IChile—Izwe Eliyingqayizivele, Umhlangano Oyingqayizivele
BAFIKA ngezinkulungwane nangamashumi ezinkulungwane eSantiago, inhloko-dolobha yaseChile. Ngisho nakulelizwe elinabantu abangaphezu kwezigidi ezine, lokhu kuthutheleka kwakusobala—zonke lezizivakashi zazifake amabheji aluhlaza okwesibhakabhaka amemezela uMhlangano WoFakazi BakaJehova ‘Wokufundisa Kwaphezulu’ ka-1993.
Ezingaphezu kuka-400 zazivela kude eJapane; ezingaphezu kuka-700 zazivela e-United States. Ezingaphezu kwenkulungwane zatheleka ngendiza nangezimoto zivela ezweni elingumakhelwane i-Argentina. Iphepha lansuku zonke i-Tercera lathi embikweni walo wangemva komhlangano: “Ubuso obumhlophe, obunsundu, ‘obuphuzi,’ nobumnyama banikeza ubufakazi bezinhlanga nezizwe ezihlukahlukene ezazimelelwe eNational Stadium. Ngaphezu kwalokho, amadoda nabesifazane baseMexico, eBrazil, ePeru, eBolivia, eVenezuela, eSpain, naseJapane babevelele ngemvunulo yasemazweni akubo.” Izihambeli zomhlangano zazivela e-Australia, eBelgium, eBrithani, eCanada, eFrance, eHolland, eJalimane, eParaguay, eSwitzerland, nakwamanye amazwe amaningi aseNingizimu Melika. Izivakashi zakwamanye amazwe ezingaphezu kuka-4 500 zatheleka eSantiago ngesonto lango-November 15, 1993. Khona-ke njengomvuthwandaba wakho konke, kwakunoFakazi baseChile abangu-30 000 abahamba amabanga amade ukuze bafinyelele eSantiago. Kungani kwakunjalo?
IChile—Izwe Eliyingqayizivele
Phela, ngokomqondo wokuma kwezwe, iChile iyizwe elikhethekile. Yini elenza lihluke futhi libe ingqayizivele? Bheka ibalazwe futhi uyobona izwe elingamakhilomitha angaphezu kuka-4 310 ubude kodwa elingamakhilomitha angaphansi kuka-440 ububanzi. Eqinisweni isilinganiso sobubanzi balo singaphezudlwana nje kwamakhilomitha angu-180. Inhloko-dolobha, iSantiago, cishe isenkabeni yalelizwe. Lezizici zibonisa ukuthi oFakazi abaningi baseChile kwadingeka bahambe amakhilomitha angamakhulu nemikhaya yabo ukuze bafinyelele emhlanganweni wezizwe—futhi ezimweni eziningi lokhu bakwenza naphezu komnotho olinganiselwe. Nokho, bafika ngezinkulungwane, ubuso babo buchichima injabulo.
IChile iyizwe elinezinto eziningi ezihlukahlukene, kusukela e-Atacama Desert eyomile esenyakatho kuya ezivinini ezivundile zasesifundeni esingaseSantiago kuqhubekele ezansi eningizimu lapho i-Andes embozwe ihlathi yehlela khona ePacific. Ekugcineni, kukhona izinguzunga zeqhwa nezihosha okuphelela esifundeni sase-Antarctica.
Izivakashi zakwamanye amazwe zahlatshwa umxhwele idolobha laseSantiago. Esinye isihambeli somhlangano sakubeka ngalendlela: “Lalibukeka njengendawo yesiyaluyalu, kodwa abantu bakhona babenomusa nobungane. Ekuphileni kwami ngangingakaze ngibone amabhasi amaningi kangaka emgwaqweni. Izinkampani zamabhasi eziningi zazincintisana ngamakhasimende. Amatekisi amancane ayehla enyuka. Isici esisodwa esibi kwakuwukungcola. Ukuze kudanjiswe, iSantiago inemithetho yokuthi izimoto zishintshane ngokungawusebenzisi umgwaqo usuku olulodwa ngesonto, kuya ngokwezinombolo zazo.” Sanezela: “Esinye isici esasithakazelisa kwakuyizingane zesikole ezazigqoke ngobunono, zonke zigqoke iyunifomu yesikole, kungekho neyodwa ehlukile. Ngokusobala lapho kwakungekho ukuncintisana nokucindezela kontanga kokugqoka izingubo zabaklami namateki okusemfashinini! Futhi akukho neyodwa eyayigqoke ngobudlabha.”
Ukwamukelwa Okufudumele Kwezivakashi Zakwamanye Amazwe
Isimiso esithi “Ukufundisa Kwaphezulu” saqala ngoLwesine, ngo-November 18. Izihambeli zomhlangano zakwamanye amazwe zabamba ongezansi lapho zifika enkundleni kanobhutshuzwayo i-Estadio Nacional. Ibanga elingamamitha angu-270 ukusuka emabhasini azo kuya enkundleni, zazidlula emgwaqweni owawugcwele oFakazi baseChile—amadoda, abesifazane, nezingane—bonke ababefuna ukwamukela nokuxhawula abazalwane ababevakashile. Abaningi base befunde ngisho nemishwana elula yesiNgisi ukuze bathi: “Niyamukelwa EChile!” Ezinsukwini ezine ezalandela, kwakhiwa ubungane obukhulu naphezu kwezithiyo zolimi. Amakhamera nemishini yokuqopha ye-video kwasetshenziswa kakhulu. Izinkulungwane zashintshana ngezinto eziyizikhumbuzo, amagama, namakheli.
