Ca dxiiñaʼ ni gucaʼ para guca grabar: «Ca noticia galán según Jesús»

Iza riʼ guiráʼ ca testigu stiʼ Jehová gulézanu guidúʼyanu primé capítulo stiʼ serie «Ca noticia galán según Jesús». Stale binni maʼ biiyaʼ ni, peru cayaadxaruʼ guidúʼyanu sti 17 capítulo stiʼ serie riʼ. Peru ¿xi dxiiñaʼ cayaca para ganda gaca grabar ni yaʼ? Ne ¿ximodo huayacaneluʼ para gácaruʼ dxiiñaʼ riʼ yaʼ?

Cayapa chaahuidu ca hermanu ni cayacané lu dxiiñaʼ riʼ

Ndaaniʼ sucursal stiʼ Australasia ra cayaca dxiiñaʼ riʼ, racané biaʼ 50 ne 80 binni para ganda gaca grabar serie riʼ.a Ne guirácabe ricaacabe ni gócabe, nga runi dede ante raca preparar guirani. Ester, ti hermana ni runi dxiiñaʼ lu departamentu de serviciu de alimentación guníʼ: «Ruyúbidu sidu ca ni caquíʼñedu para gaca guendaró lu gadxé gadxé binni, ti sidu ni galán ne cadi guireeni tan caru, ne rúnidu biaʼ guendaró ni chiguiquiiñeʼ ti cadi guiaana sobra cani». Raca gastu biaʼ tapa dólar para gó ti binni.b

Cadi caquiiñeʼ si gó guiráʼ ca binni ni racané lu dxiiñaʼ riʼ, sínuque laaca caquiiñeʼ guiaapacabe. ¿De xidé yaʼ? Nabé nandáʼ ndaaniʼ guidxi Australia ne guizáʼ runiná xtuxu Gubidxa binni. Para qué guinaazeʼ peʼ Gubidxa laacabe rudxiibacabe lona ra cayúnicabe dxiiñaʼ ti cadi gaca nandáʼpecabe ne chuʼ ra guiziiláʼdxicabe, ne laaca ruyúbicabe chuʼ crema para cadi guzaaquiʼ Gubidxa laacabe, sombrilla ne chuʼ nisa para gueʼ guirácabe. Kevin ni runi dxiiñaʼ lu Serviciu de Audio y Video guníʼ: «Ca ni racané laadu gaca guiráʼ dxiiñaʼ riʼ, nácacabe voluntariu externu stiʼ Betel. Humilde laacabe ne rúnicabe dxiiñaʼ né stale gana. Ne qué ñanda ñaca guiráʼ ndiʼ pa qué ñacanécabe laadu».

Laaca runi grabardu gadxé lugar

Caadxi de ca escena ni rihuinni luni qué nihuínnicani galán pa ñaca grabárcani ndaaniʼ si sucursal, nga runi riuudu sti lugar para gaca grabárcani. Tiempu gucuá Biblia, gastiʼ biaaniʼ nin carretera, ni yoo casi nuu yanna, nga runi ruyúbicabe ca lugar zitu ra gastiʼ ca ndiʼ para guni grabárcabe. Ndiʼ riníʼ caquiiñeʼ guiaapaʼ lari, equipu ne guiráʼ ni chiguiquiiñecabe ti ganda chinécabe cani sti lugar. Ante guzulú guni grabárcabe, ca coordinador de producción auxiliar naquiiñeʼ gúʼyacaʼ cadi guiaadxaʼ biaaniʼ, nisa ne bañu. Ne riaanacabe ra lidxi ca hermanu ni nabeza gaxha de raqué o ndaaniʼ remolque, hotel o ranchuhuiiniʼ.

Nabé caru rireeni laacabe guni grabárcabe xcaadxi lugar, rineni stale tiempu ne rusidxágani guiráʼ ca ni cayuni dxiiñaʼ riʼ. Nga runi lu iza 2023, biʼniʼ aprobar Grupu ni Zániru guixuíʼ pantalla naroʼbaʼ ra rihuinni ca videu ni risaca chupa millón arondaʼ de dólar. Nápani biaaniʼ ne raca adaptar biaaniʼ stini né ni cahuinni lu ca videu ca, ne dede ruluíʼ nuucabe lugar ni cahuinni lu pantalla ca. Ne zacá maʼ qué runítidu stale bueltu pa ñuni grabardu sti lugar. Sicaríʼ bisiene Darren, ni nuu lu Comité de Sucursal stiʼ Australasia: «Modo raca ca grabación riʼ racané ni para ganda guni repetírcabe xiixa escena ne zacá maʼ qué ridxaga peʼ ca actor ca. Casi pa ñuni grabardu ora ziyaaziʼ Gubidxa, chupa chonna si minutu ñápadu para ñúnidu ni. Peru né ca pantalla riʼ zanda gúninu chupa chonna grabación dede ra guireeni galán».

«Qué ñaca nagana para naa»

Para ganda gaca grabar cada capítulo stiʼ serie «Ca noticia galán», caquiiñeʼ gayuaa actor ne xcaadxi hermanu ni runi dxiiñaʼ luni. ¿Ximodo runi sentírcabe né guiráʼ ni runi ca hermanu ca para gapaʼ laacabe yaʼ?

Ti hermana de Melbourne láʼ Amber, biʼniʼ viajarbe jma de gadxe gayuaa kilómetru para ganda gúnibe dxiiñaʼ lu proyectu riʼ. Laabe bicaabe: «Gupa ca hermanu de Betel naa dede ora yendayaʼ ra aeropuerto. Guirácabe biʼniʼ invitárcabe naa chitahuaniáʼ laacabe, gúcacabe nachaʼhuiʼ né naa ne bineʼ sentir galán. Qué ñaca nagana para naa guneʼ viajar, purtiʼ gucuaaʼ stale ndaayaʼ».

Ti hermanu láʼ Derek, de equipu de producción, guníʼ: «Dede dxi bizuludu, huayacané stale departamentu laadu. Ne rudieeʼ xquixe peʼ guiráʼ hermanu ne hermana purtiʼ guleecaʼ tiempu ne bíʼnicaʼ stale stipa para gunda guca proyectu riʼ. Guizáʼ nacháʼhuicabe ne nuucabe listu para gacanécabe. Rihuinni dxíchica riguu Jehová ndaayaʼ laacabe ne zaqueca laadu ne qué ruuyaʼ si Jehová ximodo riluxe dxiiñaʼ riʼ, sínuque ximodo cayácani».

Pur ca donación ni bidiitu, gunda guca serie «Ca noticia galán» dede né ca ni rudiitu lu donate.jw.org. Xquixe peʼ laatu hermanu caʼ pur ca donación stitu.