Bicha’du modo runi imprimirdu para gacanedu «guirá’ xixé binni» guiziidi’ ni dxandí’

Racala’dxi’ Jehová guiziidi’ chaahui’ «guirá’ xixé binni» ni dxandí’ (1 Timoteo 2:3, 4). Guirá’ ca Testigu rinidu gadxé gadxé idioma ne laaca zaqueca ca binni ni runi predicardu. Nga runi, guirá’ iza runi imprimirdu bia’ chupa mil millón de publicación lu stale idioma. ¿Xi huayúnidu para guni imprimirdu ca publicación ri’ lu stale idioma ne cadi gunítidu stale bueltu ya’?

Guzidu equipu jma galán ne bixié ca lugar ra runi imprimirdu

Raca bia’ 40 iza bi’ni’ imprimirdu ca revista stidu ndaani’ jma de 40 guidxi. Yanna ma’ rúnidu ni ndaani’ ga’ si guidxi, purti’ ra gudi’di’ iza bicha’du modo runi imprimirdu. Ne lu ca iza ca jma stale publicación cayuni imprimirdu purti’ jma cadale ca idioma ca. ¿Xi huayacané laadu guni imprimirdu guirá’ ca publicación ri’ neca huaxié’ imprenta nápadu ya’? Guzidu equipu jma galán.

Ca equipu nacubi ri’ racané cani laadu guni imprimirdu ca publicación ca jma nagueenda. Dxiqué runítidu tiempu ma’ cucha’du modo nexhe’ ti máquina para guni imprimirni lu sti idioma. Yanna jma nagueenda rúnidu ca dxiiña’ stidu purti’ jma galán ca equipu ni nápadu. Casi ca publicación ni riree lu ca idioma ni huaxié’ riní’ binni, jma nagueenda rúnidu cani. Peru para gúnidu ca dxiiña’ ri’ riquí’ñedu caadxi hoja naro’ba’ de guiiba’ ni rábicabe plancha de impresión. Lu ti iza si biquí’ñedu bia’ chupa millón de dolár para guzidu ca plancha ri’.a Nga runi, ora runi imprimirdu huaxié’ publicación la? ma’ riquí’ñedu ca máquina ni riquiiñe’ computadora. Ca equipu ri’ qué riquí’ñecani plancha de impresión ne huaxié’ bueltu runítidu lúcani.

Lu chonna iza ni gudi’di’ ca, biquí’ñedu jma de chii millón de dolár para bi’ni’ chaahuidu ca equipu ni runi imprimir ne ni ruzá’ libru lu guidubi Guidxilayú. ¿Ximodo runi ca equipu ri’ dxiiña’ para gaca jma Biblia ya’? Dxiqué para gúnicabe ti Biblia naquiiñe’ chinándacabe 40 pasu, casi iguiidini, igá ni, gata chaahui’ ni ne gaca decorar ni. Peru para gúnicabe cada pasu que naquiiñe’ guácabe ca libru que ne quixhe chaahuicabe ni sti lugar. Yanna ma’ chii si pasu rinándacabe purti’ stale de ca dxiiña’ que ma’ ca equipu nacubi ca rúnicani. Nga runi bixié ca dxiiña’ ni runi ca hermanu que. Casi ndaani’ sucursal sti’ Japón dxiqué rúnicabe chupa mil biblia cada xhono hora. Yanna né ca equipu nacubi ca ma’ rúnicabe treinta y cinco mil de laacani cada xhono hora.

