Gucané binni guiziidiʼ guʼndaʼ ne gucaa
1. Panda binni maʼ biziidiʼ guʼndaʼ ne gucaa.
1 Dede iza 1946 cayacanenu binni ni nuu guidubi Méjicu guiziidiʼ guʼndaʼ ne gucaa, ne cani maʼ nanna caadxi de laani la? laaca racanenu laacaʼ gúnicaʼ ni jma jneza. Dede iza que hasta ca dxi stinu maʼ bisíʼdinu 150,794 binni. Lu ca iza si ni gudiʼdiʼ de 1994 hasta 2007 biziidiʼ 23,028 binni.
2. Tu guiráʼ binni cayacanenu guiziidiʼ guʼndaʼ ne gucaa.
2 Lu ca últimu iza riʼ jma cayúninu stipa para gusíʼdinu binni ni riníʼ sti diidxaʼ. Nga runi, lu iza gudiʼdiʼ ca bisíʼdinu hombre ne gunaa ni riníʼ maya, náhuatl, purépecha, tojolabal, tseltal, diidxazá istmo ne diidxastiá. Ne para ganda gacanenu jma binni la? maʼ guca folletu Biʼniʼ stipa gúʼndaluʼ ne gucaaluʼ lu gadxe de ca diidxaʼ ni riníʼcabe Méjicu.
3. Pabiáʼ zandaa ca clase ra guiziidiʼ binni guʼndaʼ ne gucaa.
3 Ca clase ca zácacani xhoopaʼ beeu ne zuzulú ni lu beeu enero stiʼ cada iza, biaʼsi maʼ bilúxecani ora gaca Scuela stiʼ ca Precursor o ca guendaridagulisaa de chonna gubidxa. Peru pa chuʼ xiixa ni qué gudii lugar gácani lu beeu ca la? zanda guzulúcabe lu febrero o marzo.
4. Xiñee galán nga guiziidiʼ binni guʼndaʼ ne gucaa, ne xi zuni ca binnigola ca.
4 Cani guicá lá lu clase riʼ la? naquiiñeʼ gucaa íquecaʼ guiziidicaʼ gúʼndacaʼ ne gucaacaʼ biaʼ tiempu guindaa ni. Zacá zahuinni cadi pur gana si nga guiráʼ tiempu ni biquiiñeʼ cani bisiidiʼ laacabe. Galán pa guiráʼ cani nuu ndaaniʼ xquidxi Jiobá ñánnacaʼ ñuundacaʼ ne nucaacaʼ purtiʼ zacá zanda gusiidicaʼ ca diidxaʼ nacubi ne galán stiʼ Reinu. Nga runi, ca binnigola ca zuzeetecabe de scuela riʼ nezalú ca binni ridagulisaa para cheʼ ca binni huaniisi ni qué ganna guʼndaʼ ne gucaa, ne para cheʼ cani caquiiñeʼ guiziidiʼ chaahuiʼ ti guiénecabe jma lu ca guendaridagulisaa ca.
5. Ximodo naquiiñeʼ gaca scuela ca.
5 Galán gaca scuela riʼ pur grupuhuiiniʼ, ne ni gusiidiʼ laacabe ca naquiiñeʼ guʼyaʼ pabiáʼ ziziidiʼ cada tobi de laacabe. Pa gastiʼ nin ti hombre para guni dxiiñaʼ riʼ la? zanda gábicabe ti gunaa ni zanda gusiidiʼ ne ni nabani modo na Biblia para gúnini. Riquiiñeʼ guihuinni maʼ biziidiʼ grupuhuiiniʼ ca ni jma naquiiñeʼ ganna ora guizaa xhoopaʼ beeu ca, ti despué maʼ laasicaʼ guiziidiʼ chaahuicaʼ. Ora ti binni si guicá lá lu scuela ca la? ni chigusiidiʼ ca zanda cheʼ ralídxibe. Guiráʼ iza zuuyaʼ ca binnigola ca panda tu caquiiñeʼ guiziidiʼ lade ca binni ridagulisaa ne zaguíxhecaʼ gaca scuela ca modo ganda gacaneni laacabe (biiyaʼ Benefíciese de la Escuela del Ministerio Teocrático, yaza 285).
6. Xi chiguni ca binnigola ni riganna ca binni ridagulisaa ca, ne xi guiʼchiʼ nga naquiiñeʼ guidxá.
6 Ca binnigola ni riganna ca binni ridagulisaa zuuyacaʼ gaca cani bizéʼtenu ca ne pa jneza caziidiʼ ca binni ca. Laaca zuchácabe guiʼchiʼ ni láʼ Informe sobre las clases de lectura y escritura ora chigánnacabe ca neza binni ridagulisaa ni napa scuela ca, ne pa cadi cayúnicabe ni neca nuu tu caquiiñeʼ guiziidiʼ la? laaca zucaacabe lu guiʼchiʼ ca xiñee cadi cayácani. Ne guiráʼ iza zuseendaʼ ca binni ridagulisaa guiʼchiʼ ni láʼ Informe sobre las clases de alfabetización.
7. Xi zabeendú binni ni guiziidiʼ guʼndaʼ ne gucaa.
7 Caquiiñeruʼ gaca scuela riʼ ndaaniʼ stale neza binni ridagulisaa. Ora nanna binni guʼndaʼ ne gucaa la? racaneni laa guibani jma galán ne guicaa stale ndaayaʼ (2 Tim. 2:15). Zacá qué ziuu dxi gusaana binni de guiziidiʼ, zanda gacané sti binni, ne ziuu nayecheʼ ora guni zacá (Hech. 20:35).