Iquiiñenu guiʼchiʼ ra cayaca invitar binni guʼndaʼ Biblia
1 Nuu ti guiʼchiʼ de chupa yaza ni zanda iquiiñenu para gacanenu binni chuʼ ndaaniʼ xquidxi Dios. Peru Méjicu huaxiéʼ caquiiñenu ni. Nga runi, naquiiñe chinenu guiʼchiʼ ca guiráʼ biaje chigucheechenu diidxaʼ. Stale de cani rucheeche diidxaʼ maʼ bidiicaʼ cuenta randa ruzulú riníʼnecaʼ binni ora gudiicaʼ laacabe ti tratadu o guiʼchiʼ ni bizéʼtenu ca. Pa tuuxa qué naʼ guxheleʼ para guinínenu laa la? zándaca guchaa ora guluinu laa ti guiʼchiʼ ca. Ne cumu luni cá pora raca ca guendaridagulisaa stinu la? zacaneni laanu gusiénenu laacabe xi pur rucheechenu diidxaʼ.
2 Lu guiʼchiʼ riʼ cá padxí ne pora raca ca guendaridagulisaa stinu ne laaca cayuni invitarni binni gapa libru Xipeʼ ndiʼ cusiidiʼ Biblia para guidúʼndanenu laacabe. Cadi galán diʼ nga guiníʼ íquenu qué risácapeʼ gusaananenu ni binni. Guzéʼtenu ti ejemplu: «Ti biaje bidxela ti hombrehuiiniʼ napa 11 iza ti guiʼchiʼ ra cayaca invitar binni chigucaadiaga ti libana ni caníʼ de infiernu. Despué guniʼbe: “Nabé guyuuladxeʼ tema que, purtiʼ ruluíʼ cadi jneza ngue guiráʼ ni runeʼ, ngue runi bidxibeʼ chaa ndaaniʼ infiernu ra cayaʼquiʼ que ora gateʼ”. Yegucaadiágabe libana que, ne gudiʼdiʼ si ti iza de cayuundanécabe laabe de Biblia la? guyuunísabe. Zacá bizulú Karl Klein biʼniʼ ni na Jiobá, ne despué beeda gácabe tobi ni guyuu lu Grupu ni Zaniruʼ stiʼ ca Testigu stiʼ Jiobá stale iza. Guca guiráʼ ndiʼ pur ti guiʼchiʼ ni bidxélabe».
3 Ca binnigola ca zanda guinábacaʼ biaʼ iquiiñecaʼ ne gábicaʼ cani rucheeche diidxaʼ chinecaʼ ni guiráʼ ladu checaʼ. Lu guiʼchiʼ ca zanda gucaʼnu padxí ne pora raca ca guendaridagulisaa stinu. Galanpeʼ ca guiʼchiʼ riʼ para gucheechenu diidxaʼ ca dxi riʼ. Stale de cani rucheeche diidxaʼ racaneni laacaʼ para guzulú guiníʼnecaʼ binni. Cani nahuiiniruʼ ca xiiñiʼ la? zanda gudiicaʼ ni laacabe para quíʼzicabe ni, zacá zuzulú zaziidicabe gucheechecabe diidxaʼ. Cani rucheeche diidxaʼ pur carta zanda uguucaʼ tobi de laani ndaaniʼ sobre ni guseendacaʼ. Ne galán gudiʼnu tobi binni ni cayúʼndanenu de Biblia ne xcaadxi binni para guni invitarnu laacaʼ checaʼ ca guendaridagulisaa ca.
4 Ti invitación ni guca raca gayuaa iza, yanna riʼ laaca cayaca ni lu 235 guidxi, ndiʼ nga lani: «Latáʼ ne quíbanu lu dani stiʼ Jiobá, [...] ne laabe zusiidibe laanu de neza stibe, ne dxandipeʼ zazanu luni» (Isa. 2:3). Pa guyúbinu modo chuʼ binni ndaaniʼ xquidxi Jiobá la? zanda gacanenu laacabe para guiniisicabe lu Stiidxaʼ Dios ti gápacabe guendanabani ni qué zaluxe.