Amanani Amangalisayo
Kwakulindeleke ukuba inani eliphakeme kulomhlangano libe ngu-60 000—oFakazi baseChile abangu-44 000, izivakashi ezingu-4 500, bese kuba abantu abathakazelayo. Cabanga ngokumangala okwaba khona lapho inani lababekhona ngoLwesine nangoLwesihlanu lase lingaphezulu kuka-50 000 kakade. NgoMgqibelo ekuseni isixuku sanda sisuka ku-67 865 saya ku-70 418 ntambama. NgeSonto ekuseni, lapho isimiso sihlanganisa i-drama eyayiphathelene nezinkinga oFakazi ababhekana nazo namuhla, inani lababekhona lenyukela ku-80 981! Inkundla yayigcwele phama, futhi abanye abangamakhulu babelalele ngemibhobho eyayingaphandle. Lokhu kwakungesinye sezici ezenza lomhlangano waba ingqayizivele—inani lababekhona elikhulu kunawo wonke emihlanganweni eyaqhutshwa emhlabeni wonke yochungechunge oluthi “Ukufundisa Kwaphezulu.” Kwabamangalisa oFakazi baseChile futhi kwakuwuphawu lokuthi amabandla abo angakhula futhi ande esikhathini esizayo esiseduze.
Kwasetshenziswa ibhodi lamaphuzu likagesi ukumemezela inkulumo ngayinye ngeSipanishi nangesiNgisi. Lalize libonise ngisho nalapho izilaleli zishaya ihlombe! Ekupheleni komhlangano laveza amazwi okuvalelisa ngezilimi eziningana, kuhlanganise isiDashi, isiFulentshi, isiJalimane, nesiJapane.
Ubhapathizo Lukhanga Abezindaba
Isenzakalo esiyingqopha-mlando kanjalo sasingeke singanakwa abezindaba baseChile. Nsuku zonke sahlanganiswa kahle kakhulu amaphephandaba, umsakazo, nethelevishini. Lokhu kwabanjalo ikakhulukazi ngokubhapathizwa kwabaningi okwenziwa ngoMgqibelo. Kwakubekwe amadamu amancane ayishumi nambili emaphethelweni olunye uhlangothi lwenkundla kanobhutshuzwayo. Phakathi nenkulumo yobhapathizo, abantu abangamakhulu ababezobhapathizwa basukuma ukuze babonakalise isinqumo sabo sokulandela isibonelo sikaKristu ngokukhonza uJehova uNkulunkulu. Ngemva kwenkulumo, umthandazo, nengoma, izikhonzi ezingu-24 ezazigqoke izikhindi nezikibha ezimhlophe zama ngomumo, ngazimbili edamini ngalinye. Nabasizi besifazane bafika bezosiza. Khona-ke abokuqala kwababezobhapathizwa baphuma ezindlini zokushintshela bangena enkundleni, abesilisa kolunye uhlangothi, nabesifazane kolunye. Kwabonakala kuwuhide lwemigqa iya emadamini. Konke kwakuhlelekile njengoba abathwebuli bamaphephandaba nabo bama ngomumo. Ubhapathizo lwaphothulwa phakathi nehora—kwakucwiliswe emanzini oFakazi abasha abangu-1 282, izikhonzi ezingamaKristu, zilandela isibonelo esabekwa uJesu.
Ukuvalelisana Okumbalabala
Isimo sezulu sasisihle kulo lonke lelosonto. Phela, lokhu kwabangelwa ukuthi kwakusentwasahlobo eChile, lapho kungalindeleke mvula khona. NgeSonto izinga lokushisa lenyuka laba ngaphezu kuka-20. Cishe yonke imikhaya yeza nezambulela ezinkulu nezincane ukuze izivikele elangeni elikhipha inhlanzi emanzini. Izinkulungwane zezambulela ezimibalabala zasikhumbuza ngoswebezane lwezivemvane eziqhwakele ezimbalini. Inkulumo yokuphetha yaphela cishe ngehora lesihlanu ezimpondweni. Ngemva kwengoma nomthandazo, akekho owanyakaza. Akekho owayefuna ukuba umhlangano uphele. Amaqembu aphubuka ngokuzenzekalelayo ahlabelela izingoma zoMbuso; kwakuzwakala ukushaywa kwehlombe kuyo yonke inkundla; kwavayiziswa amaduku futhi izambulela zaphakanyiswa kanye kanye. Kwakuyisenzakalo esivusa amadlingozi—ngemva kwalenkundla kune-Andes Mountains—esasigcwele amaKristu ajabulile, anothando ebonga “Ukufundisa Kwaphezulu” okwakushintshe ukuphila kwawo.
Phakathi nesimiso sangeSonto, izinyoni ezinkulu ezimbili zaseChile, ama-queltehue, noma amatitihoye aseningizimu, zazilokhu zinqamula enkundleni, zidla izinambuzane noma imbewu. Zazilokhu ziphazamisa isimiso ngokutshiyoza kwazo okuhoshozayo. Phakathi nenkulumo yokuphetha, njengokungathi zezwa ukuthi isimiso sase siphelile, zaphakama kancane, zacuthela ukundiza, zase zindiza. Akungabazeki ukuthi ziyobuya, njengoba noFakazi BakaJehova beyokujabulela ukubuyela kuleyankundla ngomunye unyaka ukuze bahlanganyele injabulo nokholo lwabo—eChile, un país singular, izwe eliyingqayizivele.
[Izithombe ekhasini 17]
Kwakukhona abangaphezu kuka-80 000 emhlanganweni waseSantiago
[Isithombe esigcwele ikhasi 18]