Abefundisi Bazama Ukufinyelela Intsha
“Izikhundla zabefundisi baseMcGill University . . . zathelekelwa iqembu lamaphanka anezinwele ezigcwele amafutha, namajakhethi esikhumba,” kubika i-Gazette yaseMontreal, eCanada. Nokho, “lamaphanka” ayengewona awohlobo oluvamile. Ayengabanye babefundisi—engabefundisi baseyunivesithi—futhi eyingxenye yalokho leliphepha elakubiza ngokuthi “iqembu elisha elishabashekayo lezazi zemfundiso yenkolo ezisebenzelana ngokuqondile nabafundi baseyunivesithi abafuna ukukhanyiselwa okungokomoya.”
Lababefundisi babegqoke ‘njengamaphanka’ ukuze banikeze umfanekiso oklanyelwe ukukhangisa ngezinkonzo zabo kuleyunivesithi. Omunye wabo, ongumfundisi weSonto LaseHabe obizwa ngokuthi uRoberta Clare, wachaza: “Sinqumé ukwenza umfanekiso wamaphanka ngoba sifuna ukusuka kulowombono wokuba ngcwele kunabanye, owahlulelayo abantu ngokuvamile abanawo ngathi.”
Nokho, waphawula ukuthi abafundi abaningi kakhulu kunasesikhathini esidlule banesithakazelo sokufunda ngenkolo esikoleni. Abaningi bashikashikana nemibuzo ejulile futhi babheka kubafundisi nabefundisi baseyunivesithi ukuze bathole izimpendulo. Leliphepha laxoxa nomunye umfundi owayenelukuluku lokwazi ukuthi kungani inkolo inethonya elinamandla kangaka emphakathini, kungani kunezinkolo eziningi kangaka, nokuthi kungani lezizinkolo zibonakala zibangela izingxabano eziningi kangaka emhlabeni. Wayeshikiliswa ukuthi ungubani ngempela uJesu Kristu kanye nendaba yomsuka wendawo yonke.
Ingabe lababefundisi bayalisebenzisa iBhayibheli ukuze basize abafundi bathole izimpendulo zikaNkulunkulu zemibuzo ejulile enjalo? Kubonakala sengathi akuvamile lokho. Lezizazi zemfundiso yenkolo zeNhlangano Entsha zavumelana ngokuthi ngeke ziguqule muntu, lokho ezikubheka ‘njengokweba izimvu.’
Nakuba bengase babe nezinhloso ezinhle, abefundisi abanjalo baye bachezuka kakhulu ezindleleni zokufundisa uKristu nabalandeli bakhe ababezisebenzisa. AmaKristu okuqala awazange akhathazeke ‘ngokweba izimvu,’ engazange futhi azigodle ekufundiseni iZwi likaNkulunkulu nasekusizeni abafuni beqiniso abaqotho ukuba baliqonde. (Luka 24:44, 45; IzEnzo 20:20) Ingani kudingeka ulwazi olunembile lukaJehova uNkulunkulu neNdodana yakhe, uJesu Kristu, ukuze umuntu athole ukuphila okumi phakade. (Johane 17:3) Intando kaNkulunkulu iwukuba zonke izinhlobo zabantu “zifinyelele olwazini olunembile lweqiniso” ukuze zisindiswe.—1 Thimothewu 2:3, 4.
Umsebenzi woFakazi BakaJehova uhlanganisa nokuqhuba izifundo zeBhayibheli zasekhaya zamahhala kanye nalabo abafisa ukuba imibuzo yabo engokweBhayibheli iphendulwe. OFakazi BakaJehova abasemphakathini wakini bayokujabulela ukukusiza.