Ra qué nutáledu stale publicación bi’ni’ ahorrardu jma

Guirá’ cambiu ni cayaca ri’ huayacanécani laadu iquí’ñedu ca donación ca jma jneza. Cumu ma’ bixié’ ca dxiiña’ ni rúnidu para gaca ca libru ca la? jma nagueenda runi imprimirdu ca publicación nahuiini’, ne ma’ qué rutáledu stale publicación ndaani’ ca imprenta ca. Gary, ti hermanu ni cayuni dxiiña’ ndaani’ sucursal sti’ Estados Unidos, guní’: «Laadu guní’ íquedu jma galán nga guni imprimirdu stale publicación tobi si tiru. Peru ora gúdxicabe laadu naquiiñe’ guni imprimirdu bia’ publicación guinábacabe laadu, huaxié’ guyuulá’dxidu ni. Lu primé iza que, binítidu sesenta mil dolár lu ca plancha de impresión ne ca gui’chi’ ni bi’ni’ sobra lu ca publicación que. Peru laaca lu iza que bi’ni’ ahorrardu ti millón aronda’ de dolár purti’ ma’ qué nutáledu gui’chi’ ne libru ndaani’ ca imprenta que». Ne zanda iquí’ñedu bueltu ca lu xcaadxi cosa risaca, casi cuí jma yoo sti’ Reinu ne gacanedu ca hermanu ni bininá xiixa desastre natural.

Cumu jma huaxié’ lugar riquí’ñedu para guni imprirmidu la? ma’ rapa ca sucursal ca lugar para iquí’ñeca’ lu xcaadxi dxiiña’ ni raca Betel. Ne cumu ma’ ndaani’ huaxié’ guidxi runi imprimirdu la? ma’ cadi caquiiñe’ cuí jma lugar para laani. Dxiqué biquí’ñedu sucursal sti’ Gran Bretaña para guni imprimirdu ca publicación stidu, peru dede lu iza 2018 gudixhe íquedu guni imprimirdu ndaani’ xcaadxi sucursal, casi Europa central. Ne zacá bi’ni’ ahorrardu stale millón de dolár ora gurí sucursal nacubi sti’ Chelmsford (Inglaterra).

«¡Que nusiaandalu’ naa!»

Ni jma risaca de guirá’ cambiu ni cayaca ri’ nga cayacanedu jma binni guidxíñaca’ Jehová. Yanna ma’ randa runi imprimirdu jma publicación lu xcaadxi idioma dede né ca publicación ni huaxié’ rinábacabe laadu. Casi ndaani’ guidxi Nueva Caledonia, las Islas Wallis ne Futuna bia’ treinta y cinco mil si binni riní’ diidxa’ wallisiano. Peru lu agosto de iza 2024 ma’ gúpacabe guidubi Traducción del Nuevo Mundo lu stiidxacabe. Ti publicadora ni lá’ Selafina, guní’: «Ora ruunda’ Biblia lu diidxa’ francés, nuu diidxa’ qué riene’ luni. Nga runi, ora biinda’ Biblia lu diidxa’ wallisiano guizá’ bieche’ dede biina’. Ne oraqueca bine’ orar Jehová ne gudxe’ laa: “¡Ay, Jehová! ¡Xquixe pe’ lii purti’ qué nusiaandalu’ naa! Rihuinni ca nadxiilu’ guirá’ binni”».

Ndaani’ República Democrática del Congo, menu de gaayu’ gayuaa mil binni riní’ diidxa’ sanga. Peru ma’ nápacabe libru cZanda guibánilu’ nayeche’! lu stiidxacabe. Josué, ti hermanu ni nuu ndaani’ ti congregación ni riní’ diidxa’ sanga, guní’: «Cumu gadxé diidxa’ gúpadu libru ca dxiqué la? guca nagana para laadu gusiénedu o gábidu ca estudiante stidu xi riní’ xiixa diidxa’ zeeda luni. Ne neca rusiénedu ni laacabe peru qué randa riénecabe ni ná ni. Yanna ma’ nápadu libru ca lu diidxa’ sanga ne ma’ qué runítidu tiempu gusiénedu laacabe ni zeeda luni purti’ jma nagueenda riénecabe ni».

Ca dxi ri’, jma stale binni cayuunda’ ca publicación stinu purti’ cayaca imprimir cani lu stale idioma. Xquixe pe’ laatu hermanu ca’ pur ca donación ni rudiitu de guidubi ladxido’to ne ni rúnitu lu donate.jw.org. Pur ca donación stitu cayanda cayúnidu ca dxiiña’ ri’.