Kungani Kunokwehlukana?
IMBANGELA eyisisekelo yokwehlukana kwezinkolo, noma uqhekeko, ibekwe kwenye iencyclopedia yenkolo njengekathathu: engokwemfundiso, engokwenhlangano, nengokwezombangazwe. Ake sibone ukuthi lokuhlaziya kuyasifanelekela yini isimo eSontweni lamaKatolika.
Imfundiso Yenkolo Noma Iqiniso LeBhayibheli?
Ekuhlaziyeni kwakhe siqu isizathu sokwehlukana okukhona eSontweni lamaKatolika, umpristi uRené Laurentin wabhala: “Imbangela enqumayo ibonakala icacile kimi. Iyizimfundiso ezihlukahlukene.” Ukhuluma ngemfundiso eqhubekayo. Lena iphambene nesiko, okungukuthi, ukungafuni uguquko okwenziwe samuntu nguMbhishobhi Omkhulu uLefebvre. Umqondisi wesigodlo sabalandeli bakaDominic uJean-Pierre Lintanf uthi: “Lunye ukholo, izimfundiso zenkolo zihlukene.”
Izimfundiso ezihlukahlukene, ezibangela ukwehlukana esontweni, bezingagwenywa ukuba isonto belinamathela eBhayibhelini njengomthombo wezimfundiso zalo. Ngempela, uMkhandlu Wesibili waseVatican wathi: “IZwi elingcwele liyithuluzi eliyigugu esandleni esinamandla sikaNkulunkulu lokufinyelela kulobo bunye uMsindisi abunikeza bonke abantu.” Nokho, ungayinaki indinganiso ehlanganisayo yeBhayibheli, wona kanye lowoMkhandlu waseVatican wathi: “ISonto alikususeli emiBhalweni engcwele kuphela ukuqiniseka kwalo ngawo wonke amaqiniso embuliwe. Kungalesosizathu, kokubili umBhalo neSiko kumelwe kwamukelwe futhi kuhlonishwe ngemizwa efanayo yokuzinikela nenhlonipho.” Futhi: “Imfundiso yenkolo engcwele incike eZwini likaNkulunkulu elilotshiwe, elifundwa kanye neSiko elingcwele.”
Amazwi kaJesu kubaFarisi angase asetshenziswe ngokufanelekile ezikhulwini zokufundisa zeSonto lamaKatolika: “Nilenzé langasebenza izwi likaNkulunkulu ngesiko lenu.” (Mathewu 15:6, The New Jerusalem Bible) Owesifazane othile oqotho ongumKatolika wabhalela iphephabhuku lamaKatolika eFrance: “Uma abefundisi bengasashukumiseleki ukuba bashumayele iZwi Elihle, ingabe kuyamangaza ukuthi abathembekile bambalwa ngamanani, noma sifune kwenye indawo? (Kodwa oFakazi BakaJehova nababambelela emasikweni esonto, ukholo lwabo lubenza bahluke.)”
Isigungu Sabefundisi Esihlukene Phakathi
Manje cabangela imbangela engokwenhlangano yokwehlukana kwesonto. Uqhekeko olwabangelwa uMbhishobhi Omkhulu uLefebvre lwaluhlobene ngokuqondile nezimfundiso zamaKatolika ‘Zohlu Lwabaphostoli’ nesikhundla sikapapa. ULefebvre uthi ‘amandla okufundisa, ukubusa, nokungcwelisa lawo uKristu awanikeza abaPhostoli baKhe . . . aqhutshekiselwa phambili ekolishi lababhishobhi beSonto.” Ngakolunye uhlangothi, kuthiwa umbhishobhi waseRoma, upapa, “ungowokuqala kubo bonke ababhishobhi, hhayi kuphela ngesikhundla noma ngesithunzi, kodwa ngegunya lobupapa.”—New Catholic Encyclopedia.
Kodwa ingabe lezimfundiso zisekelwe eBhayibhelini? Yona kanye le-encyclopedia yamaKatolika iyavuma ukuthi “umuntu akatholi mazwi kaKristu eTestamenteni Elisha abonisa indlela isikhundla sobuphostoli esasizodluliswa ngayo.” Futhi iyavuma nokuthi “isikhundla sikapapa” asizange ‘siqondakale kahle noma sivunywe ngokucacile’ ‘eSontweni [lamaLatin] laseNtshonalanga’ kwaze kwaba ngekhulu lesihlanu leminyaka C.E.
Okwamanje isimiso sesigungu sabefundisi seSonto lamaKatolika sibekelwa inselele kusukela phezulu kuya phansi. Siyimbangela kulokhu kwehlukana, njengoba ababhishobhi, abefundisi, abapristi, nabakhokheli bezwakalisa obala ukungavumelani kwabo nopapa ezindabeni zokholo, ukuziphatha, nokubuswa kwesonto. “Isimemezelo saseCologne” sathi: “Uma upapa enza okungekhona okwesikhundla sakhe, akanakukufuna ukulalelwa egameni lobuKatolika.”
Lihlukene Ngokwezombangazwe
IEconomist yaseBrithani yabhala: “Njengoba abalandeli bakaLefebvre bekubona, isonto labo liye laba isisulu sozungu oluye lwalinikela ezandleni zabalandeli bakaMarx, labo abafuna ukwenza izinto zibe zintsha nakumaProthestani. UMonsignor Lefebvre ukholelwa ukuthi iNguquko yaseFrance yaqalisa izinto zesimanje ezikhonondisayo nokukhululeka ezweni, nokuthi iVatican II yaqalisa iNguquko yaseFrance . . . esontweni.” AmaKatolika amaningi aphikisayo analombono. Ngakolunye uhlangothi, amaKatolika okuqala afuna izinguquko ezingokwenhlalo, amanye aze ngisho amukele nesimiso sokuvukela ngezikhali. Ngaleyondlela, ezombangazwe zingesinye isici esidala ukwehlukana phakathi kwamaKatolika.
Ephetha isihloko sakhe esiphathelene nokuthi “Kungani Kunalokhu Kwehlukana Phakathi KwamaKristu?” umpristi uLaurentin wathi ukukholeka kweSonto lamaKatolika kuyoxhomeka ekulaleleni kwalo amazwi kaJesu: “Bonke bayakunibona ukuthi ningabafundi bami, ngokuthandana.”—Johane 13:35, NJB.
Esebenzisa leyondinganiso, amaKatolika amaningi aqotho emhlabeni wonke aye afinyelela esiphethweni sokuthi ukuzisholo kwesonto lamaKatolika ukuthi liwukuphela kwesonto leqiniso asikho isizathu sokuba kukholelwe. Eqaphela, njengoba futhi uJesu asho, ukuthi “akukho-ndlu ehlukene phakathi engahlala njalo,” amaningi aye “acathama” aphuma esontweni.—Mathewu 12:25, NJB.
Inani eliphawulekayo lamaKatolika manje lifuna “indlu” ebunjwa amaKristu eqiniso, ahlanganiswe uthando lwangempela lobuzalwane nangahlukanisiwe izimfundiso ezingezona ezeBhayibheli, isigungu sabefundisi esihlukene, noma imibono ephikisanayo engokombangazwe. Izinkulungwane ziye zathola ebezikufuna lapho ziqala ukuhlanganyela noFakazi BakaJehova.
[Isithombe ekhasini 9]
UJesu wabalahla abaFarisi ngokubeka amasiko abo ngaphezu kweZwi likaNkulunkulu