Caadxi dxiiña’ ni cayaca para guiaapa’ ca hermanu ne guidxilayú stinu

Laanu ca testigu sti’ Jehová runi crenu ma’ cadi candaa zuni chaahui’ Jehová ra ma’ bininá binni planeta stinu (Apocalipsis 11:18). Nga runi, laga cabézanu guedandá dxi ca, cuyúbinu modo gápanu guidxilayú stinu. Ti ejemplu de laani nga, ni cayúninu né ca lugar ni ma bicui’nu para gaca adorar Jehová.

Ca iniciativa ecológica, ni laaca runibiá’cabe casi iniciativa verde, laacani nga ni runi binni para cadi guniná ti dxiiña’ naro’ba’ guidxilayú o ra nuu stale yaga o layú. ¿Xi cayúnidu para cadi guninadu planeta stinu ya’? Ne, ¿ximodo huayacanécani laadu iquí’ñedu ca donación ca jma jneza?

Biyúbidu ximodo cadi gaca tan nandá’ ndaani’ ti Salón de Asamblea

Salón de Asamblea sti’ Matola, ni nuu Mozambique, raqué gurí’ ti galera zuxele’ guirá’ ladu, peru cumu lámina nexhe’ íqueni la? guizá’ nandá’ ndaanini. Ti hermanu de raqué guní’: «¡Cumu guizá’ nandá’ ndaanini la? guiradu ma’ názedu nisaluna! Cásipe’ guiluxe asamblea, guirá’ ca hermanu que rireeca’ para gundubi bi laaca’ ne igaandaca’». ¿Xi ñanda ñúnidu ti cadi gaca nandá’ pe’ ca hermanu que ne ganda gucaadiaga chaahuica’ ya’?

Biyúbidu xi iquí’ñedu para cadi guninadu medio ambiente: gulu’du ventilador ni riquiiñe’ stipa si sti’ bi para guni dxiiña’ ne laaca gudíxhedu aislante íqueni para cadi gutiidini calor ne cadi guninani ca ni nuu ndaani’ auditorio que, ne ca ventilador que la? gucanécani para usigaanda’ cani. Cumu stipa si sti’ bi runibi’ ca ventilador que la? qué riquiiñe’ di’ cani biaani’ ne racané bi sti’ ca ventilador que para guiree calor sti’ auditorio que. Ne cada ventilador risaca’ bia’ 50 dólar.a

Guizá’ gucané dxiiña’ ni guca ndaani’ Salón de Asamblea ri’ para guxooñe’ bi ndaanini. Ne cumu ma’ qué riaana bi nandá’ raqué la? ma’ qué nicá bé ne gupa ndaani’ local que. Ne pur ngue ma’ randa rucaadiaga chaahui’ ca hermanu que ne ma’ qué ruchiiña’ calor que laaca’. Hermanu ni bizeetenu nagasi que guni’ru’: «Ma’ qué riree guxó’ñedu ndaani’ local que ora guiluxe programa que, ma’ rianadu ndaani’ auditorio que para guizaacadu ca hermanu galaa dxi. Yanna ma’ ribidu ndaani local que casi ñaca nibidu xa’na’ baca’nda’ sti’ ti yaga nagá’».

Riquí’ñedu biaani’ sti’ gubidxa’ ni qué rirá

Lu ca edificiu ni ma’ bicui’du lu guidubi guidxilayú, nabé ma’ biquí’ñedu panel solar, para gutópadu xpiaani’ gubidxá ne gácani biaani’ para iquiiñe’ ca edificiu, ne jma galán ni purti’ qué rirá biaani’ ri’, ne zacá ma’ qué riquí’ñedu ca generador ni runi dxiiña’ né petróleo o gas. Ni huayúnidu ri’ racaneni para iquí’ñedu ca donación ca jma jneza ne para cadi guni biididu guidxilayú.

Lu iza 2023 guluucabe caadxi panel ndaani’ sucursal ni nuu Eslovenia, ne rudii ni 30% de biaani’ ni riquiiñe’ ndaani’ edificiu ca. Ne ora gudii ca panel ca jma biaani’ que bia’ ni caquiiñe’ la? rudiicabe biaani’ ri’ municipiu. Bisaca ca panel ca chonna gayuaa sesenta mil dólar. Peru cumu ma’ huaxié’ biaani’ riguixe sucursal la? lu tapa si iza, né bueltu cayaca ahorrar ca, zanda guininu zaree saca cani.

