinjengalezo ezishiwo ekuqaleni, ngakhishwa ekukhonzeni ekomitini yalelizwe nakwamanye amalungelo ahlukahlukene. Elinye lalamalungelo engangiwazisa kakhulu kwakuwukufundisa esikoleni sababonisi abajikelezayo namaphayona, njengoba zibizwa kanjalo izikhonzi zesikhathi esigcwele.
Ngakwamukela ukuyalwa engakuthola, kodwa lenkathi yamaphakathi kuya ngasekupheleni kwawo-1980 kwakuyinkathi enzima yokuba ngizihlole. Ingabe ngangiyokufunda ukusebenza ngokuqonda kakhudlwana nokugwema ukungacopheleli? IHubo 30, ivesi 5, lithi: “Kusihlwa kungena ukukhala, ekuseni ukujabula.” Lolo suku lwafika ngokuwa kombuso wamaKhomanisi eCzechoslovakia ngo-November 1989.
Izibusiso Ezimangalisayo
Yeka ukuthi kwakuwushintsho kanjani ukuhlanganyela enkonzweni yethu ngokukhululekile nokujabulela ukuxhumana okukhululekile nendlunkulu yoFakazi BakaJehova eBrooklyn, eNew York! Ngokushesha ngabelwa njengombonisi ojikelezayo, futhi ngaqala lomsebenzi ngo-January 1990.
Khona-ke, ngo-1991, ngaba nelungelo lokuya eSikoleni Sokuqeqeshela Inkonzo eManchester, eNgilandi. Yeka ukuthi kwakuyisibusiso kanjani ukuchitha izinyanga ezimbili ngijabulela ubudlelwane nokufundiswa amadoda angamaKristu avuthiwe! Isikhathi esithile usuku ngalunye, thina bafundi sasabelwa umsebenzi, owawusiphumuza ezifundweni zethu ezishubile. Ngangabelwe ukuhlanza amafasitela.
Ngokushesha ngemva kokubuya eNgilandi, ngaqala ukusiza ekulungiseleleni umbuthano obalulekile woFakazi BakaJehova owawungo-August 9 kuya ku-11 eStrahov Stadium enkulu ePrague. Kuleso senzakalo abantu abangu-74 587 basemazweni amaningi bahlangana ngokukhululekile ukuze bakhulekele uNkulunkulu wethu, uJehova!
Ngonyaka olandelayo ngayeka ukusebenza njengodokotela wokwelapha izinzwa. Sekuyiminyaka engaba mine, ngisebenza ehhovisi ePrague, lapho ngikhonza khona futhi ekomitini eyengamele umsebenzi woFakazi BakaJehova eCzech Republic. Muva nje isakhiwo esisha esinezitezi eziyishumi, esanikelwa koFakazi BakaJehova, savuselelwa futhi sasetshenziswa njengehhovisi legatsha. Ngo-May 28, 1994, lesi sakhiwo esihle sanikezelwa enkonzweni kaJehova.
Phakathi kwezibusiso ezinkulu engiye ngazithola kuye kwaba ilungelo lokuhlanganyela amaqiniso eBhayibheli nabanye, kuhlanganise nezihlobo zami. Okwamanje, ubaba nomama abakabi oFakazi, kodwa sebeyawuthanda umsebenzi wami. Phakathi naleminyaka embalwa edlule, baye beza kweminye yemihlangano yethu. Ngiyethemba ukuthi nabo, kanye nezinye izigidi zabantu abanhliziyo ziqotho, bayozithoba ekubuseni koMbuso kaNkulunkulu futhi bajabulele izibusiso zaphakade uNkulunkulu azigcinele labo abakhetha ukumkhonza.
(Izincwadi okubhekiselwe kuzo kulesi sihloko zinyatheliswa yi-Watchtower Bible and Tract Society of New York, Inc.)
[Isithombe ekhasini 12]
Lapho ngifunda eyunivesithi
[Izithombe ekhasini 13]
Ubaba, owaba ungqongqoshe wezemfundo eCzechoslovakia, nomama, owayengudokotela ohlinza amehlo odumile
[Isithombe ekhasini 15]
UFrantis̆ek Vyskočil, usosayensi ongakholelwa ebukhoneni bukaNkulunkulu, owaba uFakazi
[Isithombe ekhasini 16, 17]
Kusukela ekuweni kobuKhomanisi, oFakazi BakaJehova baye baqhuba imihlangano emikhulu eminingi eMpumalanga Yurophu. Abangaphezu kuka-74 000 babekhona kulomhlangano ePrague ngo-1991
[Isithombe ekhasini 18]
Lapho ngangisebenza khona ngesikhathi ngiseSikoleni Sokuqeqeshela Inkonzo eNgilandi
[Isithombe ekhasini 18]
Isakhiwo sethu segatsha ePrague, esanikezelwa ngo-May 28, 1994