Lu iza 2024, gulu’du panel solar ne ti batería naro’ba’ ndaani’ sucursal ni nuu Sri Lanka. Bisácani bia’ chonna millón de dólar, ne rudiini bia’ 70% de biaani’ ni riquiiñe’ ndaani’ sucursal ca. Ne lu chonna si iza, ma’ guca ahorrar bia’ sácani. Ne lu iza gudi’di’ ca laaca gulu’du panel solar ndaani’ sucursal ni nuu Países Bajos. Bisácani bia’ ti millón ti gayuaa mil dólar ne rudiini bia’ 35% de biaani’ ndaani’ sucursal ca. Bia’si lu ga’ iza ma’ guca ahorrar bia’ sácani.

Laaca ma’ gulu’du panel solar ndaani’ caadxi oficina de traducción (ORT) ni nuu Méxicu, casi ORT tarahumara central, ni nuu Chihuahua. Guizá’ naga’nda’ raca lugar di’ ne tiempu calor laaca guizá’ nandá’ raca raqué. Peru, cumu caru reeda saca biaani’ la? ca hermanu ri’ qué rinaca’ iquiiñeca’ calefacción ni riquiiñe’ para guchaa binni ne laaca qué riquiiñecabe clima. Jonathan, ti hermanu ni runi dxiiña’ ra ORT ri’, guní’: «Ora naga’nda’ riquí’ñedu lari dxaa, ne ora nandá’ ruxhéledu ca ventana ca».

Lu iza 2024, gulu’du panel solar ndaani’ ORT ri’. Bisácani veintiún mil tapa gayuaa ochenta dólar, bia’si lu gaayu’ iza zaca ahorrar bia’ sácani. Yanna jma ma’ riquiiñe’ ca hermanu stinu calefacción ora nananda ne riquiiñecabe clima ora nandá’. Jonathan guní’: «Jma galán nuudu yanna ne rúnidu dxiiña’ né gana. Ne laaca galán runi sentirdu purti’ nánnadu jneza modo riquiiñe’ xquidxi Jehová ca donación ca ne riuucabe cuidadu cadi guni contaminárcabe guidxilayú stinu».

Riquí’ñedu nisa sti’ nisaguié

Ndaani’ guidxi África nuu Yoo sti’ Reinu qué gápacani nisa ni zanda iquiiñe binni. Nga runi, stale hermanu rizá zitu ma’ nuá’ nisa ni iquiiñe’ ra Yoo sti’ Reinu. Ne ndaani’ xcaadxi Yoo sti’ Reinu rizí’ ca hermanu que nisa ne risaana pipa ni. Peru caru rireeni laacabe ne runi biidini guidxilayú stinu.

Para gaca chaahui’ guendanagana ri’, lu stale Yoo sti’ Reinu ni nuu Africa, gucuá caadxi canal ruaa techu stícani ne guluucabe tanque para gutopa nisaguié. Ante gucaacabe ca canal ca, ruuya’ ca hermanu ca modo riaba nisaguié lugar ca ti zacá gánnacabe ximodo gutopalúcabe nisa jma jneza. Para chu’ tobi de laani ndaani’ ca Yoo sti’ Reinu risácani bia’ xhoopa gayuaa dólar o chonna mil dólar. Ne cumu ma’ qué riguixe ca hermanu ri’ saca nisa, ma’ qué raca stale gastu ra Yoo sti’ Reinu ca.

Beeda gácani ti ndaaya’ para ca hermanu que. Ti hermana de Mozambique lá Noemia guní’: «Dxiqué, naquiiñe’ sadu zitu para chicaadu nisa. Ne guizá’ ma’ bidxaagadu ora guedandadu ra Yoo sti Reinu. Ne, cumu huaxié’ nisa que la? nagana raca para chuʼdu nayá. Yanna, ma’ nápadu nisa para quibináʼ guiradu, ne ma’ qué ridxágadu ora chindadu ra Yoo sti’ Reinu ne ma’ randa rucaadiaga chaahuidu. ¡Xquixe pe’ laatu!».

¿Paraa riree bueltu para gaca ca dxiiña’ ri’ ya’? De ca donación ni riaba para obra mundial. Stale de laacani riuucani lu donate.jw.org. ¡Xquixe pe’ laatu purti’ rudiitu de guidubi ladxido’to!